طرائف من الشعر - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

02-12-2025, 05:08 PM

طرائف من الشعر

كانت تنشر مقاطع من قصايد عبدالله بن عبار وتنشر معها صور قديمة أيام الشباب وشاهد الشاعر سلطان الأدغم السبيعي الصور القديمة والصور الحديثة ولاحظ الفرق بين الصور القديمة والصور الحديثة وقال البيتين دعابة

تـبي الشباب وفاختـك يا أبـن عـبـار *** تغشنـا في صـورتـك وانـت شايـب
حـنـا من عـيـالـك قـد عـيالنـا كـبـار *** يالـلـه بحسن الخاتمه ما انـت تايب

ورد عبدالله بن دهيمش بن عبار على سلطان الأدغم :

الصـوره الـلـي شفـتهـا بـس تـذكـار *** ما القصد يالأدغـم اغـش الحبايـب
حتى انت كانك من طويلين الأعـمار *** لابـد مـا تـشيّب عـلى غيـر طـايـب
مـانـي مـخـادع يـالـسنـافـي ومـكـار *** والشايب أن ماتاب هـذي مصايـب
ما سرت في منهـج ملاحـد وفـجّـار *** أخـشى مـن المـولى مـديـر الهبايب
وكـان الكبـر يا نسل الأجـواد معيـار *** كـل البشـر حـطيـت فـيهـم معـايـب
جـميع شيّـاب العـرب كانـوا صـغـار *** وآخـر مصير العبـد تحـت النصايب
لـو تـنشـد مـبـارك يفـيـدك بالأخبـار *** عن سيرتي يخبرك في علم صايب
من فضل ربـي لـي حشيمه ومـقـدار *** عـنـد الـرجال الـلي تـفـك النشايب

وقال شاعر :

هـذا القصيد الـلي عـلى الذوق يندار *** مـثـل المـهـار العـاديـات النجـايـب
استغفـر الـلـه ماهـو بعـزف الأوتـار *** الا ولا شـابـه مـن الحـيـف شـايـب

وقال شاعر آخر :

أنا احسب أن صدره شمالي لكن فار *** دمـه وأنـا اقبـل منـه ما كان جايب
شايب وشاعـر لـه مكـانـه ولـه كـار *** جعـلـه يكـون بخـيـر والبـال طايـب

وقال شاعر آخر :

الشايـب البيطـار فـي نـظـم الأشعـار *** يـبغـي يعـرضني لصفـق الهـبايـب
وأنـا مـا اثـورها عـلى غـيـر معـيـار *** ومن تهمة الموضوع ماني بهايب

وقال عبدالله بن عبار يجاري الشعراء بهذه الأبيات :

لا تـشـوهـونـي عـنـد ربـّات الأخـدار *** ما يقبلـن الشيـب شـقـر الـذوايـب
ما عـاد لـي لازم بتـعسيف الأمـهـار *** اليـوم عنهن يا فـتى الجود غايـب
بـس اتـركـوني لا تبـيحـون الأسـرار *** لـو شبت مـاني يالأجـاويـد خـايـب
أخـذت بالـدنـيـا مـن الوقـت مشـوار *** ولا لـي عـلـى ذريــة آدم طــلايــب
أبـي اتـفـرّغ للـمـمـاشـي والأسـفـار *** وأدوج واصعد فوق روس الجذايب
أجـمع نسب عنّاز في خمس الأقطار *** واليـوم شبـت ومشعـل النجل نايب
بـني وهـب وجـلاس وعـيـال عـمـار *** وعبيد الـلي هـم عزوتي والقرايب

وهذه مقاطع لشعراء يصفون حالة النسيان وانشغال الفكر جاء بالمثل
( تدوّر ولدها وهو على متنها )

قال الشاعر نايف العون :

ياأهل العقول الراجحه ويش الأسباب *** انـتـم يـجـيـكـم شـيء نـوبٍ يـجـينـي
انـزل مـن الـمـوتـر ولا اسكّـر البـاب *** وأدوّر الـحـاجـه وهــي فـي يــديـنـي

وقال عبدالله حمود السبيعي :

نـايـف بـدأ بـالقـول فـي راس مـرقـاب *** واظهـر خفايا الـلي طـوتـه السنيـني
قـامـت مخاليـب الـزمـن تنهش ارقـاب *** وقـام الفـكـر ينسى عـلى كـل حـيني

وقال شاعر يدعى سدّاح :

يـا نايـف أبشرك فـي كـثـر الأصحـاب *** مـاهـي بـكـلـمـة راس بـينـك وبـيـني
نظـارتي مـن يـوم مـا عـارضي شـاب *** أحـيـان أدورهـا وهـي فـوق عـيـنـي

وقال الشاعر بندر الشّلاحي :

شـابـت عـوارضـنـا وأنـا تـوني شـاب *** والمشكـلـه مـاهـيـب فالشّيـب فـيـني
اراجــع الــدكــتــور ويــقــول كــــذّاب *** وأدوّر السبـحـه وهـي فـي يـمـيـنـي

وقال الشاعر أبو علي الرويلي :

يا صاحبي شرحك سرى قبـل الأسناب *** ومـن بعدهن كل يوم وضعي يشيني
مـن سـورة التـكـويـر أرجـع للأحـزاب *** والـمـغـرب اصـلـيـه فـي ركـعـتـيـني

ويقول الشاعر أنور الرويلي :

لا تـشكـي الأحـوال يـا عـز الأصحـاب *** وشـلـون لـو تـدرون بـالـلي يجـيـني
احـيـان يا مشكاي اوقـف عـلى البـاب *** مـا أدري مـع الـداخـل أو الطالعـيني

قال عبدالله بن عبار :

هـيـهـات بالنسيـان مـا تفـيـد الأطبـاب *** كـان انشغـل عـقـل اللبيـب الفـطيـني
حـتـى الـذي مـاهـم كـهـولـه وشـيّـاب *** تـسمـع بمجـلسهـم نـسيـت ونـسيـني
من راجع المختص في مـخ وأعصاب *** يــقــول لاجـاك الـزهـيـمـر تـجـيـنـي