تابع
مقاطع من شعر المؤلف في بعض مفاخر الفدعان
قال عبدالله بن دهيمش بن عبار هذه القصيدة في مدح قبيلة الفدعان :
بـديـت اوصّف عزوتي بالوصايـف *** واعتز وأفخـر في رجال الفـداعين
هـم حـربة الويلان ستـر العـفـايـف *** مـاهـم عـلى كـل القبـايـل خـفـييـن
تشهـد لهـم بالطيـب كـل الطوايـف *** مبطي عـلى فعـل المراجل مضرين
يـوم الغـزاه ويـوم عصر النكايـف *** يرعون في حـد الحسام أبو حـدين
فـوق النجايـب موميـات السفايـف *** فـي كـل يـوم لـدارالأضـداد غـازين
قـبـل المـرازق تنحصر بالوظايـف *** داجوا بـدارالكرد وارض السلاطين
اهـل العـلوم المسملات الطـرايـف *** مضرب مثل بالطيب والناس دارين
تاريخهـم مـا ينحصي بالصحـايـف *** مبطي عـلى عـلوم النفـايـل معيين
أولهـن الـلـي بالسنين الـعـجـايـف *** الصوت لأبن مهيد يوم الزمن شين
والثـانـيـة يـوم العـطـايـا عـذايـف *** جـزل العـطيـه سنهـا خـلـفـة غبيـن
والثـالثـة عـن عايـزات الحسايف *** صغيـرهـم شـرب المغـر بالـدياويـن
والـرابـعـة بـوج الـديـار المهايـف *** فـي كـل ديـرة يدلجـون المضاعيـن
والخامسة يزبـن لهـم كـل خـايـف *** حـمـر النـواظـر يدحـرون المعادين
والسادسة يثـنـون دون العطايـف *** الـروم مكـديـن الـعــدا بـالـمـيـاديـن
من بشر ابـن عـنـاز ماهـم لفايـف *** مـن نسل وايـل بالمناسب عـريبين
هـذا الوكـاد ولا نـبـي مجـد زايـف *** ما قـلـت تمجيـدي هـقاوي وتخمين
والمدح مايزها العـفـون الهـدايـف *** يستاهـل التمجيد من يفعـل الـزيـن
وقال عبدالله بن دهيمش بن عبار هذه القصيدة يذكر بها قبائل الفدعان :
ياحمود مانصبرعـلى الجور ياحمود *** ومن لا جزع يا حمود ماعـد رجّال
من لا شرب ياحمود من عد مورود *** شربه من الصاري غثاريب وحثال
ومن يشمت الأجواد يا حمود مقرود *** أعرف تراه من الغوى تايهٍ وضال
ولا تستـعـز القـوم وقـلـوبـهـم سـود *** افهـم هـدف معناي يا طيّـب الـفـال
ويـاعـل قـصـر مـا يـذريـك مـهــدود *** يهـدم كـما قـال السديـري بالأمثـال
يا حمود ما ربعي هـل الناي والعـود *** ربعي حمود الخيل ذربين الأفـعـال
فدعـان نالـوا مـدح والـقـول مسنود *** عاداتهم يصخون بالـروح والـمـال
فـدعـان فخـر ولاعن اللاّش منشود *** أفـخـر بـهـم والـحـق لابــد يـنـقــال
فـدعان منسوبين مـن أعـرق جدود *** والكـل مـنهـم زاكـي الـجـد والخـال
فدعـان باللاّزم لي زنـود واعـضـود *** حمـر النواظر تنطح الجمع لا صال
فـدعـان حـربه والفعايل لهـا شهـود *** تـاريـخـهـم مـن دور وايـل ولا زال
فدعان ماضي مجدهـم سجّـل خلـود *** يشهـد لهـم تاريخهـم عـبـر الأجيال
فدعان من فضل الولي صافق النود *** الشـاهـد الـلـه مـا بـهـم قـول قـوّال
فدعان ربـعـي مابهـم هـرج منـقـود *** صافيـن مـا منهـم هـلابـيـج وأنـذال
فدعـان يـوم القـوم حـاوي ومـردود *** والخيل تلكد والنضى تهـذل أهـذال
فـدعـان كـانـهـم أرتـدوا درع دايـود *** أرداهـم الـلـي لغـالـي الـروح بـذال
فدعان ما تصبر على الغبن والـزود *** لا حـل يــوًم يـودع الـراس يـنـثـال
فـدعان وأن صالوا طوابير وحشود *** صابورهم يـزمي مثـل نايف الجـال
فدعـان لا ركبـوا عـلى ضمّـر القـود *** عـقّـالهـم صـاروا بالأكوان جـهّـال
فـدعان يوم الغوش طارد ومطـرود *** يـامـا رمـوا بمطـارد الخـيـل خـيّـال
فـدعـان يـزبـن نـزلهم كـل مضهـود *** عـز الصـديـق وللمعـاديـن غـربـال
فـدعـان يـذكـر طيبـهـم مـالـه حـدود *** يشهد لهم شيخ الشيوخ أبن هـذّال
فـدعـان ربـعي كنهـم شامخ الـطـود *** رجـالـهـم عــنـده حـمــيـه وزعــّال
فـدعـان نـعـم بـلابـتي صفـوة فهـود *** مبـطي فعـايلهم عـظيمات واجـزال
فـدعـان عـــوقٍ لـلـمـعــادي ولادود *** يـوم الـمـلاقـى وأحـمـر الـدم شلال
ولو أبـي أفندهم عـلى جموع وفنود *** وأذكـر فعـايلهـم جـديـدات وأسـمـال
منا المهيد أهل الصّخى ماكر الجـود *** وعزوة غبين افعالهم مابهـا جـدال
وعـيـال عـلـي لا قـبس مـلـح بـارود *** كان انتخوا بمهيد يرمون من عال
وضنا عربان وضنا مزرع وملحـود *** ومكـاثـره ضـد المعـادي بـالأهـوال
ومـنـا السيافا عيال منصب ومسعود *** والـروس بالهيـه صناديد وأبطـال
ومنـا الجـدعـه فعلهم صـدق ماكـود *** والشميلات أهـل الفضايل والأنفـال
والهضبي الشجعـان حـمّـايـة الـذود *** والميس الـلي باللّقاء مثـل الأشبال
وغضيـور وقـلفـان نـطـاحـت الكـود *** والحـنـاتـيـش اليـا بطـل كـل عـذال
ومـويـعـز وصيـّاح كـسّـابـت الـفـود *** وضـحـوه وعــواد حــمّـايـة الــذال
وعيال حـازم عـزوة الشايب الـعـود *** عاداتهم يثـنـون كـان الحمـر سـال
واليوم حاضرعصرنا سهود ومهود *** عـم الأمن والسّلم في حكم الأنجال
عشنـا بضـل ملـوكـنا صفـوة سعـود *** والحمـد لـلـه حالنـا باحسن الحـال
الشـر بـابـه صـار مـغـلـق ومسـدود *** سكّـر عـلى كـل المشاكـل بالأقـفـال
وقال عبدالله بن دهيمش بن عبار هذا المقطع في مآثر قبيلة الفدعان :
مـن لابـة الفـدعان والساس جـذاب *** الـعـرق يـجـذب والفـعـايـل تـشـابـه
يوم الفخر والمجد بسيوف وأحراب *** ارواحـهـم بـالـكـون مـثـل الجـلابـه
اودي أشرح ماضي المجد بسهاب *** شـرح الـعـلـوم المسمـلـه مـالنـابـه
أبي أختصر ميزاتهـم بيـن الأعـراب *** والهـرج دون أفعـال مـافـيـه ثـابـه
حازوا على خمس الفضايل والألقاب *** فـازوا بـهـا يـوم المراجل اكسابـه
حـربـة ضـنـا عـنـاز زاكيـن الأنساب *** منهـم ديـار أيـوب صارت خـرابـه
وحمـر النواظـر يـوم غالـب وغـلاّب *** قـصيـرهـم مـا يـوم قـشّع اطـنـابـه
والدار باجـوهـا عـلى خيـل وأركـاب *** قطعـانهـم تـرعى خمـايـل أعشابـه
والصوت نادوبه عـلى راس مرقاب *** مـن جـاع يـقـلـط للقـرى مـرحبابـه
ثـم الـعـطيـه مـا تـرجـع ولا أيـجـاب *** أخـذ العـوض بسلـومنـا بـه معـابـه
والخامس اللي للمغـر صـار شـرّاب *** حكم بحـق الضيف وأنهى الطـلابـه
ماضي فخـرهم للمثل صار مضراب *** عـنـد العـرب شيـابـهـا مـع شبـابـه
يشهـد لهـم تاريخهم عبـر الأحقـاب *** بـهـم الـحـمـيـة والـذكـاء والنجابـه
هـذي فعايـل لابـتـي عصم الأشنـاب *** وضـحـتـهــا لـلـي يـريـد الأجــابــه
ولـو أبـي أعـد افعالهم مالها حساب *** أرداهـم الـلـي بـالـلّـزم يـعـتـزابــــه
وشكر الثناء يستاهله كـل من طـاب *** ولا الـزلابــه لــو مـدحـتــه زلابـــه
الـلي يـجـمّـل لابـتـه عـنـد الأجـنـاب *** نـثـني عـليـه ونـفـتخـر في جنـابـه
أثني على اللي بالكرم نال الأعجـاب *** اللي صعـد صرح الفخـر وأعتـلابـه
اللي وفاء بالطيب في كل الأوجاب *** سـلـم الكـرم والجـود طبـعـه ودابـه
يتعب على الجزله ويفعل لها أسباب *** ونال الفخـر في كـل مسلك سعـابـه
ذاك الذي يسعى على عتق الأرقـاب *** عـسى ولـي الـكـون يـجـزل ثـوابـه
عـن الـلـوازم مــا تـعـذر ولا غـــاب *** وأن جاه نـاصي زايـره مـا كـبـابـه
يـا مـا نصـاه مـن المحاويـج طـّلاب *** بالذكـر قـالـوا ما خسر مـن هقـابـه
ديـوان بـيـتـه دوم مفـتـوح الابـواب *** وكـل الـمـعـانـي مجلسـه تـلتـقـابـه
علمه وصل مع كل طـارش ونجّـاب *** عـلـم الصـخـى والجـود كـلاً درابـه
الـرزق يـأتـي بالمساعي والأتـعـاب *** ولا خيـر في رزق الحـرا والشلابه
وقال عبدالله بن دهيمش بن عبار هذا مقطع في بعض مآثر قبيلة الفدعان:
حـربـة الـويـلان حـمـران العـيـون *** فـزعـة المحـرج اليـا صـار اللـزوم
أنـتـم الـلي بـالـمـفـاخـر تـفـخـرون *** أربـع الشـارات يـذكـرهـا الـعـمـوم
أنـتـم بحـمـر الـنـواظـر تـوصفـون *** وبـجـتـوا الديـره بحـزات الهـجـوم
منـكـم الـلـي للضيـوف يـصـوتـون *** يـوم عـصـر الجوع والـزاد معدوم
ومنكم الـلي اليا عطوا ما يرجعون *** وبالـقـضـايـا عـنـدكـم كـل السلـوم
وأنـتـم الـلي بـالطـلايـب تـفصلـون *** تـفـرضـون الحـل ما بين الخصوم
وللمـغـر عـنـد المعـانـد تـشـربـون *** أنـتـخــوا يـا عــل عـزتـكـم تـــدوم
ويـن الـلي بسـم المنيعي يعـتـزون *** ويـن عـقب كحيـل شجعان القـروم
وين عزوة سيف حاميـن الضعـون *** ودي اسمع بالنخـاوي صوت روم
وين اللي عشوى العقيري ينتخون *** عـزوتي يذرون عن لفح السمـوم
أنـتـم الـلـي بـالـلـزم مـا تـخـتـفـون *** أنـتـم الفـدعـان تـجـلـون الهـمـوم
أنـتـم الـفـدعـان مـا مـنـكـم عـفـون *** وأحمـد الـلـه ما ذكـر منكـم رخـوم
قاسي الصعـبـات بأمـر الـلـه تهـون *** والفـرج يأتـي من الـرّب الرحـوم
يـا أهـل الـنخـوه عـساكـم تـسلمـون *** كـل مـنـكـم للفخـر نـفسـه تـشـوم
سـربـة الـويـلان لا جـوك يـحــدون *** قـام يـزمـي جمعهـم مـثـل الغـيوم
نـفـتـخـر بـافـعـالـهـم لا صـار كـون *** هـم فـزعـنا لا حصل لطم الخشوم
هــادي الأمــه وعــدكـم تـنـصـرون *** حين يـبغي ضدكم خـطـو الظـلـوم
وكـل قـوم ولا عـنـزة لـه تـذكــرون *** المثـل يضـرب وله قـصد ويمـوم
أفـزعـوا يـا ربـعـنـا وش تـحتـرون *** أنـتـم الـلي مجـدكـم فـوق النجـوم
مـا تـخـيـب بـنسـل عـنـاز الظـنـون *** جـمـلـة الأفـراد واصحاب الختـوم
للـنـداء عـبـر الـوسـايـل يـسمعـون *** مـن سلـيـل دهـام صـرّح بالعـلـوم
وهذا مقطع من شعر عبدالله بن دهيمش بن عبار على طاروق الدّحه :
اعـتـزي بأهـل المـهابـه * ربـعي هم عـز القرابـه * حمر النواظـر لي لابـه
وافخر لا قالوا فدعاني
ربعي في وقت اللّـوازم * عادتهـم شد المحـازم * واحدهـم لـلجـزلـه جـازم
يرضون القاصي والداني
نـعـم برجـال المنيعي * عـلي ومهـيد الشجيعي * والروس حـمات القطيعي
ونعم اليا قيل شميلاني
والنعـم اليا قيل مهيدي * والروس سقام الضديدي* وعلي يزهاه الحميدي
سلايل جبل شجعاني
والـنعـم اليا قـيـل شميلي * اهـل الجمـع الثقـيلي * دايـم ضـد الـلي يـعـيـلي
كشور وجمع الجذعاني
وفريضي يا نعم الطاري* منهم عزوة سيف الساري* سيافا بفعلهم نماري
مسعود ومنصب فرساني
وميس وهضبي وضحوه * وعيال العود أهل أنخوه*بالواجب مابهم سهوه
عادتهم تكريم العاني
ونعم اليا قالواحنتوشي*وخلف واحدهم يشوشي*شجعان الياصارالهوشي
غضيور وايضاً القلفاني
والنـعـم اليا قـيـل غبيني * ونسل عـواد الـوافـيني * مع الفزران الذربيـني
جـدعـه ضـد العـدواني
ومـويـعـز نـعـم السمـيـه * وصيـاح رجـال الحـميه * عـصبه لمحمد دنـيـه
من نسل جديع وجدعاني
والنعم اليا قيل خريصي*على المراجل حريصي * وأن حل الأمر العويصي
ضد العايل بالميداني
خيـال البـلهـا كثيـري * ولحيـده عـز القصيري * ومـزرع باليوم العسيري
والنعم بجمع عرباني
وهذا مقطع من أحد قصائد عبدالله بن دهيمش بن عبار في قبيلة الفدعان:
العـزوه الـلي مـن قـديـمٍ لهـا افعـول *** حـمـر النواظـر ما خلطهم هـذاليف
خـويـهـم مـا يشتـكي ضيقـة الجـول *** وقصيرهم مصيون ما يلحقه حيـف
ودخيلهـم يحشم عـن الظيـم مكفـول *** ويـوم الجفـا ببيوتهم ينعـم الضيف
عزوة فـخـر ما فعلهـم كـان مجهول *** تاريخهم معروف ما يريـد تعـريـف
مـا أقـدر أعـد افـعـال حمّايـة الشول *** عصر السبايـا والبكـار المـزاهيـف
كنـا نجـوب البـاديـة فـوق مـرحـول *** واليوم عصر العـز والأمن والكيف
بـقـيـادة الـلي بالمعالي سمـك طـول *** عاهـل وطنـا يردع الخصم بالسيف
* وقـال عبدالله بـن دهيمش العـبـار العنزي في بعض أمجاد قبيلة الفدعان
فـاض القريض وللمـبادي عـناويـن *** أعـرض مجال القيل وأبديـت قافـي
نـقـطـف زهـر نـوار ورد الرياحيـن *** وغـرفت جم القاف مـن نبع صافـي
هيضني الـلي قـال بالـربـع الأدنـيـن *** منـطـوق قـولـه للحقـايـق أيـنـافـي
وأظـن مـا يـقبـل عـلى ربعـه الشين *** ألا النبيـت الـلي مـن الأصـل هافـي
يا اللي تقـول القول هقـوه وتخميـن *** أسـمع كلامـي وأفـهـمـه يالسنافـي
وأن كـان مـا تـدري بفعـل الفداعين *** أنشد وأنا أبي أخبرك عن كل خافي
حمـر النواطـر لـو نشدت المعـادين *** عـدوا جـميـع أفعـالهـم بـأعـتـرافـي
حمـر النواظر يـوم خوض الميادين *** والـريـق نـاشـف مـا يـبـل الأشافـي
حمـر النـواطـر بـالملاقـا ضريـريـن *** فـوق الـنجـايـب يقـطعـون الفيافـي
حمـر النـواظـر مـقحـميـن الأكاويـن *** ضد المعادي يـوم ضـرب الشلافـي
حمـر النـواظـر مـن قـديـم أمسميـن *** في ما مضى واليوم دورك عوافـي
الـيـوم حـنـا بـضـل حـمـايـة الـديـن *** اللي عسفوا عـوج الطبايع عسافي
آل السعـود الـلي بـالأحكـام عـدليـن *** فـي حكمهـم نبـقـا أعـزاز أشـرافـي
من عقب مـا كنا عن الحـق غـاديـن *** الـيـوم حـطـت سـفـنـنا بـالـمـرافـي
وصـلاة ربـي عـدد ما تـرمش العين *** عـلى الرسول اللي مع الحق وافـي
قال عبدالله بن دهيمش بن عبار هذه الأبيات من ذات القافية الصعبة في بعض أمجاد
ومفاخر قبيلة الفدعان في العصر الماضي حيث كانوا الفدعان اتصفوا بصفات فخرية
منها مصوّت بالعشاء وعطية غبيني وحربة عنزة وحمران النواظر وبواجت الديار
وشرابة المغر وحالياً تفرق شمل القبيلة وسكنت في المدن وتوزعت في عدّة دول وقلت :
فـاض القـريـض وذكـرتـني تـمـاضـر *** تمـدح وتـرثـا جعلهـا تسكـن الخـلـد
وذكـرت أنـا الفدعان حـمـر النواظـر *** من ضنا ماجـد أو ضنا محمـد الولـد
عـقـب النـزول بـكـل روضٍ مخاضـر *** مـرتع قـفـر فـيـه البكـار تحلـد حلـد
الـوقـت فـرقّـهـم وصـاروا حـواضــر *** مسكنهـم الحـارات بالـمـدن والـبلـد
يـوم الخصيـم من المعاديـن جـاضـر *** لهـم الفخـر والعـز والمجـد والـتـلـد
يـوم الحـدب شامـان للعـمـر غـاضـر *** مـا هـابـوا الباشه ولا هـابـوا الفـلـد
دولـة بـنـي عـثـمـان تكـتب محاضـر *** بالـلي عزايمهم سوات الصخر صلد
وأن جـالـت الخيلين وإبليس حاضـر *** ما كـان طعـن رماحهم مشح بالجلـد
لأفـعـالـهـم كـلـن بـعـيـنـه يـنـاظـــــر *** كـم مـن عـديـم حـطـو بعنـقـه القـلـد
والـلي يعـاديهـم لـه السيـف كـاضـر *** بالرمح يجلد في متون الظهـر جـلـد
***
يتبع
التعديل الأخير تم بواسطة عبدالله بن عبار ; 08-07-2024 الساعة 05:23 AM
|