مراكـز الارصـاد توقـع امطـار**من الرياض وغرب تهطل غزيـره
ومحطة الارصـاد تعلـن بالانـذار**وبعض المواقع صنفوهـا خطيـره
الله يجيب الخير ماتحـدث اضـرار**ويعم غيثه كـل شعـب الجزيـره
والاوديه تجري مثل جري الانهـار**وكل فيضـة ٍ تصيرمثـل البحيـره
خير ٍيعم الـدار ويفيـد الاشجـار**وكل وادي بالسيـل تسمـع هديـره
غراء ردوم وراس غيمه لها طـار**وثعولهـا تسحـب وراهـا كثيـره
اليا ضربت عقم ٍ تحفـره وينهـار**طشة مطرها يـوم تنـزل كبيـره
تسمع رعدها طق بنشـر بالاكفـار**يعـم خيـره بالبلـد كـل ديــره
وعسى تتالي من مراويح الاغـزار**كـل وادي ٍ يفيـض مـاه بغديـره
وكل عب يرجع راس فرعه اليا حار**والماء يفيض من الفياض الصغيـره
والاوديـه مقـاس سيلـه بالامتـار**وطرق المواتر حافر ٍ لـه حفيـره
نبي نهنـي نجـد بقـدوم الابشـار**يوم الخميـس اول بدايـات صيَره
بأمر الولي المنخفض فوقهـا سـار**واهل الفلك توقعـوا فـي مسيـره
الرب ساقه من محيطـات الابحـار**وعساه صيب ٍ نافع ٍ صـاب خيـره