* وهذه القصيدة قالها الشاعـر جحيش بن مهاوش السرحاني من أهل الجوف ينصح عياله وقد نسبتها في طبعات سابقة من كتابي للشاعر سويدان الحلام العمري أستناداً إلى قول بعض الرواة ثم أتضح أنها لجحيش وليس لسويدان :
قـال الــذي يــقـرأ بـلـيـا مـكـاتـيــب *** يا الـلي تقـرون العمى من عنـاكـم
مـار اسمـعـوا مـني كـلام بـترتـيـب *** نـصيـحـة مـن شايـب بـه عـنـاكـم
خـوذوا كلام جحيش مابـه تكاذيـب *** مـثـل السنـد مضمـوم لـلـي وراكـم
يا عـيال يالـلي تشرفون المراقـيب *** الـلـه عـلى سمح الطريق ايهـداكـم
كـان أنكم للضيف صرتم معـازيـب *** تـرى الـكـلام الـزيـن ملحـة قـراكـم
وترى السبابة من كبـار العذاريـب *** وهـرج البـلايس مـا يطـّول لحاكـم
المذهب الطيّب فهو مذهب الطيـب *** والـمـذهـب الخـايـب يـبّـور نساكـم
تجـنبـوا درب الـردى والمعـايـيـب *** وأمشـوا مع المخلوق مثـل خوياكم
يـا عـيـال مـا سرحتكم باللواهـيـب *** أيـضـاً ولا عـمـر الـمعـّـزب ولاكــم
يا عيـال مـا ضربتـكم بالمشاعيـب *** ولا سمعـوا الجـيـران لجـت ابكاكـم
يا عيال بعتـوني بصفـر العـراقيب *** مـا هـي حقـيقـه سـود الـلـه قـراكم
يـا مـا تـولجـت القبايـل تـقـل ذيـب *** من خـوف لا ينقص عليكم عشاكم
وياما قطعت من الفياض العباعيب *** نـدور مـن صـيـد البـراري غـذاكـم
واليـوم شوفـوا لحيتي كلهـا شيـب *** هــذا زمـان قـعــودنـا فــي ذراكــم
قـمت أتـوكا عـلى عـوج المصاليب *** قصرت اخطانا يـوم طالت اخطاكم
أنـا كبـرت وقـربـت شمسنا اتغـيـب *** وأن ما حشمتوني هجركم ضناكـم
عطـوني القـرضه عـليكـم مطـاليـب *** ردوا جمايـل بالجـزا مـن جـزاكـم
خـوالـكـم مـرويـن حـد الـمغـالـيــب *** عرق الردى ما يندرى كيف جاكم
الـبـر واجـب مـن كبـار المـواجيـب *** للـوالـد الـلي فـي كـلامـه نـخـاكــم
مـانـي بشانـيكـم بوسـط الأجـانـيـب *** لـكـن عـملـكـم يـا عـيـالي شنـاكـم
من فعلكـم قـلبي جـروحـه معاطيـب *** يا اللي عـلى الـوالـد خبيث لغـاكم
صرتوا عليـه مثـل زمـل المواهيـب *** مـن جـابـكـم عسـاه يـقـلع مـداكـم
وعسى من صفيـه لوادي سلاحيب *** يـنـدا عـلى الصبخـا مدافيـق ماكـم
مار اطلب الـلـه عالم السر والغـيب *** يـلـطـف بـعـودٍ للنـصيحـة دعـاكـم
ابـوكـم الـلي طـوعـتـه الـتجـاريـب *** عـن مذهـب الـرديـان يا مـا نهاكـم
كـلام عـود هـذب النـفس تـهـذيـب *** مـن غـلوكـم عـنـده بروحـه فــداكـم
ترى الزمن له في صروفه تعاجيب *** والـيـا دهـا غـرّات نـاسٍ دهـاكــــم
لا بـدي ادخـل بالحـفـور الضنابيـب *** بالقبر ما أفـرق طيبكم مـن رداكـم
لابـد مـن يـومٍ نـطــش الأســالـيــب *** ولابـد قـولـت يجبـر الـلـه عـزاكـم
التعديل الأخير تم بواسطة عبدالله بن عبار ; 11-26-2011 الساعة 06:14 AM
|