هذه الأبيات فاضت بها قريحتي عندما مريت بقصر المشقوق في قصيبا وهو قصر أثري قديم وكنت أزور هذا القصر قبل أعوام بصحبة صاحبه الشيخ راضي بن عبدالرحمن الراضي الحبلاني رئيس مركز قصيبا سابقاً رحمه الله وكان هذا الرجل من الرجال الذين أعزهم ويعزونني وهو معزبي كل ما قدمت إلى بريدة فتذكرت وقلت هذه الأبيات وأرسلتها عبر الجوال لنجله الشيخ فهد بن راضي الراضي أمير قصيبا حالياً حفظه الله فقلت :
يـا فـهـد ويـن معــزبـي ذيـك الأيــام *** عـينت راضي مـا بقي غـيـر ذكـراه
لا جـيـت لبـريـدة أجـي يـمـه شـمـام *** هـو الوحيد اللي من العـزوة أنصاه
والـلـه مـا جيتـه عـلى الـزاد معـتـام *** ولا جيت له قصدي حراوي لمخباه
لاشـك أجـد في مجـلسه عـز واكـرام *** الشيخ لـي عـنـده معـّزه ولـي جـاه
لـو راضي أبو دحيم تحت الثرى نـام *** ذكـراه تـبقى دايـم الـدوم مـا أنساه
الـلي أعـني لمشاهده عـبـر الأعـوام *** عـزالـلـه إنا يـا أبـو فيصل فـقـدنـاه
وأنت العوض بالليث يانسل ضرغام *** حيثـك كـريـم وعـادتـك تـذبح الشاه
وقد رد الشيخ فهد بن راضي الراضي رئيس مركز قصيبا على الأبيات الموضحه أعلاه قائلاً :
مـبــداي بالـلـي دايـم الـدوم مـا نــام *** الـواحـد المعـبـود فـضلـه رجيـنـاه
الـواحـد الـمـعـبـود خــّلاق الآنــــــام *** محـيي عـظـام بالـصفـايـح مـغّـطاه
ومـن بـعـد ذكـر الـلـه أسجل بالأقلام *** أبـيـات مـن صميـم فـكـري مـنـقّـاه
يـا مـرحـبـا حيـيـت يـا نـسل الأكـرام *** يا أبـن الـرجـال الطيبـيـن المسّمـاه
ونـعـم بـأبـن عـبّـار لـه عشرة أنعـام *** الـوايـلي يـا طـيّـب الـذكـّر والـجـاه
جتـني بـيـوتـك وأبـي أوقع بالأبهـام *** أنـي مقـصـر والـعـذر مـنـك نـبـغـاه
لـنـك رفـيـق أبـوي فـي ذيـك الأيــام *** رفـقت وفـاء مـابـه مصالح وغايـاه
ولـنـك عـزيـز ومـن رجاجيل احشام *** ومعـزتـك مـا تـنحصي لـو كـتـبـنـاه
وذكرك لأبوي وسيرته عندي وسام *** يالـلـه عسى الجنـه مـقّـره ومـثـواه
وأبـوي خـلّـف لـه أوالـيـد وأقــــرام *** فـي ديـرتـه محيـيـن ذكـره وذكـراه
ومن غير قاصرفي بني عم وأعمام *** نـاس عـلى فـعـل المـراجـل مضّـراه
مـانـي بشاعـر بس تـقـديـر وأكـرام *** نـيـابـة عـن لابـتـي جـتـك مـهــــداه
وصلوا على من سن للخلق الأحكام *** رسولـنـا المبعـوث رحـمـه ومنجـاه
ورديت على الشيخ فهد الراضي بهذه الأبيات :
مشكـور يا فهـد عسى العـز لـك دام *** مظمون قـافـك يا أبـو فيصل فهمناه
لا لا تـعـذّر وأنـت لـي دوم عـّـــزام *** يـا مـا ذبـحـت مـن الكبـاش المـربّـاه
والنعـم قـمـت بواجـبي كـامـل وتـام *** حاشى يخيب الـلي من دحيـم مجنـاه
ولـو شفت منك قصور مـاني بلـوام *** ولاني بالـلي يشمت رفيقـه ويشنـاه
أبـيات شعـري مـابهـا لبس وأدغـام *** تـدرك مـرامـي كـان حـلـلـت معـنـاه
جيت المشقوق وصابني وجد وهيام *** وذكـرنـي الـلي بـه تـمشـيـت وأيـاه
وفطـن عـليـه طـيـف يشبـه للأحـلام *** ودلـيـت أردد كـلـمـتـي يـا حـلــولاه
وطـرى عـلى بـالي فـزع كـل منظـام *** الـنـادر الـلـي مـا تـوصـف حـلايـاه
وهلت عبايـر نـاظـري تـقـل مـرزام *** وأصبح عـزاي أنك شبيهه وشرواه
مـرحـوم يـالـلي دوم مـمـشـاه قـّدام *** منعـور ما دنـق عـلى الهـون علبـاه
دوّج بـرجـلـه فـي فلسطيـن والشام *** وبغـداد والبصره وحتى النجف جـاه
لاشـك دورات الفلـك تـرغـم أرغـام *** ولا حــي ألا أيـروعــه جـور دنـيــاه
والحتف لـرقـاب البشر كـنـّه حسام *** لابـد يـورد كـل حـي لـمـنـايـــــــــــاه
لـولا أعمال الخير في ديـن الإسلام *** تـفٍ عـلى الدنيـا ومن عزهـا أغـراه
يـا مـا هـفـابـه مـن مشايـخ وحكّـام *** وكـم مـن خليـفـه زال والملـك خـلاه
مـا خـلـّدت فيصل وحـافـظ وصـّدام *** مع الحسن وحسين وادريس والشاه
ومن قبلهم جدعان وجـديع ودهـام *** ومشعان الـلي هنـف الغناديـر تـنعـاه
من عاش صيوره لفايف من الخام *** والـلي عمل مـن خـيـر أو شـر يلقـاه
وقال الشيخ فهد بن راضي هذه القصيدة رداً على عبدالله بن عبّار :
خـيـر الجواب أجمل تحيات الإسلام *** مـعـطـره بـالـعـود والمسـك مـبــداه
أهـل هـلا بالخـط وأصحاب الأقـلام *** والـلي كـتبهـا وأرسلـه والـلي أنشاه
يا مرحبابـه عـد مـن لبس الأحـرام *** طاف وسعا وسط الحرم سبع دوراه
أو عـد مـا بـالجـو مـن طـايـر حـام *** بين السماء والأرض رفرف جناحاه
جتـني بـيوتـك وأفتخـر بيـن الآنـام *** مـثـلـك يـشـرفـنـي مـرده ومــلـــواه
مـثـلـك يـشـرفـنـي كـريـم ومـقــدام *** ومـثـلـك ينومسني رفـيـق وقـرابـاه
وأيضاً عـزيـز ومن رجاجيل أعلام *** تـرفـع لـك البيـضاء بـراس الرفيعاه
وأيضاً عزيز وعندنا مثـل الأعمـام *** لـك مـنـزل بـيـن الضـلـوع المحـنـاه
والـلـه مـا قـلـت الـقـصـيـدة تـلـوام *** قـصـدي شـريـف والـنـوايـا سليمـاه
لاشـك شـاعـر فـي بـدايـة تـعّــــلام *** والمـعـذرة أن كـان بالشعـر غـلطـاه
يالوايـلي أنـتـه عـلـم مـثـل الأهـرام *** فعلك ينومس من سمع بـه ويـقـراه
ذكـرتـني لأبـوي حـركـت الأســقـام *** وهـلت عـبايـر ناظري جبت طـرياه
ذكــرتـنـي فـعـلـه وروحـتـه لـلشـام *** وقت مضى مابين خـوف ومجاعـاه
سافـر وهـو أبـو سبعـة عشـر عـام *** تـوه صغـيـر بـس عـنـده طـموحـاه
وعند الشيوخ أهل المعزة والأكـرام *** نـوخ وحـطـولـه زهـاب وكـرامـــاه
ومضى ثلاث شهور والرجـل عـزام *** عـلى السفـر لـم الـديـار الـبـعـيـداه
حـتى وصـل لـكـويـت وديـار الأزلام *** والقدس جـاه وادى فيها الصلاواه
ومع خاله العساف امضى له اعوام *** بـيـع وشـرى مـع الـرجـال العقيلاه
حـمـولـة لـهـم الأمـارة وحـكـّــــــام *** بعـيون الجواء من السنين القديماه
واليـوم هـم ضبـاط وشـيـوخ فـهـام *** ومـنـهـم وزيـر مـن اهـم الــوزاراه
الـلـه يـفـكـه مـن صـواديـف الأيــام *** ويـوفـقـه ربـي بـديـنـه ودنـيـــــــاه
ومن بعدها عود عـلى خيـر واكـرام *** وعـيـن أمـيـر عـنـد ربـعـه واحبـاه
عـيـن أمـيـر بـديـرتـه والسـعـد قـام *** والـحـمـد لـلـه حـقـق الـلـي تـمـنـاه
والخـاتـمـه أجـمـل تحـيّـات الإسلام *** أخـتـم بـيـوتـن بـالـتـحـيـة بـديـنـــاه
وقال عبدالله بن دهيمش بن عبار هذه القصيدة جواب لقصيدة الشيخ فهد بن راضي الراضي رئيس مركز قصيبا :
مبـداي بالـلـه منشي المـزن بغـمـام *** رب الـخـلايــق كــل مـا راد ســوّاه
بسمه بدعـت من القوافي والأنـغـام *** وسجلت من نظـم القريض المغنّـاه
جـتـني بـجـوّالـي رسالـه مـن غـلام *** غـلام شـيـخ بـالـفـخـر كـنـه أيــــاه
الشيخ أبـو فيصل جمع فهم والهـام *** وكـل الخصال الطيـبـه مـن مـزايـاه
قـرم العيـال الـلي لـرقي العـلا شـام *** عاف الطمان وشامخ الحيـد يـرقـاه
فـهـد مفـاعـيـلـه شريـفات وأعظـام *** صبـر عـلى ظـرف الـزمان وتحـدّاه
جده حمى ملك الجدود من الأخصام *** الباسل الـلي باللقـاء يـقـهـر اعـداه
يوم الزمان اللي به حروب وأجـرام *** والكـل يبطش حـزت الخصم يقـواه
مـن لا تحـامى ديـرته راحـت أقسام *** يطـرد ويحرم من طعامه ومـن مـاه
مـن عـزوة مـا راعـهـم كـل هـجّــام *** رجـالـهـم يـطـعـن خصيمـه بشلفـاه
ضد الحريب وللعـدو عـوق وأكعـام *** حمـوا بلدهـم ما أحـد يقـرب احمـاه
ويوم الجزيرة صار به خير وأنعـام *** وحكم بها اللي أمن الشعب وأغـناه
حـكـم بـرأي الشرع وأزال الأوهـام *** والكـل طـاع الـرب والفـرض صّلاه
أخلص لهـم والـدك وأسرع بالأولام *** والأمـر فـي نـيـل المناصـب تـلـقـاه
وعين بها منصوب وأمر الفخر هام *** منصب فخـر مـا كـل رجـل ايتـولاه
عـنـده مـن العـاهـل تواقيع وأختـام *** مجـد وفـخـر مكتـوب ماشي يمحـاه
بأمر الولي جتله على خير ما أيرام *** طـوّر قصيـبـا والـولي سـدد اخطـاه
من عـقب مـا كانت عـرازيل وخيام *** تطـاولـت فـيـهـا القـصـور الـمبـنّـاه
وأنت بطريق الطايله تحـفى الأقـدام *** شرواك مايقصر عن المجد ممشاه
اسست بـقصيبـا مـن الـعـز مـرسام *** مـاهـو خـفي بمجـرد العـيـن شفنـاه
وأنت الذي من قال بك مدح ما يلام *** ولاهي غـريبـه كـان طاريـك جبنـاه
وأنت الذي تعتـز في وصل الأرحام *** والـلي غـلـط تـدمح خمالـه وتـرفـاه
الـلي بحزات الحـرج عضد واحـزام *** شعـر الثنـاء والمـدح مـاقيـل لـولاه
ولا الردي ماهو عـلى الطيب جـزّام *** سـاس الـردى خـلـه يـولـي بـلـيــاه