في ليلة العيد أقام الرجل الفاضل الشيخ حسين بن علي العطالله الطويلعي مدير الاستقدام بالدمام سابقاً أقام حفل معايدة لقبيلة عنزة في مجلس الوائلية بالدمام وقد حضر عدد كبير من رجال عنزة الحاضرة والبادية وتخلل الحفل قصائل القاها الشاعر الشاب فيصل التويجري العنزي ثم بدأت العرضه والدّحه ومن فقرات الحفل هذه القصيدة في مناقب راعي الحفل الشيخ حسين بن علي :

عـاش من شيّـد مضيف الوايليـه *** النبيـل حسين محمود الخصايـل
المضيف الـلي مـثـل قـارة طميـه *** يـزمي وحولـه بساتين وخمايـل
عن هجيرالقيض به للضيف فيّه *** مزبن الملهوف في حمو القوايل
الـبـخـور يـسـاق بـه والشاذلـيـه *** والصياني وسطها كـوم الجلايـل
وكـل ليـلـه مجلسه مـثـل الحنيـه *** يجمع الأصحاب من كل الفصايل
يلتقي مـن جـاه في نفس رضيـه *** يجذب الـّزوار في شتّى الوسايل
يـلتقـيـهـم بالـبشـاشـه والتـحـيـه *** وبالكرامه راس من يآتيه طايـل
الكـرم والجـود مـا جـالـه حـذيـه *** ورث جـدانـه عـريبيـن السـلايـل
ورثـّه عـوداً ربـى بـديرة ضريـه *** ولا تناسى عزوته نسل الأصايل
إشهـد أنـه عـقّـب لـربـعه شفيـه *** أنجب اللي لصعب الاحمال شايل
صاحب المعروف عنوان الحميه *** أشهـد أنـه مفـخـره لعيـال وايـل
فـي عـلـومه تفتخـر كـل السميّـه *** شـرّف الـويـلان مع كـل القبايـل
نفتخر في كـل صاحب جود زيـه *** ونعتـزي في كـل نـادر لـه فعايـل
نـال عـلـم الغـانـمـه بالمـعـنـويـه *** كـل يـوم الـوايـلي يكسب نفـايـل
مـا تـدنّـي لـلـدحـاويـس الـرديـه *** يدرك الجـزلات ويعاف الهـزايـل
يـبـذر الحسنى ويـكـره كـل سّيـه *** طيّب ويحسب من كـرام الحمايل
عن مجال الطيب ما يخلف نـويه *** حيث فعـلـه بالمراجـل لـه دلايـل
مـا يعاشر بالعـرب عفن السجيه *** ولا يحـل بمجلسه سود الفـوايـل
ياعسى يـفـداه مـن نـفسه دنـيـه *** العـفـون الـلي يجيبـون الفشايـل
ما تسود أهـل الفشل والمحقريه *** ولايحـوش الطايله شين الدغايل
الــردي لـو كـان عـنــده مـاديــه *** خاب سّده ما يحوش الا الرزايـل
يـدرك الطـولـه مـن يـدينه نـديـه *** الكـريـم حـسيـن كـريـم السبـايـل
الكـرم والجـود وأيضاً طيب نيـه *** تحتـوي شخصيتـه كـل الفضايـل
مـا سهج واجـب ولا يقبل خطيه *** ولا تحمّل بالخطأ من كـان عايـل
لـه مكـارم عـدهـا يصعـب عـليـه *** من مزايا حسين عـديت القلايـل
أطـلـب المـنعـور يـقبلـهـا هـديـه *** مـن مّـود لحضرته والشك زايـل
صاحب المعروف له حـقً عـليـه *** من عـرفته عادته فـعـل الجمايل

ونعم بالشيخ حسين الطويلعي يستاهل المدح من يحوش الطيب والطوالعه عزوة بهم الحمية تشتعل والله وسبعة أنعام ... صح لسانك يابو مشعل ولا فض فوك ...

وكفو بـ حسين الطويلعي يستاهل وأنت كفيت ووفيت صح السانك وبيض الله وجهك على ماقلت

بمثل هذا الهمام يزهو ويعلو الشعر والفخر

فأنعم وأكرم براعي مضيف الوايلية ويستاهل المدح وإعلاء الذِّكر والثناء من كان مثل الأخ حسين الطويلعي أبو علي .. وبمثله نفخر ونعتز وراع الصخى والجود كلٍ فيه يعتز وهذه الصفة من الله يهبها لم يحب من عبادة، وفّقه الله لكل مرضاه وخلف عليه وأعلى شآنه في العالمين ..

وبيّض الله وجهك ووجهه يأبو مشعل بياضٍ ما يلحقه سواد ومن غير سوّ وأذيّة فأنت الصوت الخالد لهذه القبيلة بجميع مناقبها ومآثرها ورجالاتها الكرام ولا نستغرب منك هذه القصيدة العصماء تجاه هذا الهمام الكريم فصح الله لسانك وبنانك حتى ترضى ..

ولكم منا الدعاء لله عز وجل أن يديمكم بصحةٍ وعافية وبحفظه ورعايته أجمعين ..

والف نعم بـالشيخ/حسين الطويلعي
ولاهي غريبه عليه هذه الأفعال والطيب
مايستغرب من أهله ..
وانت صح لسانك ماقصرت يا ابامشعل
بيض الله وجهك وأمد الله بعمرك ..