دنيـاك هـذي كلهـا هـز قـاووق
ما تعرف الصاحب من اللي معاديك

اكثر كلام النـاس بالمكـر والبوق
يهرج معك واليـا تقفيـت يرميـك

المــال دايم صاحبـه مرتفـع فـوق
والقل خايـب لـو ترفعـت يرخيـك

عـــزي لمن دور لهـا عنـد مخلـوق
إما بخــل ولا منـن يـوم يعطيـك

أوصيك بالطيب إن كـان لـك ذوق
أرمـه وراك ولازم إنـه يلاقـيـك

يا قلب هون كـل مطـرود ملحـوق
لا تشتــحن لك رب ما هـو مخليـك

اللي جعل لك روح جاعلك مــرزوق
كما تكفل بـك في الخلـق كافيـك

يعطي وباب الرزق ما هو بمغلـوق
واليا طلبته وانت محتـاج يعطيك

الرزق له حبسه وله وقت مطلـوق
وان مت ظلى عنـد قبرك يناديـك

والمـوت جايك لو تقع جوف صندوق
دع عنك مابك من حـذر لا يعنيـك

لا تشتغل بالمال والمـال ممحـوق
مـا مالـك إلا مـا تمـده أياديك

إن كان مالك يافتى ضيـق السـوق
تراه عند الموت مـا هـو مناجيك

الجــار والعاني لهم شـرط وحقـوق
والضيف لازم تكرمه يـوم يأتيك

وإن كان تبغي تأخذ المدح مطبوق
خلك مشمـر دون ضيفـك وعانيـك

صون الامانه واظهر الهرج بصدوق
ولاتعاشر صاحـب البـوق يعديـك

لا تصحب الخاين ولا تأمـن النـوق
وان لاح براق الحيـا عـذرت فيـك

والدرب لاتامن ولو كنـت مرفوق
إلا بحـد فـي يميـنـك يبـاريـك

أترك طريقة كل عاشـق ومعشـوق
ترمي بروحك في الشرك ثم يرميـك

والكلب ما يتبعك لو تلبسـه طـوق
وإلا خلاخيل الذهـب مـا يراعيـك

وبالصبر تغلب صاحب العزم يا شوق
والعزم طيب ميـر حـزات يرميـك

وافرح آليا منك عن الشـر مـدروق
واحذر صديقك واحذر اللي يواليـك

هذا كلام الصــدق ما هـو بمسـروق
وابيات يا قلبـي بناهـا يسليـك

من هاجس يطمـــي كما بحر صافـوق
أحذر على القلب الشقي يوم يطريك

يارب تجعلني مـن النـار معتـوق
واجعل ختامي طيبـاً يـوم ألاقيـك

ما شاء الله يافتى ربيعة هذه قصيدة عصماء لقد أبحرت في محيط الشعر .

ماشاءالله عليك
ماقدرت اقتبس بيت
كلها على بعضها مجموعة درر
صح لسانك ملايين
وعدهم صح كلك
ودي واحترامي