ياعلـي ماشفـت حـالـي ياظنيـنـي = من هنوف شايت القلـب شلعتهـا
ياعلـي عــذروب خـلـي شارتـيـن = مـع سـواد عيونهـا طـول رقبتهـا
توها شافت غزيـر الزيـن عينـي = طارت الغدفه وشفت اللي تحتهـا
دلعـت والقـرن الاشـقـر زافتـيـني = ياصبـاح الخيـر ياحـلـو طخمتـهـا
ليتنـي ماشفـت وضــاح الجبيـنـي = عزتيلـي ياعـلـي روحــي خذتـهـا
كـل ماقلـت اعطفيلـي وارحمينـي = ماتـخـاف الله ولا تــدري بخـتـهـا
عـيـن ريــم ذيـروهـا مسلحـيـنـي = قـادت الـغـزلان والـريـم اتبعتـهـا
شافـت القنـاص يـدرق بالبطينـي = وسمعت البارود بالخايـع رمتهـا
شـبـه حـمـرا ربـعـت بالقريتيـنـي = سلفـت قـدام المضاهـيـر وتلتـهـا
من حراير جيش وسـام الردينـي = نضوة الي ترهـب القـوم نخوتهـا
لعن ابوك اخذي ذلولي وامنعيني = عندكـم تصلـح ولا عـنـد ورثتـهـا

وجدت في بعض المنتديات من ينسب هذه القصيده للشاعر دهيمش المعنى رحمه الله وبعضهم ينسبها للشاعر زيد بن غيام المطيري والبعض الاخر ينسبها للشاعر حمد المعمر فما صحة نسبة هذه القصيده ومن قائلها

من عادة القصائد المغنّاه شعر الهجيني وما شابه ذلك تسير بها الركبان لسلاسة لفظها وخفة أيقاعها وأحيان يتغنىّ بها الراكب على راحلته وأحيان يتغنّى بها العازف على الربابة ومن طبع الناس إذا سمعوا شاعر يغنّي بأبيات نسبوها له حتى لو لم ينسبها لنفسه وهكذا تنسبها الرواة لعدد من الشعراء وحول ما يخص نسبتها للوالد دهيمش بن عبار المعنّى رحمه الله فأن كبار السن الذي عاصروه من جماعتنا كلهم ينسبونها له وحيث أنه توفي رحمه الله ونحن أطفال فأنني لم أحصل ألا على القليل من شعره ومنها هذه الأبيات ولها قصّة وهو يسند على أبن عمّه علي الغملاس ورغم تأكيد الرواه للقصيدة فأننا لست في أشد الحرص عليها لأنها مجرد أبيات في الوجد وقد أنصف الباحث الراوي محمد الحمدان مشكوراً عندما نسبها في كتابه السامري والهجيني للشعراء الثلاثة لأن العهدة على الرواة والله أعلم

حيّاك الله ياراعي الجدعا :
شـبـه حـمـرا ربـعـت بالقريتيـنـي = سلفـت قـدام المضاهـيـر وتلتـهـا
من حراير جيش وسـام الردينـي = نضوة الي ترهـب القـوم نخوتهـا

القريتين من الأماكن التي ترتادها قبيلة الرولة والشاعر يوصف الفتاة بأنها من جيش الشعلان الذين وسمهم الرديني قال خلف الزيد الشعلان :
اسمح لنا وأرسل لسمحه تجيني *** اعتاق عبدن معتقينه اعتاقه
أبـي اتـنـحـّر واسـميـن الـرديـني *** ربعي ولا هانت عليه فراقـه