قصيدة جديدة نصيحة للذين يسبون القبائل والحمايل - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

01-27-2022, 08:10 PM

قال عبدالله بن دهيمش بن عبار هذه القصيدة نصيحة للذين يطعنون في وسائل التواصل دون وجه حق والذين يتفاخرون بالمحتفلات ويلمزون القبائل ويتطرّقون للأحداث القديمة بعد أن أصبحت القبائل قبيلة وحدة في ضل حكم الشرع وحكومة آل سعود حفظهم الله :
الـجـاش هـاض وفـنّـد القـول تـفنيـد *** وعـذيـت لفظ القاف عن لـوم لايـم
قـلتـه وأنـا أدرا مـن كـلام المنـاقـيـد *** فكري عن الـلي يجلب العيب شايم
الـلـه حسيب الـلي تعوّد عـلى الكيـد *** مـا يـرعـوي فـي غـبّـة الغـي عايـم
الـلـي جـداه الـبـلـبـلـة والـهــرابـيــد *** يشمت عبـاد الـلـه وهـرجـه نمايـم
يتبع هوى أصحاب القلوب المحاقيد *** والطعـن بشخوص الحمايـل ظلايـم
يـا مـكثـر الـلي يـردد القـول تـرديـد *** يـرغب أيقاض الشّـر والشّـر نـايـم
ولا ينـبـش الأحـقـاد كـود المـقـاريـد *** الـلـي يحـفـرون العـظـام الـرمـايـم
ذكـر الضغـايـن والحـزازات تـنـكـيـد *** فـي عصـر زال ولا بـقـالـه عـلايـم
يـوم الـزمّن عصره تحـدي وتهـديـد *** بأحـداث تـالـيـهـا حسـوف ونـدايـم
مـن ثّـور الـفـتـنـه بـدربـه لـواديــــد *** ولا داعـي لـذكـر الفـعـال الـقـدايـم
مـا يستفيد الـلي يـحـرّض ولا يـفـيـد *** مـا نـال خـيـر ولا يحـوش الغنايـم
الـواقـع الـلي صـار يـحـتـاج تـنـديـد *** بالمجتمع مـا فـيـه غـلـب وهضايم
عجبت من منطوق بعـض القواصيد *** فـي محـفـل الـلي يعـملون الـولايـم
اشـوف كـلـن قـام بـالـعـزوة يـشـيـد *** ويذكر فخرهم فوق عـوج القـوايـم
ويحـط قومـه مثـل عنتـر وأبـو زيـد *** قـومـه صقـور ومـا سواهم حمايـم
أحــدٍ بــقـولـه طـرّد الـقـوم تـطـريـد *** والـحـق بـعـدوانـه شنـيع الهـزايـم
وبـهـم الـذي خـلاّ الجنايـز رواجـيـد *** ودفـن جميع اعـداه تحـت الردايـم
والمـدح دون أسباب موضة وتقليـد *** الكـل يـبـي الصيـت مشفـق وهـايـم
وأنـا مـديـحـي يـوم صـد الـمـعـانـيـد *** ولانـي سـوات الـلي يوهـم وهـايـم
ولانـي مـن الـلي يشمتون الأجـاويـد *** رد الـنـّقـا مـا قـلـت ســب وشـتايـم
أمدح وهـب وجلاس وسهيل وعبيـد *** عـنّـاز مـرذيـن الـبـكـار الـهـمـايـم
وأبـي أخبر الـلي يرغب المدح تأكيد *** فـي قـول حـق ويـرتـكـز بالـدعايـم
المدح يزها الـلي لشعب الوطن سيد *** عـبـدالـعـزيـز مـرسّـخ الأمـن دايـم
الـليّـث أبـو تـركي زعـيـم الصنـاديـد *** البـاسـل الـلي قـاد بـيـض العـمايـم
شيّـد قـصـور العـز والمـجـد تشيـيـد *** تحجي وتـذري عن لهوب السمايم
صقر الجزيـرة وحّـد الشعب تـوحيـد *** وأنهـى المغازي والفتن والجرايـم
مـن بـان شــرّه كبّـل يـديـه بـالـقـيـد *** والشعب صار أخوان والشرع قايم
كـل القـبـايـل خـلـط مـا فـيـه تـفـريـد *** صحبـه وجـيـره واجتـماع بعـزايـم
صـرنـا نسيـد بنعـمة الأمـن ونـمـيـد *** مـن ديـرة الجـوبـه لشـرق التهايـم
ومن راد يبني بيت مـن دون تحديـد *** السـكـن فـي كـل المـنـاطـق مـلايـم