اليوم يومك يا وطن افرح ويا علّه سعيد
..........................في ظل ابو متعب عسى تصبح يخيل خيالها

واجب علينا يا وطن نلبس لك الثوب الجديد
.......................ونرقص لك العرضة فخر يوم العرب بأهوالها

نجدد البيعة وفا لهل الوفا في كل عيد
............................في قولة ابشر سيدي تامر وحنا رجالها

ابطالها حازو لنا بالعز والمجد التليد
.........................وحنا على عز الوطن نمشي بدرب ابطالها

من عهد ابوتركي الى عهدك يابو متعب نعيد
...............................ذروة ولانا وانتمانا .. والبلد بأجيالها

والتنمية تشهد على التطوير من هذا الصعيد
.............................واكبر دليل المملكة تبعث جميع عيالها

بالعلم اسسنا بلد يرمي على الطلع النضيد
..............................لين اعتلا بين الدول بالتقنية منزالها

من فضل ربي ملوكنا بالشرع والرآي السديد
................................محكّمين الانضمة بأقوالها وافعالها

ومن فضل ربي خيرهم ضافي ويوصل للبعيد
..........................ووفير خير بلادنا يسبق وريف ظلالها

من اولويات الملك يحيا المواطن في رغيد
..........................ومن اولويات المواطن ان حيا يحيا لها

لا خير في أمة تبي تنهض ولا معها رصيد
..............................بالعلم لو ان البنوك مكـدّسه بأموالها

والمملكة من يومها تطمح على بدع الجديد
.......................واعمالها بين الدول تعكس.. بياض امالها

عهد ٍ علينا رفعتك بأسم الشعب ايد ٍ بيد
.............................يعلا صهيل خيولها والاهدير جمالها!

وعهد ٍ علينا هيبتك لاثارت بطون الحديد
.....................نفرش لك الدم الخضر حتى اخضرار رمالها

حنا ولانا يا وطن يمشي مع دم الوريد
..........................حنا لها لا عجعجت خيل الرمك حنالها

نوقف بوجه الموت من دونك الى اخر شهيد
..........................وكم فتنةٍ يوم اقبلت اقفت تجر اذيالها

برماحنا وارواحنا وطيورنا ان طارت تصيد
........................وان وقـّـعـت ما وقـّـعـت الا بروس جبالها

مدام عزك عزنا تبشر وحنا ما نحيد
.......................لا قال ابو متعب .. لها خيلي وانا خيالها




وكل عام والوطن يفخر بكم وتفاخرون به


اخوكم
سعد مسهوج العلاطي

الشاعر القدير

سعد مسهوج العلاطي

الف صح لسانك على هذه القصيده الوطنيه
وبالتأكيد الوطن له حق علينا جميعا ً وانت ماقصرت
أدام الله الأمن والأمان على بلادنا وبلاد جميع المسلمين
وحفظ الله والدنا خادم الحرمين الشريفين وولي عهده الأمين
وإنشاء الله يرجع بالسلامه ابو متعب حفظه الله ورعاه وألبسه ثو ب العافيه


اكرر صح لسانك ملايين

لا خير في أمة تبي تنهض ولا معها رصيد
..............................بالعلم لو ان البنوك مكـدّسه بأموالها

الله الله وصح السانك كلام في منتهى القوة بالواقع

ربي يوفقك