عسكر ابن خيطان من الجابر من الهضبي من العقاقره من الفدعان يقولون إن بعض الفدعان شادين يدورون المرعى الزين والماء ويشدون وينزلون وهم بعض من الهضبي من العقاقره من الفدعان وبعض من الروس ومعهم ابن كره وابن كره هو شيخ الروس من المنيع من الفدعان، ويجيلهم هاك ألصلبي ويقولهم وين تبون قالوا له ندور المرعى الطيب قال به خبرةٍ طيبه بها الماء ليه ما تمررونها اثر ألصلبي مشروط له من ابن شعلان شيخ الروله والطيار من شيوخ ولد علي لقحه بس انه يجيب ها العرب يم ها ألحبره لجل يخذونهم وتجمع العرب الإبل تبي تسوقها للخبره ويوم مشم وقربوا جاءهم ألصلبي وقال والله يا الفدعان أنا خنتكم شرط لي ابن شعلان والطيار وتراهم يبون يصبحون ألخبره وهي تحيل العرب ويحصرون الإبل ويجتمعون وقالوا وش الرأي قالوا الرأي نكوس ما ننكس لا بالله نبي يم العراق وهم يمدون الطرش يم العراق وتشد العرب كلها وخلوا بيت ابن كره وأشعلوا نيران عشان (السبر)والسبر هم اللي يراقبون للغزو وين به ابل يعلمون، ما يدرون أنهم شدو ويقولون ان فهده بنت ابن كره مريضه بالجدري وشالوها على نعش وعسكر ابن خيطان مع اللي شايلينها بنعش وهم ما شين طلبت فهده ماء قالوا من يجيب ماء أي يرجع للخبره ويجيبه ويقولون ان فهده الكره قالت ما يروح الا عسكر لانها عارفه انه يفك حاله من الغزو ويأخذ عسكر ذلول وفرسه ويرجع للخبره ويجيها مع شقت النور وهو يروي على ذلوله وإلا طبت الغزو من بعيد قال الطيار يا ابن شعلان وين الفدعان ما أني شايف ألا فرس ساطعةٍ وذلول قال الفدعان جاهم ألصلبي وانذرهم بس علموني وش لون الفرس اللي على الخبره قالوا حمره مصهبه قال ابن شعلان ماني خابر بالفدعان فرس حمره من (خيل ألصحابه)أي أنها أصيله ومن مربط ومعروفه أنها من سلالة خيول ألصحابه، إلا مع سطم الغبين وابن خيطان يذكرونها عنده وسطم معروف وابن خيطان ما جتنا علوم عنه بس الفرس عنده قالوا نبي نّغير ونأخذ الفرس منه قال ابن شعلان وش تبون به رجال مقفي قالوا لا نبي الفرس قال ابن شعلان يا شينين والله من العصر وجاي ترى الذبح بكم والرمي بكم ولا تقدرون عليه لين العصر وغاد كان أذان الفرس عرقن يمكن تقدرون عليه وتأخذونها بس أطيعوني وخلوها وستخارو بعد قول ابن شعلان لهم ويلحق ابن خيطان ربعه ويجيهم بالماء ويخذ هاك (المكي)والمكي هو نفس كوب الماء بس اكبر شوي يجيبونه من مكه لشرب ، ويعبيه ماء ويعطيه لأم فهده الكره وهي تسقيها وآخذو شوي وهي تموت وهن يغسلنها الحريم ويكفننها ويصلون عليها ويدفنوها وهم يمشون وعسكر بآخرهم على فرسه ويتلفت ورآه ويقوله واحد من اللي معه وشفيك تتلفت هو أنت خفت قال يشين أنا ملايع الطرش لحالي بس اسمع أبقولك كلام وقال هاك الأبيات على فهده الكره يوم دفنوها برأس عرقوب وخلوها لحالها واثر عسكر ابن خيطان يوم يتلفت يتلفت على قبر فهده الكره.

حيث قال عسكر ابن خيطان:-



يــا بـــانـــيٍ بيتك بـروس العـراقيب



تــراك مــقـيـمٍ فـــي بـطـــو المغايب



البدو شـدت علــى حــرش العراقيب



ونهايتك عنــدي طــايبٍ علـى طايب



يفدونك اللــي مـــا يشتهون الزبازيب



وانتــي فدوتٍ للـي يشتهون الحرايب



ليـه يــالموت تجنب الخبـلات تجنيب



ســود الكتـوف مطـوفرات العصايب





جمعها وكتبها




اخوكم/احمد بن محمد الحريميس





ابو منصور

يابانيا بيتك بروس المراقيب = تراك مطوي في بطون المغايب
البدو شالت فوق حرش العراقيب = خلوك في مرفوع روس الجذايب
تفداك منهي تردع الصدر بالطيب =وانتي فدا اللي يسعرون الحرايب
....................................... = ..................... ملويات العصايب



رحم الله عسكر ابن خيطان كأني سمعت بالابيات منذ زمن طويل ولكن من رواها لا يعلم هي لمن ؟؟؟؟ شكرا لك يابو منصور على القصة والقصيدة التاريخية المشرفة لهذا البطل من رجال الفدعان .... تحياتي لك ...

اخي الرجال العنزي اشكرك على المرور والمتابعة ولعل الرواه اختلفوا في نقل هذه الابيات فالذي سمعته من بعض الشيبان الكبار بس مثل ما نقلته ولعل هناك خطاء في النقل ارجع عنه شكراً لك على هذه الاضافه يا أخي


تحياتي لك