يسر موقع العبار أن يلبي طلب الأخوة القراء بنشر بعض القصائد التوضيحية التي قالها صاحب الموقع عندما تعرض لحملة مغرضة لمحاولة تشويه جهده دون مبرر :

قال : عبدالله بن دهيمش بن عبار يؤكد بعد البحوث أن قبيلة عنزة تنحدر من عنزة بن أسد بن ربيعة وتعتزي بوائل ويفند قبائل ربيعة قبل الإسلام :

حـنـا عنـزة من دور عامـر وجيلـه *** معنا عـلى الواقـع ختـوم وتـواقيع
حـنـا عنـزة مـن نسل وايـل قبـيلـه *** عن مجـدنا التاريخ سجل مواضيع
حـنـا عـنـزة والجـد ما هـو هميـلـه *** الجـد مـا نقبـل بـدالـه ولا انـطـيـع
حـنـا عـنـزة تـاريـخـنـا مـا يـزيـلـه *** ألا جـبـال طـويـق تـصبـح بـلاقـيع
حـنـا عـنـزة مـا نـرتضي بالفشيلـه *** يشهد لنا مشعان وعقـاب وجـديـع
حـنـا عـنـزة شجعـان يـوم الدبـيلـه *** أولاد وايـل عـلمنـا بالـعـرب شيـع
حـنـا عنـزة نسل الجـدود الأصيلـه *** واصل نسبنـا ما حصل فيـه تقطيع
حنـا عنزة والجـد الـلي ننتـمي لـه *** سـمي شـرسات الأسـود البـواتـيـع
أسـد سـاسـه مـن ربـيـعـة سلـيـلـه *** مـا هـي هـقـاوي بالكـلام ومراميع
ربـيعـة استـورث مـن الجـد خيـلـه *** وأنجب أسـد وأكـلب الليث وضبيع
وأسـد أسـد الـغـاب عـقـب مثـيـلـه *** جد عنزة عامر صميدع وصعصيع
وأنجـب عميرة من ضناه وجديلـه *** فـرعّهـم التـاريـخ بالقـص تـفـريـع
وجديلـه انجب عبد قيس وغفيـلـه *** والنمـر بن قاسط وعـنـز المـداريع
وبكـر وبـني تغـلب عـذاب الكحيله *** أهـل الفعـايـل بالسيـوف اللـواميـع
الـلي تفـانـوا يـوم صيحـت جليـلـه *** نـهـار تحليق اللمم في هـاك الريـع
ذولا قـرايـبـنـا ولا بـه جـهـيـلـــــه *** حيث النسب ودّع مع الناس توديع
وكان ابن قاسط حاش علم النفيلـه *** عـن وايـل الهـزان مـا فـيـه ترفيع
نـفـخـر بـطـاري طيـبـيـن الفعـيـلـه *** لاشـك مـا نقبـل لـلأنساب تـضيـيع
مـصـدر فـخـرنـا مـا نـدّور بـديـلـه *** مـن دور آدم مـا عرض جـد للبـيع
مـا جـدنـا سـلـعــه نـجـدد مـديــلـه *** جـد عـنـزه مـابـه معـايـب وتـشنيع
ومـن لا يـعـد الحـق يا ويـل ويـلـه *** الـزيـف يكشف والدجـل والمخاديع
ومـن لا يعـرف الحـق لازم نحيلـه *** للمصدر اللي يرجعه غصب ترجيع
وهـرجٍ بـلا بـرهـان ما ينصغي لـه *** هـرج الغـلط يذهب سوات الفقاقيع
أوردت فـي تسعيـن مصـدر دليـلـه *** ما هـو كـلام مجمع الهـرج تجميع
سجـلـت جـزلات العـلـوم الجـزيلـه *** والقـول مثبـت مـا صنعنـاه تصنيع
أنـساب فصلـتـه فـصيـلـه فـصـيلـه *** قصدي فخر مابي معونه وتشجيع
مجـدت وايـل فـي مـلاحـم طويـلـه *** ولا همني من حـط بالشمل تصديع
نـفـخـر وحـاسدنـا يمـوت بـغـليـلـه *** بالمجد الـلي كـل الوسايل بـه تذيع
يـقـولـه الـلـي مـا تـسـوّل بـقـيـلــه *** ولا دار من بـدع القصيد المطاميع
منظـوم قـافـي مـا جعـلتـه وسيـلـه *** جـلـه نـظـمتـه بالشغـاميـم تـبـريـع

وقال : عبدالله بن دهيمش بن عبار العنزي هذه القصيدة يؤكد أن عنزة هامه وليست لهزمه وهي تنسب لوائل عنزي صليبه :

لـي قـبـيـلـة مـا يـقـرون الـمعـيـبـه *** من شخوص أهل المكارم والحميه

ضنـا وايـل مـابـهـم كـوبـه وخيـبـه *** مـن قـديـم أهدافهـم مـا هـي دنـيـه

يدركـون الطـايـلـه لـوهـي صعـيـبه *** والفخـر والمجـد ما جـاهـم حـذيـه

الـويـلان افعـالهـم مبـطي عـجيـبـه *** افـتخـر واعـتـز فـي مجـد السميـه

وايـل الويـلان مـن عـنـزه صليـبـه *** وايـلي نسـل العنـزي مـن عـنـزيـه

لا دعـي ولا حـلـيـف ولا ربـيـبــــه *** وايـلـي مـشـهـور وأمـه وايـلـيـــه

وايـلي حـلـف الضعافـه ما رضيبـه *** وايـلي منسوب من عصبـه قـويـه

لـو تـلـهـزم يـوم بالـكـثـرة غـليـبـه *** عـاد مـجـده مـا يـريـد المحـقـريـه

بـان عـلـمـه والفـخـر كلـن دريـبـه *** مـن بـلـد خـيـبـر إلـى نجـد العـذيـه

جـدنـا الـلـي مـن قـديـم نـعـتـزيـبـه *** مـن ضنـا عـنـاز مـا سـاسه هفيـه

وايـل الهـزان لـه صـولـه وهـيـبـه *** جـد ثـابـت مـن زمـان الجـاهـليـبـه

وايـل الـهـزان مـن عـزوه عـريبـه *** مـن قـبـيـلـه مـا مـعـامـقـهـا رديـه

مـا نـشـك بـجـدنـا ولا فـيـه ريـبــه *** والتلاعـب بالنـسب جـرم وخطـيـه

ومـن يحـّرف بالجـدود أنـا طليـبـه *** نـحـتـكـم للشـرع فـي حـل القضيـه

التـخـبـط بالنسـب أكـبـر مـصـيـبـه *** والجهـل ساس المعايـب والـزريـه

مـن تخـبـط بالـنسـب ربـه حسيبـه *** وهـّم الـلي مـن العـرب مالـه دريـه

أزلـه الـلـي شـوفـتـه دايـم قـريـبـه *** ومن شهد بالـزور ما يشكل عـليـه

اكـتـب بـتـاريـخ وايــل واعـتـنيـبـه *** وأبـذل المجـهـود ما دوّر الجـزيـه

قـلتـها وبـدع القصايـد وش نبـيـبـه *** كـان مـابه ذود عن مجـد السميـه

يـوم بعض الناس هـمه بس جيـبـه *** يخـدع كـرام البشر لأجـل العـطيـه

وقال عبدالله بن دهيمش بن عبار هذه الأبيات رداً على الذين يدعون أن قبيلة عنزة انقرضت وحلت محلها بكر وتغلب :

يالـلي تقـولون أن عـنـزة منقـرضه *** وتـبـون في زعـمكم قـومٍ تعـوضها
نعيـذهـم بالـذي مـد وبـسـط أرضـه *** ما تـنقـرض لابـتي مولاي يحفضها
من فرض رأي الخطأ مانقل بفرضه *** ما نسمع اللي علوم الزور يلفضها
والـلي عبـث بالنسب لابـد نعتـرضه *** مـن زوّر أنسابنـا دعـواه نـرفضها
اليعربي منسبه يحسب مثل عـرضه *** نعـتـز بجـدودنا والـروس ننهضها
ما جالنا المجد بالتسليف والقـرضه *** وكان عنـزة نايمه ملـزوم نيقـضها
أن كان دقت طبول الحرب بالعرضه *** وتلاقت جموعهم وإبليس حرضهّا
فيما مضى المعتدي نفناه وانحرضه *** واليـوم ربـي دعـاة الشـر قوضها
أهـل القلوب الـذي بالحقد منمـرضه *** سود الضماير رموز الظلم نبغضها

قال : عبدالله بن دهيمش بن عبار العنزي هذه القصيدة رداً على الذين يدعون أن ابن عبار غيّر جد عنزة وائل :

تاريخ وايـل لـك الـلـه ما نفـرط بـه *** ما نحرف الواقع ولا نريد تـزويـره
ما جـدنـا سلعـة لمـن راد يبسط بـه *** الـجـد ثـابـت ولا نـقـبـل بـتـغـيـيـره
واللي وقع بالخطأ ما اظن يغبط بـه *** والعـاقـل يـسنعـه عـقـلـه وتفكيـره
كانه غرق بالجهل لويسمع الخطبه *** القـول ما يفـتهـم قـصده وتفسيـره
من خط حرف الغلط لابد من شطبه *** من حيث موروثـنا ما جاز تحويره
موارث جدودنـا هـو كيف يغـلط به *** لاشـك مـن حـرفـه ملـزوم تحذيـره
حنا عنزة مجدنا ما احد أيتخبط بـه *** وايل لنـا عـزوة وبالمجد لـه سيره
من خيبر الحرة اليا شرقي الرطبـه *** لسلوك تشهد لنـا السكان والديـره
كـم ديـرة ذودنـا داج وتـمـغـط بـــه *** من طور سينا نبوج لقبلي مغيـره
يا اللي تلم الحطب بالليل لا تحطبه *** صعب بظلام الدجى جمعه وتغميره
العـلم مثـل البحـر من قـال حوطبـه *** غـلطان مـا يـدركه لـوعـد تقـريـره
ما فادت الواسطة واللي توسط بـه *** وراع النكـد ما نجح كيـده وتدبيـره
اللي حفر حفرة من السؤ يسقط به *** ما فاد اللي منهجه بالحسد والغيره
وأشوف أنـا المنتدى كلن يلطلط به *** وأشـوف اللي سبنا شادوا بتقديره
الـلي لحـوم البشـر دايـم يـعـرط بـه *** بظهور كـل العـرب نشب أضافيـره
اللي يكن الحسب والسب ينشط بـه *** لـه عـام بلحـومنـا تـنشر منـاشيره
شنع الكلام اكتمه عن لابتي واطبه *** الـزيـف بأنسابنا مـا نـريـد تبـريـره
من قال هـرج الغلط قوله تـورط به *** ياليت عن منهجه لو يطلب الخيره
الحمل لـو ينقلـه حاشي يحطحط به *** كل ما يطول السفـر بـادت فتاتيـره
ومن يفقد الشم ما يستروح العطبه *** والضرس كان انخر ما فاد تخديره
وقصرٍ عداه الذرى يا عل ينغط بـه *** البـوم عسى الـولي يعجـل بتدميـره
والبيت ما ينسكن كان انشلق قطبه *** اليا وقع مقدمه يصبح كما الصيره
مجلس حليف الردا حلفت ماقلط به *** لوبش بي ضحكته بالوجه تكشيره
حزت يزوغ البصر والعقل يخلط به *** حنـا هـل الفـزعة الياعميت مطيره
واللي سعى بالنكد وإبليس شبط به *** ماني رهين أمره ولاعشت من ميره

وقال عبدالله بن دهيمش بن عبار العنزي هذه الأبيات رداً على الذين يدعون أن أبن عبار حذف اسم وائل عن عنزة وبطلان ما يدعون به:

مـن قـال ابـن عـبـار فـرّط بـوايــل *** حـظه ضعيف وتايـه البصر غـادي
لا تصدقونـه يا شخوص الحمـايـل *** مالـه سنـد يمشي عـلى غيـر قادي
الـلـي كـتـبـتـه لـه اسـنـاد ودلايــل *** مـن واقـع التـاريخ عـنـدي مبـادي
الصـدق يـبقـى دوم والكـذب زايـل *** ولا يـحـرف الـتـاريخ درد ودوادي
مـانـي بحـال الـلي يـكـن الدغـايـل *** اهـل الـدسايـس والكـدر والنـكـادي
دونـت جـزلات العـلـوم الصمـايـل *** والـلي تجاهـل مـا يشوف اجتهادي
ما جبت من عندي علـوم هـزايـل *** وخلـط النسب مـا يعتبر شي عـادي
وايل من عصور الجـدود الأوايـل *** الـعـزوة الـلـي دوم دونـه نـفــــادي
هو جدنا اللي بذكره الراس طايـل *** معـروف عـنـد الحاضرة والبـوادي
وايـل نسـل هـزان مـابـه جـهـايـل *** وصبـاح جـده مـا عـلـيـه انـتـقـادي
وعتيـق مـن أسلـم ويـذكـر سلايـل *** نسل عنـزة هـذا الصحيح الوكادي
حـنـا عـنـزة بـشهـود كـل القبـايـل *** لـنـا الـفـخـر مـنـزالـنـا بـالـشـدادي
تاريخنـا أبيض في جميع الفـوايـل *** نـاصع بـيـاضه مـا غشاه السوادي
وبـكـرٍ وتـغـلـب طـيـبـيـن الفعـايـل *** أولاد عـم ويـدحـرون الـمـعـــــادي
والـلـي يـدوّر عـن اجـدوده بـدايـل *** مثـل الـذي يـتـبع سـراب الحـمادي

وقال عبدالله بن دهيمش بن عبار العنزي هذه القصيدة يفند مزاعم الذين يحاولون خلط نسب عنزة وأختيار الجدود حسب الرغبة :

نـويـت أوضح كـل خـافي ومكنـون *** واشـرح مناهيج الـدروب السنيعـه
أسند لمن عقلـه من الربع مـوزون *** ما هـو بمـن خـم العـلـوم السريعـه
وأبي أنشد الـلي طبعهم مـا يحابون *** الفـاهمين أهـل الصـدور الوسيعـه
وش مقصد اللي بالدعـايات مفتـون *** يـحـط مـا بـيـن الـقـبـيـلـة وقـيـعـه
وش الكلام اللي لـه اليـوم تـوحـون *** الـكـذب ضـدي قـام كـلـن يـشـيعـه
وش مقصد اللي بالمجالس يخاقون *** الـلـي عـلـيـنـا يـدورون الـذريـعـه
الربع اللي من دون خبره يقصـون *** والقـص للجـاهـل متـاهـة وضيعـه
هـل ما سمعتم قولهم وش يقولـون *** دار عـنـزة صـارت بـلاقـع وقـيـعـه
هـو حـلم ولا من هـرابـيـد مجنـون *** متى عنـزه جاهـا الفنـاء والقطيعـه
نبي الإجابة يا أهـل العرف وشلـون *** كـيف عنزة صارت شراذم نـزيعـه
هـل سـن في تبديـل الأجـداد قانـون *** حـتى انـتخـيّـر بالجـدود الشجـيعـه
حنـا عنـزة ما هـي تخامين وظنـون *** مـن صلب وايل من سلايل ربيعــه
ما مجدنـا بفـلـم المهلهـل وشيبـون *** ولا صيتـنـا بتعليق خطـوا المذيعـه
تـمثيـل فـلـم الـلي تمكيـج بصالـون *** فـي شاشـة التـلـفـاز يجـهـر لميعـه
تاريخنـا مبطي لـه الـنـاس يـقـرون *** والـلي تـخبـط بالنسب مـا نطيـعـه
القـرطـبي يشهـد لنـا وابـن خلـدون *** مـثـل الجـبـال الـراسـيـات المنيعـه
مـرويـن من دم العـدى كـل مسنـون *** والـلي يـنـاطحنـا يـعـود بفـجـيـعـه
أولاد وايـل بالـلـقـاء تـقـحـم الكـون *** وأن عـدوا الأبـطـال هـم بالطـليعـه
الصيـد مـنهـم بالفـعـال أيـتـبـاهـون *** معهم من شخوص الحمايل وديعـه
وديعـة مبطي لهـا عصـور وقـرون *** مـا يـقبلـون الـمخطيـة والهـزيـعـه
وأنـا مـن الـلي للقبـيـلـة يـحـامـون *** وأفـخـر بالـلي لـه الحـميـه طبـيعـه
أقـولهـا ومـن جنب الحق ممهـون *** لابـد مـن كشـف الـدجـل والخديعـه
الحـر مـا يصبـر على الذل والهـون *** يشفـق عـلى رقـي الجبال الرفيعـه
عـلى الكتاب أجـواد عـنـاز يـثـنـون *** ولاني بحال أهـل الهداف الوضيعة
ولا العفون عفون من ماكر عفـون *** مـن يـبذل المجهـود تـنكـر صنيعـه
من غير خلاق الملأ ما طلب العون *** ومـن لـه قضيـه يحتـكم للـشريـعـه

وقال عبدالله بن دهيمش بن عبار العنزي لتفنيد بعض الأقوال الباطلة :

يـا نـديـبي جهـز الخـط المـزرّف *** وارسله يالقـرم لرجال الشهامه
وزعـه لـعـيـال وايـل لا تـطــّرف *** من عموم الربع أومقدم جهامه
بـلـغ الشيّـاب والصـبي المتـرّف *** وقـل أبـن عـبـار يهديكم سلامه
ما يسود القوم من مجده تقـرّف *** لـو تفـاخـر بالـذي بادت عظامه
من حبى يا لابتي كوعه تجـرّف *** ومن يدلبح ذل يوصف بالرخامه
المجالس تهترش مثل المهّـرف *** مـن يـرّوج للدعايه وش علامـه
من تمسك بالخرافـة قيـل خـّرف *** ومن جهل مجناه تغشاه الملامه
كـل جاهـل قـام يكتب وايتصّـرف *** والتعبّـث بالنـسب يـرث نـدامـه
العلوم الزايفه توضع على الرّف *** والنسب مايتقنه من به غشامه
أفـخـر بتـأليـف كتـبي واتـشّـرف *** وأحمد الله منهجي عـز وكرامه
لـوبهـا تـزويـر أو قـول محـّرف *** والـلـه أنـي لا أحذفهـا بالقمامـه
جدنـا وايـل ما هـو نكره معـّرف *** مـا مكانـه لهـزمـه لاشك هـامـه

ومن شعر عبدالله بن دهيمش بن عبار هذه الأبيات بتغيّر طباع الناس :

قـال مـن يـفهـم مباهيـم الرمـوز ***يدرك المقصود والغايات ماهي
مـا يعسره حـل صعبـات اللغـّوز *** والخـفا والسر يعـلـم بـه إلاهي
ما نصرب يابس الضرع الغروز *** قـانع بمـد الولي والخيـر راهي
من تفكـر شاهد الوضع مهـزوز *** منـوة الـلي دالـهٍ والقلـب لاهي
كم شهم من العرب جنسه يعوز *** من زمانه ذاق لوعات الدواهي
صـارت الهـزلـة وسيلة للبـروز *** وأزدهر دور المهرج والفكاهي
شاطر الملسن على المنبر ينوز *** كنـه الصنديد خـواض الهيـاهي
الشرف والعـز اغـلا من الكنـوز *** والرذيلـة للفضيلـة مـا تضاهي
مـن حفـظ عـزه مكـرم ومعـزوز *** مستقيم ولا يهمـه هـرج واهي
النبيل الـلي على الجـزله يحـوز *** والدروب العوج ما فيها تبـاهي
من طمن ممشاه ما ظـني يفـوز *** يدرك الطولات من هام المناهي
ماشقيت براعي الطرف الغموز *** ولا تتبعـت المسارح والمقـاهي
لـو تعـّرض في بناطيـل الجنـوز *** بغـيـة الفاجـر تفطن كـل ساهي
زولها غطروف كنـه عـود لـوز *** البطن ملهـوف والهنـدام زاهي
هايف الخصرين مزبور البـزوز *** والنحروالخد تقل قلاص شاهي
الدروب العايـزه عنهـا محجـوز *** ولا خبـر للحيف يممت اتجـاهي
قلـتها وأعـتـز فـي عـز العـنـوز *** عنـد ربعي عارف مقدار جاهي
دام معي مـن الـرجال ثـقال روز *** ما يهم الكذب لو بالناس فـاهي
الحـذر يالـربع مـن نـفخ القـزوز *** نافخ الظرمة لقدر الشر طاهي
الهمـوز الـلي لخـلق الـلـه لمـوز *** وش علامه ما يطاوع كل ناهي
المـنـاكـد والمـجـادل مـا يـجـوز *** المجادل عيب مالي بـه مشاهي
أنـذر الـلي يودع اللابـه حـزوز *** ولا بعض القول ما ثار انتباهي

ومن شعر عبدالله بن دهيمش بن عبار العنزي هذه الأبيات مستغرباً التنكر لجد عنزي صليبه أسمه وائل موضح بالتاريخ ومحاولة أنتحال جد آخر لا يمت لعنزة بصلة :

هـو كيف نرضى يلفق جدنا الزايـف *** وشلون نقبل تصير العصبه أعصابه
ما نطاوع الـلي لوايـل جـدنـا عـايف *** من عـاف جده تحمّل لمز اللي عابـه
اسمع سوالف تسولف هب له طايف *** خرط بمجالس ولكن ما أفهم أسبابه
ماني من أقوالهـم زمـلان أو خـايـف *** واثـق ولا همـني مـن يفتـل اشنـابـه
اللي عـلى صاحبه حنشولي وحايـف *** وأن كان عال العدو ما أظن يشقابـه
نفاض جيبه يحـق الحـق ما أيسايف *** والحـق الأبـلج يـبي قـالات وطـلابـه
يا مـن تميّـز مـن الصـّداق والهايـف *** عن قولي انشد غـزيـر العلم نسّابـه
يشهد بجهدي جميع السامع الشايف *** أمجـاد دونـتــهـا تفخـر بـهـا الـلابـه
ماني سوات الذي بيـن العـرب لايـف *** يسري ويجـري يدور الفـود لجيابه
وأن خـم بـلعـه رجـع للبيـت متكايـف *** مبسوط وش لـه بابن عبـار وكتابه

وقال عبدالله بن عبار رداً على الذين يريدون أن نتسمى بجد ليس لنا :

حـنـا بـغـيـر اجـدودنـا مـا انـتسـمى *** حنـا عنـزة ما ننـتحل نسب قاسـط
يالـلي مسامعـكم عـن الحـق صـّمى *** ما تعـرض جدود العرب بالمباسط
الـزيـف يـبـطـل والحـقـايـق تـنـمّى *** والبيـت ما يبنـا عـلى غـيـر واسط
والـلي عـن المعقول بصره مغـمـّى *** طـاع الـذي مقـول لهـاتـه يـمـاسط
مثـل الـذي فـي مظـلـم اللـيـل ومـّى *** بالحندس الداجي يـدور المواسط

وقال عبدالله بن دهيمش بن عبار العنزي هذه القصيدة يسند على خلف المحدى الغبيني عندما ابلغه أنه قد سمع أناس في مجلس تخوض في كلام فارغ لا قيمة له وينوه عن بعض الجهلاء الذين يخوضون بالمجالس :

يا خلـف قـل لـلي تـنـاغـط تقـل بـط *** المحـرشيـن المورشين الملاهـيـط
ما جيـت منهـم واحـدٍ قـلت لـه قـط *** وش يطلبوني جعـلهم هفـت مقيـط
الـلي يـلـوم ومقصده حسد واغـبط *** لـو كـف شـره ما نبي لـه مصافيط
خطو الرجل توحي صهيله الياعـط *** يـزوم بالمجلس تقـل جـده سويـط
ولو تنصحه عـن الخطأ نـاظره نـط *** كنـه عقـاب الخيل أو كنـه الضيـط
يـبلـغ صـراريـره لسـانـه الـيـا مـط *** ويشبحك بعيونـه سوات المزاقيـط
ما يدري أن الظلف في غاربه غـط *** سوالفـه وسط المجالس خـرابـيـط
والـلي عـليـنـا ملسنـه بالخـطـأ لـط *** مقـول لهـاتـه يـلـزمـه دوم تربـيط
وش مقصد اللي ضدنا يرسم خطط *** عـنـده لتفـريق الجماعات تخطيـط
بيـن الـرفاقـة يفتـح خلول واشعـط *** وبـيت القبيلـة يفتقـه عقب ما خيط
ياقف بجنب اللي لحرف الغلـط خط *** ويفزع مع اللي يكتبون الشخاميط
الـغـث يـجـدع بـالمـقـمـات وإيـقـط *** ولايفـرطّون الناس بالجـزل تفريط
الـرس يبـقى رس مـا ينقـلـب شـط *** والخيش مايذري كما يذري الحيط
وين الرجال الـلي سلاطين واسلـط *** شيخان ولـدهـم العجاجـه مساويط
يـوم الـزمـن ما فيـه حكام واشـرط *** بسيوفهـم يـنحـون حـمـر البرانيـط
وين العـديم الـلي يسط العـدو سـط *** بالكون ما يخشى خبـيط المخابيط
وين الكريم اللي لجزل القـرى حـط *** يمضي زمـانـه بـيـن فهـقٍٍ وتقليط
وين الـذي بـه لاذ مـن طاح بأورط *** عن ضيم ولا من السنين المقاحيط
زالوا وفاز الـلي على مذهب الـزط *** وصار الفخر تقليد موضه وتفحيط
الـيـوم يـفـخـر كـل فـاسـد ومـنحـط *** وهـب السعد لمراقصين الشراميط

هؤلا من قوم خالف تعرف ....صح لساااانك يا بومشعل ولا هنت

مشكور على الطرح المميز



تقبل مروري وصادق ودي ,,,,,,,,,,,,,