قال الشاعر رجاء بن سويلم بن شداد البجيدي هذه القصيدة يسند على زميله عبدالله بن دهيمش بن عبار :
يا الـلـه يا جـالـي ظـلام الـغـداري ~ يا رب تحمينـا من الـبغي والشرك
يا الآدمي تمـضي سنين العماري ~ تمشي بأثر ناس وناس على أثرك
لابـد ما تـرحـل رحـيـلـك اجبـاري ~ بالواسطة والمـال ما أحـدٍ يـدبّـرك
ولابـد مـا تسفي عـلـيـك الـذواري ~ ويدعي لك اللي من دناياك يقبرك
آخـر مصيـرك للفـنـاء والـدمـاري ~ تـسعـى وصـيّـاد المـنـيـه يـداورك
ولابـد مـن بعـد الطلوع أنحـداري ~ مـابـه طريـق غيـر دربـك يحـّدرك
من عاش بالدنيا يشوف الغيـاري ~ ناس تناضر زين زولك ومضهرك
شعبـانهـا تمشي بعكس المجـاري ~ تـحتـار مـنـهـا والتـقـلـّب يـحيـرك
صار الرخـم يشره لصيد الحبـاري ~ والثعلبي يـا غـار على الغنم درك
عصرٍ بـه الثعـلب يضد الضـواري ~ يلعـب بقطعـان الغـنم ما ينـاضرك
يـقـول لـلسـرحـان ذيـب المساري ~ دورك مضى يا ذيب لزوم أوخرك
وأشوف صافي الجو يقلب غباري ~ حتى الختوش تحاول اليوم تقهرك
ودنياك لأهل المال وأهل العقاري ~ وأن قل مالك حتى الأنـذال تحقـرك
اليـا فـضت مخبـاك مالـك وقـاري ~ المـال خـلا عفون الأنـذال تـامـرك
من كثـر مـالـه بالـدراهـم يـمـاري ~ يصـد عنـك وصابره يفـركـه فـرك
الـلي بـسوق المـال بايـع وشاري ~ كـثـرت فلوسه وأرتـفع مـا يقـدرك
وأبعد عن أهـل البلبله والمـزاري ~ الـلي لجاجتهم عـن النوم تسهـرك
واللاش خـلـه لا يجي لـك مبـاري ~ ولا تعاشره لـو كان وده يعـاشرك
سـوالـفـه أحـلام لـيـل وهــــذاري ~ تجنبه مالـه سوى الخصر والترك
وأستثـني الـلي ياصلون المحاري ~ اللي مثل بليهان لحمله برك بـرك
مثـل الجبـال العـالـيـه بـه مـذاري ~ زبن الضعيف اللي على عاتقه درك
ينفـق ويبذل سـر وأيضاً جهـاري ~ لاجيت ناصي ما خصرك وتعـذرك
هـذاك بـوجـهـه للـمـروه شواري ~ الـلـه يـستـر مـن تجـمّـل ويستـرك
وأرسـل لأبـن عـبـار ليـه يجـاري ~ قـرايضه مثـل الـذهـب ما يخسرك
من مصنع القيفان ما هـو تجاري ~ اليـا طـمـك أمـواج تـلاطـم يعبّـرك
سيف عنزة لا سن وقت الطواري ~ يحشر جنون الأنس من قبل تحشرك
وأنا يابو مشعل على الحظ أداري ~ عسى السعادة طول الأيام تغـمرك



قال عبدالله بن دهيمش بن عبار هذه القصيدة رداً على الشاعر رجاء ابن سويلم البجيدي :
خـط لـفـانـي زاد فـيـه أفـتـخــاري ~ جاني جوابك يابو نواف وأشكرك
حيثك يا أبـو نـواف كاتـب وقـاري ~ والكـل يالمنعـور بالخـيـر يذكـرك
من ساس لابه يـوم قص الأثـاري ~ خيالهـم لـو كنت بالأسـر يضهـرك
عـزوة هـل البلها اليا صار جـاري ~ تدحـر عـدوك بالمعامع وتـنصرك
والمرجله ما هي بغلـض العتـاري ~ تدريبها من دون أعلمك وأخبـرك
مـن شام للعلـيا يـدوس الخطـاري ~ وأن طاب علمك بالمخاليق يشهـرك
هـرجك وكـاد وشفت كل المواري ~ وحيرني الـلي يا أبن شداد حيـرك
كما ذكـرت اليـوم عصر المصاري ~ الـعـز بـالـدولار والمـجـد بالمـرك
هـذي حقيقه وأنـت بالوضع داري ~ لاشك من رامك على المال ينفرك
الثعـلـبي لـو نـال منـصـب وزاري ~ كان أنت صاحبته نكربك ودهورك
ابعد عن المذموم غادي القطـاري ~ ترى الرزيل بصبغت العيب يمغرك
بعدك عن أهـل البلبلـه والهـذاري ~ يبعـدك عن كل المشاكل ويضهرك
والله مالومك لـو تجـوب البـراري ~ تبعد عن اللي من العرب ما يوقرك
تـنـزل بـوادي ما تشوف الكبـاري ~ ولا تسمع أصوات تلجك وتسدرك
ما تستمع تفحيـط جيـب السفـاري ~ لا فـر دولابـه مـع القـار له صرك
تسعى بسماهـيـد الديـار القـفـاري ~ وعشب الربيع اليـا تلفـت يبهـرك
مـابـيـن غـدران الـفـلا والخبـاري ~ تبحث عن اللي بالخمايل يصورك
عنـدك جليس لطيّب السلم ضاري ~ مثل أبو يوسف بالسوالف يخاشرك
صادق صدوق وبالعلوم استشاري ~ أن حرت شاورته وأن أحتار شاورك
تشرح لـه ظروفك وما كان جاري ~ موثوق تبـدي لـه خفـايا سرايـرك
أمـا قـصص ولا حـديـث البخـاري ~ لـه ينشرح صدرك وينسر خاطـرك
نطلب من المولى اصلاح الذراري ~ ياعـل ربـي يا أبـو نـواف ياجـرك
اليوم أشوف البـاز هـاب الكداري ~ يلبد مع فروخ الدجاجه ولـه كـرك
والنمـر يجفـل من نبيح الجعـاري ~ وجرو الثعل هو الفهد بينهم عرك
تعادلت حصن الـرمـك والشهاري ~ أنظر وعاين وش مع أيمنك وأيسرك
أنظر على الشاشه تشوف العواري ~ الغـرب وده بالعـماهـيـج يسحـرك
سلم الكفر سموه مضهر حضاري ~ وهـذا الـذي جسّر علينـا الدنمـرك
والسيف اللي ثـلمّ شطير الشباري ~ تـراه ما غـمد هاك السيف أبشرك
مـا ظنـي السكتون مثـل السواري ~ ولا لاعب الكوره مثل لاعب السرك

بشير العنزي الف شكر على ايراد شعر رجاء بن سويلم البجيدي ورد الشاعر الكبير
والمؤرخ عبد الله بن عبار ابو مشعل . شعر يحوي بين شطوره المعاني الكثيره . اللهم
وفق الشاعرين على درب الخير والسداد

الله الله

صح لسان البجيدي

وصح لسان ابن عبااااار


اسمحولي اقتطفت بيتين من بستانيين تحلن باروع الدرر



أنظر على الشاشه تشوف العواري ~ الغـرب وده بالعـماهـيـج يسحـرك
سلم الكفر سموه مضهر حضاري ~ وهـذا الـذي جسّر علينـا الدنمـرك








احترامي


سعد العلاطي

اشكر الشيخ عبدالله ابن عبار وردة على قصيدة الشاعر الشيخ رجاء بن سويلم البجيدي

ابيض وجه يابو نواف وصح لسانك والخال ابو نواف وبو مشعل كلن منهم غني عن التعريف

كلمتين نقولها صح لسان الشعراء الادباء الكرام

صح لســان ابو مشعل .. وصح لســان ابونــواف ...
ولاهاااان من نقلهااااا

الله الله الله
ماقصرت يابونواف وابن عبار يستاهل

اشكر ابو نواف على هذه الابيات كما اشكر شاعرنا واديبنا ومؤرخنا الكبير ابو مشعل