(ما استجد من شعر أبن عبار في شهر ربيع الأول عام 1439هـ )

قال عبدالله بن دهيمش بن عبار العنزي هذه القصيدة يثني على الرّجل الفاضل سعادة المهندس
عبداللّطيف بن حمد بن صالح الخطيب رئيس بلدية البصر سابقاً ورئيس بلدية المذنب حالياً :
الثـنـاء يستـاهـلـه عـبـداللّـطيـف *** حيث أبـو نـواف ما نجحد ثنـاه
سامي الأخـلاق والشهم العفيـف *** جـامعٍ حـكمـه وفطنـه وانـتبـاه
أشهـد أنه عاقل ونـزه وشريـف *** فـعـلـه المشهود يـرفـع مستواه
الذكـاء والفهـم والقـلب النظيف *** الله الـلي مـن كرم فضله عـطـاه
فيه ثقـل الـروز مـا وزنه خفيف *** بالوزن أثـقـل من جبـال السراه
يشتغل باخلاص فهمان وظريف *** من اخلاصه بالعمل ماحدٍ شناه
مـا تهـاون بالعـمل لـوهـو كليف *** ريس ومأمون والمنصب زهاه
كـل مشروعٍ يخـطّـه لـه يضيـف *** لـبّى مطلوب المواطن مـا نساه
البصـر حـدايقـه صارت مصيف *** طـوّر البلـده وعنـد الـلـه جـزاه
الحـدايـق والمشاتـل والرصيـف *** والدروب اللي تخصص للمشاه
كـل ما سوى بشبح العين شيـف *** يبشر المذنـب بـعـزه يـوم جـاه
حـاذق وشاطـر يشابه حـد سيف *** عـالي الهمّه وفزعت من نخاه
طـبـع أبـو نـواف بالـلّازم يقيـف *** فرحت العاني وعـز اللي نصاه
دوم أبـو نـواف للناصي سعيـف *** يا عسى رب الملأ يصلح ضناه
للمـراجـل شـاد بالضـلع المنيـف *** لـه مخيّم في شفـا الطلعه بـنـاه
للضيوف الوافـده حطـه مضيف *** وتجتمع بـه كـل ربعه واصدقاه
بالكـرم والجود جـدّه له وصيف *** سار مع منهج عمامه واقـربـاه
بالجـفا يـوم البلـد مـا كان ريـف *** من لفاهم ضيف يبشر في قراه
من نوادر عزوتي مـاهـو حليف *** يشهد الله صاغ في قلبي غـلاه
من محددت الجمل ريف الضعيف *** عادته يكـرم خـويـه واقصراه
من غريب الـدار مروين الرهيف *** باللقـاء رجالهـم يقهـر اعـداه
مـن قـبيلـه مـا يـعـرفـون النكيـف *** مـن يـلـوذ بنـزلهم يبلغ مـنـاه
يـنـزلـون بـخـالي الـدو المـخيـف *** والقـفاري ذودهم داج ورعـاه

قال عبدالله بن دهيمش بن عبار هذه القصيدة من شعر الحكمة وهي نصيحة
ولا تخلوا من بعض المعاني يقول :

انصحك ياللي تكسب الفود من غش *** السّحـت مـا فـادك رصيـده وكاشـه
خلك قنوع بـمـا اقسم لـك وبـه عش *** الخـلق رب الكـون يضمن معـاشـه
يرزقك الـلي هـطّال مـزنـه اليـا رش *** يسقي ثـرى الدار المحيله طشاشه
الطيـر يصبح خامص البطن بالعـش *** ويمسي بدين القاع ينبش خشاشه
لو أنت تسكن في خرابيش واعشش *** لا تطـلـب المذموم لـو كـان بـاشـه
لـو تزبـن الأنذال تـورم لهـا اخشش *** وعظم الهلامـه مـا يفيدك عـراشـه
وأن شفت من دنيـاك نشبات وابلش *** ونـور الأمـل مـا عـاد يلمع فـلاشه
لا تـنـطـوي لاشـك مـش القّـدم مـش *** وخاو الصديق الـلي يعـزّك وماشه
أنـص الرفيق اللي اليا جيت لـه بش *** هـو فرحة الـلي خبّـث الهـم جاشه
ولا تقرب الـلي كل ما غبت بك حش *** لـو كـان رحّـب بـك ومهّـد افـراشه
أن جـاك كـنّس جـرتـه قـشّـهـا قـش *** وأنفض فراشك واغسله كان ناشه
الـلي العـلـوم الـزايـفـه لـشـهـا لـش *** ولـو تنصحه مغرور يصعب نقاشه
يـنـقـل نـمـانيـم السوالـف تـقـل دش *** وينشر صدى حقده على كل شاشه
طـبـايـعـه نـمّـام وامـعـقّـد اشــــوش *** حـيثـه بـرع بالظلـم والعـيب حاشه
من عاث بعراض البشر قيل لـه كش *** كـوبـان حـظّـه داعسه فـي كـلاشه
حكي المسفّه في عقول العـرب خش *** حـارت بـه الأفكار والـراس داشـه
بعـض الرجال جـراب لـو تنفخه فش *** وش عـاد لـو يكبـر سريع انكماشه
الطـيـب مـاهـو فـي قصاليم والشش *** الطيـب كـايـد والمـراجـل غـبـاشـه
والـداب الأرقـط دق راسـه اليا وش *** قـبـل تـنوشك شـوكـته فـي مهاشـه
والـرس الـلي بالقـايلـه منبـعـه نـش *** مـا يـارد الظامي عـلى جـال طاشه
وأرض الهيار اليا بـدأ سطحها هش *** الساس مـا يـثبـت وقاعـه هـلاشـه

قال الشاعر أحمد بن حمود العوفي الحربي هذه الأبيات يسند على عبدالله بن دهيمش بن عبار العنزي :
الشعر وهبه ونبض جاش وهوجاس *** وانـا بمـوهـبـتي قـويـن احساسي
بـنـات فـكـري كـل مـا هـب نـسنـاس *** صغت الفـرايـد والجزيل الحماسي
ارفع وقار الشعـر عن مـدح هـلاّس *** للطـّيـب نـاس ولـلـتـصنّـاع نـاسـي
امـدح كفو وانصى بعيدين الأرماس *** واقـصر عن الرديان مدحي بياسي
عـبـدالـلـه العـبـار يا طـيّـب الساس *** القـرم منصى الـلي به الوقت قاسي
حـرن ولـد حـرن وبالطـيـب نبراس *** يـقـدح طنـاخه وأن خسأ كل خاسي
اليا برد وجه الردي ثـم عطأ ساس *** شيخة رخى ضاعت بموقف تكاسي
ازبن على الـلي ما يوردك الأفلاس *** حـرن لـبـس تـاج المـكـارم لـبـاسي
زحلن بطيبه ينجلي كرب واعماس *** وهـيـلـع يـمـيـن مـا تـمـد الطـفـاسي
عبدالله المـولى يجيـره مـن البـاس *** ويعـيش راسـك جـيـت ينخاك راسي

قال عبدالله بن دهيمش بن عبار هذه الأبيات جواب لأبيات أحمد بن حمود العوفي الحربي :
يا أحمد بن حمود يا صلب الأمـراس *** اشكرك يالمنعـور وأرفـع حساسي
حيثك سلايل حـرب والعـرق عسّاس *** أجـواد طـاريـهـم يـزيـل العـمـاسي
أرسلـت لـي منظـوم بسطور كـرّاس *** وأعـطـيـك بـالـواقـع كـلامٍ أسـاسي
بالنـاس تـاجـر خـزنته تملأ الأكياس *** من كثر ماله مـا عـرف لـه مقاسي
لاشك لـو مالـه كـثـر رمـل الأطعاس *** ما يوم جيت أبي اشتكي له فلاسي
من يعترض له يا فتى الجود لولاس *** يشكي عـلى الـلي يعتلون الكراسي
ومـن ضايـقـه تعـقيـد حـاقـد وبلاّس *** يزبن عـلى الـلي بالدوايـر سياسي
واللي شكى فكره من العوز محتاس *** يـبـحـث لـعـل المقـتـدر لـه يـواسي
شروى جناب حجاب ولا أبن هبّـاس *** مـا مـنهـم الـلي للمواجيـب نـاسـي

هذه الأبيات نشرها عبر توتر احد القراء باسم فهد يقول :

الـلـه يبيـّض وجـه ابن عـبـار *** الطيـب الـوافي رفيع الشان
يقـول قـولاً مـا عـلـيـه غـبـار *** ويـثبـت الأقـوال بـالـبـرهـان
بـك نفـتخـر يا ماكـر الأحـرار *** يا شـاعـر الـويلان يا بليهان
يا مهندس التاريخ والأشعـار *** يحفظك ربـي خـالـق الأكوان

جواب عبدالله بن عبار على أبيات فهد :

قـريت منظومك عساك مجـار *** لـك الشكّر يا نـاظم القيفـان
عـسى فـداك الـخـايـن الغـدّار *** الخايب اللي وسه الشيطان
خطو الذي به نزعة الأشرار *** ما عنده ألا الكذب والبهتان
ما ينصف ألا صفـوة الأبـرار *** ولا الردي من عادته طعّان

صح لسانك ابومشعل

في طريقي من القصيم إلى الرياض مريت على مخيّم الرجل الفاضل مهنا المزروعي في فيضة نوره بين الرياض والمجمعه بدعوة منه وتشّرفت بمقابلة عدد من رجال المزاريع من الذين جاورتهم سابقاً واتحفني الشاب عبدالله بن فراج بن منصور المزروعي بأبيات ترحيب وكان والده من جيراني سابقاً ومن زملائي وقد اكرمني الرجل الفاضل مهنا حيث أنه كعادته في أكرام الضيف وقال عبدالله بن فراج المزروعي هذه الأبيات يسند على عبدالله بن دهيمش بن عبار :

يـا مـرحـبـا بـعـداد هـطّـال الأمـطـار *** يـا حـي أبـو مـشعـل ويـا حـي داره
بـك يا هـلا وأهـلين بعـداد الأشجـار *** واعـداد مـافـي الـفـيـافـي حـجــاره
لـك من قـديم الوقت منـزل ومقـدار *** يا منـومس الـويـلان سـر وجـهـاره
في مجلس مهنـا هـلا يا أبن عـبـار *** في صـدر بـيـتٍ مـا طفـت فيـه نـاره
الـيـوم أبـن فـراج من شوفتـك طـار *** كـن القصـور الشـاهـقـه بـاقـتـداره
يـامـا درّست الشعـر لكبـار وصغـار *** ومـن لا تعـلـّم مـنك يقـصر اشعاره
لـنـا الفخـر يا طيّـب الصيـت والكـار *** للعيـن شـوفـك سـعـدهـا وازدهـاره
واختامها صلـوا عـلى خـيـر الأبـرار *** شفيعـنـا يـوم الـضـنـك والـحـراره


وقلت هذه الأبيات جواب لأبيات عبدالله بن فراج المزروعي وقد أشرت لموقف الرجل الفاضل مهنا حيث سبق وأن دفع مليون ريال في دية الوثيري الذي كان مطلوب في ستة وثلاثين مليون وهذا البذل يستحق الثناء وأجره على الله :

مـشكـور يـانـاظـم عـذيـات الأشعـار *** عبـدالـلـه الـلي سلـم الأجواد كـاره
رحبـت بـي فـي بيت ممدوح الأذكار *** عـنـد أبـو هـاني يـوم جيتـه زيـاره
الـنـادر الـلّـي بـلازم الـرّبـع مـا بـار *** يـبـذل حـلالـه مـا يـعـرف احتكـاره
يـوم الوثيـري داخـل السّجن محتـار *** مـن جـاد بالمليون شاعـت اخبـاره
يا بعـد أبو هاني عـن العيـب والعـار *** عـنـد القبـيـلـه مـنـزلـه بالـصـداره
وأنتم يا أبن فـرّاج من عـزوه خيـار *** وأبـوك يـفـرح بــه خــويـه وجـاره
فـراج ضفـر وفي طريق الفخر سار *** فيـه الشهامه وأنـت سرت بمساره
وضنـا مزروع أقولها سـر واجـهـار *** بـهـم الصّخى والمرجله والجساره