قصيدة الشاعر طراد بن مطرود الشمري ومجارات عبدالله بن عبار - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

01-15-2019, 09:11 AM

مجاراة عبدالله بن عبار للشاعر طراد بن مطرود الشمري الذي يثني على عبدالله سمير الحنتوشي

قال الشاعر طراد مطرود الشمري يثني على الرجل الفاضل عبدالله بن سمير ابو ثامر يقول :

الـلـه يـكـثـر خـيـركـم يـا أبـو ثـامــر *** فـطــور سـويـتـه يـعــادل ولـيـمــه

واطلب يابو ثامر عسى البيت عامر *** وعليكم الصحه عسى الـلـه يـديمـه

وطيبك طبيعي ما انت بطيبك مغامر *** وتـواضـعـك زادك وقــار وقــيـمــه

ومثـلـك يا ابـو ثامـر مـقـدّر وتـامـر *** ومتمسكن بسلوم اهـلـنـا القـديـمـه

وانـا في مدحـك مـا اجامـل واطامـر *** ولي الشرف بمدح الرجال الفهيمه

والـكـذب والـنـفـاق لـراعـيـه دامـر *** ولا يكـذب الـلي يستحي وفيه شيمه

ولاخير بالـلي عـلى الباطل يحـامـر *** ومن تبع هوى النفس طاح بجريمه

والعـقـل يـمنـع صاحـبـه ما يـزامـر *** وأبن آدم لـولا العـقل مـثـل البهيمـه

وعن ساعده من يطلب المجد شامر *** ومـن كـد وتعـب جاب فود وغنيمه

ويـا غـر خـلـك غـر وافـزع لـنـامـر *** تـفـاهـمـوا لا تـضـعـفـون العـزيـمه

ولا تـوقـدون النـار والجـمر جـامـر *** تـصـبـح عـواقـبـهـا عـلينـا وخيمـه

تـكـفـون لا تـطـيـعـون كـل امـتـآمـر *** عـودوا لـلسّنـه وألآيـات الكـريـمـه

ويا مـسلـم لا تـصيـر للشـر ضـامـر *** خـف من غـضب ربك تفوز بنعيمه

والظّـلـم مكـوى نـار للقـلـب سـامـر *** والـلي مشى بالظـلّـم ربّـه خصيمـه

ويالله عسى وبلن من المزن هامـر *** يـسـيّـل الـشـعـبـان مـن نـو غـيـمـه

وتـربـع الــوديـان لاهــه وحـامــر *** ديـار الـرجـال اهـل الـنـوايـا السليمه

قال عبدالله بن دهيمش بن عبار هذه القصيدة مجاراه لقصيدة الشاعر

طراد بن مطرود الشمري

الذي يثني بها على عبدالله بن سمير أبو ثامر :

جـانـي قـوافـي مـثـل نـظـم المـرامـر *** من قيل أبن مطرود يعجب نظيمه

يـا طـراد شـوقـني مـديـح أبو ثـامـر *** قـرم العـيـال الـلي افـكـاره حكيمـه

ماهـو عـن الماجوب مـلبـد وخـامـر *** يكـرم ولـو شـان الـزمن ما يضيمه

أبـوه مـن طـيـبـه لـضـيفـه يسـامـر *** ماهو من الـلي مجلسه مع حـريمـه

شهم ونقي ماهو للأصـحـاب قـامـر *** ولاهو عشير أهل الخصال الذمـيمه

في عصر شـح الكيل يمـلأ المخامر *** ويـنفـق ويـبـذل بالسنين الـوخـيمـه

يا طـراد أنـت من الرجال الغشامـر *** غـلبـا الطنايا اهـل الفعـول العظيمـه

شمـر اليا ركبـوا عـلى كـور ضامـر *** يـوم الفخـر فـوق البـكّـار الهـميمه

ستر الذي تنسف عـلى المتن دامـر *** فرسان في وقـت المعامع عـديـمـه

من قبـل حكم أهـل الحسا والمعامر *** شـمّـر بـزيـنـات الـمـرابـع مقيـمـه

لـهـم مضايـف مثـل سـوق التـدّامـر *** لاحـل بالـعـالـم مـجـاعـه وعـيـمـه

العـود الأزرق فوق سطح المجـامـر *** والبـن الأشـقـر والهـلا والحشيمه

مـا سبـب شهرتهـم طبول ومـزامـر *** لاشك في حدب السيوف الصميمه

والـحـمـد لـلـه طـايـعـيـن الأوامـــر *** ولا نسمـع الـلي ينقـلـون النميـمـه

وبعض البشر يشبه مجير أم عامـر *** نـيبـانـهـا خـلّـت عـظـامـه رمـيمـه

ولاهو بخيـر الـلي لـه إبليس ذامـر *** يـرمي حـليفـه فـي وقـود الجحيمه

نظراً لصعوبة القاف فقد تكررت عدة كلمات في لفظ واحد وفي معنا مختلف :
قال مطرود : واطلب يابو ثامر عسى البيت عامر جاء في معنا مطرود عامر من العمار
وقلت : وبعض البشر يشبه مجير أم عامـر وفي قولي عامر اسم مكرر ويسبقه كلمة أم وأقصد الضبعة
وقال مطرود : والـكـذب والـنـفـاق لـراعـيـه دامـر قصد مطرود دامر من الدمار
وقلت : ستر الذي تنسف عـلى المتن دامـر والدامر لباس تلبسه النساء
وقال مطرود : ويا مـسلـم لا تـصيـر للشـر ضـامـر وهو يقصد الذي يضمر الشّر
وقلت شمـر اليا ركبـوا عـلى كـور ضامـر أقصد بالضامر الهجن من الأبل
أما معاني بعض مواقف بيوت قصيدتي : 1- المرامر جمع مرمر وهو من الأحجار الكريمه 2- قامر يعني ليس قمّار يقمر أصحابه 3- المخامر مفردها المخمر نوع من وعاء مصنوع من خشب وهو كبير الحجم توضع به العجينة التي تخبز للضيوف وأهل البيت 4- الغشامر مفردها غشمري وهي لغة مكتسبه ومعناها مدح حيث يقال فلان غشمري أو فلان وليده 5- المعامر مفردها المعمّر وهم أسرة من تميم كانت تحكم العيينه وما حولها من بلاد العارض 6- التدامر المقصود أهل مدينة تدمر والمقصود أن بيوت شمر واسعة مثل سوق تدمر