قال الشاعر عبدالله بن بداح بن عبلان السهلي هذه القصيدة يسند على عبدالله ابن دهيمش بن عبار العنزي :
يا أهـل البطين والـلـه العـظيـم ** بالغـلا ما معـكم بقـلبي رديـف
حـبكـم بالـقـلـب جـديـد وقـديـم ** لو أوصف حبكم ماله وصيف
وأن بديت السين يلزم رد جيم ** والصراحه يالنشاما حـد سيف
قيـل أبـن عبـار بالديـره مقيـم ** هل مقامه جار أو يكون ضيف
سكن بالبطين مـن بـد القصيم ** وأعتبرمسكانها افضل مصيف
داركـم لاهـب ذعـذاع الـنسيـم ** كل منا صوبها يهـرف هـريف
والمعـنى جـالـهـا يـرزم رزيـم ** والموده لفـت قـلبـه لـف ليـف
حيث أبن عـبـار رجـّال حشيـم ** عاقـل وثقيل مـا وزنـه خفيـف
واقردات حظ من حطه خصيـم ** الستر يا رب والطف يا لطيف
خابره هداف يضرب بالصميـم ** والمسيطر دوم كلن لـه حليف
أبو مشعل ما وراء فهمه فهيم ** شاعر وفاهم وضميره نظيـف
أبو مشعل شاعـر وقـلبه سليم ** النزيه الفاضل الجزل الشريف
يفهم المقصود ما عقله غشيم ** يا جعل يفداه من فكره قصيف
أشهـد أنـه في مسيره مستقيم ** ليت لـو حطوه بالهيئة عـريف
لـكـن الشعـار واحـدهـم يهـيـم ** لـو يهلل بالشوارع والرصيف

قال عبدالله بن عبار رداً على الشاعر عبدالله بن بداح بن عبلان:
يا نديبي شد اللي مثـل الظليـم ** أوكما الشيهان توحي له رفيف
قم سريع وجهز الجيب الهميم ** خـذلـك مرافق وخله لك سعيف
حـرّك الفكسار من حي النظيم ** ولا تمل من السفـر خلـك عنيف
اسهج الفيحا شمال من التويم ** وعب فـل اليا تعـديت الصريـف
ومـر بـبـريـده وغـادر لا تقيـم ** وحـط حايـل باليسار ولا تقيـف
وأن زمالك بالنظر ضلع العليم ** قـد عديت النفد والرمل الكثيف
توصل سكاكا قبل وقـت العتيم ** اقـلـط وتلقـا المفطح والـرغيف
تلفي اللي يذبح الكبش الضخيم ** عنـد عبدالله تجد ونسه وكيـف
وصل المكتـوب للقـرم الحليـم ** به مرد القاف والقـول الظـريف
نعم بأبـو بـداح نقاض البريـم ** من قبيلـه تـنـزل الـدو المخيـف
السهـول الـلي يفكون الجـريـم ** يحتمونـه بالمشـوّك والـرهيـف
خصمهم يوم اللقا يرجع كضيم ** الحمرمن ضربهم ينزف نزيف
عسى من عقبك بجنات النعيـم ** أخبـرك يالقرم بالهرج الطريف
يالزميـل اقسمت بالـرب العليم ** البـطيـن أحـبهـا الحب العـفيـف
صافي نسناسها يبري السقيـم ** يعلم الله عندي أفضل من جنيف
بالسموم اللي مثل صلوالجحيم ** هب فيها من هوا الذعذاع هيف
يـا عـسى يـعـلـهـا وداج غـيـم ** بأول الوسمي بهبـات الخـريـف
ما سكن فيهـا عـتـل ولا زنـيـم ** ولا نزلها من يسيربدرب حيف
مـا نـزلـهـا لا رزيـل ولا لـئيـم ** وأنشد أبو بداح ولا أنشد خليف
هي مقـر النادر الحـر الصريـم ** ما يـوكـر كود بالضلع المنيـف
هي مقر العادل الشهـم الكريـم ** متعـب الصنديد للجيـران ريـف
أبو فهـد يزبنه مـن شاف ظيـم ** عامـر ديـوان بـيتـه والمضيف
العديم اللي تسلسل من عـديـم ** الأميـر المقـرني زبـن الضعيف
العريب اللي من أنجال الزعيم ** من احـفـاد سعود شيال الكليف
كل منهم صاحب القلب الرحيم ** بـه مـعـزه للمحـرول والكـفيـف
مثلهـم هيهـات ينجبن الحـريـم ** بالفخـر تاريخهم ما فيـه زيـف
طوعوا من كان شيطانه رجيم ** من بحر جده ليا شرق القطيف
ومن بحر جيزان اليا ديرة سحيم ** ومن مشاريق العقيرليا طريف

وقال الشاعـر عبدالله بن بداح السهلي هذه القصيدة يثني على سمو الأمير متعب بن فهد بن فيصل الفرحان آل سعود ويسند على زميله عبدالله بن دهيمش بن عبار العنزي :
يـا نـديـبـي دام كـلـن فـي مـنـامــه ** حضّـر الفـكسار بالمـمتـاز عـبّـه
الفـكسار الجـيـب قـطّـاع المهـامـه ** بـايـعـه لـو قـيـل غـالـب انغـلـبـه
يطـوي المسافـه تـقـل طـي خـامـه ** عقب الجمس اللي به دبـه ودبـه
بالسفـر مـنـوت الـلي ولـّم اولامـه ** وبـالـمـزايـن والـلـه أنـه ينصبّـه
لا شافـه المفـلس جـدواه النـدامـه ** ماله ألا حامض ما يصلح اعنبـه
سـايـقـه يحـس بـغـرور وعظـامـه ** بالفخـر والعـز يشعـر مـن ركبّـه
صك بابـه والأمـان أقـفـل حـزامـه ** كـل مسرى يـمدح السراي غـبّـه
قبل فجر الصبح ما يجـلي ظـلامـه ** مع طريق الجوف حايل شرق جبه
في ما مضا السير ماخالف نظامه ** واليوم أطرب للجرس صوت المنبّه
منتـوي وقـلـبي المطـراش هـامـه ** للبطين هجـوس قـلبي مشرهـبـه
للقصيـم وغـايـة القـلـب ومـرامـه ** البطـيـن وزبـدت الموضوع لـبّـه
أبـو فـهـد واجـب عـلـيـه سـلامـه ** بـيـن حـيـن وحيـن يلـزمني أنـبـّه
أبـو فـهـد قـمـة المـجـد وسنـامـه ** المـثـل بالطـيـب مـتعـب يـنظـربـه
متعب المراجل من روس الزعامه ** منصى من تلولس حبله وانتشبه
الفخـر والطيب في كـفـه خـطامـه ** من هاك الضرغام في راسه مصبّه
في محل أبوه وقـايـم فـي مقـامـه ** والتـواضع فـيـه مـن توفيـق ربـّه
من عنالـه شاف عـزه والكـرامـه ** أشهـد أن الطيب ماعونـه شـربّـه
المراجـل نصب عـينـه واهتمامـه ** والسعـد يـبشـر بـه الـلي انـتـدبـه
من رجال شداد ما تركب مسامـه ** بـيـوم تطحـن المـعـارك كـل حـّبـه
يوم دور كروش مع بنت النعامـه ** لـهـم بالأمجـاد مقـضب يـنقـضبـه
يـوم هاك الوقت فتلـه وابـتـرامـه ** ولـعـّوا الـنـار بـراس الـلي يشبّـه
مار أبا أرجع للبطين أعطيه زامه ** دام قـلبي فـيـه هـاجـوس حضبـه
البـطـيـن أهـلـه مـنـبع للشـهـامـه ** زاد في قلبي من حب أهـلـه حبّـه
كـنـهـم لـلافـي أهـلـه وعـمـامـــه ** شف بلدهـم كيف من زاره رغـبّـه
شف أبن عبار وين أصبح دوامه ** سبحان الـلي غـيّـر هـواه ومهبّـه
عندهم يمكن يبي يلبس اعمـامـه ** وأن لبسها جـاك عـلمي ثـم ضبّـه
كان صار مؤذن المسجد وأمامـه ** يصعـد المنـبـر ومـن ثـم ايخـطبـّه
يعـلـم الـلـه مـا نـشكـك بـلـتـزامـه ** مـثـلـه عـارف واردتهـا والمغبّـّه
خـابـرينـه فـوق مفهـوم الفهـامـه ** وكـل جـحـر عـارف دابـه وضبـه
لو ماخبر القاف بسطه وانسجامه ** والـله أني ما العب طاروق لعبّـه
هـايـبـه لاشـك جـسـرنـي كـلامــه ** الرجـل محسوب ومثلـه ينحسبّـه
محترم ويفـرض عليـك احتـرامـه ** قـول نـعـم محصلـه والـريـع ذبّـه
مـدحـت الممدوح مـا فيهـا ملامـه ** والـردي مـا نـمـدحـه لكـن نسبّـه
يا بحـر ما كـل مـن يجـيـه عـامـه ** كـم سـابـح شـالـه المـوج وقـلبـه
ما يـداني الموج قـلبي والتـطامـه ** مير والله لا أدفعه في وسط غبّـه
أن عـبـر هـنيت حـالي بالسـلامـه ** وأن تعـثـّر قـلت هـويـه أو مطبّـه
دام العـرب قـالـوا الـذلـه رخـامـه ** من نهاني قـلت كـب الهـرج كـبـّه
أما النجاح اللي بـه زايـد عـلامـه ** ولا هـفـت الـلـي حـصـانـه هـذبـه
كانـهـا غشامـه قـولولـي غشامـه ** والغشامه فيها الطب يضيع طبّـه
كان مزح المسلم يجرح له صيامه ** تـبّـت يـديـن أبـو لـهـب ثـم تـبّــه

قال عبدالله بن دهيمش بن عبار العنزي هذه القصيدة رداً على قصيدة الشاعر عبدالله بن بداح البرازي السهلي :
راكـب الـلـي تـو ورد شـد عـامـه ** منظـره مرمـوق من شافه عجبـّه
من مصانع طوكيو مـا فـك جامـه ** صنعت الـلي أتقـن الشغـل وتعبـّه
صانـعـه لبسـه قـرافـت وبـجـامـه ** يشتغل باخلاص مـا يثـني اركـبّـه
دوم يعمل ما جلس عـنـد المدامـه ** ولـو تـغـيّـب يـوم مـديـره يـدبــّـه
صمم اللي هـام به فكـري ورامـه ** يـبهـج الخـاطـر اليـا ولـع اسطبّـه
كـم واحـد جـر ونـه حـيـن سامـه ** مـهـجـتـه كـن الـوقـايـد تـلـتـهـبّـه
حـّرك الفكسار من شرق الثمامـه ** مشمل ويسبح مع الـريـح ويعـبـّه
الضحى سافـر مـن بـلاد اليمـامـه ** بالصحـاري والجبـال المشرعـبّـه
يوصل اللي عسى يفـداه الفـدامـه ** حضرة أبو بداح عنـده دوم شبّـه
وأن لفاه اللي صدع راسه وخامه ** فـاولـه فنجـال يجـلي غيض لـبّـه
وحين يلفي للحراج أرسل غلامه ** بالخفا من شان ضيفـه مـا ايتنبـه
لـو حلف ضيفه وحرّم عن طعامه ** يجـبـره بالحلـف مالـه مـا حسبـه
وجاب له عيتـا توصف بالجسامه ** ما تـقـل هي ضان للحاشي تشبّـه
قـلـط المـقسوم والـحـايـل ايـدامـه ** لـو ما هو رز البشاور قـلت تـبّـه
عـادت الطيّـب بشاشـه وابتسامـه ** عـن ضيوفـه ما قـفل بابه بضبـّه
الصخي مـا همـه المـال وحطامـه ** وأن مدحته بالفخر شاش وطربّه
يا سمي في مبتدأ القاف وختـامـه ** بـالـكـلام الـزيـن تـزداد الـمـحـبّـه
الـوداد عـراه مـا جـاز انـفصـامـه ** ولا نصير لفرقت الأصحاب سبّـه
من سمين القول ما قـافي هـلامـه ** والمعـاني ناخـذه من راس صبّـه
الـبـري يالقـرم مـا جـاز اتـهـامـه ** قالهـا الـلي مـا يظـم العـيب عـبّـه
صاحب العلم الردي من جاه لامـه ** والضمير أن كان صدى من يربّه
من جلس بالعـز يشعـر بالفخـامـه ** ومـن تـدنـا لـلـردى نـال المسبّـه
من ورد هـداج ينهـل من جمامـه ** ومـن ورد لـلـرس مـا يـمـلأ قـربّـه
القـطـامـي مـا يـوصـف بالحمامـه ** والسيـوف الـداثـره مـا يـنحـربّـه
يـا زمـيـلـي مـا اتـذرى بـالثـمـامـه ** والديـاجى يالـبـرازي مـا حـطبّـه
الحشيـم الشهـم بـالـغ بأحـتشـامـه ** والـردي كـوبـان هـبّـه ثـم هـبــه
من كسل هيهات مـا حقق احلامه ** ولا فـرح بالمال من بـاق وهربّه
التـقي يفـرق حـلالـه مـن حـرامـه ** ومن فهم علم الفرايض مارسبّه
كان تنشد كيف أنا اخترت الأقـامه ** بالبطيـن وكيـف ضميري رغـبـه
بالبطين مجـاور حـمـود السلامـه ** ديـره مـن بـلادنـا مـا نـغـتــربّـــه
صار بالديره له أصحاب ورحامـه ** لا تـقول السوق يمدح من كسبّـه
لـو تجـوّل من تـبـوك اليـا تهـامـه ** مـا تحصل كـود الـلي ربك كـتـبّـه
بالبطيـن رجـال مـا فيهـم خـمامـه ** دارهـم لـولا غـلاهـم مـا نـطـبـــه
يا عسى يغشاه ديـم من الغـمامـه ** ويا عسى سحب الهماليل اتحلبـه
هل غيثه والطهى ربـرب ركـامـه ** ساقه المولى على البيـداء يصبّـه
تـريـف رياض الفيافي والعـدامـه ** والنـوار بـكـل دعـب وكـل خـبّــه
دار أمـيـر الجـود بالعـلـيـا مقامـه ** متعـب اللي كـل من عرفـه يحـبّـه
فوق مشموخ العـلا يبـني خيـامـه ** والهبوج الطامنـه مـا يقـترب بـه
هـو سليل الـلي يقودون الجهامـه ** شـيـدوا فـي قـمـة الأمـجـاد قـبّــه
الضـديـد اليـا تعـاوج هـم كعـامـه ** يـوم مقبـاس الفتايل من اعـطـبـه
جـدهـم للـمعـتـدي جـّرد حسـامـه ** ومـن تمادى بالخـطأ رأسه يجـبّـه

هذه القصيدة قالها الشاعر عايد بن حطاب الغضوري العنزي يسند على عبدالله بن دهيمش بن عبار :
هـم يـدور بخـافـقـي يـا أبـن عـبـار ** والله يا أبو مشعل حداني عن النوم
نوب يصير بثـومـة القـلـب مسمـار ** ونـوب يصيـر بعيشتي تقـل ديمـوم
ونـوب يـنسيـني لـزومـي والأفـكار ** ونـوب تـقـل دنـيـاي غـدابـهـا قـوم
يا أبن دهيمش ضاع فكـري ويندار ** صارالهدف من دونه علوم وعلوم
اليـوم صارت فـي سـروات وأدوار ** أسكت وهمي داخـل القـلـب مكتـوم
أبـيـك تـفـزع فـزعـة الـجـار للجـار ** قصير بيـت وصار بالحـق مضيـوم
أخبرك بالـلي صار يا نسل الأخيـار ** يا مـؤلف قـول من الـوقـت معـدوم
أطلعت فعل اللي وطوا حصن ذيقار ** زبـن الدخيل الي من الوقت مظلوم
يا صـقـر يـا حـرٍ عـلـى كـف صقـار ** حر صيود اليا شهل وأدرج الحـوم
واخـتـامـهـا مـني نـواويـر وأزهـار ** ورد وريـحـان وعـطـرٍ ويـشـمــوم
وصـلاة ربـي عـد مـا طـايـر طـــار ** عـلى النبي اللي من الذنب معصوم

قال عبدالله بن دهيمش بن عبار العنزي هذه الأبيات رداً على الشاعر عايد بن حطاب الغضوري العنزي :
قال الـذي من صافي الشعـر يخـتـار ** مـن نظم بدعي عبّـر الفكر منظوم
رداً عـلى الـلي كـزلي عـذب الأشعار ** عايـد بن حطـاب من خلفـة قـروم
عايد شكا من الهم شاف الزمن جار ** ودنيا الشقا من جورها كلنا كظوم
يالغضوري ماني مـن الجهـد ذخـار ** ومن اجتهـد يالقرم يسلم من اللوم
لاشـك مـالي يا أبـن الأجـواد معبـار ** مـن دون مطلوبي عراقيل وعقـوم
لـيـه ثـلاث سـنـيـن يـالـقـرم محتـار ** مـثـلـك أدوّر لـلـذي عـنـدي رقــوم
اصـبـر عـسى يحلهـا والـي الأقـدار ** والـرزق عند مكوّن الكون مقسوم
مثلي ومثلك بـه ألـوف مـن الأنفـار ** الـكـل يشكي الهـم والقـلـب مكلـوم
الـلـي مـنـاصبهـم رفـيعـات واكـبـار ** غـدوبـهـا لـو هـم هـلابيج ورخـوم
كـم واحـدٍ جـيـتـه وحصلت الأعـذار ** مـع الأسف فرخ الصيارم غدا بوم
حتى الصديق الـلي تهقويت به بـار ** لا جـيـت لـطـم خشته تـقـل مزكـوم

قال فهد بن صالح بن عبدالله الجطيلي هذه القصيدة الترحيبية :
ابـن الجـطيلي قـال عـذب المثـالـي ** يحيـي بـرجـال الحـضـر والقبيـلـه
يـا مـرحـبـا بـقـدوم كـل الـرجـالــي ** عـيـال الحمـايـل والرجال الأصيلـه
تسوون مـالي والـذهـب والحـلالـي ** فـصيـلـة يـا طيـبـهـا مـن فـصيـلـه
حـيـاكـم الـلـه يـا قـروم الـعـيـالــي ** عـيـال النشامـا كـاسبـيـن النـفـيـلـه
فـي شـوفـكـم يـالـربع يـنسر بـالي ** وتجـلي همـوم فـي ضميري ثقيـلـه
وأهـلا هـلا بالضيف والـلي عنـالي ** أهـل المـراجـل والـدروب الطويلـه
الـيـوم عـيـد وكـل شـي صـفـالـــي ** وفـي شـوفكـم زال الكـدر والمليلـه
أرحـب بـكـم تـرحيـب غـالي بغـالي ** تـرحيـبـة الـخـل الـقـديـم بـخـليـلـه
تـرحيـبـة الـوالـد بشـوف العـيـالـي ** عقب البطأ شاف الوجيه الفضيلـه
وأنـا أحمـد الـلـه شرفونـا الجـزالي ** نعم الرجال أهل العلـوم والجزيلـه
أهـلا هـلا تـعــداد بـرق الـخـيـالــي ** واعداد ما يمطر على الكون سيلـه
وعـد الـرمـال وعـد حصو الجبـالي ** واعـداد من شاف القمـر كـل ليلـه
أهـلا هـلا بأهـل الـدروب الطـوالـي ** أهل الصخى وأهل الفعول الجميله
مـا غـرّد القمري على صوت عالي ** يـجـر صوتـه بـالـلحـون ويـشيـلـه
وعـد الـكـواكـب كـلـهـا والـهـلالـي ** وأعـداد مـا بالـكـون عـدلـه وميلـه
وعـد العـصـور الماضيـه والليـالي ** واعـداد مـن زار الحـرم وايعـنيلـه
يـعـل يـفـداكـم جـمـيـع الـحـثـالـــي ** الـلي مـراجـلهـم ضعـاف وقـلـيـلـه
وصـلاة ربـي عـد رمـل السـهـالـي ** عـلـى نـبـيـاً وضّـح الـلـه دلـيـلــــه

قال عبدالله بن دهيمش بن عبار العنزي هذه القصيدة رداً على قصيدة فهد بن صالح بن عبدالله الجطيلي العنزي :
بسـم الكـريـم الـلـي عـلـيـه اتـكـالي ** رب المـلأ محـيي الـبـلاد المحيـلـه
عـلام بـأسـرار السـنـيـن الخـوالـي ** خـلاقـنـا مـجـري نـهـاره ولـيـلـــه
ومن بعد ذكره هاض قاف طـرالـي ** نـكتـب جـواب الـلي اهـدافـه نبيلـه
فـهـد بـن صـالـح كـريـم الـسبـالـي ** قـرم العـيـال الـلي يـرحـب بـقـيـلـه
حيثه من شخوص الرجال المـدالي ** ربـع الجـطـالا طـيـبـيـن الـفـعـيـلـه
يستقـبـلـون ضيـوفـهـم باحـتـفـالي ** وقولت هـلا بالضيف حـّزت يجيلـه
وأنـتـم مـقـر الطـيـب مـابـه جـدالي ** أهـل مجـالـس للفضـايـل وسـيـلـه
فيها مواعض تهدي أهـل الضلالي ** وفـيهـا سوالـف لفضهـا ينصغـيلـه
ولا تسمـع الـلي بالنـميـمـه يـلالـي ** ولا منهم الـلي جاب غيـبـة زميلـه
والـبـن سيـق بـمـكـرمـات الـدلالـي ** يجلي عماس الـراس نفحات هيلـه
ومـن وارد الـسـيـلان مـرٍ وحـالـي ** بـه زعـفـران وخـالـطـه زنـجبيـلـه
والعـود الأزرق بالمـداخـن ايكـالي ** أخـن مـن ريـح الـنـفـل بـالخـميـلـه
وحـيـل تـقـلـط بالصحون ودغـالـي ** فـوق الـصياني مـثـل تـل النـثـيـلـه
وأنواع من حمل الغصون الـدوالي ** يجنـا مـن اثـمـار الكـروم الضليلـه
لـكـم الشـكـر يـا طـيـبـيـن القـبـالـي ** يا أهـل العـلـوم الطيـبـه والجليـلـه
الـواجـب اشـكـركـم ولانـي لحـالـي ** باسم أبو خالد نسل حـامي الدبيلـه
بـنـدر سـلـيـل مـزبـنـت كــل جـالـي ** ابـن سويـلـم مـا يـبـور بـعـمـيـلــه
والخـاتـمـه أطـلـب عـزيـز الجـلالي ** عـسـاه دايـم عـزكـم مـا يـزيـلــــه

الله الله

صح لسانهم جميع

السهلي

والغضوري

والجطيلي

وابن عبار



كل اللي قريته جميل لكن




هنا الاجمل ولا قصور بالشعار ولا بقصايدهم




يا نديبي شد اللي مثـل الظليـم ** أوكما الشيهان توحي له رفيف
قم سريع وجهز الجيب الهميم ** خـذلـك مرافق وخله لك سعيف
حـرّك الفكسار من حي النظيم ** ولا تمل من السفـر خلـك عنيف
اسهج الفيحا شمال من التويم ** وعب فـل اليا تعـديت الصريـف
ومـر بـبـريـده وغـادر لا تقيـم ** وحـط حايـل باليسار ولا تقيـف

صح لسانكم جميعا
قصيد جميل
ومشاعر اجمل


دمت بود يابومشعل

اقتباس : المشاركة الأصلية كتبت بواسطة هبايب [ مشاهدة المشاركة ]

صح لسانكم جميعا قصيد جميل ومشاعر اجمل دمت بود يابومشعل

محبتي.......

ونعـــــــــــــــــم يااااااااااابن عباااااااااااار والله
وصح لسانك ياخـــالي

صح لسان الجميعـ كفوو يبن وايل b_52

مشكور بس لو ممكن تكون صوتيات من اداء عبدالله بن عبار الحلو و صوت الحلو

قصائد جزله وشعار كبار

صح الله السنتهم

والله قصايد لها طابع غير فيها معاني جميله وهذا هو الشعر
الاصيل الذي ليس فيه تملق وتقليد مافيك حيله يابن عبار

اشكر جميع الأخوة والأخوات على مرورهم وأطلاعهم على هذه المساجلات واحسن الله إلى الجميع