مساجلات جديده - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

11-20-2017, 05:12 PM

( مساجلات جديده )

قال الشاعر رابح بن عوده الجعفري هذه القصيدة يسند على زميله عبدالله بن دهيمش بن عبار

مـدحـت كـسّـاب المـراجـل والأفـعـال *** عـبـدالـلـه الـلي من حرارن منقّـاه
ريف الضعيف اللي عليه الدهر مـال *** من لابـة الفدعان والطيـّب مـربـاه
ديـوان بـيـتـه لـلـرجـاجـيـل مـدهــال *** يحـيي بضيفه قـبـل يـدخـل بمـبنـاه
ويـشـب نـار ضـوهـا يـشعـل اشعـال *** وقـلـط بغـاديـد عـلى النـار مـركـاه
وسـوا لهـم مـن صافي الـبـن فـنجال *** وصبه عـلى أهـل الكرم والمحاماه
الـلي لـهـم عـادات فـي اشهب الـّلال *** يهدون غـالي الـروح لاشان ملفاه
لا هـاب خطو اللاّش من كـل محتال *** يردون حـوض الموت كورد مظماه
لا صـار بـالمـيـدان طـاعــن وقـتّـال *** يـزبـنـهـم لـلـي يـابـسـات شـفايـــاه
لاثاع عج الخيل من عـقـب مجـوال *** توحي لهـم وسـط المعارك منـاخـاه
لا جـوك فـرسان المعـادي بالأقـبـال *** يرسون كـمـا تـرسي جـمال مـثـنّـاه
الـكـل مـنـهــم لا مـحـســـّب ولا ذال *** ولا منهـم الـلي صار عـنده مراواه
مثل الحيود الشامخه أو كمـا الجـال *** الـكـل منهـم تـفـعـل الطيـب يـمـنـاه
عـلـومـهـم لـوحيـتها تـشـرح البـال *** حـلـويـن مـريـنـن صـقـور مـلاقــاه
وصـلاة ربـي عـدد مـا هـــل هـمّـال *** واعــداد مــن كـبّــر لـربــه ولــبّـاه

قال عبدالله بن دهيمش بن عبار هذه القصيدة جواب لقصيدة الشاعر رابح بن عوده الجعفري :

حـي الجواب وحي من صاغ الأمثـال *** من رابح العوده عسى الرّب ياقاه
رابـح ربـح عـلـم الفضيلـه والأنفـال *** شبحه بعيـد وشامخ الحـيـد يـرقـاه
ما هـو من اللي مقصده يجمع المال *** نفسه عزيزه يا عسى النذل يـفـداه
يفداه الـلي يـزمـر تـقـل صـوت دلاّل *** يسعى يبي يملأ من السّحت مخبـاه
مـجـنـاه مـن لابـه صناديـد وأبـطـال *** جـعـافـره نسـل الشخوص المسمّاه
مدحتـني واشكـرك يـا طـيّـب الـفـال *** حيـث الـذي شرواك نفخـر بطـريـاه
مار الرجّل يالقرم كان انجز اعمـال *** هـذا يـمـجّـد بـه وهـذاك يـشـنــــــاه
يـفـخـر بـه الطيّـب وتشنـاه الأنـذال *** لـكـن يـحـط أقـوالهـم بـاسفـل حـذاه
أجـهـدت يا رابـح وجـربـت غـربـال *** مـن نـاس لـهـم بـالمجالـس مـلالاه
نـاسٍ منـاحـيسٍ ونـاسٍ بـهـا هـبـال *** وبـه ناس يسهل قودها كنّها الشاه
عاصرت يا رابح من العـزوه رجـال *** من صفوة الويلان لي عندهـم جـاه
رجـالـهـم يـقـدى كـلامـه الـيـا قـــال *** ما وقع بختمه على الكذب وامضاه
والشّرع يمنع شر بالحـق مـن عـال *** والـلي يـبـي مـضـرتي مـا اتـرجّـاه
اليوم من فضل الولي بأحسن الحال *** مـا يقـنط الـلي يرتجي فضل مـولاه

قال الشاعر طارق بن عطالله لعيبان الرويلي هذه الأبيات يسند على
عبدالله بن دهيمش بن عبار :

الوقـت الأول راح مـا تقـل هـو شيف *** مـن دونـه البيـبـان وقـفول وبلـك
وجـانـا زمـان فـيـه قـل التـصـاريـف *** شيئاً رفـع روحـه وشيئاً بـه انـدك
عبدالله اعمال البشر صارت اتخيـف *** الــود قـل وكـثـر الأحـقـاد والـشّـك
ما يعرف معّزب ولا يعـرف الضيـف *** وحـتّى قـفـول البـاب ما عـاد تنفـك
قافي وصلك وصّنف الشعر تصنيف *** وش حيلتي يالقـرم وأنـا بهـا أهلك

قال عبدالله بن دهيمش بن عبار هذه الأبيات جواب لأبيات
طارق عطالله لعيبان الرويلي :

يـا طـارق بقـافـك تشّرفـت تـشـريـف *** وهـذي ردود القـاف كـزيـتهـا لـك
حيثـك فهيـم بـنظـم الأشعـار حـرّيـف *** والشعر ونسه بالمجالس اليا صك
دامك توصف حاضر الوقت توصيف *** جور الـزمن غـدّار كانـه غـدر بـك
أنـظـر تشـوف المـال عـز الهـذاليـف *** واللي بخل يبغضك لو قلت لـه زك
عساك تسلـم مـن جـميع الصواديـف *** أصبر وربك يفـرج الضيق لا ضك

قال حامد بن عناد اليمني هذه الأبيات يسند على عبدالله بن دهيمش بن عبار :

لا يهمك يا أبو مشعل لا يهـمّك *** مـن تكـلّم فـيـك باعـلان وخـفا
والله ان انظارنا حـولـك ويمـك *** نستـمـد العـلـم مـنـكـم والـوفـا
يا أديـبٍ مـا يقـول الـزور فمّك *** يـوم غـيـرك نورهم بان وطفـا
أنت تاريخ العرب يجري بدمّك *** وبالـدلايـل والحقايـق بـك دفـا
ما هناك النوم دون عيال عمّك *** ناحتـن مجدك على صم الصفا

قال عبدالله بن دهيمش بن عبار جواب لأبيات الشاعر حامد بن عناد اليمني :

ياقريضي هات من نقروح جـمّك *** جـاوب لمنظـوم مـن حـامـد لـفـا
عشت يا حامـد عسى ربي يلمّـك *** بالحشر مع الـرسول المصطـفـا
مع هل الطولات يا حـامـد نظمّك *** ولا نعـد الـلي عـن الواجب غـفا
الصـديـق الـلي يـودك مـا يـذمّـك *** مـن هـل النمّات فـي كـلمـة قـفـا
مـن نواك بشر لـو بالصدر زمّك *** أحـذر الـغـادر تـرى حـظّـه هـفـا
من حسدك من البشر ودّه يسمّك *** حـقـد قـلبه لـو تعـالـج مـا شـفـا