هذه السالفه جرت لعمران البجيدي وهو من البجايده من عنزه ...وكان له ولد يقاله (ساير) وكان توه شاب واذا سرحت أبلهم كان يسرح معها جنب الين تاصل مع ابل القبيله ...

المصدر كتاب قطوف الأزهار تأليف عبدالله بن عبار

وفي يوم من الايام جاء واحدً قوماني يبي عسى شئ يتهياله من البل عشان يحوفه ويوم قرب من الابل وهو ينطحه ساير ويجي بينهم رمي وتصيب طلقه في ساير ويطيح مقتول ...

ويقوم هالحايف يبي يزبن للبيوت يشوفها مد النظر والرجاجيل يلحقونه وهو مايقدر ينحاش
لانه وسط ديار عنزه ويبي يزبن زبنه ويوم قرب من البيوت وهو اللى ينصى اكبر بيت بينهم
ويجي راكض والرجاجيل من وراه ويوم قرب وهو يحذف عمره حذف على البيت ويقول :

دخيل دخيل يا رجل قال عمران دخلت . ( الرجال زبن بيت ابو المقتول ساير ) والرجاجيل من وراه فقالوا: ياعمران ذابحن ولدك ساير .

وقتها أنفجع عمران فهذه مصيبه لانه زبّن الرجال يوم جاه زابن والثانيه انه قتل ابنه فقعد شوي وهو منّزل راسه بالخد ويتماسك عمره ثم قال: الرجال دخل وساير مثله مثل ساير الناس روحوا وخلوه .

ويقعد شوي الا هذه ام ساير جات تمشى مفجوعه وتقرب حتى وصلت للدخيل

ويقوم عمران ويجي وياقف بينها وبين الدخيل خايف انها مغبيهً لها جنبيه والا شئ وتذبح الدخيل فتصير مصيبه وتسود وجهه

وقال : وش عندتس يامره وهي ساكته مفجوعه وكررها عليها ثلاث مرات فقالت هألابيات :



الحمد للبـاري صـدوق المخايـل
اللى بلاني بالليالـي بـلاء ايـوب

مايستوي لـك يارفيـع الحمايـل
ذبحت دخيل البيت عيبً وعذروب

أدخل دخيل البيت لو كـان عايـل
عفواً عن المحروج حقً وماجـوب

تكسب بها ناموس بيـن القبايـل
وماراح يخلف والذي صار مكتوب

والطيب حبله بين الاجـواد طايـل
ولايستوي طيبً من الصبر مسلوب

مار خله دخيل ياذعـار السلايـل
لو كان لابني مهجه القلب مطلـوب

أخينا الفاضل فرج القصّة منشورة في كتابنا قطوف الأزهار يجب ذكر المصدر .