لماذا الكثير من الأشخاص يطلب الشهرة
هذا الموضوع كتبته ونشرته في الموقع حسب ما مر عليه من تجارب

يلاحظ في هذا الوقت أن الكثير من الأشخاص يرغب الشهرة ويتمنّى أن يشتهر بأي وسيلة فالبعض يخالف المألوف لكي يشتهر والبعض يسب ويقدح وينتقد الناس لكي يشتهر والبعض يبتدع حكايات غريبة لكي يشتهر والبعض يلّفق ويزوّر لكي يشتهر والبعض يدعي بالعلم والمعرفة ويكتب مقالات بعيدة عن الواقع لكي يشتهر والبعض يكذب وينصب على الناس لكي يشتهر والبعض يكرم ويبالغ بالكرم لكي يشتهر ولكن الشهرة ما تليق الا لثلاثة رجال فقط وهم :

1- صاحب المنصب الذي له اصلاحية يتمكن من مساعدة الناس .
2- صاحب الوجاهة التي تخوله أن يتوجه لحل مشاكل الناس .
3- صاحب الثروة التي تمكنه من بذل المال لسد حاجات الناس .

والكثير من الذين يبحثون عن الشهرة ما يعلمون عن ما تسببه الشهرة لمن يظهر صيته وينتشر مع الناس وهو لم يكن من الأصناف الثلاثة كالشهرة في شعر وأدب أو تأليف كتب أو أي مجال آخر سوف يتعرّض لإحراج لأن الكثير من الناس عندما يسمع بالرجل المشهور وهو يجهل امكانياته فأنهم يحملوّنه مالا يطيق ويصعب علية المقدرة على تلبية كل طلب فهذا يطلب منه السعي لحل قضية وهذا يطلب منه مال والرجل الذي يحافظ على سمعته يحاول ارضاء الناس ولكن رضاء الناس غاية لا تدرك ومن اشتهر فأنه سوف يتعرّض لأهل الحسد والحقد وبذلك تكون شهرته دون جدوى وقلت هذه الأبيات من قصيدة :
اليا ظهـر علمك ترى الناس توذيك *** أحفـظ كرامـة سمعتـك قـدر الإمكان
وأبعـد عـن الـلي ما يحبون طاريك *** تـرهـم يعـيـبونـك لـو أنـك كحيـلان
وأفطـن تـرى الشراث لا بـد شانيك *** ما يـقـتنع لـو تحملـه فـوق الأمتـان
لـو كـان مـا تاجـد ريـال بمخـابـيـك *** مـا يـأسـف لحـالـك ولا راح قـنعـان
وقلت من قصيدة أخرى :
كـم واحـدٍ يـشـكي عـلـيـه اهـمـومـــه *** لا شك أنـا مـن اشتكي لـه همومي
أشكي على الـلي تـدي الناس صومه *** الـواحـد الـلـي للخـلايــق رحـومـي
بعـض المطالـب فـي دوايـر حكـومـه *** والـكـل مـنـا بـالـنـظـام محـكـومــي
والـجـاه مـا يجـلـب لمـن لا يسـومـه *** الـجـاه عـنـد الغـانـميـن محشومـي

واصدق تعبير حول هذا الموضوع هذه القصيدة قلتها اسند على حمود بن معيبر :
فكـرت بالـدنيـا وشفـت الـتعـاجـيـب *** نـعـيـمـهـا لـو دام عـجـل زوالــــــه
تجـري كما تجـري سريع الدوالـيب *** وتفـتـل كمـا تـفـتـل خطات المحالـه
لا تـأمـن الـدنـيـا تـقـلـّب تـقـالـيـــب *** مـثـل السـراب الـلي يغـرك خـيـالـه
من عصر ابن كلثوم والزير وكليـب *** ما ذكـر فيهـا الـلي زمانـه صفـالـه
دنيـا الشقا ما خـلدت نـوح وشعيـب *** والـرابح الـلي يصلح الـلـه اعـماله
أن هرفـت تسقيك عـذب المشاريـب *** وأن أقحطـت دنـيـاك تشرب حثالـه
أن أقبلـت وأرهـت علينـا المطاليـب *** درنـا بـهـا عـلـم الـفخـر والشكالـه
وأن أدبرت عشنا بها عيشت الذيب *** يـوم يـجـوع ويـوم يـشبـع عـيـالـه
نوبٍ بها يا حمود نقدر عـلى الطيب *** وأحيان نغضي عن خطات الجماله
نخـاف تـأتي ساعـةٍ يـفـرغ الجـيـب *** وتبـقـا ذراريـنا عـلى النـاس عالـه
ولابه على من ضامه الوقت تثريب *** لا شك مـا يفيـد الرجـل غيـر مالـه
ومن لا صبر حاش الردا والعذاريب *** ومـن دور الطولات يرخص حلاله
والمعترض تـكثـر عـليـه المواجيـب *** ولا كـل من لـه قصد يا حمود نالـه
والـرجـل اليا مرت عليـه التجاريـب *** أمـا يـحـوش الـنـعــم ولا الـرزالــه
نـدور سـتـر الحـال عـنـد الأجانـيـب *** والمستحي يتعـب عـلى ستر حالـه
الأجـنـبـي وده بـشـاشــه وتـرحـيب *** مـلـزوم كـانـه جـاك تـكـرم قــبـالـه
يجـزع اليـا شاف الحواجب مقاطيب *** ويـفـرح بـتـرحيـبـك ويـنسـر بـالـه
أكرم غـريب الدار تبعـد عن الـريـب *** مـن لـفـوتـه حتى يحيـن ارتحـالـه
ولا القـرابـه مـن حساب المعـازيـب *** لـو ايـتـقـهـوى فـي محلـك بـيـالـه
الـواجـب أنــه مـا يـّدور بـك العـيب *** يـروف بـالصاحب ويستـر خمـالـه
حـقـه اليـا جـتـه الـليـالـي شلاهـيب *** يـوم الرجـل يزبـن عـوايـن رجـالـه
اليا عض بـه ياحمود حزم الكلاليب *** بالضيـق والشـدات تـوقـف بـجـالـه
لا بـد بـأمـر الـله تهـون المصاعيب *** والـحـر نـفسـه مـا تطيـق الفضالـه
والرزق مـن مـد الولي عالـم الغيب *** مكفـول مـن رب الخـلايـق كـفـالـه
وصلوا عـلى اللي أدّب الكفر تأديب *** المـصطـفـى نـّزل عـلـيـه الـرسـالـه

وفي أهمية المال ودوره في مقدرة صاحبه على الاستطاعة بعمل المعروف وكسب الثواب قلت هذه الأبيات من قصيدة اسند على أبو نايف هديس بن دخين :
المـال ساس المرجلة يا أبـو نايـف *** أنا أشهـد أن المال مثل الجناحيـن
المال مفعـوله مثـل ما انـت شايـف *** ينفـعـك بالشـدات والعسـر والليـن
الـمـال يـرقـيـك الحـيـود الـنـوايـف *** والعوز طمن شامخ الراس تطمين
الـمـال عـز الـسـافـلـيـن الـهـدايـف *** والفـقـر ذل الـطيـبـيـن العـزيـزيـن
مـن قـل ماله شاف عزر وكسايـف *** ومن كثر ماله عد ضمن المسمين
والـديـن غـبنـه بالضمايـر مسايـف *** يا ثقـل حمل الدين يا مشنع الديـن
يـا مـا نـويـت وثـم رديــت عـايــف *** تـبغي تجـود ولا تمكن عـلى شيـن
تـبـغـي تـنـال أم الثـمـان الرهـايـف *** الجادل اللي شوفهـا يطـرب العيـن
وتبـغي تسـوي للنشـامـا مضـايـف *** وتبي الوناسة في وسيع الدياويـن
وتـبـي المصيف بطيبـات المصايف *** وتبي التمشي بين خضر البساتين
ولا اللـيـّالي مـا عـلـيـهـا حـسـايـف *** مـا خلـدت من كـان يملـك ملاييـن
وقلت من قصيدة أخرى :
عـز الـلـه أن الـمال يـعـتز صاحـبـه *** كـل مـا يـزود المـال تـكـثـر نفايـعـه
وإلـى فـقـدت الـمـال لـو جـل قـدرك *** تـنـقـاد نفـسـك للـرذيـلات طـايـعــه
إلـى فـقـدت المـال بـانـت أعـيـوبـك *** وغاليك يـظهـر لـك بوادر قـطـايعـه
إن كـثـر مـالـك يـكـثـرون الأحـبــه *** وإن قــل مـا تـلـقـى خـليـل تـلايـعـه
وفي التعفف وعدم السعي لقصد التكسّب قلت هذه الأبيات من قصيدة طويله :
قالـوا خجول وقـلت ما بـالحـيا عــار *** عسى الحيـا مابـي عـذاريب غيـره
ماني من الـلي بالملأ لسنها أشطار *** ولا درت مـن شعـر المدايح بريـره
أدخل عـلى الله عن غرابيـل الأخيـار *** ومن عـز نفسه شاف بالأمر خيـره
وبما يخص شهرة الشعر قلت من قصيدة أخرى :
أخـذت لي مع نظـم الأشعار مرواج *** وعـلى النقـاء فيـه الرجال أعرفتني
وكـم قـاف سويتـه وشلته بالأدراج *** أدرى الملامـة والظـروف أشغـلتني
مـا قـلت منطوقي غـرابيل واحراج *** اتـرك سـلـوم الحـيـف مـا لايـمـتـني
الشعـر الـلي يقضي لـوازم لمحتاج *** عـنـه الشهـامـه والـكـرامـه نهـتـني
كـان القصيـد لنـاظم الشعـر سمـّاج *** مـا اشفـق عـليها كان مـا نومستني
وكان القصايد ما بها رفعت حجـاج *** مـا حـب الـلي في قول شاعر نعتني
ومنذ مدّة طويله اتلقّى قصائد ورسائل ومكالمات تحمل طلبات ولا استطيع البي كل طلب وحيث أنني لم أكن من الأصناف الثلاثة فأني ابذل جهدي بكل ما استطيع لكي أحافظ على سمعتي وسوف أنشر بعض ردودي على الشعراء دون أن أورد قصائدهم وهذه أبيات من قصيدة طويله أعتذر من أحد الشعراء :
أفطن ترى الـطـيّـب الـيـا قـل مـالـه *** عـن واجـبـه مجبـور ياخـذ تصاديـد
وده يـحـوش الـغـانـمـه والجـمـالـه *** وأن مـا تمكـن مـا تفـيـد التـواجـيـد
لـو عـنـدنـا مـفـتـاح كـل الـقـفـالـــه *** كـان افتتحت من القصـور المشاييد
لـكـن زمـيـلـك قـدرتــه قـد حـالــــه *** حـاول يجـود ولا حصل له مجاويـد
أن جـاد تقـصر مونـتـه عـن عـيالـه *** وأن أعتـذر يخشى ملامة وتسويـد
الحيص لو يقـدر عـلى الحمل شالـه *** لاشـك نـخــنـه لـيـالـي جــويــريــد
حيـص الجـمال إلـى ثـوى عـزتـالـه *** يـبـرك ولـوهـم ثـوروه بـعــوامـيــد
مهـمـا أعـلفوه مـن الـدرابي كعـالـه *** إلـى بـاد حيلـه مـا تـفـيـده لهـاميـد
والـلي عجـز ما أظـن حملـه قـوالـه *** والـيا تضجـر يفـرحـون الحواسيـد
ولا كـل مـن يبحـث عـن العـز نـالـه *** درب المـراجـل حـال دونـه لـواديـد
ومن طـاح يا مشكاي محـد انتبالـه *** والوضع يبغي يا فتى الجود تمهـيد
الـلي يـسـلـف مـا حصـل لـه ريـالـه *** والـلي تسلف مـا حصل منه تسديد
الـمـال يــرفـع مـن مـقـام الـثـعـالــه *** والـفـقـر يــذل الـقـروم الـصنـاديــد
هـذا تـخـيـّر مـن حـفـيـز الـوكـالـــه *** وهـذاك مـا حـصـل قـرنـبع تقاصيـد
والـرزق وهـبـه مـا يجـي بالختـالـه *** والـلـه رزق حـتى الـطيور الملابيـد
والـلـي عـلـى رب الـعـبـاد أتـكـالــه *** لو مال بـه وقته عن الحق ما أيحيد
وقلت هذه الأبيات من قصيدة جواب لأبيات أحد الشعراء :
تـرى زميلـك مـا ذخـر مـن جهـيـده *** وبعض الموارد ما تطوله احبالـي
والـنـاس كـلـن فـوق متنـه نضيـده *** والكل يشكي مـن ظـروف الليـالـي
جـور الـزمـن فجـع ضمايـر زبيـده *** مـال بـولـدهـا وهـو خليفـة أوالـي
جتـه المصايب من شقيقه عضيـده *** وعقب الخلافـة هـام في دو خالـي
وقلت هذه الأبيات من قصيدة جواب لأبيات أحد الشعراء :
جـاني نديبك يالسنافي إلى البيـت *** سلم لـي المكتوب وأبدالي أسـرار
من حين للمندوب يالقـرم قهويت *** وفـر عـلـينـا واجبـه بالعجـل سـار
قـلـت أبلغـه أنـي للقضيـه توليـت *** وسلـم عـليـه وبلغـه كـل الأخـبـار
الشاهـد الـلـه مـا بجهـدي تونيـت *** يا مسندي مانـي من الجهد ذخـار
ولا نذخـر الا عن خطاة السرابيت *** الـلي قـضيتهـم بـهـا كسـر تعـبـار
للي قـدرتـه يا فتى الجـود سويـت *** ولا زلت أنا ما بيـن الأجـواد دوار
من طحت بالبلوى أنا مثلك ابليت *** الله يعين اللي على السجن صبـار
أن طاب مسعايه على العـز غنيت *** رب الملأ ياقاك من شـر الأخطار
ورديت على أحد الشعراء بهذه الأبيات :
شكيت حمـل الدين مـع قـلـة المـال *** ومـن بـه حـمـيـه باللـزم ينشكـالـه
ودنـيـاك هـذي كـنـهـا فـي وضـلال *** لـو مـهـلـت يــوم سـريـع زوالــــه
دنياك هـذي خيرها حسن الأعمـال *** وكـم واحـدٍ مـا فـاد لـو كـثـر مـالـه
لـو ثـروتـه مليـار عـد مـن الأنـذال *** مـالـه كـثيـر ولا يحـوش الجمـالـه
وكـم واحـدٍ تـلـقــاه لـلجـهــد بــذال *** لـو كـان دخلـه ما يعـيـّش عـيـالـه
أطلـب ولـي الكـون خـلاق الأجيـال *** يفـرج لـك المولى عـزيـز الجلالـه
أصبـر ولا بـد لـلصـعـيـبـات حــلال *** والـلـي تصبـر كـل مقـصـود نـالـه
والمعذرة يالقرم ما أطيـق الأحمـال *** حملـك ثقيـل ولا قـويـت احتـمـالـه
قـلـتـه ولانـي يا فـتى الجـود ختـال *** ومـن لا قـدر لـلغــانـمـه عـزتـالــه
وقلت جواب لأحد الشعراء بقصيدة منها هذه الأبيات :
اللي يشكي جـور وقتـه صار شيـن *** ويذكـر أنـه عـاش في ذل ومخافـه
وكان وقتـك صار ينصب لك كميـن *** ما تجـد مخلوق كـود الوقـت لافـه
أحتسب وأصبـر عسى ربـك يعيـن *** ومن صبر يا مسندي حقق اهدافـه
يـفـرجـه مــولاك رب الـعــالـمـيـن *** نطـلـب الرحـمن عـفـوه والمـرافـه
تشـتـكي والـلـه يعـيـن المستحـيـن *** يا زميـل العـون مـا تفيـد الحسافـه
كـم واحـد يـبـي فـعــل الـغــانـمـيـن *** مـار شـف الـبـال دونـه حـال آفــه
الـجفـاف يـنـّوخ الحيص السـمـيـن *** يبـرك ما يقـدر عـلى حمـل الكلافه
أن تـركـت الموجبـه ينـدا الجـبـيـن *** والصخي مـا جـاد والمذخور تافـه
وقد رديت على الشاعر بهذه الأبيات من قصيدة :
كان أنت تطلب يابن الأجواد عوني *** أريــد أوضــح مـا عـلـيـكــم كـنـيـا
مـا كـل مـطـلـوب عـلـيـنـا يـهـونـي *** بـعـض الـمعـانـي كـايـده مـا تهيـا
أقسمـت لـك بسـم الـولي صدقـوني *** ما أذخـر طلبكـم كان يـوجـد هـنيـا
الـمـال عـز السـافـلـيـن الـعـفـونـي *** وخـلا الصـقـور مـدوبـحـه للحـديـا
ومن قصيدة جواب لقصيدة شاعر قلت :
جتني رسالة فـي سجـل الكراريس *** مـن طاهـر المهجة عفيف اللساني
جـاني جـواب مقيّس القيـل تقـييس *** الـنـافـل الـلي مـا بعـرقـه اهـدانـي
اللي شكـالي مـن زمانـه حواسيس *** وحاولت أحصل مطلبه يـوم جـاني
يشكي ومن شكواه جاني تعـامـيس *** لا شـك عـيـا لا يـسـاعـف زمـانـي
وضحت له عذري ولا قـلت تدليس *** حـيثـه عـنـالي مـن بعـيـد المكاني
أنقـل حمـولي بالكـواهـل كـواديـس *** حملي ثقيل وكل ما انهض رمانـي
يـحـلـهـا جـالـي ظـلام الـحـنـاديـس *** رب الـمـلأ عـلام سـبـع الـمـثـانـي
أخشى يقـال فـلان عـلمه حماليس *** ومن لا قدرت اقضي لزومه شناني
مـن بان علمه غربلوه العـواسيس *** والصيـت مـا بيـن الخلايـق بلانـي
العـيلم الهـداج ينضب إلـيـا عـيـس *** لـو كـان جـمـه مـنـبعـه ريهجـانـي
التجرة اللي ما تجيب أجرة أدريس *** خـلهـا تـولي مـا بهـا صلح شانـي
صـارت عـليه كنهـا لقطت اغـليس *** أسـمـه كبـيـر ولا تـفـيـد الـعـوانـي
لو كنت تاجـر كان أصيّف اباريـس *** مـن فـوق بـنـز وبـالعـلـيـا مكـانـي
ماني تحت ضلع شنيع التضاريـس *** بالموقـع الـلي مسكنـه مـا هنـانـي
وهذه الأبيات من قصيدة جوابية قلت :
يـا مسنـدي مـطلـوبكـم مـا اتـغـالاه *** والشاهـد الـلـه مـا نقوله هـزاوي
الـلي نخـانـا أرواحـنـا مـن فـدايـاه *** وكان أشتكى حنـا نثيب الشكـاوي
كـانـك تـوجهـنا عـلى درب جيـنـاه *** لو حـال من دونـه جبال وعـلاوي
والـهـم مـا بـيـني وبـينـك قسـمنـاه *** والكـل يـاخـذ مسهـمـه بالتسـاوي
ومن قصيدة جوابية قلت :
يـا مـرحـبـا بالـلي وصلـني بـريـده *** ينخا وأنا من نخوته صـرت محتـار
الشـاعـر اسنـد لـي بـيـوت جـديـدهٍ *** ينخـا ويشرح ما حصله ومـا صـار
ولا نـذخـر الـمجهـود دون البـديـده *** وحقه عـلى بعض الحمايل والأمار
ومن يقدر المعـروف يـدي جهـيـده *** ينـفـع رفـيـقـه مـا تـذرع بـالأعـذار
لا شـك هـومـات المـعـالـي شـديـده *** كلـن يبيهـا مـار مـن دونهـا الحـار
بـذلـت جـهـدي والنـتيجـة سـعـيـدة *** ولا خيـر باللي عند وقت اللزم بـار
وهذا مقطع من قصيدة رد على شاعر :
يـا راكـب هــاف ســريـع فــديــــده *** يعجبك جريه يـوم يمشي مع القـار
وأنـا أذكـر الله يـوم تسمع رعـيـده *** رعـيـد مـزنٍ هـل غـيـثـه بـالأمطـار
وداه أبـن عــبـار يـحـمـل بــريـــده *** لـلي أرسـل القيفان رديـت الأشعـار
واليا وصلت القـرم عـطه القصيده *** ثـم أعـتـذر للـوايـلي مـكـرم الـجـار
قـلـه شريطـك لـفـوتـه لـي سعـيـده *** يا مـرحـبـابـه عـدد مـا طـش بّــذار
وقـله زمـيـلـك لـه مـرامـع بعـيـده *** عـن الملامـة يبـذل الجهـد باصخـار
لا شـك ما كـل الوسايـل عـلى أيـده *** ولا كـل رجـل باللـزم يـقـرب الحـار
وقلت هذه الأبيات جواب لشاعر :
أرسلـت لـي منظـوم بسطور كـرّاس *** وأعـطـيـك بـالـواقـع كـلامٍ أسـاسي
بالنـاس تـاجـر خـزنته تملأ الأكياس *** من كثر ماله مـا عـرف لـه مقاسي
لاشك لـو مالـه كـثـر رمـل الأطعاس *** ما يوم جيت أبي اشتكي له فلاسي
من يعترض له يا فتى الجود لولاس *** يشكي على الـلي يعتلون الكراسي
ومـن ضايـقـه تعـقيـد حـاقـد وبلاّس *** يزبن عـلى الـلي بالدوايـر سياسي
واللي شكى فكره من العوز محتاس *** يـبـحـث لـعـل المقـتـدر لـه يـواسي
وزميلـك الـلي بان عـلمه مع الناس *** يـرسي كـمـا شـم الجبـال الرواسي
وش عـاد لو علمه مسجّل بقرطاس *** مالـه جـدى والوقت قحـط ويباسي
وقلت من جواب لأحد الشعراء :
قـلـت استـمـع لـلـرد معـنـاه يـعـنيـك *** هـذا جـوابي وافـتهم قـصـد معـنـاي
من آخـر اسمك يا فـتى الجود نغليك *** صفـوة حمايـل حطّـمـوا كـل غـزّاي
نويت أوضح لك أبي أخبرك وادريك *** انشد وتلقـا العلـم مـع رايح وجـاي
الـلـي ذكـرتـه زارنـي قـبـــل يـأتـيـك *** جاني وعطّل يا أبن الأجواد يمنـاي
هـذاك كـانـه يـالـسـنـافـي مـوازيــك *** لازال عـنـدي مـركـبـه فـوق علبـاي
أخبـرك بالمعقول عـن سمعتي ذيـك *** شعـر وأدب بأوساط كاتـب وقـــرّاي
لـوهـي تجـاره كـل ما تطلب اعطيك *** لـكـن كـذلـك ظـامـنـي جـور دنـيـاي
يا مكثـر الـلي قـال لـي جيت ناصيك *** وأبي استتر من كل شامت وشنّـاي
أصـبـر وخـلاّق البـشـر مـا يـخـليّـك *** وأعـرف تـراك اليوم مثلي وشروي
لا تـشـتـحـن مـا دام ربّـك مـعـافـيـك *** ورزق البشر يالقـرم بيديـن مولاي
وهذه أبيات جواب لشاعر :
أقـول أنـا موجـود فـي كـل الأوقـات *** لـكـن بـليـت بـكيـد بقـعـا وغـثـاهـا
الـلـه يعيـن الـلي ظـروفـه صعيبـات *** باهـض حمولـه كـاهله مـا قـواهـا
لـه شـف يفـزع لكن الوضع هيهـات *** مـل وبـعـض لـوازمه مـا قـضاهـا
يـكـتـم هـمـومـه بالضمايـر خـفـيّـات *** وكثيـر الـلي مثـلـه همومه كماهـا
شهره بـلا منصب ولا هـي تجـارات *** وش فـايده منهـا ومـا هـو جـداهـا
وقلت هذه الأبيات من قصيدة جواب لشاعر :
يامن شكا من الهم شاف الزمن جـار *** ودنيا الشقا من جورها كلنا كظوم
يـا مسنـدي مـانـي مـن الجهـد ذخـار *** ومن اجتهـد يالقرم يسلم من اللوم
لاشـك مـالي يا أبـن الأجـواد معـبـار *** مـن دون مطلوبي عراقيل وعقـوم
كـم واحـدٍ جـيـتـه وحصلـت الأعـذار *** مـع الأسف فرخ الصيارم غدا بوم
حتى الصديق الـلي تهقويت بـه بـار *** لا جـيـت لـطـم خشته تـقـل مزكـوم
وقلت هذه الأبيات من قصيدة جواب لشاعر :
خـطً لـفـانـي بـه تـشـرفـت تـشريـف *** قـريـتـه وهيّض مشاعـر احساسي
يـا عـل يـفـداك الـعـفـون الهـذالـيـف *** والخـايـب الـلي للكـرامـات داسـي
دنياك هـذي ما عطتـنـا عـلى الكيـف *** نـوبٍ يصيـر الـوقت يالقـرم قاسي
أحيـان ما نقـدر عـلى ضيفة الضيف *** وأحيان نملآ من العصيب التباسي
دنيـاك بـعـد القحـط ينبـت بهـا ريـف *** تـفـتـر يـا مـشكاي مـثـل الكـراسي
أحيان فيها اشفق عـلى هبت الهيـف *** وأحيان من برده تراقـل اضراسي
وأحـيـان أصنـف يالسنافي تصانيـف *** وآخـذ عـلـى كـل الـروابع مقـاسي
* وقلت هذا الأبيات من قصيدة جواب لشاعر :
ومن بعـد ذكر الله سجلـت الأشعـار *** جـواب قـرم لـلـمـراجـل يـشـومـي
الـلي شكالي من ظروفه والأضرار *** والمعـضلـة مـا تنشكي للـرخومـي
أسـنـد لـنـا مـن بـد عـنـاز الأخيـار *** ربـع لهـم بالطيـب مبطي رسـومي
مضيت ليلي يا فـتى الجـود سهـار *** كلـه سبب شكواك مـا طـاب نومـي
ادايـــر الأ فــكــار لــلــحــــل دوار *** وقمـت اتـذكـر كـل قـرم محشومـي
عسى نبشر من نصانـا بخبـر سـار *** بشـر العطاش بمرزمات الغـيومي
بعـض الأمـور الهينة تصبح اكبـار *** نجهد عـلى حلـه ونرجع اكضومي
حـاجتـك منصاهـا منـاصيـب وأمـار *** معهـم لتـوقـيع الكفـالـة خـتـومـي
أقـولـهـا ولانـي مـن الجـهـد ذخـار *** ومن بذل جهده ما حكي به ثلومي
لـو تـنشرى بالـمـال ولا بالأعـمـار *** أخير من تبـويس بعض الخشومي
كـم واحـدٍ جـيـتـه لشـرواك مسيـار *** ننصـاه لـو ثوبـه قصيـر الكمـومي
وإلى نصيته عن قضي حاجتي بـار *** وأعـود أنـا خجلان تقل مهـزومي
ننصى الرجال لمعضله مابهـا عـار *** نجهـد ومـع الـلي نـخـانـا نـقـومي
وكـم واحدٍ يا مسندي قالهـا اجهـار *** أبعـد عليك مـن السمـا والنجومـي
وكـم من نصيتـه والتقـاني بمـقـدار *** ثـم اجتهد مشكور وأنجـز لـزومي
وكـم من صديق بادل العرف بانكار *** مثـل الصبخ ما ينزرع به كرومي
يـا مـا لأجـل مثـلـك تعـنيت مشـوار *** أبـيـع غـالي الـجـاه لـلي يسـومـي
والشاهد الله كـل يـوم اطـرق الـدار *** مثل المضيّع طول وقـتـه يحـومي
وكـم خيّـر جيناه عشـرات الأمـرار *** واصبح بصفحات العلاقة طخومي
ومـن كـثـر الطلبـات يالقـرم تكـرار *** صدقـانـه الأدنيـن يضحون قومـي
وقلت هذه الأبيات من قصيدة جواب لشاعر :
جـانـي جـوابٍ واضـحـات مـعـانـيـه *** مـن بـادع المنـظـوم مـهـديـه لـيــه
الشاعـر الـلي طيّـب القـول مهديـه *** يشـكي عـلي الحـال عـنـده قـضـيـه
شبهـني لـهـداج بالـوصـف تشبـيـه *** هـداج تـيـمـاء الـلـي تـلاطـم دلـيــه
والـلي مـثـل هـداج تـنـبـع مجاريـه *** نـبـعـه غـزيـر ويضـرب الجـم طيـه
هـداج مـاهـو بالنظيـم وضـواحـيـه *** هـداج يـالـمـنـعـور بــالـنـاصــريــه
اخبـرك بالمعقول واعطيـك تـنـويـه *** كـانـك تـشّـره يـا عـزيـز الـسـمـيــه
نخيتني وأنا الطّلب ما اقدر اقضيـه *** وظـروفـنـا مـاهـي عـلـيـكـم خـفـيـه
ويـوم اعتذر لـك مـا مرامي مزاليه *** لـكـن لـزومـك مـا تـطـولـه أيـديــــه
فـي عصرنا كـلـن سعيفـه مخـابيـه *** وكـلـن يـعـول مـن الـذراري سـريـه
شكواي لـلي خافت الصوت يوحيـه *** ولا لـغــيـره مـا نــبـث الـشـكـيـــــه
ومن يطلب الله والـي الكون يعطيه *** اعـنـز عـلـى مـولاك رب الــبــريـــه
الـواحـد الـلي كـل مخـلـوق يرجيـه *** الـخـالـق الـمـعـبـود جـزل الـعـطـيـه
وقلت هذه الأبيات من قصيدة جواب لشاعر :
تعيش يالـلي هـرجتـك كلهـا صح *** عسى الولي يحميك من كل عاهه
الـرس لا يغـريك نبعـه ولـو ضح *** ما هـو مثل هداج غـزره امواهـه
واللي اليا جيته تـبي فـزعته قـح *** المنصـب الـعـالي يـزيـده بـيـاهـه
لا شك من لا فـاد عـن ديرته زح *** لا قلـت عندي لازمـه قـال هـاهـه
هـذاك يستاهـل مـذاريـب واشتح *** ودك تحشـره مـا يشوف النفـاهـه
كما ترى صدور الخلايق لها فح *** ولا تـاجـد الـلي مـا تعـوزه نقاهـه
وهذا الأبيات من قصيدة جواب لشاعر :
الله يجيرك من غثـا الوقت واصدوفه *** فهمت مقصودك ولا كنت لـك زالـه
لاشك يا مسندي وقـتي بـه أحـفوفـه *** يفداك من شح يا يالمنعور في ماله
وش حيلتي كان الزمن جـرّد سيوفه *** من يشتكي لوعـته مـا ينسمح بـالـه
منصاك مابـه عن بـني جلدته نـوفـه *** ألا الـذي سبـب احـراجـه وغـربـالـه
السمعه الـلي حـملهـا تتعـب اكتوفـه *** مثل الحمل يبرك به الحيص ماشاله
يا مكثـر الـلي يكتـم الهـم في جـوفـه *** الكـل يشكي نـكاد الـوقـت وأهـوالـه
بالناس من وقـتـه تـوطـاه بـظلـوفـه *** وخـلاّه ما يقدر عـلى عيشة عـيـالـه
مـا يـدرك الطايله مـن قـل مصروفه *** وأن راد مقصد حداه العسر ما نـالـه
ومن باد حيله ما قـدر يقمز الطوفـه *** نطلب عسى رب الملأ يلطف بحـالـه
لاشك مانبدي على الماضي حسوفه *** العبـد يعـرف يا أبن الأجواد منـزالـه
مـا صـار بالبصـره وبغـداد والكوفه *** كـمـا تـشـاهـد يـفجـع الغـافـل الـدالـه
وهذه الأبيات جواب لأبيات أحد الشعراء :
يـا الـلي كتبـت القـاف لا جـاك لادود *** الـلـه يجيـرك مـن جوايـح عـذابـه
النـاس مـن قـدم الـزّمـن بينهـم رود *** أوضـاعهـم وأخـلاقهـم مـا تـشابـه
بالناس من قصره كما الحيد مشيود *** وبهـم الـذي يسكن عـماره خـرابـه
وبالناس من يـملـك عقارات ونـقـود *** وبهم الذي يشكي من العوز صابه
بالناس اللي بالبنك له خزن مرصود *** وبـهـم الفقير الـلي مصفر حسابـه
بالناس مـن عـنـده مزارع ولـه ذود *** وبهـم الـذي عـازت عليـه الجلابـه
بالناس اللي من جور دنياه مضهود *** ضامـه زمانـه مـن دواعي اسبابـه
ينقل حمـل بالكاهـل اثقـل من الطـود *** باهـض ولا تـقـدر تشيلـه اعصابه
والمتـكـل يـقـنـع لـو الـدخـل محـدود *** مـع فـاقتـه مقسـوم رزقـه رضابـه
ولا تـأتي الأرزاق مـن دون مجهـود *** ومن كـد يـدرك مرزقـه مـن تعابـه
ورديت على شاعر بهذه الأبيات :
سـار القـلـم في قـاف تمليـه الأفكـار *** جـواب لـلـي صـاغ طـاروق قـيـلـه
الـلي شكـالي مـن تصاريـف الأقـدار *** لاشك فـي شكـواه مـالـي وسـيـلـه
بالناس الـلي معـوز وبالناس تـجّـار *** والـوقـت كانـه جـار مـا فيـه حيلـه
واللي شكيته صار مع بعض الأنفار *** يا كـثـر الـلي يشكي ديـاره محيـلـه
كـم واحـدٍ مثـلـك جـرع مـر الأمـرار *** ومالح من ظروف الزمن حنضليله
قلته وأنـا مليـت مـن كـثـر الأعـذار *** تـأتـي رسـايـل بالـطلـب كـل لـيـلـه
والشهره الـلي ساسها أدب واشعـار *** صـلّـب عـليهـا مـا وراهـا حصيلـه
ومن لا ملك واحد على تسعة اصفار *** مـا يستفـيـد مـن النعـوت الجميلـه
مـا ودي ابـدي لـك خفيّـات الأسـرار *** يـفـرح عـلي الـلـي يـدور الفشيلـه
وحول موضوع الشهرة قال عبدالله بن دهيمش بن عبار هذه القصيدة توضّح بعض المعاني :

يـا مستمع أفـهـم كـلامـي ومشكـور *** أخـبـرك والمكنون نكشف اسراره
الـلي برز علمه ولـه صيت مشهور *** مـا شهرتـه منصب ولاهي تجـاره
شعـر وأدب وتـراث بالكتب منشور *** هـذي سبـايـب سمعتـه واشتـهـاره
روابـعـه فاضـت أحاسيس وشعـور *** ولفظ العلوم الصادقه هي اشعـاره
يعجب بنظمه صايب الراي والشور *** حـكـر المعـاني صنعتـه وابـتـكـاره
مجهد ومع جمع القبيله لـه حضور *** وحافظ عـلى علمه وسلمه وكـاره
ومن يفعـل الأحسان والخير ماجور *** ومن حصّل الطوله يجوز افتخاره
لاشك الـلي ماله عـلى البـذل مقدور *** كـان أعتـذر ياجـب قبول اعتـذاره
ومن لا تمكن يلـزم الصمت مجبـور *** محـرج وتفويـت الجـماله خسـاره
عـن لازمـه مابـه تهاون ولا قصور *** يـدري بـه الـلي يـفتهـم بالأشـاره
الحـر الـلي معطب جناحه ومكسور *** يفـتـر نشاطـه مـا يجـيـد الصقـاره
أطلب عساني عند الأجـواد مستور *** والمـرجلـه تحتـاج صبـر وجساره
والحـمـد لـلـه تـابـع الحـق منصور *** ومن سـار بالباطـل تعـرقـل مساره
من خـاف ربّـه جنّب الكيد والجـور *** ولا ينجح الـلي فيـه خبـث وقشاره
من يشمت المخلوق خايب ومثبور *** والـلي يحقر الناس جـاز احتقـاره
مـا دام جهدي شاد بـه كـل منعـور *** الـلي انكـره ما اشكل عليـه انكـاره
أهـل القلـوب الطـاهـرة تطلع النـور *** ومن لـه فضايل تحتفظ فـي وقاره
نعوذ بالـلـه من هـل الظلـم والـزور *** أهـل الضغـايـن والحسـد والنغـاره
والعـبـد مـهـمـا عـاش لابـد مقبـور *** وخسران من شـال الكتاب بيساره

هذه الردود غيض من فيض ذكرتها دون أن اذكر قصائد الشعراء لكي يعرفون الذين يبحثون عن الشهرة أن الشهرة لها ضريبة تسبب متاعب واحراج وأسأل الله سبحانه أن يسترنا فوق الأرض وتحت الأرض ويوم العرض .

تقول العرب من امثالها ( أسأل مجرب ولا تسأل طبيب ) وهذا الموضوع كتبته بعد التجارب