أحتفل الوجيه المعروف صياح بن دعاس الجعفري العنزي بزواج ثلاثة من أنجاله في ليلة الخميس غرة شهر ذو القعدة في قصر المعالي في مدينة بريدة ونقلت ذلك الحفل قناة صدى وحيث أن المذكور من الرجال الذين لهم محبة في قلوب من يعرفهم فقد حضر الحفل جمع غفير من الأقرباء والمحبين وشارك عدد كبير من الشعراء من عنزة وقبائل أخرى وكان لنا شرف المشاركة بهذه الأبيات المتواضعه :

مبـروك لـك مبـروك يالقـرم صيّاح *** عسى تدوم أفراحكم يا أبن دعاس
عـساك تـرفـل بـالسعـادة والأفـراح *** وعساك دايم فـي معـزّة ونـوماس
نـدعي للأنجـال الثـلاثـة بالأصـلاح *** عساهم بحفظ الولي خالـق النـاس
رب الملأ يسعـد مساكم والأصبـاح *** نقولها من قـلب وشعور واحساس
مـن قـلـب ندعي للشغاميم بنصـاح *** حيث أنـهـم من لابـةٍ ترفع الـراس
دعـوة فخـر يـفخـر بهـم كـل مـدّاح *** أهـل الحميـة والبطـولات والبـاس
الـلابـة الـلـي جـمعـهـم دوم نـطّـاح *** للخصم يوم الجمع بالجمع ينحاس
يثنون دون اللي من خيالـتـه طـاح *** يوم الهنادي بالثنادي لها اضراس
سلايـل سليـمـان مـهـديـن الأرواح *** لا هاجت الهيجا على قب الأفراس
لاصار دون الذود بالقـفـر وحـواح *** من غار يبي الفود يرجع بالأفلاس
الـذود مـن دونـه صناديـد وسـلاح *** خصيمهم يدعس جـنـابـه وينـداس
ويوم الشفايا بحـزت الكـون كـلاّح *** الـكـل مـنـهـم للـمـنـاعـيـر طسـّاس
بالوقت الأقشر ما يمانيهم شحـاح *** يقـرون يـوم الكيل في وزن وقياس
أدنـاهـم الـلي لكاسر البيـت شتّـاح *** عـز الغريب اليا شكا هـم واعماس
هـم فـرحة الطرقي إذا مزهبه بـاح *** ريف الهجافا لالفوا عقب الأدماس
يقـلط عـلى ترحيب والهيـل فّـّواح *** مـن دلـةٍ يخلط بهـا خمسة اجنـاس
دلـو القصيـر اليـا ورد كـل مـيّـاح *** عـن المعـاوق مـيـزوها بالأجـراس
يتلون شيخ للفخـر يلبس اوشـاح *** نسل العـواجي بالمناعير لـه ساس
مقدم هل الجدعا بعيدين الأشبـاح *** ذخـر القبيلـة لا ابترم عـقـد لـولاس
أمجادهـم تمـلأ سجـلات وأصفـاح *** مـا ظنتي تحصى بصفحات قرطاس

ونعم وسبعة أنعام بصياح ابن دعاس يتعب على الطيب ويخسر ويستاهله وهو كفوا ويشّرف وكما قلت استاذ عبدالله بن عبار له محبة في قلوب الناس والناس تحب الصافي النظيف اللي يسوق الخير ويبعد عن الردى قولا وعملا....

... صح لسانك يابو مشعل وبيض الله وجهك ....

ابو مشعل

صح لسانك وبيض الله وجهك وحضورك لاشك إنه شرف لصاحب الحفل خاصه
ولفخذ الضواويه عامه لاهنت وأدام الله وجودك وحضورك المميز
كفيت ووفيت ولا عليكم زود







تقبل تحياتي