هذه القصيدة بمناسبة عودة خادم الحرمين الشريفين الملك عبدالله بن عبدالعزيز آل سعود حفظه الله سالماً معافى ولله الحمد :
حيالله الـلي بـطيّب الفـعـل موصـوف *** مليكنـا رمـز الفـخـر صاحـب الجـود
يا مـرحـبـابـك يـا ذرى كـل مـلهـوف *** حـيـاك ربـي يـا فـزع كـل مـضـهـود
يامن ملكـت قـلـوب شعبـك بمعـروف *** الشعـب وافي والـولاء فـيـه معهود
حبـك كمـن بـقـلوبهـم داخـل الجـوف *** والحـب يـرسخ بـيـن والـد ومـولـود
شعبك يابو متعب ملاهيف واشغـوف *** والكـل عـنـده شوفتك خـيـر مقصود
يا من عـلى كـل الرجاجيـل بـك نـوف *** صنت الحمى وأديت للشعب مجهود
الكـل يسمـع عـن فعـايـلـك وايشـوف *** مـن حيث فعلك لـه براهين واشهود
يالعاهل الـلي بسايـر الشعب مكلـوف *** جودك عـلى كل الوطن ليس محدود
تعيش يا حرز المواطن عـن الخـوف *** تسهـر وكـل الشعب في ظلك رقـود
حيثـك ذرانـا عـن سمـايـم وعاصوف *** فيك الـذرى والظل عن لاهب النود
عساك ما تشكي من أوجاع غضروف *** وعسى الـولي ياقاك يا ناطح الكـود
وعساك دوم بعـافيـة مـا تـقـول أوف *** يلطـف بـك الـلي للمخالـيـق معـبـود
الـلـه يجيرك مـن عواثـيـر واصدوف *** يـا قـايـد الأمـة لـك الأمــر مـسـنـود
يالحاكـم الـلي بالفضيلة لـك اشفـوف *** يـا ذخـرنـا كـان الليـالي غـدن سـود
أنت العويـن لمن شكا ظيـم وظـروف *** ريـف الذي من جاير الوقت مسرود
وفـرت لـلأيـتـام والـرمـل مـصـروف *** وبـذلـت للمعـسر مـعـونـات وانـقـود
يامـا لجالـك مـن مساكين واضعـوف *** عون المعاق وفـاقـد السمع والعـود
تشمـل بعطفـك كـل عـايـب ومكفـوف *** تبـعـت سلـم أبـوك والـفـعـل مـاكـود
الـلي اليـا جـولـه مسايـيـر وضيـوف *** دايـم مضـيـفـه للهـواشيـل مـشـيـود
اللي مشوا خلفـه طوابيـر واصفـوف *** ساروا مع القايـد صوابيـر واحشود
جاهد وصان الـدار عـن كـل ملقـوف *** رفـرف عـلمهـا وانكعـم كـل مـقـرود
مضـراب كـفـه للمعـادي بـه احتـوف *** لاشـك للصاحـب بـه الخـيـر والفـود
سلطان نجد أن جـوّد السيف بكفـوف *** جـّرد حسامه وأنتخى بعـزوة سعود
المعـتـدي يـضرب عـلابـيـه بسيـوف *** سيف العـدل يقضي عـلى كل منكود
خـلا العـدو عـضـده مقـيّـد ومكتـوف *** وأقـسم يـمـيـن وقـال للشـر مـا اعـود
من عانـده يبـدي نـدامات واحسوف *** حـكـم بـعـدل وبـيـرق الـعـز مشـيـود
عوج الدروب اللي بهم ميل وجنوف *** عـدل مماشيهم عـن النقص والـزود
ما توفي أوصافه عبـارات وحـروف *** مجـده عـريـق مـعـقـبـه جـد لـجـدود
عبدالعزيـز الـلي لـه المجـد معسوف *** الليـث الأروع عقـب نـمـور وفهـود
الـلي فخـرهـم في سجلات واكشوف *** مبطي عـليهم بـيـرق النصـر معقـود

ابو مشعل

الله يسعد مسائك وصح الله لسانك على ماكتبت
وملكنا ابو متعب يستاهل هذه المعلقه العظيمه
والحمد لله على سلامته وعودته لإرض الوطن سالما ً معافا
والله يبيض وجهك عزالله ماقصرت ولاهي
غريبه على شاعر قبيلة عنزه
وأديبها ومؤرخها
الشاعرالكبير/عبدالله بن دهيمش بن عبار
لافظ فوك يابو مشعل

أدامك الله ورعاك

مع تحيات
محبكم الشاعر / حمد الضوّي

الحمد لله على سلامته وعودته لإرض الوطن سالما ً

والف شكر لشاعرنا الكبير عبدالله بن عبار

على هذهي القصيدة الجميلة

تقبل تحياتي.

صح لسانكـــ يابو مشعل
مشاعر لاتستغرب منكــ يحفظكـــ الله تجاه والد الجميع خادم الحرمين الشريفين
ألبسهُ الله ثوب الصحّة والعافيه وأيدهُ بنصره وأخوته الكرام والأسرة المالكة الكريمه "
حفظ الله الجميع وحفظ بلادنا وشعبنا الكريم من كل شر ٍ ومكروه ..
ودّي وتقديري لجنابكــــ الكريم يحفظكـــ الله..

مبدع دائما ياابو مشعل بارك الله فيك والحمدلله على سلامة ابو متعب ملك القلوب حفظه الله ورعاه

أشكر الأخوة الكرام حمد الضوي ورياض سالم وشامان والنويبعي على مرورهم وأطلاعهم على هذه الأبيات المتواضعة التي قلتها من فيض المشاعر في قائدنا ورائدنا المحبوب

حفظ الله ولاة أمرنا من كل سوء
وحفظهم الله في حلهم وترحالهم

الله يحفظ طويل العمر الحمدلله على سلامته

الاخ العزيز ابو مشعل

الله يجزاك بالخير وصح الله لسانك على ماكتبت
وملكنا ابو متعب يستاهل هذه المعلقه العظيمه
والحمد لله على سلامته وعودته لإرض الوطن سالما ً معافا
والله يبيض وجهك عزالله ماقصرت ولاهي
غريبه على شاعر قبيلة عنزه
وأديبها ومؤرخها
الشاعرالكبير/عبدالله بن دهيمش بن عبار
لافظ فوك يابو مشعل

أدامك الله ورعاك

صح لسانك . يا ابومشعل والحمد لله على الامن والامان
وان يديم علينا نعمته وان يحفظ ولاة امرنا . وندعو الله
ان يوفقك يا ابو مشعل