( تهنئة لمحافظ البكيرية )
بصحبة الشيخ فهد بن راضي الراضي الحبلاني رئيس مركز قصيبا بالقصيم تشرّفنا بزيارة الشيخ رميح بن صالح الشتيوي الرميح محافظ محافظة
البكيرية بمنطقة القصيم لتقديم واجب التهنئة بمناسبة ترقيته بالمرتبة الرابعة عشرة وتعيينه محافظ للبكيرية وقد قدمت لسعادته هذه القصيدة تهنئة :

يا رميـح فـي منصب محافـظ ترقـيت *** مـبـروك لـك يـا عـل تسعـد بمنصبك
كـتبـت منظـوم التهـانـي ولـك جـيـت *** عسى المعـانـي والتعـابـيـر تـعجبـك
رقـيـت فـي بـرج الـعـلا واستعـزيـت *** حـيثك بـذلت الجهـد وأديـت واجـبـك
الحـظ طــاب وصـح لـك مـا تـمـنيـت *** فـعـل الجمايـل هو رصيدك ومكسبك
وفـيـّت بـافـعـال الـمـراجـل وكـفـّيـت *** ورقـي المعـالي مـا يـكـودك ويتعـبك
للـمـجـد حـثّيـت السرى مـا تـونـيـت *** ويـاثـق بـك الـلي للمهـمـات ينجـبـك
وأنت الـذي وقـت الـلـزم مـا تخفيّت *** شلت الحـمـول الكـايـده فـي منـاكبـك
وأنـت الـذي بعـلـم الفضيلـه تـكنيـت *** ربـك حباك بحسن الأخلاق واوهـبـك
يـا عـل مـا تشمت عليـك الـشواميت *** ويـخـيـبّ ظـن الـلي يـدوّر مـعـايـبـك
لـك الفخـر بالـلي عـملـتـه وسـويـت *** في مسلك الطـولات سلمك ومـذهبـك
مــا دام فـي بـيـت الكـرامـه تـربـيـّت *** صالح أبوك الـلي عـلى الطيب دربّك
أبـوك يـرحـمه الـولي حـامي الـبيـت *** مرحوم عـودٍ يا أبن الأجواد عـقـبّـك
أبــوك يـلهـج بـالهــلا وقـول حيـيـت *** يا رميـح نـفخـر بـك ونفخـر بشايبك
أبـوك عنوان الصخى طـيّـب الصيت *** عـرق النـدى يا ماكـر الجـود يجذبك
أبـوك ذبّـاح الـكـبـاش الـعـنـاتـيــــت *** يفـرح بـه الـلي يـربـط الحيل بالشبك
أبـوك ذكـره حـي لـو كـان هـو مـيت *** لا جيب طـاري سمعته طـال شاربـك
أبـوك سـاس الجـود لـه مـا تـناسيت *** عـلـمـه يـسـرّك بالمـكـارم ويطـربـك
أبـوك صيته بالكرم نعـم مـا اطـريـت *** بالطـيـب فـعـلـه تفـتخـر بـه قـرايبـك
أبـوك ريـف الجـار بـاسمـه تسميّـت *** هـو الـذي نـدعـوك باسمـه ونـنـدبـك
أبـوك نـسـل رمـيـح بـه لا تـعـزويـت *** الـكـل مـن روس المشاكيـل حـاسبك
واخـوانـك الـوافـيـن فـيهـم تـقـويـت *** لا حـل بـك ظيم الـزمـن هـم جلايبـك
مصقر حـرار أن كـان للصيد هـديّـت *** أدنـاهـم الـلي بـالـمخـالـب ايـشـبـبك
ولك عـزوة يوم الحداء والمصاويت *** فـوق الـسبـايـا والحـوافـر لـهـا دبـك
عـزوة نـجـيـد لفـعـلهـم مـا تحاصيت *** الـربـع الـلي منهم عـموقك ومنسبك
وأن هاجـت الهيجا تهجـد العـفاريـت *** عـلـيـه مـردود اللـنـقـا مـن يحـاربك

الشيخ صالح بن شتيوي الرميح رحمه الله والد المحافظ رميح كان من أعز الأصدقاء وهو من وجهاء وأعيان أهل القصيم وفي سنة 1418هـ أيام الربيع المشهور كنت أزور الشيخ راضي بن عبدالرحمن الراضي الحبلاني أمير قصيبا رحمه الله وفي ذلك السنة دعاني الشيخ صالح الشتيوي وهو يسمونه أهل القصيم كبير الصياني وفوجئت أنه عمل لي حفل تكريم وأقام وليمة كبيرة دعى عليها أعيان البلد وبدأ يرّحب وينوّه أنها كرامة لي وهو يشيد وسبق وأن قال لي الشيخ راضي أن هذا الرجل إذا دعى شخص ولم يوافق تصيبه صخونه من الكرم والآريحية وكان رحمه الله يكن لي من القدر ما جعله يعمل لي تلك المناسبة وقلت هذه القصيدة اثني على الشيخ راضي بن عبدالرحمن الراضي الحبلاني أمير قصيبا سابقاً رحمه الله والشيخ صالح بن عثمان بن شتيوي الرميح المصلوخي أبو رميح رحمه الله واسند على حمود بن عنيزان بن ناجم العنزي فأقول :

يا حمـود طـاروق الخواطـر لفاني *** هام الفكر والبال هاضت اشجونـه
بديـت اعـبـر مـن غـزيـر المعـاني *** ونظمت قـافـي مـن روايع افـنونـه
ما قـلت قـولي في رهيـف الثماني *** لوهن مثل وصف الزمرد اسنونـه
مـا قـلتـهـا بصخـيـفـات الـمـثـانـي *** ولا همني يالقـرم ناقـض اقـرونـه
مـا ولـف غـضات الصبايـا بـلانـي *** ولا انغـر باللي يسبي العـقل لونـه
يا حمود ما اقـلـد صـريع الغـواني *** خـليـت شـعـر الوجـد لـلي يـبـونـه
ربـي عـلى الطرق القـديـه هـداني *** والهـرج من غير الحقايق مهـونه
هذا الجـواب الـلي لفـظ بـه لساني *** وأهـل الفـهـامـة قـولنـا يفهمـونـه
لا شـك أنا يـا حمـود يغـمـر كياني *** حـب الكـرام الـلي الفخـر يفعلونـه
اعـلـن محـبـتـهـم وربـي عـطـاني *** ومن شاف عد اللي تشوفه عيونه
زرت القصيم بعيد فطر ارمضاني *** وأنا من اللي حق الثناء يظهرونـه
مـالي لـزوم لمـاكـر الجـود عـاني *** أبـو دحيـم الـلي النـشـامـا يجـونـه
وعايدت لابه شوفهـم عـيـد ثانـي *** الـلا بـة الـلي ضيـفهـم يـكـرمـونـه
حبـلان نسـل معـربـيـن المـجـانـي *** فعـل الفخـر والطيـب مـا يجهلونـه
من روس وايـل مطلقين اليمـانـي *** يـوم الـمـراجـل حـقـهـم يـدركـونـه
ديـرة قـصيـبـاء شيـدوبـه مبـانـي *** وارض القوارة والجواء ينـزلونـه
يـوم النخـل يسـقى بـكـد السواني *** احيـوا غـرايسـهـم ويـثـنـون دونـه
صـانـوا بلدهـم واحمـر الـدم قانـي *** مبطـي شتـيـل جدودهـم يحتمونـه
يذكـر ثـنـاهـم عـنـد قاصي ودانـي *** عـاداتهـم عـرق الـرحـم ياصلونـه
واخـص فـي قـولي رفيع المكـاني *** راضي حجأ من يلتجي له وعونـه
شهـم وكريم وشاعـر ومعشرانـي *** وحكيـم راي وبالصخى يـذكـرونـه
وإلى برك بالشيل زمـل الصخـاني *** لـو ثـقـل حـملـه يـنقـلـنـه امتـونـه
ثـم اشكـر الـلي للـكـرامـة دعـاني *** صالح عسى رب الخلايـق يصونـه
أبـن رمـيـح الـوايـلي عـز شـانـي *** المـكـرم الـلي بـالـكـرم يـمـدحـونـه
ما دك بـه عـرق البخيـل الهـداني *** جـده هـواشيـل العـرب يـقـصدونـه
من قبل اشوفه صادق العلم جاني *** وحكـوا لـي الـلي بالكـرم يبخنونـه
قـالـوا تـرى مـن الا ريحية ايعاني *** لوعارض المدعو تصيبه صخونه
حاولت ارده عـن هـواه وعصاني *** ولا طـاوع الـلي حاولـوا يقنعـونـه
جـوده مـحـيـط ولا لـحـده مـوانـي *** ولا خـالـف المعهـود لـو تمنعـونـه
مـا يذخـر الماجـود والعـمـر فـاني *** مـا يـمتـنع مـهـمـا تـراثـت ديـونـه
فصـل لتـقـليـط الـذبـايـح صيـانـي *** تـنـدا من شحـوم الهرافي صحونه
يـذبح عـناتيـت الكبـاش السمانـي *** كـل يـوم تـجـّار الغـنـم يـحـتـرونـه
قالولـه اقبض راحتـك قـال مـانـي *** من شح في مالـه تـزاود اغـبـونـه
أبـن شـتـيـوي لـلـردا مـا ايــدانـي *** طاهـر ضمير وصاحبه ما يخـونـه
من روس لابه يوم عسر الزماني *** يـوم السنيـن الـلي بهـا قـل مـونـه
زبن الدخيل اللي به الوقـت وانـي *** عـز القـصيـر وضيفهـم يشبعـونـه
نسل النجيدي ما مشوا بالطمانـي *** شـم الجـبـال الشـامخـه يصعـدونـه
في ما مضى عـلم المصاليخ باني *** قـفـر الحـمـاد بـذودهـم يـرتـعـونـه
منـابهـة وقـت الـقسى والليـانـي *** ضـد العنيـد الـلي بـراسـه خشـونـه
والمعذرة عن كـل مقـصد خـفاني *** والـلي قـصـر عن مدحكم تعذرونـه

* وقلت أيضاً هذه القصيدة أيثني على الشيخ صالح بن شتيوي بن رميح المصلوخي رحمه الله :
يا نـزار الخـط وضـح لـي نقـوشـه *** بالقريض الـلي القريحه تحتويهـا

من معاني صافيه ماهي مغشوشه *** هـام فـكـري والقـوافي مهتـويـهـا
راكـب الـلي تـايـره مـا دار بـوشـه *** بـنـز لـبـعـاد الـمـاشـي نـعـتبـيهـا
ما دخل ورشه ولا سمكر ادقـوشه *** الشبح يـفخـر بـهـا مـن يـقـتـنيهـا
كنها اللي من وحي رمي مخروشه *** شـافـت القـناص واختفـت ايديهـا
أو كما الـلي جابـه الصيرم يروشه *** مـن غـلاة الـروح وده يـحـتـميهـا
أو كما اللي روحت تبغي اعشوشه *** حـادهـا الـلي بالمخـالـب مطبـيهـا
مـن يـسـابـقـهـا تـعـداه وتـطـوشـه *** منـوت الـلي سـار منهاتـه يجيهـا
ساقها الـلي للسفـر جهـز اقشوشه *** جـاهـز ولبـس المسافـر مرتديهـا
يا نديـبي مـن قبـل بنصـه تـنـوشـه *** أذكـر الـرحـمـن حـزت تـعـتـليـهـا
خذ كتابـي وصلـه مكـرم اطروشـه *** يـفـتخـر فـي جابـتي مـا يـزدريهـا
أبن شتيوي عسى تفـداه الدحوشه *** يفتهـم قـصـد العـلـوم الـلي نبيـهـا
صالح اللي بالصخى نفسه بشوشه *** والهواشـل فـي مضيفـه يحتريهـا
حيـث عـلم الطايله صالح يحـوشـه *** الـمـراجـل دوم صـالـح محتسيهـا
يذبح من العيت لضيوفـه رشوشـه *** سلـم عـادات الحمـايـل مـا نسيهـا
والشريطي كان شافه عند حوشـه *** زاد سعـر الحـيـل حـيثـه يشتريهـا
ليت اللي شرواه ما اتكمل قـروشه *** ودك أبـو رمـيح دايـم مـرتـهـيـهـا
يوم اضافير الزمن تجرح اخموشه *** ما حسب ميلات بقعـا ولا خشيهـا
جرب اللي راس من يجزع يدوشه *** لـو ظـروفـه قـاسيـه مـا يشتكيهـا
بالسنيـن الـلي بهـا شح المعـوشـه *** يـوم مـن صـاد الجـراده يشتويهـا
ومن تفكـر بالزمن شابت ارموشه *** يسهـر وساعـات ليله مـا ايغفيهـا
كـم طـيـّب خـربـت دنـيــاه كـوشـه *** عـز نـفسه والمهـونـه ما رضيهـا
بالتعـب والكـد يجمع قـوت غوشه *** يـبـغـي الطـولـه ولا يـقـدر عـليهـا
كـل مـا جـاء خايعٍ لجـت اوحوشه *** مـا يطـيـق الـدار والحـقـران فيهـا
واستوت لـلي مثـل خطـو اللكوشه *** يمـدح المخلوق واحيـان ايهجيهـا
تسري وتجـري مع البيـدا جيوشه *** غـرتـه نـفسه عـسى الله ايهـديهـا
صوب منحر صاحبه ذبت اقفوشه *** والأعادي لـو تدوسه مـا ايغـزيهـا
كـل فـتـنه كـل طـوشه كـل هـوشه *** يصطنعـهـا ويـبتـدعهـا ويفتـريهـا
يلتقط عوج السوالف في ادشوشه *** ويخترع مظمونها لـو مـا وعـيهـا
ما خبـرت الحنظله قيـل امعـروشه *** مـن مـرارت لـبـهـا مـا نـشتهـيهـا
والحدج لب الحناضل في اشروشه *** ما تغـيّـر لـوعـلى الشط اتغـذيـهـا

صح لسان شاعرنا القدير أبو مشعل على هذه القصائد الرااائعة

ونتقدم بالتهنئة للشيخ رميح بن صالح الشتيوي الرميح محافظ محافظة البكيرية بمنطقة القصيم بمناسبة ترقيته الى المرتبة الرابعة عشرة وتعيينه محافظا للبكيرية وألف مبروك متمنين له دوام التوفيق والنجاح ،،،،،

صح لسانك يابومشعل ويستاهل ابن رميح هذه المراتب العالية وجميع ابناء قبيلة عنزة