والله ماادري وين اودي وجهي منكم هذا اول يوم لي وازعجتكم فيه لان هذا ثاني استفسار اكتبه
بس ابي قصيدتك يااستاذ عبدالله في زيارة شاه ايران

أخي الكريم :
من الأفضل أن تذكر الأسم الصريح بحيث من الصعب أستمرارالتعامل مع الأسماء
المستعارة أما بخصوص شاه أيران فهو ليس عربي لذلك لم أقول به قصيدة وأظنك
تعني قصيدة قديمة من شعر الوجد وهي من الشعر القصصي وهذه القصيدة منشورة
بكتابي ( ديوان الوائلي ) تحت عنوان ( نكبة حزيران ) وبأمكانك الحصول عليها
عن طريق الديوان حيث لا أريد نشرها بالموقع وقد ورد ذكر لشاه أيران بأحد
قصائدي ضمن قصيدة قلتها ولها مناسبة وهي مسنده على أحد الجماعة وبها
أثني على الشيخ النوري بن فواز الشعلان حيث قام بوجاهة أعتق رقاب وأثنيت
عليه بقصيدة قبل هذه حيث غضب بعض الذين لا يستطيعون القيام بمثل عمله فأقول :

سميت بسـم اللي لـه الخـلـق صـيّـام ** يرجون عـفـوه دوم سجّـاد وركـوع
وبديـت نظـم القاف مـن لـب الإفهـام ** فيض القريحـة من نقاريح يـنبــوع
نفح المشاعـر صوغها فهـم وإلهـام ** وفن القريض بجوهر الفكرمصنوع
والقصد ما يخفى على الشاعر الفام ** السد بـاح وهيّض الجـاش موضوع
حاولـت اكنـه والضرورة لها احكـام ** وكشف المغطا بسلم الجواد ممنوع
لا شــك فـي مـنهــج تـعـاليم الإسلام ** الذود عن حـد الحمى حـق مشروع
حسّـان ابـن ثابـت تصـّدى للأخـصام ** رد الهجاء ومن سيّد الخلق مدفوع
شـذرة لسـانـه كـنـهـا شـذرة احســام ** كافح وعدوان النبي صاعهم صوع
مـا هـمـنا مـن ذمـنا يا أبـن صـلهـام ** لـو طـال حبـل الكـذب لابـد مقـطوع
مـا ضـرنـا تـلفـيـق هـلبـاج واخـمـام ** لو قال ما قـولـه مصّدق ومسموع
يـا مـا سـمعـنـا مـن هـرابـيـد حـّـوام ** ويا ما سكتنا عـن هـذاريـم منـزوع
الـخـايـب الــلي بـالـديـاويـن عـّــذام ** طاشت سهومه والهدف بعد ميقوع
الـحـاقـد الــلي صـال بالكـذب هجّـام ** شين الضمير بقـلبـه الحقـد مزروع
الــلي لعـرض الـغـافـل الغـار شّـتـام ** جلاّب حظه بارخص السعـر مبيوع
وش عـاد فـاد مـرّوج الـهـرج نـمّـام ** يـدور بـالغـيـبـة مـصالـح ومنفـوع
يـبحـث عـن الغـرات والـقصـد هـّدام ** صابـه كمد قـلبه من الحقـد ملقـوع
راعـي البلايس طـاح حـظـه ولا قـام ** واصبح قـناعه كاشف الستر مجلوع
وأظــن مـا حـصّـل مـرامـه ولـو زام ** عـوّد سوات اللي عـلى الوجه مقموع
من فضل والي العرش ملجوم بلجام ** ما يـبلغ المقصود لو يشخف الكوع
المنسعـر بـالغـلث لـه عـوق واكعـام ** حيـث الحنش نابه عن السم مقلوع
ونـقـل الكلام لشمـل الأقـراب قسّـام ** يـا مـا ويـا ما فـّرق نزول وانجـوع
حكي النقـيلي سوس يفتك بالأجسام ** مبـطي لـك الله للـمخـالـيـق راثــوع
والـلي زعـل مـن مدحنـا لـبـو دحـام ** يـفـعـل فعايـل طائـل الشـبر والبـوع
شـفع لـربعـه يـوم حكمـوا بـالإعـدام ** وافـرح عوائلهم عقب نوح ودموع
ابـي امـدح الـنـوري ولا اطـيع لـوام ** بـه نفتخر والقول بالصدق مشفوع
عـلم الـفخـر يسـتـاهـله كل ضرغـام ** سلايـل اللي لبسهـم طـوس ودروع
راس العرب بـالمعـضلة موقفـه هام ** ما يخـتفـي مقـدم طوابـيـر واجـموع
والـلي جـداه النوم عـن واجـبـه نـام ** خـلـه بـراحـة بـال ورقـود وهجـوع
والـيـوم حـنـا بـزود خيـرات وانعـام ** نـنعـم بحكم الحـق والشمل مجمـوع
الحـمـد لله جـت عـلى خـيـر ما أيـرام ** زال وتبـدد واهس الخوف والـروع
نمشي على وضح النقا ونشمخ الهام ** نسلك طـريق العـز والراس مرفوع
عـند الكرام إكـرام وإعــزاز واحشام ** والحـر مـا يقبـل مـذلـه ولا اخضوع
الـحـر مـا يـصـبـر عـلـى ظـلم ظّـلام ** والجـور مـا ينطـاق والحـق متبـوع
تـلاشـت الأوباش وانـصاب الأ زلام ** وعصرالتسلط زال ما يرجع رجـوع
وبعض الرموز الباليه مثـل الأصنام ** يـغـتـر فـيـهــا كـل جـاهـل ومخدوع
والــلي يــغــرنــه خـيـالات الأوهـام ** سلم الغـرور بخاطـره صـار مطبوع
متكبـر ويـفخـر عـلى الناس بعظـام ** يـبى الصعب ينقاد له بالرسن طـوع
كـن البـشـر عــنـده مـوالـي وخـدّام ** ما تـقـل فـي آدم لهـا جـذوع وفروع
وده يــدوس الخـلـق كـلـه بـالأقـدام ** ما يـدري الـدنيـا بهـا نـزول وطلوع
مايفتكر وش صارمع شاة الأعجـام ** أمسى ملك وأصبح عن العرش مخلوع
يـوم الـتجأ مطرود عن ديرته شـام ** عـاف العـذارى والعـماهيج والخـوع
نـكـبـات بـقـعـا بـددت مـجــد صـّدام ** عقب الفخامه صار بالسجن مجدوع
ما صح له عـن واقع الأمـر مهـزام ** ولا عاد لـه في عودت المجد مطموع
نـعــوذ بـالـلـه مـن تـقـالـيـب الأيــام ** دايـم تـقـلب كــل حــزة عـلـى نــوع
دنـيــا الـغـثـا تـشبـه تمـاثيـل الأفلام ** من هرّفت له يوم تطوي له اسبـوع
يــوم بـهـا تـصبح عـماليـق الأقـزام ** ويوم الشناح الهيلعي صار مربـوع
يوم بها تسمر عـلى صوت الأ نغـام ** ويـوم تبات من الغضب تقل مفجوع
احـيـان يـدفــق فـائض الـزاد بـدرام ** واحيان يشوون القدايـد من الجـوع
احـيـان تـلبـس شـال واشماغ بسّـام ** واحيان مـا تملك على ثـوب مرقوع
أن سانعـت لـك ترتـدي فـاخر الخـام ** وأن عاضبت تلبس درافيل وارثوع
عصر الفـرح والكيف والبسط مادام ** لابـد مـا تـشـرب مـن الـمـر قرطوع
والخاتـمـه صلـوا عـلى خيـر الآنـام ** اللي جعـل مبنى هـل الشرك مقشوع

الله يعطيك العافيه .. وصح لسانكـ ..
تقبل مروري أبو صـــــايل .

بارك الله فيك



تقبل مروري

الله يحفض لنا شاعر عنزة ونسابتها