قصيدة عبدالله بن عبار ورد صالح الرضيمان عليه - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

01-28-2015, 12:14 PM

الشاعر المعروف صالح بن رضيمان العنزي من أهل قصيبت بالقصيم في أحد المجالس قال لو مدحتني بقصيده لوضعتها في برواز وعلقتها في مجلسي وكان يقولها من باب الدعابه فقلت أبشر ووجهت له هذه القصيده :

يا أبـو بـدر تبغيني أمدحك مـن شان *** تـحـطـهـا أبـرواز وسـط التصاويـر
أبي أبتدي بالمـدح وأعـلن به أعلان *** لأجـل طلبك أصخّـر القاف تصخيـر
ماني بمدحـك يابن الأجواد خسران *** وآسمح وسامح كان لاحظت تقصير
يابو بدر لو كنت في عصر الأكـوان *** تـروي شطيرات السيوف البواتيـر
تـشـل مـن ذود المـعـاديـن قـطـعـان *** وتحـذي من جـلال النيـاق المغاتيـر
لـكـن زمـان اليـوم يا طـيـر حـوران *** كـمـا تشاهـد صـار بالـوقـت تغـيير
لاصـار مـا عـنـدك من المال ميلان *** بالمجتمع لابـد تـشـوف المـحـاقـيـر
لو كفّك أكـرم مـن هماليـل الأمـزان *** مـا تـدرك الـطـولـه بـلـيـا دنــانـيــر
وش فايده لا صرت طيّب وفـقـران *** مـادام مـا تملـك مـن المـال قـطميـر
من يمدح المفلس يقولون غـلطـان *** ومـن قـل مـالـه مـا تجيـه المسايير
عـزاه لـلي مـركبـه حـوض نـيسان *** قـرنـبـع ولـو بـنشرت مالهـا سبيـر
والنعـم بـك يا صالح أبـن رضيمـان *** يالشاعـر الـلي مـن كبـار الشواعير
يابـو بـدر تبدع مـن الشعـر قـيـفـان *** الــذ وأحـلا مــن حـلـيـب الـمباكـيـر
وأنت الذي قـافـك تقـل نظم مـرجان *** وأن كان صغت البيت مافـيه تكسير
تبـدع قصيد ولا أنـت بالنظم بحـلان *** واليـا القيته ترفع الصوت واتـزيـر
ولا تـمـدح الا الـلي يشابـه كحيـلان *** ساس الكرم والجود ريف الخطاطير
تـثـني عـلى الطيـّب وتـسب كـوبـان *** ولا تـسـب إلا الـرخـوم الـمـعـاثـيــر
أنـت الـذي شرواك مـا غـث جـيـران *** شاعـر ولابك شـر لاشك بـك خـيـر
شوق الهنوف اللي تقل ريم غـزلان *** بـنـت الحمايـل من خـيـار الغـناديـر
من ساس عـزوه بالملازيم شجعان *** مـن نـسـل جـبـر مقحمين الطوابيـر
وشاوشه وزيـود وعـيـال شـرمـان *** وسـلايـل شبـيكان صفـوة مناعـيـر
منهم أبن حيـيـان وأيضـاً مطـيـران *** والمـدحـل ونسل الأفينس مشاهيـر
ويـامـا بربعـك من نـوادر وفـرسان *** وياما بهـم من فارس يشبه الـزيـر
سلقا اليـا حـان اللقاء واللـغّي شان *** بسيوفهـم يـقـرون عـوج المناقيـر

وقد رد الشاعر صالح بن رضيمان الجبوري على زميله عبدالله بن عبار :

باثنين من شهـر اربـعـه قمت فرحان *** بـعـد الصـلاه ولا بعـد غـرد الطيـر
كـلـمـني المـنـعـور والكـيـف لـي زان *** قال القصيده جاهزه والهدف غير
وتجلجـل الهـاتف عـلى نظم الألحـان *** يوم أبتدى الشاعر بجـزل التعابير
مـن حـطـني شـاعـر وطـيّـب وفـنـان *** قلت الشهاده منك تكفي عن الغير
يشهـد أبـن عـبّـار بالـفـعـل والـسـان *** شاعر ضنا عناز وجه الشواعيـر
يشهد له الحاضر وبالعصر اللي كـان *** أيضاً وتشهـد لـه جميع الجـماهيـر
وسط المسجّـل والصدّى تقـل بركـان *** يركي عـلى كـبـد المعادي مساميـر
كاشعـر أبـن كـلـثـوم أوشعـر حسّـان *** سحـر البـيـان يكسّر العـظم تكسيـر
ربـه حـمـاه مـن الـدواهي والأحـزان *** والـلـه يفـكّـه مـن جحيم وزمهرير
واللي أبتلاك بشر في بعض الأحيـان *** أطـلب عسى يـرمـيه رب المقاديـر
يـا مـرحـبـا كـلّـه مـعـزّه وصـفـطـان *** يالـلي بدعت القاف حشمه وتقديـر
بـعـداد مـا رحّـب كـريـم بـضـيـفـــان *** وأعداد ما داجوا عسوس ومداوير
واعداد ما ركبوا عـلى الخيل فرسان *** يـوم البداوه والضعّـن والمضاهير
قصيدتـك وصلـت وأنـا قـبـل شفقـان *** وحنا عـلى شوفك نسوق التباشير
وقريحتي هاضت عـقب وقـت الأذان *** والـرد عـنـدي والمـعـاني مبـاكيـر
أنتـه علمنا الـوايـلي طـلـق الأيـمـان *** فخر عنزه رعيانها وشيخ وأمـيـر
وش عاد لوشالوك من فوق الأمتان *** نفخر وانماريبك على الشر والخير
يا عـل مـن عـاداك بألفـيـن شيـطـان *** هذا وضيع وبس ينهق كـمـا العيـر
مغسول مـخـه والعـقـل فـيـه نقصان *** والناقصه من ناقص العـقـل تكبيـر
لـك القـروم شـهـود والـنـذل زعـلان *** ولا نستمع لمـزوّر الهـرج تـزويـر
أترك ضعيف النفس مبغـض وفـتّـان *** واللي وقـف ضدّك عطيناه تحـذيـر
تمت يا أبو مشعل على نظم اللأوزان *** وأزكّـى التحايـا يا عشير المناعير