من الرجال الذين شاءت الأقدار أن اتعرّف عليهم في قرية البطين في ضواحي مدينة بريدة
الشيخ مبارك بن فراج البرازي السهلي وهو من وجهاء أهل البطين وقلت هذه الأبيات :
يستـاهـل التـمجيـد حضـرة مـبـارك *** النـادر الـلي مـن شخوص البرازات
نسل الـزبـيـر الـلي بعـصر المعارك *** فارس مضر يروي حدود الرهيفات
يحـق لـك يا أبـن الـزبـيـر أفتخـارك *** بالجـد الـلي عـقـب لنسله كـرامـات
أنـت الـذي من عضّه الغـلـث زارك *** عقب الوهق والياس صارت سلامات
من عـقـب ما عقـله به الهـم شارك *** فـرّجـت هـمـه وأنـثـنـا بـالـمسـرات
عـذروبـك المعسر الـيـا طــب دارك *** تـعـطـيـه مـن مـدت يـمينـك ألوفـات
تـنـفـق يـمـيـنـك مـا تـعـلّـم يـسـارك *** تعـطي الفـقيـر وتبذل المال بسكات
أنـت الـذي بالطيـب تـرفـع اشعـارك *** تتبع قديم السلم بالعصر الـلي فـات
فـعـل المـراجـل يا أبـن فـراج كـارك *** يا ما ذبحت مـن الخراف السمينات
أنـت الكريـم الـلي تـشّرف اخـبـارك *** ريـف الركاب الـلي تبوج المسافات
يجـذب هواشيل الخـلا ضـوح نـارك *** عـادات جـدك بـالسنيـن القـديـمـات
طالت على علوم المراجـل اشبـارك *** يـا أبـو مـهـنـا يـا زبـون الـونـيـات
دايـم عـلـوم الـمـرجـلـه بـعـتـبــارك *** تجـهـد لكسب الطايلـه كـل الأوقـات
العـالـم الـلـه مـا شكى مـنـك جـارك *** ولا يوم شخصت النظر بالقصيرات
حـيثـك فـهـيـم وصايـبـات اشـوارك *** تـنـقـض مبـاهـيـم العقود العسيرات
سـدّك غـميـق ولا تـبـيّـح اسـرارك *** وعليك من رمـز الفهامـه عـلامـات
دايـم عـلى درب الحـقـيـقـه مسـارك *** يفداك الـلي طبعـه شنـاوي وشمّات
يـا عـل رزقـك بـالـحــلال أيـتـبــارك *** وأطلب عسى يـرزقـك رب البريات
سعـيـت والكسب الحـلال اخـتـيـارك *** ما حشت رزقـك بالدجـل والحيالات
مـا قـلـت منظـومي أريـد أخـتـبـارك *** أقـولهـا ولا لـي مـن المـدح غايات
وقال الأستاذ عبدالله الموسى الخرشاوي هذه الأبيات يثني على الشيخ محمد بن عيّاد الخرشاوي ويثني على سكّان البطين :
فـكـري يـحـوم ويـعـتـلي بالمـراقـيـب *** يبحث عن العليا على كل عالي
جـاني يقـول أهـل الكـرم والمواجيب *** يا كثرهم وسط البطين الشمالي
عـربـان مـن كـل القبـايـل أصاحـيـب *** الكيف طايـب والشعر لـه مجالي
وقـررت أسافـر يمهـم دون تـرتـيـب *** وأدخل مجالسهم على ما بدالي
ركبت أنا الفرت الرصاصي ولاهيب *** قطع الفيافي وما طرالي جـرالي
مشيت مـن بـعـد التقاطع بتهـذيـب *** ودخـلـت دار المرجـلـه والمعالي
من أجل ذكره قلت أنا حظي مصيب *** بـأبـو عـزّيـز افخـروا يا عـيالي
وأنـا بـداره كـم سمعـت التـراحيـب *** في بـيـت دايـم مدهـل للـرجـالي
أعـني محـمـد شيخنـا منبع الطيـب *** هـو درعنـا في مظلمات الليالي
الشيخ أبـن عـيّاد ريـف الأصاحيب *** أطلب عسى يحميه عـز الجلالي
قال عبدالله بن دهيمش بن عبّار هذه الأبيات مجاراة لأبيت الأستاذ عبدالله الموسى الخرشاوي
يا أبو فهد حييت يا طاهر الجيـب *** يا مرحبا اعداد الحصى والـرمالي
احسنت بالمنطوق وأعربت تعريب *** قافـك كمـا العـذب القـراح الـزلالي
مدحت شيخ ما سلك مسلك العيـب *** أبـو عـزيّـز مـن ابـعـاد الــمـدالــي
مضّى زمانه في رياض المحاريب *** يطمع بلطف اللي على الكون والي
بـيـن المنـابـر والـدلال المحاديـب *** يـشهـد لـه المنـبـر وصفـر الـدلالي
له قـدر مع ربعه وعند الأجانيـب *** عـنـد الـقـرايـب والأجـانـيب غـالـي
من مقتبل عمره اليا منبت الشيب *** يـثـني عـليـه الأجنـبي والموالـي
وأنجب صوارم من حداد المخاليب *** والنعم والـلـه في جميع العـيـالـي
الكـل منهـم فـاز عـقـب التجـاريـب *** بالطيب فـازوا والعـلـوم الجـزالي
خلفة حمايل ينطحون المصاعيب *** الـطـيـب لـلـخـرشـان أول وتـالـي

وهذين البيتين قالهن الأستاذ عبدالله الموسى الخرشاوي عندما شاهد زميله عبدالله بن عبّار على شاشة قناة ديوان العرب فقال :
أخبروني يا جماعة ما فعلته هو يجوز
هـو يجـوز الـلي نعـزه بالقـنـاه نقبـلّـه
قالوا أن الحكم واجب لا ظهر درع العنوز
كـلـنـا نـقـبـّل جبينـه وأنـت لازم تـفـعـلـه
فقلت شاكراً أخي الفاضل عبدالله الموسى :
يا أبو فهد دام عـزك دوم بالجزلة تـفـوز
تكسب علوم الفضيلة والصخى والمرجله
من يقـدرنـا نعـزه ومن لـه العـز معـزوز
والصديق اللي يقدر نعـرفه ما نجهلـه

قال الشاعر عبدالله البداح السهلي هذه القصيدة يسند على زميله عبدالله بن عبار العنزي ويثني على ضويحي البرازي السهلي من أهل البطين بالقصيم :
بسم رب الخلـق والكـون الفسيحي *** أبتـدي بالقاف وأن عاضب عسفته
خـاطـري مشتـاق للقـول الملـيـحي *** هـاوي الجـزلات والهـزلة عـذفـتـه
صـرت والأفـكـار فـي لـح ولحيحي *** الـرجـل يخـاف مـن قـولـت زهفتـه
لا مـرشد بـّذّال ولا نـيـب السريحي *** شاعـر عـلى قـدي أغطـاي التحفتـه
والـعـرب نـقـّاد سـتـيـر وفـضيـحي *** وعن كلام الناس نظم القاف حفتـه
فيه بعض الناس باسلوبـه مسيحي *** تـتـهـمـه بـالخـيـر ولكـلـمـك عـفـتـه
والسماحـة نـور بالوجـه السميحي *** وزبدة الموضوع من جمّـه غـرفته
والنصاحة تلـقى بالـرجل النصيحي *** يـوم سـار القـاف للطـيّـب حـرفـتـه
لـك يا أبن عبـّـار بالأسم الصريحي *** وأنت لـك ميقـاف يعـرف لا وقفتـه
يـالـمـعـنّـى سـر ولا بـه نـبـيـحـــي *** أكـتـشـفـتـه ولا بـعـد مـا أكتشـفـتـه
يـا مـعـلـّم كـان فـيـهـا لاح لـيــحـي *** قول هاك الرجـل مبطي ما صدفتـه
كـني أمـلـك كـل ثـروة الـجـمـيـحي *** لا عـقبـت الـعـرق وخـلافي نسفتـه
مدري أنا صاحي أو ماني صويحي *** يا وسيـع العـرف ودي منـك لفـتـه
لا حسيت البـال مـا هـو مستـريحي *** للبطيـن أروح وأدنـا بـيـت ضفـتـه
يـنشـرح الـبـال واهـمومي تـزيـحي *** انشراحي مـا تصـدّق لـو وصفـتـه
كـلهـم نعـميـن وملـفـايـه ضـويـحي *** أهـتني بفنجـال عـنـده لـو رشفتـه
مـقـدّم الـتـرحيـب بالبـال الشـريحي *** ولـو أقول المدح كلّـه مـا أنصفتـه
يا أبو مشعل عارفه مهبوب ريـحي *** فـيـه كـل الطيـب سمعـتـه وشفـتـه
مغالطـه بالطيـب ماخـوذ وطـريحي *** والحنـف يـمـوت مـا عـّدل احنفتـه
يابو مشعل والله لو تبخص ضويحي *** لتندم عـلى يـوم فـاتـك مـا عـرفتـه
من هو اللي سمع مـداّح الشحيحي *** وأسحـب الكـلام وبالشارع حـذفتـه
مـدح بغـيـر أهـلـه مذمـوم وقبيحي *** عنه احساسي كلـه والنظر صرفته
في ما مضى المدح بالذبح وذبيحي *** ولا هـاك الـوقـت مـذلاف ذلـفـتـــــه
مهـف الدخان مع عاصوف ريحـي *** كـم عيون الدمع فـي وقـتـك ذرفتـه
اللي ربح واللي ماخـوذ ويصيـحي *** جاهل اللي يلحق الماضي احسفتـه
يا ثـقيـل الـروز والعـقـل الـرجيحي *** يا مصيب الـرأي معكم مـا أختلفتـه
يا عميـد الشعـر بايـن مـن نضيحي *** من عام التسعين ذا الموطن ولفته
مـوطـن أبـو فهـد كسّـاب المـديحي *** يكـذب الـلي بالـكـرم يـقـول طـفـتـه
الشهامة تـقـدح مـن راسه قـديحي *** خـذهـا مـني ديـن لـو تـبي حـلـفتـه
كـم مـن وده مـثـلـه يقـوم ويطيحي *** يـحـتـزم للطـيـب وهـيبتـه كـلـفـتـه
يكسـب الـطـولات مـن لهـا نطـيحي *** مثـل متـعـب اهـتـواهـا والتـقـفـتـه
أمـدح أبـو فـهـد بالفعـل الصحيحي *** والـلـه مالي فيها مقصود وهـدفتـه
والسموحة مـنـك يالـوجـه الفليحي *** في جنابـك نقص مـدحي اعتـرفتـه
يا سليل المجـد يا مبـري الجـريحي *** الفخـر لك ساس والله مـا استلفتـه
يـرحـم من عقبك والـلـه لـه يبيحي *** مـوجـز مـن كـثـر طـيـبـك اقتطفتـه
وقال عبدالله بن عبار العنزي هذه القصيدة جواباً لقصيدة الشاعر عبدالله بن بداح السهلي :
راكـب الـلي لا مـشى مـالـه فحيحي *** كنه الـلي يـطـرده مـن شـب سفـتـه
مـرسـل مـن عـنـدنـا روّح مـشيحي *** مع طريق الجوف يجري فوق زفته
سار نـوه صاحب الـوجـه الصبيحي *** يلفي أبـو بـداح يـفـرح كـان ضفتـه
جـاني المكتـوب بـه قـول فـصيـحي *** وحين مـا جـاني من شفقتي خطفته
مـن مـثـايـل شاعـرٍ هيّـض قـريحي *** أخـذ عـذي القـاف وخـلالي حجفتـه
ما يغـرف القاف مـن طـل ورشيحي *** عـيلـم ما غـاض جـمـّه لـو نـزفـتـه
يابو بداح القاف تصدح به صديحي *** مثل عقـد الماس من نظمه رصفته
مـا تغـّزل بـه مثـل شعـر الـوضيحي *** تمـدح الطـيّـب وغـيـره مـا قـذفـتـه
بالكـلام أحسنت يـا مـادح ضويـحي *** لـك جزيل الشكر حيث أنك أنصفتـه
أبـو ناصر عـن لـزومـه مـا يميحي *** ولا نـلـوم الـلي مع ضويحي نهفتـه
وأن لفاه الضيف في بـيـتـه يريـحي *** أبـو ناصر ريـف مـن بقعـا انحـفتـه
يالـبـرازي عـسى يـفـداك الـوكيـحي *** بالجواب أنصفت والمعبـود خـفـتـه
كـل ربـعـك يـستـحـقـون المـديـحـي *** الفخـر والمجـد لاحـوا فـي شعـفـتـه
فـعـلـهـم يـوم الـمـوازر لـه ضبيحي *** خصمهم بالكون يجفـل مـن رجفتـه
يالـزمـيـل أخبـرك بالقـول الصريحي *** الـف نعم بكل الـلي منهـم عـرفـتـه
منهـم الـلي لـو ملـك خـزن الفتيحي *** بـدده حـالاً وحـطـه فـي صـحـفـتــه
الدسم دايـم عـلى صحـونـه يسيحي *** بالكـرم مـا ضـب كـفـه لـو كـتـفـتـه
والجـمـايـل مـا كسبـهـا كـل تـيـحـي *** لـو تـجـي مـلـزم يحسب أنـك بلفتـه
كالسـراب الـلي يـغـرك بالضحيـحي *** يـغـري الظـامي ولا يـروي لهـفـتـه
بالصباخي مـا نـبـت عرفج وشيحي *** والثمـر مـن العـواشـز مـا خـرفـتـه
مـن ورد للـرس مـا حصّـل نشيـحي *** والصقر مـا طـار لـو ريشـه نتفـتـه
والـبشـر آخـر مصيـره بالضـريـحي *** يـرقـد بـسـرداب بـبـلـكـه سـقـفـتـه

بسم الله الرحمن الرحيم

صح لسانك يا أبامشعل على هذا القصيد الجزل وأهل البطين يستاهلون فهم أهل كرم وطيب ...

فبارك الله فيك وفيهم يا أبامشعل المعطاء ...

السلام عليكم ورحمة الله وبركاته

والحمد لله حمداً كثيراً طاهراً مباركا ً فيه ملئ السموات وملئ الأرض وملئ ما بينهما وما يشاء رب العزة والجلال والحمد لله على ما أنعم به علينا بفضله وكرمه وعزته وإحسانه ..

يستحقون أهل الوفا والطيب وأهل الجماله ويستاهل مبارك وربعه الثنا والمدح ، وصح لسانك وبيانك وبنانك يا أديب ومؤرخ قبائل ربيعه وفخر وايل .. وتستحق ورب الكعبة ما هو أكثر وأكبر وأجزل فأنت أهلٌ لكل مكرمة وإعزاز بك وبشخصك الكريم ،فلك منزلة الكرام الذين سعوا في هذه الدنيا لكسب كل مكرمة في ميدان الرجولة وهم كذلك حفظكم الله بحفظه أجمعين، ولقد خلدت إرثاً يصعب على غيرك ومن هم بعدك الإلمام به ، فهذا ليس كلام أخيك أو شهادة ٌلك مني فشهادتي بك مجروحة ، فهي والله شهادة لك ممن عرفك وتتبع نهجكم وسيرتكم الكريمة من كل أبناء الجزيرة العربية والوطن العربي ، وقد جعلت إسمك مع سيرة الرجال الكرام الأباة ذوي الحكمة والحلم .. وكما قيل فإن معرفة الرجال تجارة .. فبارك الله فيكم وبجمعكم الكريم أنت وجميع من ذكرت في هذا الموضوع الكريم ، وجمعنا بكم في الدارين إنه هو الجواد الكريم ..

وصح لسانك ولسان الإخوه الشعراء الكرام أجمعين ، كذلك نشكر الأخ عبدالله الموسى الخرشاوي على هذه الأبيات الجزلة الصادرة من سويداء القلب ..

وأسأل الله لكم الرفعة والعزة ودوام الصحة والعافية وأن يديمنا وإياكم بستره وعفوه ورضوانه فوق الأرض وتحت الأرض ويوم العرض ..

وكن برعاية الله وحفظه عز وجل .

محبكم والفخور بكم

بارك الله فيك يا أبو مشعل وتقبل مني كل المودة والحترام

بارك الله فيكم جميعا ابو مشعل على القصائد الرائعة

صح لسانك وعلا شانك
لآهنت

حفظك الله ابو مشعل
الحقيقه لساني يعجز عن التعبير
شعر جزل وابداع
ولا يسعني الا أن أقول
بارك الله فيك وشكر الله سعيك
دمتم على خير
تقل تقديري واحترامي
أبو زياد