بسم الله الرحمن الرحيم

قصيده من الشعر الشعبي// للشاعرعبدالله بن عبار0

هذه القصيده تثير المشاعر وتشد العزم بارك الله بشاعر العرب0
والمواقف الأنسانية النبيلة
الا القصائد التي بهذا المستوى
هذه التحفة النادرة من الشعر
الشعبي اهتزت بها أعماق
الشاعر عبد الله بن عبار
تأثرا بموقف
نبيل من المواقف العديدة
التي لا تحصى لصاحب السمو
الملكي الأمير عبد الله بن عبد العزيز
فجاءت ابداعات
الشاعر انثيالاً باهراً في منضومة
شعرية بديعة من النوع
الذي لا يأتي في كل الأوقات
و لايحدث في أي مناسبة
ويسرنا أن ننشر هذه القصيدة
بأعتبارها فريدة
من فرائد الشعر الشعبي المتميز



الفكر شد امعرب القاف بشداد= وارسل خياله مع هبوب الذعاذيع
منصاه ابومتعب وهو منتهى الماد= لو ضعت عن بدر الدجا عنه ماضيع
ناخت على بابه تناظيم الانشاد= في وصف طيبه تلفظ القول واتذيع
زاكي الجناب ابمدحه الشعر ينقاد=جوده جعل كل القرايح مطاويع
ومن يمدحه ماينقده كل نقاد= مدحه فخر ماهو تملّق وتصنيع
فعله على وصف الشواعير يزداد= وعن حصر مجده قوّع القاف تقويع
من طلعته له بالفخر شف وامراد= صعد على العليا بعيد المراميع
حاش المراجل كلها قصد واعماد= والعز الاقعس غاية الكسب والريع
مجده شهر علمه على روس الاشهاد= يبقى دهر ماهو ليالي واسابيع
الليث عبدالله لمجد الفخر شاد= طاريه تطرب له جميع المساميع
مكارمه ما تنحصي مالها اعداد= ماتنوصف زادت على كل ماشيع
عاشت على خيره مخاليق واعباد= وعلى الفقارى وزّع المال توزيع
عرق الندا وبل الحيا غيث الاكباد= من جود كفه مايضم الاصابيع
شط الفرات اللي له الناس ورّاد= تنهل من الصافي قراح القراطيع
هاشل يمينه كنّها ديم رعّاد = وكفه يفيض من الحساني ينابيع
ديوان بيته يدهله كل مرتاد= ويمناه طبعها على البذل تطبيع
بحر الصخا جزل المواهب والامداد= ومن مده المحتاج سوّا مشاريع
هو مربع الوافد اليا نوشح الزاد= مقري محاويل البداه المجاويع
يعيش ابو متعب بصرح الفخر ساد= ثناه مايحصيه نظم المباديع
اللي حفظ سلم الحمايل والاجواد= مفني حلاله للمحاويج تبريع
شبل الاسود الوايلي نمر الافهاد = الليث الاروع مايهاب الصعاصيع
الباسل الصنديد تدراه الاضداد= بزّاع مايرضى العوج والمهازيع
النادر اللي للفهد عضد واسناد= شبحه بعيد وبالعلا له مطاليع
زبن الطريح اللي تكبّل بالاصفاد= ذخره اليا ضاقت عليه المواسيع
ويامى عفى عن نفس سيقت على اقواد= وعاد الأمان لروعها عقب تخريع
وكم واحدٍ جاه الفرج بعد ماكاد= يحمل ويدخل برزخه دون تشييع
امه تنوح وخفرته حزنها احداد= من حسرة اللوعه تهل المداميع
صار البكا من موقها كيف واسعاد= من عقب ماناحت تحسّر وتوجيع
وعادت لها البشرى تقل يوم ميلاد= نور الحياه بناظره له شعاشيع
انجاه ابو متعب عقب سيف جلاد= له تنحني علط الرقاب المتاليع
ياما دعوا له تالي الليل سجّاد = وقت التهجد والخلايق مهاجيع
عاش الزعيم الفذ كسّاب الامجاد= مقدم طوابير الرجال المداريع
من صلب لابه للشغاميم روّاد= اشبال مقرن بالحرايب بواتيع
والمجد له موروث من عصر الاجداد= ساس الفخر عاداتهم بوجت الريع
منجوب ساسه من سلاطين واسياد= فخر العرب عن فعلهم يقصر الصيع
قايد ومن صفوة مقادم وقيّاد = سقم العدا لاصار للحرب تقريع
سلم الجدود امعقبينه للاحفاد= وتربى على العز التليد الرواضيع
نسل الذي سنّد مع المجد مسناد = اللي له أرقاب المشايخ مخاضيع
صقر الجزيرة للجزيلات صياد= من هدته خلا الحباري مخاشيع
شيخ العرب به تفتخر أمة الضاد= يتلونه العربان مثل المراييع
لا صاح داعي الحق يطلب استنجاد= فرحت ضميره بالطلب والمفازيع
اليا اعتزا كفّه على السيف جبّاد = ستر العذارى لابسات البراقيع
لا طار ستر البيض غضّات الانهاد = وتوايقن بين الحنايا مداليع
عبد العزيز الوايلي دونهن ذاد = حتى ارتدن شيلاتهن والمقانيع
وحّد جزيرتنا على هجن واجياد = وجمع شمل بدو العرب والزراريع
يصول من صنعا اليا حدود بغداد = قلبه تولع بالمطاريش توليع
قاد الجيوش وحرر ديار وابلاد = وعاد الحقوق ووسع الملك توسيع
بالقايله يجري والبليل هجاد = وحصن بلاده عن تشتت وتصديع
وحّدها اخو نوره عقب حرب واجهاد = وعذا جناب الدار عن كل تشنيع
الفارس اللي له على الخيل ملكاد = روس الاعادي كسّره بالفواريع
الخيل تقدح بالصخر كنها زناد = والعوص يرقع خفّها بالمراقيع
يمشي جهار بدون مكمن وملباد = ويروم مسلاك الوعر والقراشيع
يوم السنين اللي بها كر واطراد = يتعب صهات مكاضمات المصاريع
على العدو صب الذخاير والاعتاد =وشب الفتايل بالتفوق والمقاميع
من ناطح الصنديد حدّر مع الواد = يكدي عدّوه عند خوض المعاميع
لا صار حذف الروس من فوق الاجساد = يشبه لمحذوف الحصى بالمقاليع
تشيب من هوله رواضيع الاولاد = وتذهل عن الطرس الصغير المراضيع
لاجاء نهار الكون من صال هدّاد = ينطح خصيمه ماثنوه الفراريع
لا قال عوجا راحت الخيل شرّاد = السيف شرّع والجماجم مصاليع
قضى على الباغي وللمعتدي باد = يروي حدود مصقلات القواطيع
يفعل كما فعل العديم ابن شداد = مزّع اقلوب اشخوص الابطال تمزيع
صمع القلوب اقلوبهم كنها اجماد = فدّع ذيب بهم ذيب الرجاجيل تفديع
من حاربه مانام جفنه ولا ناد = توشعه طيفه بالاحلام توشيع
وشلون عينه تقبل النوم وارقاد = من صولة اللي روّع اعداه ترويع
وخضع له العاصي عقب كيد واعناد = وخلا المعاند يسمع القول ويطيع
وحتى الذي مافادهم نصح وارشاد = طوّعهم الصنديد بالسيف تطويع
ولو لا العوج مايطرق السيف حدّاد = لا شك للعايل حنوه الصنانيع
والمعتدي دونه عن الشف مرصاد = عن الهدف قدّام دربه موانيع
خلاه مدباس الوغى ينتحي غاد = وأركى على كبده لهيب الملاكيع
ياما جدع من راس فاسق وحساد = وقضى على اصحاب الدجل والمخاديع
ايضا ولاجامل منافق وسرماد = وعالج اصداع المخبثين الرواثيع
وأخلا مكان أهل الضغاين والاحقاد = سود الضماير بالغلايل مضاريع
واهل العيا والزوم قيّدهم اقياد = وصان الحمى بالمرهفات اللواميع
صنديد مايقبل على الهون مقعاد = عوق الخصيم اليا تلاقوا مفاريع
والحمد لله له مع النصر ميعاد = عاد المعزّه للقلوب المفاجيع
فارس ومن لابة فوارس وزهّاد = وفي طاعة الله صايمين ورواكيع
وفي منهجه عادل عن الحق ماحاد = عنده أطوال الناس مثل المرابيع
سوّه على اللي دينهم كفر والحاد = وهدّم رموز الضلالة صواميع
وانجب صوارم كنهم شم الاطراد = حطوا كتاب الله منهج وتشريع
اهدافهم صوب العلا شبحها ابعاد =يمشون بدروب الفضيله مساريع
واخص ريف الجار جعله بالاوجاد = له بالعلا الصنديد منصب وترفيع
عبد الله المنعور من قاربه فاد = من يلتجي له نال عز ومنافيع
حيثه مثل ديم السحايب اليا جاد = يحيي الديار الممحلات البلاقيع
دايم ولايم كرمته مثل الأعياد = والزاد بالجفنه أشكال وتناويع
العام زرت الليث من ضمن الافراد = سبع الرجال اللي يحل المواضيع
واهديت له كتبي قديمات واجداد = جمعتها من تراث الابطال تجميع
فيها ذكر سطام والشيخ مجلاد = وفيها نسب كنعان واعقاب واجديع
وفيها تقاسيم القبايل والابداد = وفيها لبني وايل بدايد وتفريع
وفيها الوسوم اللي على جل الأذواد = وفيها العزاوي والحدا والمشاييع
وفيها ترانيم المسافر بالأوهاد = وفيها لحن دحّاتنا بالمصانيع
قلته وانا ماني على السعي معتاد = ولاجيت أعرض ابضاعة الشعر للبيع
لو كنت شاعر وانظم الشعر وش عاد = مالي بصندوق العطايا تواقيع
أعتز باللي يمدحه كل قصّاد = ولا درت من بدع القصيد المطاميع
والخاتمة صلّوا عدد رمل الانفاد = على الذي يشفع لمن طاع تشفيع



نشرة لتجدد المشاعر لك العمر الطويل والاقتداربتعليم من تبعك على الدرب الطويل 000 تحيه 0

مشكور اخوي حميد على القصيدة

وصح الله لسان ابو مشعل

دمت بود