سبق وأن قلت عشرات القصائد في الوطن وموحده ونظراً لطول القصائد فقد أختصرت على ملخصات وهي تعبّر عن نفسها :

هذا مقطع من قصيدة في احد المناسبات الوطنية :
الـلـه يعـز الـلي على الرشـد داعيـن *** داعـيـن للسنـة ووافـيـن واحـشـام
الـصـالحيـن الـمـصلحيـن الـتقـييـن *** المرشدين الـلي عـلى الشعب حكام
عـلى نشـر سنـة محمـد حـريصيـن *** ومتمسكين بالهـدى وديـن الإسلام
بسيـف الشريعـة والعـدالـه قـوييـن *** سـور الوطن وحماه عن كل هجـّام
حـلـويـن مرّيـن عـلى الضـد قاسين *** صلبيـن ماشيـن مـع الحـق بألمـام
من ساس وايـل بالمناسب عـريبين *** شاهدهم التاريخ مـن قـدم الأعـوام
نسـل الزعيـم الليـث شـمْ العـرانيـن ***عوق العديم إلى بدا جدال واخصام
حكّامنا حمـاة الجزيـرة عـن الهيـن *** حـرز الوطن عـن كـل حاسد ونمام
سـادوا عليهـا بالحسـام أبـو حدّيـن *** وكـم طاغـيه شالوا علابيه باحسام
احسام يـجـزر بـه رقـاب المعـاديـن *** عـاداتهـم للمعـتـدي ضـد واشـكـام
يرقون صرح المجد سابق وهلحين *** ولاخـاب شعـبٍ ماسكيـنٍ لـه زمـام
الـلـه يحفـظهـم عـلى الـعـز بـاقـيـن *** حـيـداً مـنـيـع ويـزبـنـه كـل منظـام
ساروا عـلى نهج الجـدود القديمين *** فـيـما مـضى تاريخهـم بالـملأ هـام
دانت لهـم الدنيا مـن الهنـد للصيـن *** وسـادوا يمنـا والجزائـر مع الشـام
واستـنصـروا بالـقـادسيـة وحطيـن *** حالوا على الأفرنج واجلوا الأروام
وخـلـفهـم الشجعـان يـوم الأكاويـن *** ضـد الـعـدى لا ثـار لـلـحـرب دمّـام
عـز الـبـلاد وصـايـنـيـن الحـرميـن *** الـلـه جـعـلـهـم دوم لـلـبـيـت خــدام
بـقـيـادة الـعـاهـل حـبيـب الملايـيـن *** أبـو الـثـكالا والأرامــل والأيــتـــام
عـاش المليك ودام شعبه عزيـزيـن *** يبني ويدفـع موكـب الشـعـب قـدام
اللي جعـل صم الصحاري بسـاتيـن *** من بعـد ماهي قاحله من عهد سام
عمـّر مساكن لأحتضان الضريريـن *** ومضايفٍ ينزل بها الضيف باكرام
ومدارسٍ يدرس بهـا العلـم والـديـن *** ومستشفياتٍ عالجت عِل الأجسام
بجهـود حـكـام عـلى الحـق مـاشيـن *** ماشين في حكم الولي خيرالأحكام
اللي حموها بساعـة العسر والـليـن *** ولازال شـرع الـلـه بـبلادنـا ايـقـام
هـم ذرانـا الـي بـظـلهـم مـستـكنيـن *** مـلاذنـا عـن جـور شنتعـات الأيــام
بحـكم العـدالـه والرخـاء مطمـئنيـن *** من فضلهم عشنـا بخيرات وانعـام
الـلـه واكبـر فـوق كـيـد الـمـكـيـديـن *** لـعــل مـا يـشـمـت بـهـم كـل لـوّام
عاداتهـم سحـق الطغـاة الشريـريــن *** لاصار بحدود الوطن عرك وزحام
عابيـن لأعـداهـم ابطـال وميـامــيـن *** قوات جيش المقرني فخر الأقـوام
جنودنـا الشجعـان للحـرب ضـاريـن *** بـواسلٍ تـدحـم عـلى الخصـم قـدام
مـدربـيـن وعـارفـيـن الـتـمـاريــــن *** حـمايـة المظيـوم صلبيـن الأعـزام
عنـد اللـقـا تـلقـا العـيـال الغـلاميـن *** بـالكـون يـظهـر فعلهـم كامـل وتـام
نـعـم النشامـا خـايضيـن الميـاديـن *** إلـى هاجت الهيجـا وكتّـم لها اكتـام
لهم على خوض المعـارك براهيـن *** ورمـز الشجاعـة حاملينٍ لـه وسـام
بـارواحـنا رهـن الأوامـر امفـاديـن *** جـيشٍ يـبـيـد الضـد لـلخصـم لـطـّام
نترفع علمنـا والشعـار أبـو سيفين *** رمـز السعودي فـوقهنا مثل الأعلام
مـن رازنـا ترجـح عـليـه المـوازيـن *** والمعتدي ما نال مـن حـقنا غـرام
ما نخشى ما دامت بنـا الروح حيين *** أمـا الـنـصـر ولا كـتـبـنـا لـلإعـدام
حـنـا جـنـود الحـق ضـد الحريبيـن *** حـريـبـنـا نـقـصـر يـمـينـه إلـى زام
حـد الوطـن ما نرخـصه بالتثـاميـن *** ملك الجدود بكل ساطي وصمصـام
وحنا بفضل الله على الحـق راسيـن *** خاب وخسر من رازنا والسعد قام
مـن طـاوع الرحمـن ربـه لـه ايعيـن *** وحكـامـنـا آل سعــود للبيت خـدّام
* ووهذا مقطع من قصيدة أخرى من قصائدي الوطنية :
نسل الدروع لـدارهـم حـرز وادروع *** صفوة هل العوجا صوارم ربيعه
مجد الجزيرة والفخـر عادها رجـوع *** لـيـث بـشـرع الديـن يمنع منيعـه
لبّـى نـداء شيخ مـن الـظلـم مفجـوع *** للحـق يـدعـي ما لـقا مـن يطيعـه
دعوه من السنه لها جذوع وافـروع *** فـيهـا الصلاح وللخلايـق نـفيعـه
نادوا لدين الحق في صوت مسموع *** وتبايعـوا لأجل الهدى خير بيعـه
وتحالـفـوا انـصـار للـديـن واربـوع *** وتعـاهـدوا يحيـون حكم الشريعه
وقضوا على الفجار والضد مقمـوع *** وسدّوا عـلى كل العصاه الذريعه
مـا هـازهـم مـن دار بالدار مطمـوع *** خابوا دعـاة اهـل العلوم الخليعه
تركي اعـاد المجـد مثـني ومـربـوع *** مضراب سيفـه ماتشافى صريعه
سيفه يقص رقاب وامتون واضلوع *** به الشفـا وعلاج روسٍ صديعـه
تركي فعـل فعـلٍ بـه المجـد مشفـوع *** ضربـات كـفـه بالمعـادي فـنيعـه
وفيصل لبوه العضد والزند والكـوع *** مجناه من صلب الفهـود البتيعـه
شبل نهـل مـن صافي المجد ينبـوع *** علمه كما النبراس يجـذب لميعـه
من عانده راسه عـن المتن مشلوع *** حـدب القشاعم من يمينه شبيعـه
كم طاغيه من مضربه طاح مجدوع *** خـلي طعـام للـوحـوش المجيعـه
كم حاقـد قـلبه مـن الغيض ملـقـوع *** يخـفي غـليله والضماير وجيعــه
مـن خلـق ربي واهسه دوم منزوع *** كـنـه يـراهـم فـي وطنهـم نـزيعـه
سقاه أبن مقرن من الموت قرطوع *** واقـفـت خـيـولـه للمنايـا سريعـه
خلا دعـاة الـشـر هـجـاد واهـجـوع *** سيفـه فتك باهل النفوس الدنيعـه
بالشيمه الشماء لـه اهداف ورموع *** توصيف فعـل الليث ما نستطيعه
الليث اللي قلبه من الصلب مصنوع *** نمـر نجب هك النمور الشجيعــه
سور الوطن واحماه والضد مردوع *** دانـت لـهـم كـل القبايـل امطيـعـه
بصروح عـز شامخه مابـها صدوع *** اشـمّ مـن شـمّ الجـبـال الـرفـيعـه
وجـدد سوابق مجـدهم طايل البـوع *** عبدالعـزيـز الـلي فخـرنا صنيعـه
جّـمع شتايـت ديـرة شعبهـا انجـوع *** وليمّ شمل شعب الجزيرة جميعه
ساد الوطن من بـاب جـده الميقـوع *** ومـن ديـرة الخفجي لحد الوديعه
عبدالعزيز اللي يخلي الصعب طوع *** ومن عال دلـه بالدروب السنيعـه
امجـاد عـزه تـرتـقي لـلعـلا اطـلوع *** ومجهـود فضله مرغدين ابريعـه
والحمـد لـلـه بيـرق النصر مرفـوع *** والمملكـة بـيـن الـدول بالطلـيعـه
مـا وردت عـادات غـرب ولا شـوع *** ولا هي لترديـد المبـادي سميعـه
ولا جاملت كفر البشر ذل وخضوع *** تـنبـذ قـوانـيـن العـبـاد الوضيعـه
والمملكـة صارت بساتيـن وازروع *** عـم الـرخا والخير وازهر ربيعـه
لبست بـلدنـا عـزهـا بـافخـر النـوع *** عـلـم وتـطـوّر والمبـانـي بـديعـه
ولا مر يـوم غـير به صار مشروع *** وإلـى انتها المشروع يأتي تبيعـه
وهذا مقطع من قصيدة وطنية :
نهـضت بـلـدنـا اليـوم كـلٍ شهـدهـا *** بانـت معالمها على روس الأشهـاد
امـجـاد مـا تحـصى كثيـراً عـددهــا *** توصيفهـا يصعـب عـلى كـل قـصّاد
امجـاد مـن سـاد الجـزيـرة فهـدهـا *** عبدالعزيـز الـلي عـلى عرشها ساد
عبدالعزيـز الـلي المعـالي صعـدهـا *** واعـاد للـماضـي تـواريـخ الأجــداد
عـلـيـه رايـات الـمـعـزة عـقــدهـــا *** واعـلا مقام العـز في كون واجهـاد
قاد الجيوش اللي لخصمه حشدهـا *** صقـر الجزيـرة قادها سقم الأضداد
كـاالمـزنـة الـغـرّا حـقـوق رعـدهـا *** ديـمٍ تـهــل مـزونـهـا مـثـل الأطـواد
ديـمٍ عـلى مـن خـان يـنـزل بـردهـا *** سيـقـت رجـومٍ للـظـلالـة والإلـحـاد
مـن لا يخـاف الـلـه يمالـح نـكـدهـا *** بسيـف ٍ يزيـل الهـام للخـصم جـلاد
جـرّد عليهـا السيف حـتى وجـدهـا *** توالفت عـقـب التشاحـن والاحـقـاد
صان الوطن والدار بـادي سعـدهـا *** وصارت نعيـم ايامـهـا كلهـا اعـيـاد
عـز الوطن واثمار جهـده حصدهـا *** مجـد الجـدود الـلي يـخـلـد للأحفـاد
ارسـى دعـايـمـهـا وحـصـّن بلـدهـا *** وجمع شتايتها عـلى هجن واجيـاد
ارسـى رواسـيـهـا وبـعـده عهـدهـا *** لأنجالـه اللي واصلوا بني الأمجـاد
اسـود وسـادت بـه اسـود بـعــدهـا *** صفوت هـل العـوجـا مـقـادم وقـيّـاد
نضـايض المـقـرن ذراهـا سـنـدهـا *** مـن وايـل الـكبـرى لـلأمـجـاد رواد
سـادوا جـزيرتـنا وشادوا عمـدهـا *** سور الجزيـرة مـن قديمٍ لهـا اسيـاد
ارض السـلام الـلـه حقـق وعـدهـا *** عقب الظلالة والطغى هدى وارشاد
مـن فضـل حكـامٍ تـواصـل جهـدهـا *** دار العـرب بوجودهـم مجدهـا عـاد
دار العـرب من شاف ظيمٍ قصـدهـا *** ملاذ عـن لفـح الهـواجـر لـلأجـواد
عـاشت ويبـقى بالنكـد من حسدهـا *** فـي عـز حكـامٍ بـهـا المـدح يـنشـاد
ما خـص فضلهم الجزيـرة وحـدهـا *** عـمـت مكارمهـم عـلى أمـّة الضـاد
من خـان وافضـال المكارم جحدهـا *** سيف العدالـة واقفٍ لـه ابـمرصـاد
وهذا مقطع من قصيدة وطنية :
مـبـدأ الكـلام ابـدي بـجـزل التحـيـه *** تـحـيــةٍ يــفـخــر بـهـا مـن بــداهــا
أهـديـتـهـا لـحـكـام نـجـد الـعــذيـــه *** مـن خـاطـري ينفـح روايح شذاهـا
مـاكـر نـوادر كـلـهــم صــيـرمــيــه *** نسـل الأسـود الـلـي مـنيعٍ حـمـاهـا
يـومٍ عـلـيـنـا مـثـل عـيـد الـضحـيـه *** شـوف الوجـوه اللي يشرف لقاهـا
افـخـر بـهـم والـلـه شـهـيـدٍ عـلـيـه *** مـن لابـةٍ باقـصى الضمايـر غلاهـا
بهـم الكـرم والجـود وأيضا الحميـه *** مـن دعـوة الـعـوجا سمعنا صداها
انـجـال ابـن مـقـرن أبـطال وشفـيـه *** رجـالـهـم كـل الـمـراجـل حــواهــا
سـادوا بـشـرع الـلـه وسـنـة نـبـيـه *** والـسنـة الـغـراء سـلـفـهـم بـنـاهـا
فـي عـدلهم سـاووا جميع الـرعـيـه *** هـم سـورهـا وملوكهـا وزعـماهـا
لـهـم عـلى الـعـلـيـا عـظيـم الكـنـيـه *** امـجــاد بـالـتــاريــخ كــلٍ قــراهــا
فـيـهــم تـفـاخـر عـزوة الـوايـلــيــه *** مـن دور وايـل فـايـزيـن بـعـلاهـــا
مـن مـطـلـع الإسـلام لـلـجــاهـلـيــه *** لابــة بـنـي وايــل تـذلـل اعــداهــا
أمـجـاد هـانـي بـالـفـخـر لـه بـقـيـه *** مـفـاخـره فـيـهـا الـقـبـايـل تـبـاهــا
الـبـاسـل الـلـي زبـن الـمـنـذريـــــه *** صعـبت عـلى شـاة العجم ما ولاهـا
وانـتـم فـخـر وايـل اعـزاز السميـه *** يـفخـر بكـم وايـل ويفـخـر ضنـاهـا
تـرقـون بـصروح الـبـروج العـليـه *** صروح المعالي غيـركم مـا رقـاهـا
رايـتكـم الخضـراء بـراس البـنـيــه *** رفـرف عـلى كـل الجـزيـرة لـواهـا
الـمـمـلـكـة مـثـل الـفـتـاة الـفـتـيــه *** شـامـت لكـم عـذرا بـزمـت صبـاهـا
شـامـت لـبـو تـركي زبـون الـونيـه *** عافت سـواه وهـي كثيـرٍ اخطباهـا
حـامـوا عـليهـا العـزوة المقـرنـيـة *** بالسيف الأملح طوعوا مـن بغـاهـا
افعـالهـم بالـطـيـب مـا هـي خـفـيـه *** واعـمـالهـم كـلـن بـعـيـنـه يـراهـــا
وامجادهـم بالعـز شمس اضحـويـه *** بالكـون تـشـرق مـا تــذرا بـعـلاهـا
واسيوفهـم فيـهـا حـتـوف المـنـيـه *** دايـم صـنـاديـد الـرجـال اتـخشـاهـا
الـى غـاب نـمـر جـاب نـمـرٍ حلـيـه *** مجـداً رسخ بحـضورهـا واقـدماهـا
اشـم واشمـخ مـن شوامـخ طـميـه *** نـلـوذ عـن لـفـح السـمـوم بـذراهــا
افـعـالـكـم عـن الـمـدايـح غـنـيــــه *** يصعب على الرجل الفهيم ايحصاها
ضـد العـنيـد اللي يـدوس الخطـيـه *** نـعــم الـرجـال الـلـي بـعــيـد مـداهـا
وهذه قصيدة وطنية :
بـديـت والمكنـون بـه خـاطري بـاح *** وغـرفت من عـذب القوافي قراحـه
ذكرى البطل يشدوبها الشعر صداح *** شعـر العـوام ومن يجيـد الفصاحـه
ذكرى الزعيم المقرني باسـط الراح *** عرق الندى ساس الكرم والسماحه
ذكـرى الـذي للـكـوم والحـيـل ذبّـاح *** يبـذل إلـى صـاب النشامـى شفاحـه
ذكـرى مليـك المملكـة عطرهـا فـاح *** يـنفـح عبيـره مـن شـذا ورد واحـه
ذكرى الزعيم اللي بمجد الفخـر لاح *** ذكـرى بـطـولاتـه وذكـرى كـفـاحـه
ذكـرى الـذي سام المعـالي بالأرواح *** يلقـا المصاعب كـان زادت فـداحـه
ذكرى الذي عاد الفخر عقب ما راح *** خـطـط ونـفـذ فـكـرتـه وأقــتـراحـه
يـوم البـلـد كانـت تجـاذبـها الأريـاح *** جـمع شتـايـت شعـبهـا والمسـاحـه
أقبـل من المشرق بـه الجيش طفاح *** حيث الوطن فرصة رجوعه متاحه
صمـم وعمـم صـادق العلـم بأيضاح *** وعّـلـم رفـاقـه فـي كلام الصـراحـه
ما مقصـده جمع المكاسب والأرباح *** ولا سـار قصـده للجـزيـره سيـاحـه
قـاد الهجوم وطـوّق القصر واجتاح *** وحـمى خصيمـه بالظـلام استباحـه
فـادى بحياتـه واشهب الملح ضبّاح *** وعاد السليب وغاصب الحق زاحه
وعـذى جناب الدار بسيوف ورماح *** ملـك الجـدود ولا شلحـهـا شـلاحـه
ونادى المنادي فـي تباشير الأفراح *** واستبشـرت كـل الشعـوب بنجـاحـه
صقـر الجزيـرة صـار للخير مفتـاح *** مـن يـوم قصـر العـز تـم افـتـتـاحـه
قـاد السفـيـنـة واخـتـفـى كـل مـلاح *** وراحت على اللي ما يجيد السباحه
زال الدجى وابعـد كوابيس الأشباح *** وطيـر السعد بالعـز رفـرف جناحـه
ولاح بدياجي حندس الليـل مصباح *** وفجـر الفخر نـوره تكشف صباحـه
رام الـمعـالـي وارتـدا تـاج ووشاح *** والمجـد ابـو تـركـي تقـلـد وشـاحـه
ولا تـم نيـل المجد في لعب وامزاح *** والعـز الأقعـس ما حصل له براحـه
يـأخـذ مـع الميـدان بالخيل مسراح *** عـوق السبـايـا الـيا تـلاقـوا بساحـه
يرهـب مناعير الفوارس إلى صاح *** يـدحـم على الصعبه حليفـه سلاحـه
سـبـع الـرجـال وللصنـاديـد نـطـّاح *** يـودع لـخـفـرات المـعـادي مـنـاحـه
كم طاغـي وجبار من ضربتـه طاح *** بـالمـعــتـرك خـلاه تـنـزف جـراحـه
شره على اللي ما قبل هـرج نصّاح *** والـلي بـراسـه زوم يكبـح جمـاحـه
بالسيف عـالـج كـل مجـرم وسفـّاح *** وزال الـذي مـا عـاد يرجى صلاحـه
لـكـن لـزلـت كـل مـن تــاب دمـّــاح *** مـن عـاد رشـده سامـحـه ثـم بـاحـه
يـعـفـي ولا يـسـمـع نـماميـم قـّـداح *** ولا طـاع راي اهل الحسد والوقاحه
مـفـاخـره تـصعـب عـلى كـل مـداح *** تفـوق وصف اهل الذكى والرجاحـه
من ثمر غرسه ساير الشعب مرتاح *** يـرفـل ويـنعـم فـي كـرامـه وراحـه
والراعي الـلي يـتبـع الـذود مصلاح *** اليـوم يـمـلـك مـزرعـه واستراحـه
والـلي من اول يـبـذر الغـرس فّـلاح *** انـعــم عـليـه الـلـه وكثرت ارباحـه

يتبع

تابع

وهذا مقطع من قصيدة وطنية :
مـن صلـب لابــه لـلشغــامـيــم روّاد *** أشـبـال مـقـرن بـالحـرايـب بـواتـيـع
المجد له موروث من عصر الأجداد *** ساس الفخـر عاداتهـم بوجت الريـع
منجوب ساسه من سلاطين واسيـاد *** فخر العرب عن فعلهم يقصر الصيع
قـايـد ومـن صـفـوت مـقـادم وقيّـــاد *** سقـم العـدا إلـى صار للحرب تقريـع
سلـم الـجـدود مـعــقـبـيـنـه للأحـفـاد *** وتـربـى عـلى العـز التليد الرواضيع
نسـل الـذي سنّـد مـع المجـد مسـناد *** الـلي لـه رقـاب المشايـخ مخـاضيـع
صـقـر الجـزيـرة لـلجـزيـلات صـيـاد *** مـن هـدتـه خـلاّ الحبـاري مخـاشيـع
شيخ العـرب بـه تفـتخـر أمـة الضـاد *** عـقـب التـفـرق عـاد شعبـه مرايـيع
لاصاح داعي الحـق يطلـب استنجـاد *** فرحت ضميـره بالطلـب والمفـازيـع
إلـى اعتزى كفـّه عـلى السيف جبـّاد *** ستـر العـذارى لابـسـات الـبـراقـيــع
لا طـار ستر البيض غضـات الأنهـاد *** وتـوايـقــن بـيـن الـحـنـايـا مـدالـيـع
عـبـدالعـزيـز الـوايــلـي دونـهـن ذاد *** حـتـى أرتـدن شيلاتهـن والمـقـانيـع
وحّـد جزيـرتـنـا عـلى هجـن واجيـاد *** وجمع شمـل بدو العـرب والزراريع
يصول من صنعـا إلـى حـدود بـغـداد *** قـلبـه تـولـع بـالمـطـاريـش تـولــيـع
قـاد الجـيـوش وحــرر ديـار وابــلاد *** وعـاد الحقوق ووسّع الملـك توسيع
بـالـقـايـلـه يـجـري وبـالـلـيـل هـجـاد *** وحصن بلاده عـن تشتـت وتصديـع
جاهـد ووحدها عـقب حـرب واجهـاد *** وعـذا جنـاب الـدار عـن كـل تشنيع
الفارس اللي لـه عـلى الخـيـل ملكـاد *** روس الأعـادي كسـره بـالـفـواريـع
الخـيـل تـقـدح بالصخـر كـنـهـا زنـاد *** والعـوص يـرقـع خفـّهـا بالمـراقيـع
يمشي جـهـار بـدون مكـمـن وملـبـاد *** ويـروم مسلاك الوعـر والـقـراشيع
يـوم السنـيـن الـلي بـهـا كـر واطـراد *** يتعب صهات مكاضمات المصاريـع
عـلى العـدو صب الذخايـر والاعـتـاد *** وشـب الفتـايـل بالتـفـق والمقـاميـع
لا جـاء نـهـارٍ بـه يـشـيبـون الأولاد *** وتذهل عن الطفل الصغير المراضيع
إلـى قـال عـوجا راحت الخيـل شـرّاد *** السيـف شـرّع والجمـاجـم مصاليـع
حذف الجماجم من عناتيـت الأجسـاد *** يشبـه لمحذوف الحصى بالمقـالـيـع
مـن نـاطـح الصنـديـد حـدّر مع الـواد *** يكدي عـدوّه عنـد خوض المعـاميع
مـا يـنطـح بـالـكـون وأن صـال هـدّاد *** ينطح خصيمـه ما ثـنـوه الفـراريـع
يقضى عـلى البـاغـي وللمعـتدي بـاد *** ويـروي حـدود مصقلات القـواطـيع
يـفعـل كـمـا فعـل العـديـم ابـن شـداد *** مزع قـلـوب شخوص الأبطال تمزيع
صمع القـلـوب قـلوبهـم كنهـا جـمـاد *** فـدع بـهـم ذيـب الرجـاجيـل تـفـديـع
مـن حـاربـه مـا نـام جـفـنـه ولا نـاد *** تـوشعـه طـيـفـه بـالاحلام تـوشـيـع
وش لـون عيـنه تقبـل النـوم ورقـاد *** مـن صولت اللي روّع اعـداه ترويع
وخضع له العاصي عقب كيد وعنـاد *** وخـلا المعانـد يسمع الـقـول ويطيع
وحتى الذي ما فادهـم نصح ورشـاد *** طـوّعهم الصنديـد بالسيـف تطـويــع
ولولا العوج ما يطـرق السيف حدّاد *** لاشـك لـلـعـايــل حـنـوه الصـنـانـيــع
والمعتدي دونه عـن الشـف مرصـاد *** عـن الهـدف قـدّام دربــه مــوانـيــع
خـلاه مـدبـاس الـوغـى ينـتحـي غـاد *** واركى عـلى كبـده رضاف وملاكيع
صنديـد مـا يجـامـل منافـق وسرمـاد *** ولا ينحـني لأهـل الدجـل والمخاديع
يا مـا جدع من راس فاسـق وحسـاد *** وطـمـن رقـاب المخـبثيـن الرواثيـع
واخـلا مكان أهل الضغاين والاحقـاد *** سـود الضمايـر بالغـلايـل مضـاريـع
وأهـل العـيـا والـزّوم قـيـدهـم اقـيـاد *** وصـان الحمى بالمرهفـات اللـواميع
خـلا الـذي يـبي المشاكل عـلى حيـاد *** يرجع عن دروب الغوى دون تقنيع
عقب الكدر جت له على كيف ما راد *** يـشـرب قـراح ولا بحبـلـه تـقـاطيـع
ممرور ما يقبل عـلى الحيـف مقعـاد *** عـوق الخـصيم إلى تلاقـوا مفـاريع
والحـمـد لـلـه لـه مـع النصـر ميعـاد *** عـاد الـكـرامـة لـلقـلـوب المفـاجـيـع
فـارس ومـن لابـه فـوارسٍ وزهـــاد *** وفي طـاعـة اللـه صايمين ورواكيع
وفي منهجه عادل عن الحق ما حـاد *** عـنـده طـوال النـاس مثـل المرابـيع
سـوّه عـلى الـلي دينهم كفـر وإلحـاد *** وهـدم مـن رمـوز الظلالـة صواميع
وانجـب صـوارم كنهـم شـَمّ الأطـواد *** حـطـوا كـتـاب الـلـه منهـج وتشريع
اهدافهم صوب العـلا شبـحهـا ابعــاد *** يمشون بـدروب الفـضيلـة مساريـع
وهذا مقطع من قصيدة وطنية :
انجـاب جـاني المجـد يا نعـم انجـاب *** عبـدالعزيـز الـلي للأمجـاد عـنـوان
يوم الفخر والمجد برمـاح واحـراب *** يشهد له الشابور والسيف والـزان
اللي جمع كـل الحـواضر والاعـراب *** وعقب التناحر كلهم صارم اخـوان
اللي حماها من المعـادي والاجنـاب *** ولـيـّم شعـوب المملكـة بعـد شـتـان
وخلا قمرها ساطع عـقب مـا غـاب *** وارسأ دعايمها عـلى خمسة أركان
واعـاد للإسـلام عـهـد أبـن خـطـاب *** ومنهـاج أبـو بكـر وعـلياً وعـثمـان
قـوّم عماد الدين في شـرع واكتـاب *** وحّـكـم كـتـاب الـلـه بسنـه وقــرآن
عـساه يسقى فـي عـذيـات الأكـواب *** بـجـنـة نـعيـم وبـيـن حـورٍ وولـدان
والشكـرلـلـه تـابـع الحـق مـا خــاب *** ومـن يـتبـع البـاطـل بـذلٍ وخــذلان
يـوم الـدول تفــرقـت شيع واحـزاب *** حكـامنـا حـزب الشريعـة والايـمـان
ما وردوا مبـدأ المحاور والأقـطـاب *** منهـاجـهـم حسـب تعـالـيـم الاديـان
سيف العـدل والحـق قطاع الأرقـاب *** ارقـاب جحـاد الفضـايـل الـيـا خـان
السـيـف يـردع كـل عـابـث ونـهـاب *** ومن خـان عهد الله ذليـل وخسران
عـدوهـم يلبس من الخـزي جـلبـاب *** وصديقهم يكرم عن الغلب وايصان
نعم بهـل العوجا عـريبين الأنسـاب *** من صلب وايل من صماصيم نبهان
حـازوا عـلى كل المفاخـر والألقـاب *** وأمجادهم من دور مقرن ومرخـان
لهم الفخر والعـز من قـدم الأحقـاب *** مجـداً تسلسل مـن ربيـعـة لـعـدنـان
اشـم مـن شـم الروابي والأهـضـاب *** ملاذ عـن لفـح الهـواجـر ومـزبـان
مادونهم عن باقي الشعـب حجـّـاب *** ريف الضعيف اللي من القل حيران
الضيف دونـه دوم ما يغـلـق البـاب *** كـالمنهـل الـلي يـارده كـل ظـمـيـان
ريف المواطن هم ربيعـه بالأجـداب *** والشـاهـد افعـالٍ تشاهـد بـالأعـيـان
افضالهم تصعــب عـلى كـل حسـاب *** وافـعـالـهـم أكـبــر دلـيـلٍ وبـرهــان
يـا ملوكنا حنـا لكـم عـنـد الأسـبـاب *** وأنتـم لنـا ملجـأ إلـى شان الأزمـان
منـكـم تعـلـمـنـا الـرجـولــه والآداب *** ورهن امركم حضار في كل ميـدان
وهذا مقطع من قصيدة وطنية :
صفـوة هل التوحيد روس الحمايـل *** افعالهم فـي كـل عـصـر امحسوبـه
أبطـال من عصر العصور السمايـل *** إلى شبت نار الحرب منهم شبوبه
نـسـل الـذي لـيـّم شـتـات الـقـبـايـل *** بالشرع والمصقـول جمـّع شعـوبـه
سلطـان نجـد بمـرهفـات الصقـايـل *** مـن هـيـبـتـه كـل البـلاد مـهـيـوبــه
يمشي عـلى ما راد والراس طـايـل *** ومـن عـانـده يـلقـا مـذلـه وكـوبــه
خلايـف المـرحـوم حـامي الـدبـايـل *** عبـدالعزيـز الـلي العـباد افـخروبـه
تـاريخـهـم بـالمـجـد سجـل سجـايـل *** صـحـايـفٍ كـل الـخـلايـق قـروبـــه
عـدوهـم يـصـلا جـحـيـم الـمـلايـــل *** إلـى ذاق حنظـل فعـلهـم قـال تـوبـه
وصـديقهم تكثـر عـلـيـه الفـضـايـل *** ما دام يشكـر عـارفٍ ويـن هـو بـه
سقم الحريب اللي عن الحـق مايـل *** يلقـا المحل عقب حـيات الخصوبـه
السيـف يـردع كـل مـنـكـر وعـايـل *** خاب وخسرمن صافح السيف نوبه
الـسيـف لعـنـاق الـمـعـانـيـد زايــل *** ومن أعـتدى القانون ما فيه حوبـه
وإلى اعـتلوا من فوق قِب الاصايل *** خـصيـمهـم يـدفـع حـيـاتـه جـلـوبـه
وأن جـاء نهارٍ فيـه صايـل وجايـل *** كم من عـليه البيض قـدت اجيـوبـه
ريـف الهـواشـل مرمليـن الحـلايـل *** عوجاً عـلى العوجان يوم انتخوبـه
أنتـم هـل العـادات واهـل الجمـايـل *** وانتم أنصار الحق والـلي احكموبـه
وكـل الـوصايـف يـا كـرام السبايـل *** مـن أسـرةٍ كـل الـمـراجـل غـدوبـه
يقصر عن التمجيـد من كـان قـايـل *** ويشهـد لماضيـكـم وقـايـع حروبـه
أفـعـالـكـم بــانـت عـلـيـهـا دلايــــل *** يشـهـد بـلاد الـمجـد والـلي ربـوبـه
معـكم عـلى رقـي المعـالـي وسايـل *** أنتـم أحـفـاد الـلي المعالـي رقـوبـه
والمجد تصعـب رقيتـه مـن يحـايـل *** المجد لأهـل المجد مبطي عصوبـه
ياويـل مـن جـاكـم بالأكـوان صايـل *** يعـود معطـب والنـفـوس مغـلـوبـه
من حـر سطوتكم يشـوف الهـوايـل *** وعلى النكد يمسي بحال امغضوبه
وهذا مقطع من قصيدة وطنية :
حـرٍ مـواكيـره عـلى راس مـرقـاب *** مـربـاه شـمـاخ الـحـيـود الـطـوايـل
الحـر مـن مجنـاه والـعـرق جـّـذاب *** نجـل الـزعيـم الـلي يقـود الـقـبايـل
عبـدالعـزيـز الوايـلي زاك الأنسـاب *** الـنـادر الـلـي مـن صـنـاديـد وايــل
كـان الـفـخـر بالجـود للمـال وهـاب *** نـال الفخر بالطيب صدق وصمايـل
وكان الفخر بالهوش يدحم ولاهاب *** يـنـطح سمـوم غـمارهـا بالهـوايـل
يـوم الـقـبايـل بيـن نـاهـب ونـهـاب *** بالوقـت الأقشر يـوم شـح المكـايـل
وحّـد جزيرتـنـا عـلى خيـل واركـاب *** والمجـد سطـر له فعـول وسجايـل
سـتـيـن لاقـوا قـوة مـالـهـا حـسـاب *** والله نصـر جنـده ولـو هـم قـلايـل
دعـا ولـيـّه والـولـي لـلـدعـاء جـاب *** وعـز الـوقـاري وبالقـرايـا نزايـل
ما سـاد حكمه بالطوايف والأحـزاب *** بالسيـف الأملـح سادهـا والفعايـل
رفع لواء التوحيد في سيف واكتاب *** ومفـاخـره يـفـخـر بـهـا كـل قـايـل
يهوم عسرات المراجل وهـو شـاب *** حـتى رجـع ملـك الـجـدود الأوايـل
مـن طـلـعـتـه لـلعـز والمجـد طـلاب *** مـا عـوقـه لـو دونـهـا حـال حـايـل
ورقى المعالي دونها قـطع الأرقـاب *** شلـف السيوف وحاميـات الفتـايـل
أفعال أبـو تركي عسيرات واصعـاب *** وصل المرام وعين خصمه تخايل
حـمى البـلاد وعـزها عـند الأجنـاب *** وزال وجلا غـبن القلـوب الغـلايـل
مـا روعـه كثـر المدافع والأطـواب *** رجـع بنصـر ونـال خصمـه فشايـل
وعدوان جـد الوايلي نجمهـم غـاب *** زالـوا ولاعـنـهـم عــريـب مـسايـل
خاب وخسر من عانده باللقـا خـاب *** ومـن خالـف السنه جـداه الـرزايـل
جاب الملوك الـلي يفكـون الأنشـاب *** لهـم الفخر موروث ما هـو نحايـل
من طاب صاروا له دنييـن واقـراب *** ولا جاملوا بالكون شيـن الدغـايـل
دانت لهم كـل الحواضـر والأعـراب *** وافـعـال مـاضيـهـم عـليـهـا دلايـل
نالـوا مقـام العـز بسيـوف واحـراب *** حـتى اعـتـدل بديـارهـم كـل مـايـل
من قال ساعدهم على المجـد كـذاب *** ما ظنتـي لأحـدٍ لـه عـليهـم جمايـل
وهذا مقطع من قصيدة وطنية :
عاشوا هل العوجا عريبين الأنساب *** حـكّـام عـدل وخـيـر عـزوة ولابـــه
حـكـامـنـا عـاداتـهـم حـل الأنـشـاب *** وأن جـاهـم المظيوم يجبـر أنصابـه
هـم ملتجأ مـن عضه الوقت بالنـاب *** عـون الضعيف الـلي زمانـه دوابـه
سـلايـل الـلي قـوّم الـشـرع بكـتـاب *** دستـوره الـقـرآن حـكـمـه قـضـابـه
سيف العـدل لرقاب الأشرار قصّاب *** ومـن يعـتـدي يـردع بحـد الحـرابـه
صارت شعـوب المملكة كلها أحباب *** من عقب ماهم كـل عصبة عصابـه
مـا سلمهم مبـدأ المذاهب ولأحـزاب *** ساروا عـلى نهـج النبي والصحابه
رب المـلأ يحمي بلدنـا من الأرهـاب *** والـلي نوانـا بسوء يعجـل عـقـابـه
والـلي تـسلـل وهـمـه شـور نصّـاب *** عند الـلـه أهون من جنـاح الذبابـه
الـلـي لـنـار الـشـر نـافــخ وشـبـّاب *** بـأمـر الـولي تصبـح ديـاره خـرابـه
الفاسد اللي عاث بأمن الوطن خاب *** مـن عـال يبشـر بالقشـر والمجابـه
حـد الوطـن دونـه مهدين الأصعـاب *** يخسى المعـادي مـا يـدنس اتـرابـه
قــوات تــردع كــل عـابــث ولـعـّاب *** تـنهـار مـن فعـل البواسل اعصابـه
مثـل الأسود الـلي تدافع عن الغـاب *** من هـول صولتهم تعـاوى الذيـابـه
مـا للخصيم مـن الصنـاديـد مهـراب *** وعـن الـمـقـدر مـا تـفـيـد الحـزابـه
* وقلت هذا المقطع من قصيدة وطنية أخرى :
عـبـدالعزيـز الـلي الصيـارم تـهـابـه *** قـاد النجـايـب والأعـادي هـزمـهـا
وحــّد جــزيــرتـنــا وعــذّا جـنـابـــه *** واستبشرت بـالعـز يـوم استـلمهـا
من عقب ماهي كل عصبه عصـابـه *** بجهـود أبـو تركي تـوحـّد عـلمهـا
بـالـسـنـّه الـغـراء ومـنـزل كـتـابـــه *** سـاد البـلاد وبـالشريـعـة حـكمـهـا
عـمـر ديـارٍ عـقـب مـاهـي خـرابـــه *** احـيـا العـدالـة والظـلالـة هـدمـهـا
عـسـاه بـالـفـردوس يـلـقـا ثــوابـــه *** في جـنـةٍ خضـراء لـذيـذ طعـمـهـا
جـاب الملـوك الـلي لـفعـلـه تـشـابـه *** سور الجزيـرة جعـلنا ما انعـدمهـا
درب الهـدى من ساد منهـم مشـابـه *** ساروا على منهج خطوط رسمهـا
لابـة هـل الـتـوحـيـد يـا نـعــم لابـــه *** نسل الجـدود الـلي قـديـمٍ كـرمهــا
نسـل الجـدود الـلي زمـان الحـرابـه *** تـرهـبهـم الـكـفـار هـدوا صنـمـهـا
ومن يبي تفريـق العـرب سـد بـابـه *** اللي نوى بشق الصفوف وقسمهـا
أمـجـادنـا يـرجـع زمـانٍ مـضـابــــه *** كان اجتمع ولـف القلوب ورحمهـا
وأن مـا تـوحـدنـا بـعــزم وصـلابــه *** كـلـن طمـع بـديـارنـا واقـتحـمـهــا

يتبع

تابع

وهذا مقطع من قصيدة وطنية :
عـاشـت ودامـت بالفـخـر مملـكتـنـا *** وعـاش الملك ذخر العروبـه ذرانـا
والأسـرة الـلي بالـكتـاب احـكـمتـنـا *** دستـورهـا الـقــرآن تـرفـع لـوانــا
بحسـن الطبـايع والوفـاء عـودتـنـا *** وحــنـّا لــهــم دايــم نـجــدد ولانـــا
والحـمـد لـلـه بـالهـدف مـا افتختنـا *** والـلـه عـلى درب الـهـدايـة هـدانـا
قـلـنـا نـعـم يـوم الحـكـومـة دعـتـنـا *** واجـب وطنـا بخدمتـه مـا انتـوانـا
الـتـربـه الـلـي فـي ثـراهــا نـبـتـنــا *** هـي امـنـّا الـلي مـن لبنهـا تغـذانـا
والأعـتـداء عـنـه الشـريعـة نهتـنـا *** لاشـك نـدفـع خصـمنـا عـن حمـانـا
والـيا حربـنـا المعـتـدي مـا سكتـنـا *** دون الوطن نرخص غـوالي دمانـا
دونـه نبـيـع الـروح وأن كـان متنـا *** يـذود عـن حـوض الكرامـة ضنانـا
نـدحـم ولا حـنـا عـلى الـظيـم بـتـنـا *** سقـم الحريب أن كـان جـرب لقانـا
قـوات جـيش المعتدي ما أرهـبتـنـا *** بـالعـقـل والحـكمـة تسيـر ازعمانـا
قـواتـنــا عـن كـل عـايــل حـمـتــنـا *** نـرد كـيـد الـلـي بـجـيـشـه غــزانــا
وهذا مقطع من قصيدة وطنية :
نسل الزعيم الـلي صعـد للعلا فـوق *** عبدالعـزيـز الـلي أعـمـالـه وثـيقـه
البـاسـل الـلي ياخـذ الحـق مطبـوق *** ويشب بـقـلـوب الأعـادي حـريـقـه
الدار سطع نورها وأشرق اشـروق *** رجّـع لـهـا أمجـاد الجـدود العتيقـه
ساد الجزيرة وأرتـدع كـل مطفـوق *** ومـن بـان شـره عـن نـويـه يعيقـه
يـوم القبايل بـيـن سارق ومسروق *** كـيـد ونـكـد والكـل يـنصـر فـريـقـه
كف الغزو والسلب والغـدر والبوق *** وخـلا الـعـشايـر بالمفـالـي طليـقـه
عـلى العدو علقم من المر مسحوق *** يصعب عـلى مـن عانده بلع ريـقـه
وللصاحب أحلامن حلاالشهد بالذوق *** وألـذ مـن ذوب العسل فـي رحيقـه
المقرني ما هو على المجد مسبوق *** عـدل المنـاهـج والسياسـه عميقـه
لـه بالعـدل منهج ومسلك وطاروق *** جاهـد وكاد اعـداه وأفـرح صديقـه
ساوى الـرعية ماوضع بينها فـروق *** وأنقـذ شعوب فـي جهلهـا غريقـه
وحظي بمركز يرفع الراس مرموق *** وأنـجب صوارم سايـرين بطـريقـه
من ساس لابـة مرويت كل مذلـوق *** والسيـف بالمـيـدان يـلـمع بـريـقـه
نطيحهـم دمـه مـن الطعـن مـدفـوق *** تـشهـد لـهـم سرج الجـياد السبيقه
نسل الملوك اللي بوايل لها عموق *** صفوة حمـايـل والمناسب عـريـقـه
وهذا مقطع من قصيدة وطنية :
نسـل الـذي عـزه عـلى الـعـز زايـد *** طير السعد من مخلبه يعطب الصيد
نسـل الزعيـم اللي عـن الدين ذايـد *** مضراب سيفه يرمي المتن والجيـد
عـبـدالـعـزيـز الـلي للأمـجـاد رايـد *** يـوقـف لعـدوانـه بـكـل الـمـراصـيـد
شبـل الأسـود لشامخ المجـد شايـد *** المـقـرنـي ريـف الركـاب المعـاويـد
الـحـاكـم الـعــادل لشـعـبـه سـنـايـد *** تـتـلـيـه دكـلات الـسبـايـا عـراجـيــد
يـوم الـمجـاول والـلـقـا والـطـرايـد *** يـأخـذ عـلى خـيـل المعـادي ملاكيـد
يقـفـي خـصيمـه مـا بـقالـه شرايـد *** لـه صولـةٍ تشبه مصاويل أبـو زيـد
والسيـف مـا يحـمـل بـلـيـا جـنـايـد *** والطيب ورث وعـقب جـدٍ وتعـويـد
جـده حـمـاهـا بمـرهـفـات الحـدايـد *** وقضى عـلى كـل العـصاة الملاحيـد
وعـاد الفعـول المسملـة والجـدايـد *** سـاد الـبـلاد وشـيـد الـعـز تـشـيـيـد
ولـيّـم شمـل شـتى عـمـوم البـدايـد *** وبـدل عـن الأشـراك سنـة وتوحيـد
وبالسيف خلا عداه مثـل الحصايـد *** ورام الـمعـالـي مـا ثنـوه الحواسيـد
مـن عـانـده تـصـلاه حـر الـوقـايـد *** بـطـل وصميـدع مـن رجالٍ صناديـد
صغـيـرهـم بالطيـب عـنـده شهايـد *** يرقى العلا لو هو رضيعٍ على الديد
أمـجـادهـم مـا تـنحصي بالجـرايــد *** ريـف الصديـق ولـلمعـادي لـواديـد
عــدوهــم دايــم جــداه الـوجـايــــد *** والسيـف يعـبـا لـلطغـاة الجحـاحيـد
هـذا الـرخـا والعـز والأمـن سايـــد *** وهـذا الـفخـر لـلي يـدور التحامـيـد
وهذا الحسام لجاحـد الفـضـل بـايـد *** ويمـيـن جحـاد الفضايـل بـهـا قـيـد
الـلـه يـبـقـيـهــم عـضـود سـنـايـــد *** ذخـر الـعـرب دايـم مـلاذ الأجـاويـد
من فضلهـم تمـت جـميـع الـوعـايـد *** وبـلادنـا فـي كـل يـومٍ لـهــا عـيــد
وهذا مقطع من قصيدة وطنية :
بامر الولي اريف بلدهم بالأخصاب *** والـدار فيها الخيـر تجـري سواقيه
مـسـوح يــروي درهــا كــل حـّلاب *** صـافـي لبنهـا يابـس الكبـد يرويـه
بجهـود مـن خلآ البلـد كـرم عـنّـاب *** حقـق هـدف شعبه ولا خاب راجيه
عبدالعزيز اللي من اعداه مـا هـاب *** واصـل كفاح وعـاد مجده وماضيه
وحـد جـزيرتـنا عـلى خيـل وركـاب *** بالسيـف الأملح كـل مشرك يصفيه
بالسيف يـردع كـل عـابـث ونهـاب *** حـكـم بعـدل وحقـق الـلـه مساعـيـه
شهر صقيل السيف قطـاع الأرقاب *** سيف العـدل ماهوعلى الظلم حانيه
الساطي الـلي له بالأضداد مضراب *** مـن عـاوده زومـه بـحـده يـداويــه
مضراب سيفـه ما تشافيه الأطـباب *** حـده شطـيـر ومـن تعـاوج يـذكـيـه
يا ما جـزر بـه من منافـق ونصـاب *** ومن طاغيـه جبار وإبليس مغـويه
شره على اللي صايبه كبر واعجاب *** مـن ثقـل نـفسه ما تـمكـن أتحاكيه
مـن خـالـف السنـة يحطـه بسرداب *** ومـن يقـترف جنحة بذنبه يجازيـه
طوع طواغيت الحواضر والأعراب *** صنـديـد مـا جامـل عـدوه أيـداريـه
دق الأفاعي وأنتـزع شوكت الـداب *** وخـلا الحنش ما عاد بالسم يوذيـه
كف المغازي وأنتهى شلح الأسلاب *** وخـلا العشايـر تـرجهـن بـمفـاليـه
وكـلـن مخيّـر بيـن سفـره ومنساب *** مـن جاع له يشبع ومن عال يكويه
ما ربح مـن يأخذ عن الحق مجناب *** مصقـول أبو تركي يصافح علابـيه
والـدار غيـره مـا بغـت كـل خـطاب *** جـاهـا الزعيم الـلي بغـاهـا وتبغـيه
ومن ساد من نسله للأمجـاد كساب *** حـيـث أبـو تـركي للمكارم موصيـه
وهذا مقطع من قصيدة وطنية :
نسـل الـزعيـم الوايـلي حـامي الـدار *** الباسـل الـلي مـن خلايـف مناعيـر
نسل الزعيم اللي بهـدي النبي سـار *** عبدالعزيـز الـلي يقـود الصـوابـيـر
عبدالعزيز اللي جمع شمل الأمصار *** والتـم شمـل كـان شـتى وشعـاثـيـر
جـاهــد وذلـل كـل قـاسـي وجــبــار *** وسطـر لـه التاريخ بالمجـد تسطيـر
واصبح له لسان الثـناء دوم شكـار *** ينشـاد مدحـه فـوق عالـي المنابيـر
صفوة هل العوجـا مبيدين الأشـرار *** صلب الملوك من الملوك المشاهير
فروخ الحرار اللي مخاليبها شطـار *** لهـم عـلى روس العـوالـي مـواكيـر
ذروة حيود وشامخه مثـل الأسـوار *** يـذري حجاها عن سموم الهواجير
من صلب وايـل من صماصيم نـزار *** بـواسـلٍ طـلـق الـيـمـانـي مـغـاويـر
فيما مضى تشهد لهـم قـب الأمهـار *** وتشهد لهم حدب السيوف البواتيـر
قـادوا جحافـل معـد في يـوم خــزار *** في عصر ابن عباد وكليب وابجيـر
وفازوا على كـل العـرب يـوم ذيقـار *** واقـفت فلول الفـرس عنهم مدابيـر
هـذا القـديـم وباقـي الأمجـاد حضـار *** مـا قالـه الـراوي بكتـب الأساطيـر
تاريخهم يـروي لهـم صـدق الأخبـار *** والشاهـد التـاريخ ما قـلت تزويـر
وهذا مقطع من قصيدة وطنية :
أنتـم أهـل التوحيـد وأهـل الـعـدالـه *** وأنتـم عـمـاد الديـن وأنتـم ركـايـاه
وأنتـم كعـام أهـل الـدجـل والظلالـه *** دمتـم لـنـا يانصـرة الديـن واحـمـاه
الـلـيـث بـلـغ بـالـمـراجـل عــيـالــه *** الـطـاهـر الـلـي مـا تـغـيـّر نـوايــاه
ونال الأجر عـلى محاسن اعـمـالـه *** حيثـه سعـى بصلاح ديـنـه ودنـيـاه
حـكـم بشـرع الـلـه عـزيـز الجلالـه *** ولا خـاب من طبـق تـعـاليـم مـولاه
سـار وعـلى رب الـعـبـاد اتــكـالــه *** وحـد جـزيـرتـنـا بـسيـفـه وشلـفـاه
مـن فضل رب الكـون حقـق آمـالـه *** وخلّف بها اللي ما تناسوا وصايـاه
تـقـلـدوا حـمـل الأمـانـه أنـجــالــه *** فـي سنـة الرحمـن يدعـون دعـواه
يـمشـون فـي سـنـة نـبي الـرسالـه *** مـا تـابـعـوا للشـرق يبـدون مـبـداه
ولا من بلاد الغرب صارت اعتـالـه *** يـتلون ديـن الحـق يمشـون ممشاه
وهذا مقطع من قصيدة وطنية :
لابـة هـل العوجاء مشاهير واعلام *** سـلايـل الـلـي مجـدنـا مـن صـنيعـه
عبدالعزيز الـلي عن المجـد ما نـام *** لـه اخـضعـت كـل القبايـل مـطـيعـه
سـاد البـلاد وقـّوم الـشـرع بحسـام *** ولا جامل اصحاب الدجل والخديعه
دانت وطاعت له على كيف مـا رام *** حـتى غدت بـوب المرازق وسيعـه
مـن عـقـب مـا كنـا حفـاة بـالأقــدام *** حـفـا وجـفـا والأم تـذهـل رضـيعـه
اليـوم صرنا بخيـر من كثـر الأنعـام *** عصر الرخـاء اريـف علينا ربيعـه
تحـقـقـت فـي عهـدهـم كـل الأحـلام *** وبجـهـودهـم مطلـوبـنـا نستـطيعـه
نصعـد عـلى الأمجاد عـامٍ بثـر عـام *** واملـوكـنا مثـل الحصـون المنيعـه
سـاروا بـنـا الأبـطـال لـلـمـجـد قـدام *** لـدرب المفاخر والدروب السـنيعه
حـتى بـدأ غـزو الكـواكـب والأجـرام *** وعلـم الفخـر كـل الوسايـل يذيعـه
صــديــقــنــا يــفــرح إذا عــزنـا دام *** وعـدونـا غـلـبٍ عـلـيـه وفـجـيعـه

يتبع

تابع

وهذا مقطع من قصيدة وطنية :
احـفـاد شجعـان عـلـى نجـد سـادات *** والحـر يـنجـب بالـمـواكـر حـلايـاه
من صلب شيخ بالفخر له طموحات *** عبدالعـزيـز الفيصلي عـالي الجـاه
عبـدالعـزيـز الـلي فعـوله عظيمـات *** عـن الـعـدى حـصّـن بـلاده وعـذّاه
مـن لابـةٍ شـالـوا لـلإسـلام رايـــات *** رايـات ديـن المصطفى ترفع الـواه
دستور منهجهم على هـدي الآيـات *** ولا خـاب مـن طبـّق تعاليـم مــولاه
حاضرهم الماجود والدور اللي فات *** امجـاد مـاضيـهـم يعـيـدون ذكـراه
وهذا مقطع من قصيدة وطنية :
نعتـز في من تمجيد من يفعل الكـار *** زيزوم نجد اللي الرجال خضعـوله
وحـد جـزيـرتـنـا عـلى قـب الامهـار *** شبـل الفهـد عـقب بدالـه اشبـولـه
بـنـوا لـنـا مجـد عـلى الـمجـد جبـار *** دولـة هـل الـتـوحيـد يا نـعـم دولـه
يشهـد لهـم بالعـز فـي كـل الأمصـار *** ونـظـامهـم كـل العـبـاد ارجعـولـه
سـادوا بـشـرع الـلـه فـي حـد بـتــار *** حـكـم عسى رب الملا مـا يـزولـه
هم الفخر واهل الفخـر سـر واجهـار *** وسيوفهم يروون شذرة انصولـه
هـم عـز مـن هـو بالتبـالـيش محتـار *** ينصاهم المنظام إلـى طـق جولـه
كم معسرٍ من فضلهم شـاف الأيسـار *** عـقـب الشقـاوة والـعـنا فرجولـه
وهذا مقطع من قصيدة وطنية :
سلايل الـلي لـه خضع كـل ممـرور *** عبـدالعـزيـز الـلي بـفـعـلـه شهـرنـا
من ساس لابـة علمهم ليس مغمور *** عزوة هـل العوجاء مصادر فخرنا
مـن ينتمي لسعود بالصيت مشهـور *** حكـام بالحاضـر ومـاضـي دهـرنـا
هـم قادة الأمة مـن عهـود وعصور *** هم سورنا وهم نورنا وهم سفرنـا
صفوة عواهل للجزيـرة كما السـور *** وحـنـا نطـول بـعـزهـم مـا قصرنـا
وهذا مقطع من قصيدة وطنية :
الـطـيـب لـك مـيـراث جـدٍ وتـعـلـيــم *** زعيـم تنجـب مـن صلايـب زعايـم
والـدك أبـو تـركي مـقـر الـمـكـاريـم *** ذعّـار السبـايـا يـوم للـروح سايـم
مـن تـركـي لمـقـرن لجـدك إبـراهيـم *** لعـبـدالعـزيـز النـافـليـن الصـرايـم
نضايض الشجعـان حصـن النواهيـم *** مثـل البـدور الـلي تـزيـل الظلايـم
سـلايـل الـلـي لـلـعـروبـه مـقـاديــــم *** ساس الفخر وأهل الفعول القدايم
عمت مكارمهـم عـلى النـاس تعميـم *** ذخـر العـرب عن لافحات السمايم
أنـتـم لـهـا بـعـزمٍ وحـزمٍ وتـصـمـيـم *** الـلـه يـثـبـتـكـم عـلى الـحـق دايـم
أنـتـم قـواضـيـهـا بـحـلٍ وتـحـريــــم *** وأنتـم مقادمهـمـا بقـطع الخـرايـم
تمشون في توجيـه نـص الحـواميـم *** مثـل الـرواسي للشـريـعـة قـوايـم
عـسى يـثبـت حكمكـم منـشئ الغـيـم *** ويـعـل مـا يـشـمـت بـكـم كـل لايـم
وهذا مقطع من قصيدة وطنية :
نسل الذي فوق العلا يصعد اصعود *** نال العـلا وفـي قمـة المجـد شاهـل
مجده تسلسل من ربيعة إلى سعـود *** مـن روس لابـة للهـواشـل مداهـل
بيتـه كمـا الهـداج بالقيـض مـورود *** هـداج تـيـما الـلي يفـوق المنـاهـل
يـوم الزمان اللي بـه العسر والكـود *** رام المصاعب ما مشى بالمساهـل
ما همتـه لو كانت أثـقـل مـن الطـود *** شـال الحـمـول الـكايـده بالكواهـل
زال الطـغـاة وبيـرق النصر معـقـود *** جـاهــد وذلـل كـل هـادر وصـاهـل
وبـذل لتوحيـد الـوطـن كـل مجهـود *** حتى استقـرت وأرتدع كـل جـاهـل
يلقـا النكـد من كان للفضل جاحـود *** ويكرم بها الـلي للكرامـه استـاهـل
صديقهـم يجـني مـن الـربح والفـود *** وعدوهم عـقـله من الخوف ذاهـل
أمـر مـن العـلـقـم عـلى كـل منـكـود *** وللصاحب أحلا من دريـر المباهـل
وهذا مقطع من قصيدة وطنية :
وجـدك الـلي إلى ركب فوق الكميت *** عـلـى عـدوانـه تـنـوح الـنـايـحـات
كـم فـارس بـالــلـقــا خــلاه مــيــت *** طـاح بـنـحـور الجـيـاد السـابـحـات
ضـرب سيفـه يـودع القاسي فـتيت *** كـم عـشى من الوحـوش الجايعـات
لـو شويـره قـال لـه لـيـه اعـتـديـت *** ما تـعـشـتـه الـنـسـور الـحـايـمـات
ويـوم قـالـت نجـد بـالظـلـم ابتلـيـت *** بـات سـاهـر مـا غفـت عـينه بـتات
قـال مدبـاس الـوغى يـا نجـد جيـت *** ثـم جـاهـا الـوايـلي سـتـر الـبـنـات
ويـوم جاهـا قالـت الـيـوم اكتـفـيـت *** عـاد مـلكـه بالسيـوف المـرهـفـات
بـالـجـزيـرة جـمـّع الشـمـل الفـليـت *** وحـّد شعـوبه عـقب ما هـو شتـات
وهذا مقطع من قصيدة وطنية :
أبوك اللي صان الجزيـره مـن أعداك *** وقضى على الباغي وعـز المماليك
الـوايـلـي خـلا الـطـواغـيـت نـسـّـاك *** حـدب السيـوف استبدلوها مساويـك
كافح ووحدها عـقب حـرب واعـراك *** وانقـذ جـماهيـر الشعـوب المهـاليـك
وانجب ملوك المملكة تحمي الأملاك *** أدنـاهـم الـلي بالـمـفـاعـيـل يـكـفيـك
مصقـر صـوارم كـل من هـد عـشّـاك *** ماكـر نـوادر والـمخـالـب مشـاويـك
وعن وصفهم تقصر سجلات الأبواك *** اخبـرك يا مـن تكتـب المجـد وانبيك
وهذا مقطع من قصيدة وطنية :
عبـدالعزيـز الـلي بالأمجـاد مـذكـور *** نـال الفخر فوق النجايب والأفراس
عـسـاه بـالجـنـه يـخـلـد مـع الحـور *** يشرب مـن الكوثر قـراطيع بالكاس
ليـث الليـوث وكامـل الشبـر منعـور *** صيد الرجال وسمعته ترفع الـراس
مزبان من يشكي من الظيم والجور *** ملجأ الطريد إلى ابتـرم عقد لولاس
شبل الأسود وساسه فهود وانمـور *** الـلـيـث الأروع للجـزيـلات فــّراس
سـيـف مـجـرب لـلملازيـم مـذخــور *** يقـطع بـه الـراس المعاند الياخاس
اليا ضرب يسطي على مشت الزور *** ما حال دونه قاسي الدرع والطاس
زير الرجـال وطيـب الفعـل مخبـور *** نسل الذي ياخذ على الخيل مرواس
كنه عـرار الضيغمي فـوق مشهـور *** والا المـهلهـل يـوم يـبـرز لجساس
وهذا مقطع من قصيدة وطنية :
صفوة هـل العوجاء أسود الجزيرة *** اللابـة اللي تصخر الخصم تصخيـر
نسـل العـديـم الليـث يـوم الجـريـره *** لـه هـدةٍ مـنـهـا اضـداده شـعـاثـيـر
شيـخ العـرب كـل العـرب تستشيره *** عبدالعزيـز الـلي يـروي البـواتـيـر
الـلي شـمـل كـل الخـلاليـق بخـيـره *** وعـم العـروبـه بالفـرح والتباشيـر
وخلـّف انجـالـه لـلعـروبـه ذخـيـره *** صـديـقـهـم يـلـقـا مـعــزه وتـوقـيـر
وعـدوهـم بالكـون يلـقـا مصـيـره *** من سطوة اللي يخلف العقل ويحير
مـلـوك عـلى ردع المعـادي قـديـره *** حكـام عـدل وبـالشـريعـة مبـاصيـر
وبامـوالهم لهـم الضعـافي خشيره *** مـا صكـوا البيبـان دون الخطـاطيـر
هم ذخرنا عن حر شمس الظهيره *** وهم الذرىعن لفح هوج المعاصير
وهـم الفخر والمجـد فـي كـل ديـره *** يـصعـب نـعـد أوصافهـم بالتعـابـيـر
وهذا مقطع من قصيدة وطنية :
الحاضر اللي شيف بالعين ماجـود *** ويشهد بماضي عصركم قّرح الخيل
مجدٍ تسلسل من ربيعة إلى سعـود *** مجد الفخر موروث جيـل بثـر جيـل
متسلسلٍ مـن سـاس والـد لمولـود *** حلحيل ينجب من صماصيم حلحيـل
سـلايـل الـلـي نـافـليـن وبـهـم زود *** صفـوة حمايـل بالـدياجـي مشاعيـل
مثـل الحيـود الشامخه وأنتم حيـود *** شـم الـرواسـي مـا يـهــده زلازيــل
دولة هـل العوجا كما شامخ الطـود *** طـود الشوامخ ينطح الهول ويهيل
والـسنـة الـغـرّاء رفعـتـم لهـا بنـود *** سرتوا بها وزلتوا جميع الأبـاطيـل
والى من شنعات الليالي غدن سـود *** عـاداتكـم حـل العـقـود المعـاضيـل
وهذا مقطع من قصيدة وطنية :
ساسه تسلسل من صناديد وأسبـاع *** نسل الزعيم اللي رفع شان شعبـه
عـبـدالعـزيـز الـلي ردع كـل طـمـّاع *** صان الوطن واحماه محدٍ طمع به
واغـنى العباد الـلي مفاقير واجيـاع *** عـم الـرخـا والـدار كـلٍ شـبـع بــه
حتى الصعب خلاه خاضع ومطـواع *** واهـل التلاعـب راح لهـوه ولعـبـه
بالسيـف يـردع كـل عـابـث وخـدّاع *** وهـرج المنافـق ما نوى ينخدع به
والمنعوج دلـه عـلى درب الأسنـاع *** سار وسلك درب الهدى واقتنع بـه
وأنجب بواسل للوطن سور واقلاع *** رضـيعـهـم فـن الـرجولـه بـرع بـه
أشبـال مـقـرن عـطّــروا كـل لـمـاع *** عــدوهـم يــزداد خــوفـه ورعــبـه
والـحـمـد لـلـه لـلسعـد هـب ذعـذاع *** وكلـن حصاده مـن بـذاره زرع بـه
وهذا مقطع من قصيدة وطنية :
سلايـل الـلي عـادتـه شيـل الأثـقـال *** عـبـدالـعـزيـز الـلي فعـالـه حـميـده
ادرك شموخ العـز واورثه الأنجـال *** سـور العـروبـه حافـظيـن العـقيـده
مـيــراث جــده مــن قــديــمٍ ولازال *** ورث الفخر مـن ساس جد لحفيـده
هـل الكرم والجود للضيف مـدهـال *** وبالحرب هـم ضد العصـاة العـنيـده
للصاحب احلا من طعم شهد عسال *** صـديـقـهـم دايـم حـيـاتــه رغــيـده
وامـر مـن الـعـلـقـم للأضـداد قـتـّال *** يـعــبـا لـدوار الـمـكـايــد مــكــيــده
وهذا مقطع من قصيدة وطنية :
سـادوا بـحـكـم الـعـدال المـستـقـيـم *** وحـطـوا الـقــرآن لـلـدولـة نـظـــام
شـادوا الأمجـاد والصـرح العـظيـم *** مــوقـعٍ بـالـعـــز شــيـّـد بــه مـقــام
والـفـخـر مـتـوارثـيـنـه مـن قـديــم *** مـن زمـان سعــود لـلـعـلـيـا سـنـام
يـا حـمـاة الـدار يـا سـقـم الخـصيـم *** خصمكـم تسهـر عـيـونـه مـا تـنـام
مـن اطـاع ابـليس واغـواه الرجيـم *** الـنـكـد والـكـيـد مـن حـظ الـلـئــــام
لـلـمـصـاحـب قـربـكـم جـنـة نـعـيـم *** مـا يــخــيــب ولا يــذل ولا يــظــام
والـمـعـادي يصطـلي نـار الجحيـم *** ومـن يـعـاديـكـم مـصـيـره لـلـعــدام
أنـتـم الـلي فـضلـكـم خـيـره عـميـم *** حيدنـا المذخـور عـن هـول الجسام
الـبـخـيـت الـلـي لـكـم دايـم حـمـيـم *** واقـرد الـمخـلـوق مـن لـد الخصـام
وعـن كثيـر الوصف عفـواً يالحليم *** مـا قـدرت احـصي فعـولـك بالتمـام
وهذا مقطع من قصيدة وطنية :
يا نسل الـلي لرقـاب الأضداد جـذاذ *** يـوم الطـراد ويوم عصر المواخيـذ
جـدك يـمـيـنـه لـلـمـعـاديـن فـــولاذ *** الـوايـلـي زبـن الـجـنـاة الـمـنـابـيـذ
إلى وقف شعـر النواصي تقـل حـاذ *** عقب العـيا خصمه جـداه المعاويـذ
ريـف الصحيب وللعـدو سم الأفـلاذ *** ومنصى لمـن ضاقت عليه المنافيذ
البـاسـل الـلي بالمكـارم غـدا استـاذ *** مـنـاهجـه سـاروا عـليهـا التلاميـذ

الله يجزاك خير ولاهي غريبه منك محبتك للوطن الحقيقه مقطفات يعجز السانك أن يعبر بجمالها الرائع من شاعر مثل ابو مشعل 0 الف الف شكر لك 000

مقتطفات ولا أروع صح لسانك وإعتلى شانك وبيض الله وجهك ابو مشعل
ولاهو غريب عليك الإبداع الحقيقه وحكامنا يستاهلون والوطن يستاهل كذلك
الله يديم الأمن والأمان ويطيل بعمر صقر العروبه ابو متعب حبيب الشعب المفدى

بسم الله الرحمن الرحيم

اذا قلت شعرا صدقت رجل التاريخ والادب اروع ماطرحت للوطن وغنيت للمجد وفقك الله ياابامشعل تحية لك 0