تابع
قصائد متبادلة بين عبدالله بن دهيمش العبار وعبدالله الموسى الخرشاوي:
قال عبدالله بن دهيمش بن عبار هذه القصيدة بسمو الأمير عبدالعزيز بن سعد بن عبدالله
ابن جلوي آل سعود حفظه الله ورعاه شعر عبدالله بن دهيمش بن عبار : 940
تـجـول بـافـكـاري خـواطـر كـثيـره *** وأصوغ من لفـظ القـوافي تـعـابـيـر
أسنـدت منـظـومـي لنـقي السـريـره *** الـلي افتخر باسمه اليا قلت يا أمير
منصف ومتواضع وصافي ضميـره *** فـاهـم وعـنـده لـلـمعـانـي تـفـاسيـر
أسنـد عـلى الوافي ولا اسنـد لغيـره *** عبدالعـزيـز مـن القـروم المناعـيـر
عبدالعزيز أطلب عسى الـلـه يجيره *** يـاقـاه ربّـه مـن جـمـيـع العـواثـيـر
أبـن سـعـد يـفـرح بـقـربـه قـصـيـره *** حـفـيـد عـبـدالـلـه سلايـل مشاهيـر
مـن ساس عـزوه بالمدايـح جـديـره *** عـزوة جـلـوي بالشجاعه مغـاويـر
من صفوة آل سعود سور الجزيـره *** سـاده وقـادة للشعـوب الجـمـاهـيـر
صـانـوا بلـدهـم بالسيوف الشطيـره *** عـاداتهـم بالكـون دحـر الطـوابـيـر
ذخـر المـواطـن بالسـنيـن العسيـره *** رجالهم يـذري عـن الظيـم وايجـيـر
يا أميـر لـك من طيّـب الذّكـر سيـره *** سيـرة فخـر والكـل يذكـرك بالخـيـر
أنـت الـذي عـنـد الـلّـزوم استشيـره *** حيث أن لـي عندك حشيمه وتقديـر
يـقـولـه الـلـي مـجـتـهـد لـلـعـشيـره *** مضّى زمـانـه بالمنـاطـق مشـاويـر
لأجـل يتحاشى لـوم عـمي البصيـره *** الـلي مـلاسنهـم سـوات المنـاشـيـر
يـدرى شمات أهـل الوجيـه الشريره *** سود القلوب الـلي تدور والمعايير
ينصفـني الـلي بـه حـمـيّـه وغـيـره *** لـو يكـتـب الجاحـد بحـوث وتقاريـر
مـاذا تـرى هـل استـمـر بالـمسيـره *** ولا استريح مـن التعـب والمخاسير
قال الشاعر عبدالله بن موسى الخرشاوي أبو فهد هذه القصيدة مجاراه لقصيدة عبدالله
أبن دهيمش بن عبار الذي قالها بسمو الأمير عبدالعزيز بن سعد بن جلوي آل سعود : 941
يعـيش أبـو مشعـل ومـن يستشيـره *** ويعيش شور اللي لابومشعل يشير
حـفـيـد حـكـام الـعـرب زاد خــيـــره *** رايـه سـديـد و فـيـه حكمة وتنويـر
طـلبـت راي وجـاوبـك مـن ضميـره *** والـلي يصيبون الهدف رايهم غيـر
كانـه يقـول القـرم مـن فـيـه غـيـره *** سـؤال مـا يـقـبـل إجـابـات تــزويـر
مـن يـذكـر المـاضي ولـه يستـثيـره *** يـذكـر حـقايـق لابـو مشعـل بتقديـر
ولا نـنـكـر جهـود الوجيـه السفيـره *** ولا يـنكـرون انـك تـقـود الطـوابيـر
يـوم الـزمـن وشـروره المستطيـره *** صخـرت وقـتـك للمهـمـات تصخيـر
وجمعت من ماضي العلوم الغزيـرة *** وردتـهـا مـن بـعـد مـاهي مصاديـر
واجـهـودك الـلي للقـبـيـلـة ذخـيـرة *** حبّرتها و بانت على الطرس تحبير
ومشجَّرة وايل بفكــرك تديـــــــــره *** شجـرتـهـا لـلي يـبي العـلـم تشجيـر
أصـولـهـا مـع الـفـروع الـكـبـيــرة *** بـديـت مـن عـدنـان وبجهـدك نشيـر
يعـنـي ابـن عـبـار من فيــه غـيــره *** والحـق مـا يـزعـل رجالٍ بهـم خيـر
قال عبدالله الموسى الخرشاوي هذه الأبيات يسند على عبدالله بن عبار : 942
أبتديت بذكـر ربي وأسأله يرضى عـليـه
أسأله يحفظ لساني والفرج يوم الكروب
من يسب أنسان مثلك عاجزٍ لا يصير زيه
اللسان يبيّن الـلي حقـدهـم وسط القـلـوب
أقـرأ الـتـاريـخ تـلـقـا كـل صـادق لـه أذيـه
سنة الـلـه في عباده الأذى مـن كـل صوب
أنقتـل هابـيل غـيـلـه دون ذنـب ولا خـطيـه
والنـدم قـابـيـل شـالـه حـامـل كـل الـذنـوب
ومن بعد هـذا محمد يوصف بخيـر البـريـه
قيـل كاهـن قيـل ساحـر قيـل كـذاب ولعـوب
بـان صدقـه وأتـضح كـذب أبـو جهـل وأمـيـه
والـلـه أن الحق واضح يعـرفه كـل الشعـوب
تـأتـي الأبـطـال بـعـده عـادل بـيـن الـرعـيـه
جـاه قـتـال مجوسي عـن مـراده مـا يـتـوب
أن بـغـيـت الـرد دحـه قـلـت عـزوه وايـلـيــه
جاتـك جموع تداحـم من شمال ومـن جنـوب
وأن بغـيـت الـرد كـلمه مـن زمـان التـغـلبـيـه
لو مشد القاف صخره عنـد ابـن وايـل يـذوب
وش تـبـي أمـر تـدلـل لـو تـبي هـذي وذيـــه
بك نشوف الحـق واضح بـيـنـه كـل الـدروب
قال عبدالله بن دهيمش بن عبار رداً على عبدالله الموسى الخرشاوي : 943
يا أبو فهد دام عـزك عشت يا راعي الحميـه
كـل مـنـطـوقـك تـمـام وأنـت رجـّال محسوب
كـل مخـلص للقبـيلـه فـزعـتـه يـالـقـرم لـيـه
وأنت تدري كل باطـل صاحبـه دوم مغـلـوب
من فضل مولاي مجهد وأكتب أمجاد السميه
لـو تـشـدّق بـالـمـجـالـس كـل هــّذار وكـذوب
يا أبـو فهـد مـا نلـوم الـلي مقـاصـدهـم رديـه
ما يهم الهرج الأجوف من بعض عوج الدروب
من تجمّع في ضميره طبع حسد وشين نـيـه
ما يقول أدخل على الله ولا يعرف نفض الجيوب
بـارعـيـن بـالـمهـايـط والـنـوايـا شـقـلـبـيــه
كل منهم يحسب أنه عن بـني جنسه يـنـوب
الردي لـو عد نفسه مثل الـلي حمى ضريـه
الزعيم أخو المهلهل أو مثـل شيخ العتـوب
يدركون الناس وصفه بالشبـه مثـل الحطيـه
مشتقي بعيوب غـيـره والبـلا بـه والعـيـوب
خـاب مذموم السجايا صاحـب النفس الـدنيـه
من عمل معروف يمدح والردي دوم مهـزوب
بالـرجال أنـذال وأيضاً فيهـم شخوص شفيـه
وفيهـم هدوس وزلايب كنهم بالوصف عـوب
قال الشاعر عبدالله الموسى الخرشاوي هذه الأبيات يسند على زميله عبدالله بن دهيمش العبار : 944
يا أديـب القبيلـه يا عـزيـز الجـنـاب *** عطني علـوم حالك يا عساها بخيـر
لـك مكانه عزيزه لـو يطول الغيـاب *** يشهـد الـلـه عـليها ساكنه بالضمير
اسعـد الله صباحك بالأجـر والثواب *** وبارك الله جهودك يالحسام الشطير
قال عبدالله بن دهيمش العبار جواب لزميله عبدالله الموسى الخرشاوي : 945
يا أبو فهد هلابك عـد قطر السحاب *** من مناشي غمامه هل وبله غـزيـر
ياصدوق المشاعر جاك رد الجواب *** عبـر عجل الوسايل مع نفيح العبير
أبشر أني بعـز وخيـر والوقت طاب *** وأحمد الـرب سهّـل كـل أمـر خطير
وقال عبدالله الموسى الخرشاوي هذه الأبيات يسند على عبدالله بن عبار : 946
أحب ربـي عـظـيـم الـشـان وأجـلـه *** فضايـلـه مـا تـعـد وكـيـف نحصيهـا
أجل نـعـمـه وهـبنـا الـديـن والمـلـه *** من أمـة المصطـفى للـحق هـاديهـا
يا فخر وايل عـريب الساس عبدالله *** مهما مدحتك أفعالك ما أقدر أوفيها
قطفـت أزهـار المـراجـل كنـهـا دلـه *** ومديـت فنجـالهـا لـلي طـمع فـيـهـا
منظـوم شعـرك بـه التاريخ ما أملـه *** أخبار ناس مضت لولاك ما أدريهـا
يالجهـبـذ الـفـذ يـا حـامي عـريـنـلـه *** يالوابل الـلي همـل وأنبت قـوافيهـا
الوصف كايد وسامحني عـن الـزلـه *** بك أنظم أبيات فـيها النفس أسليها
ريان جنـة عـدن صومك لـك يـدلـه *** وفي ليلة العيد ضاعف لك حسانيها
وقال عبدالله بن عبار هذه الأبيات رداً على عبدالله الموسى الخرشاوي : 947
يا أبـو فهـد الله يجيرك عن العـلـه *** مولاك نفسك على الأيمان قـاديها
عادتك من طلعتك ما ترافق الشله *** هل الطغى والغوى حاشا تخاويها
على الفخر والنقا وقتك مضى كله *** وعـن الخطـا كلمتك دايـم تـنقيهـا
الطبـع يا مسنـدي بالعـالـم اجبـلـّه *** والـلي يريد العـلا يصعـد عواليهـا
شرواك فيه أعتزي ولاالردي خله *** أزله خشاش البشر ماني معابيهـا
من خط حرف الغلط نرميه بالسله *** لو شفتها أطشها وأقلع مضاويها
طبعي حليف الردى ما أرافقه لـلـِه *** والفعـلـه الطيـبـه أفخـر بـراعيهـا
قلته وعقد البلش عند الولي حـلـّه *** مولاي رب المـلأ والخلق باريهـا
هذه أبيات قالها الشاعر عبدالله الموسى الخرشاوي مشكوراً ينوه عما
سمع من كلام ويتصدى بحزم وصدق : 948
يا أبـو مشعل شفت نـاس بهـا عـلّـه *** عـلّـة يـبـحـل طـبـيـب يـداويـهــا
الـحسـد والبـغـض بقـلـوبـهـا كـلـّـه *** منتشر من روسها الـيـا مواطيهـا
كـل خـبـل ضـايـع حـط لـه شـلّــــــه *** ضـيّع سـلوم الـرجال ومـعـانيـهـا
تـرثـت آدم كـنـهـا الـيـوم عـقـبـلـــه *** نـاس يرفعـهـا ونـاس يـوطـيـهـــا
وعـابـر عـبّـار والـعـقـب عـبـدالـلـه *** شجرة الويـلان بالأرض يسقـيهـا
وأخضرت بأغصانها وسط خلق الله *** وكـل عاقـل يـفتهـم معـتـني فيهـا
والـسـلام خــتــام يـا مـبـهـّـر الـدّلـه *** جاز لي طاروقها وقمت أجاريهـا
فقلت هذه الأبيات مجارة لأبيات الأخ عبدالله الموسى : 949
يـا نـديـبـي رح لأبـن وايــل وقـلّـــه *** جتني أبـياتـك عسى الـلـه يحييها
قـاف اللي مثلك يا أبو فهـد ما مـلّـه *** أعتز وأفرح بها مـن عـز راعيها
يـا أبـو فهـد لـو يقـول الـردي خـلّـه *** ما يعـوق الـلي بعيـده هـقـاويـهـا
معي الـلي يشبح عـلى عـالي التـلّـه *** وضدي اللي شبحها في مواطيها
الصـديـق الـلي تـجـاوز عـن الـزلـّه *** ومن بلي بالحقـد يفـرح بطاريهـا
كل شخص يا أبن موسى لـه اجبلـه *** ومن تـطـبّـع عـادة مـا يـخـلـيـهــا
مـن يـولـع شعـلت الـشـر بـالـجـلــه *** نـار حسـده بجوفـه مـن يطـفـيهـا
قال الأستاذ عبدالله الموسى الخرشاوي هذه الأبيات يثني على الشيخ
محمد بن عيّاد الخرشاوي ويثني على سكّان البطين : 950
فـكـري يـحـوم ويـعـتـلي بالمـراقـيـب *** يبحث عن العليا على كل عالي
جـاني يقـول أهـل الكـرم والمواجيب *** يا كثرهم وسط البطين الشمالي
عـربـان مـن كـل القبـايـل أصاحـيـب *** الكيف طايـب والشعر لـه مجالي
وقـررت أسافـر يمهـم دون تـرتـيـب *** وأدخل مجالسهم على ما بدالي
ركبت أنا الفرت الرصاصي ولاهيب *** قطع الفيافي وما طرالي جـرالي
مـشيت مـن بـعـد التقـاطع بتهـذيـب *** ودخلـت دار المرجلـه والمعالي
من أجل ذكره قلت أنا حظي مصيب *** بـأبـو عـزّيـز افخـروا يا عـيالي
وأنـا بـداره كـم سمعـت التـراحيـب *** في بـيـت دايـم مدهـل للـرجـالي
أعـني محـمـد شيخنـا منبع الطيـب *** هـو درعنـا في مظلمات الليالي
الشيخ أبـن عـيّاد ريـف الأصاحيب *** أطلب عسى يحميه عـز الجلالي
قال عبدالله بن دهيمش بن عبّار هذه الأبيات مجاراة لأبيات الأستاذ عبدالله الموسى الخرشاوي : 951
يا أبو فهد حييت يا طـاهـر الجيـب *** يامرحبا اعداد الحصى والرمالي
احسنت بالمنطوق وأعربت تعريب *** قافـك كمـا العـذب القـراح الـزلالي
مدحت شيخ ما سلك مسلك العيـب *** أبـو عـزيّـز مـن ابـعـاد الــمـدالــي
مضّى زمانه في رياض المحاريب *** يطمع بلطف اللي على الكون والي
بـيـن المنـابـر والـدلال المحاديـب *** يـشهـد لـه المنـبـر وصفـر الـدلالي
له قـدر مع ربعه وعند الأجانيـب *** عـنـد الـقـرايـب والأجـانـيب غـالـي
من مقتبل عمره اليا منبت الشيب *** يـثـني عـليـه الأجنـبي والموالـي
وأنجب صوارم من حداد المخاليب *** والنعم والـلـه في جميع العـيـالـي
الكـل منهـم فـاز عـقـب التجـاريـب *** بالطيب فـازوا والعـلـوم الجـزالي
خلفة حمايل ينطحون المصاعيب *** الـطـيـب لـلـخـرشـان أول وتـالـي
وهذين البيتين قالهن الأستاذ عبدالله الموسى الخرشاوي عندما شاهد
زميله عبدالله بن عبّار على شاشة قناة ديوان العرب فقال : 952
أخبروني يا جـماعـة مـا فعلتـه هـو يجـوز
هـو يجـوز الـلي نـعـزه بالقـنـاه نـقبـلّـه
قالوا أن الحكم واجب لا ظهر درع العنوز
كـلـنـا نـقـبـّل جبينـه وأنـت لازم تـفـعـلـه
فقلت شاكراً الأستاذ الفاضل عبدالله الموسى :
يا أبو فهد دام عـزك دوم بالجزلة تـفـوز
تكسب علوم الفضيلة والصخى والمرجله
من يقـدرنـا نعـزه ومن لـه العـز معـزوز
والصديـق الـلي يـقـدر نعـرفـه ما نجهلـه
هذه الأبيات للشاعر عبدالله الموسى يسند على عبدالله بن عبّار فيقول : 953
طير الفـرح فـي خـاطـري يـوم غـرَّدت*** غـرِّد نغم فـرحة شعوري قصيدة
اصـدح بـعـالي الصوت ياناس ورَّدت *** للي يبي التمجيد طبعة جديــــدة
تأليف ( ابن عبـار ) بـه الحـق جـرَّدت *** نسَّاب كسَّاب العلوم المـفـيــــدة
يا من على زيف الحـقائـق تمـــــرَّدت *** ذا سيفـك البتار صافي حديــــــده
سلِّه عليك (الـوايلي) يـوم صـــــرَّدت *** يدمغ به الباطل وربي عضيـــــده
تسلم يا (ابو مشعـل) لـك الله تـفـرَّدت *** من فوق هامة كل راسٍ عنيــــدة
جـودك ومـجـهـودك ولـلـخـيــر أرَدْت *** بذلتهـم وأحصيـت نـاسٍ بعيـــــدة
قولك صواب وعـن التحـيـز تـجـرَّدت *** حـياة أبـو مشعـل عـساها مديــدة
جواب عبدالله بن عبار رداً على عبدالله الموسى : 954
حيـيـت يالـلي بالـقـوافـي استطـردت *** أنـت الرشيد اللي عـلومك رشيـده
سبّاح لـو خضت البحـر مـا تصّردت *** ولا تـنطـق ألا بالـعـلـوم الأكـيــــده
يـا أبـو فـهـد مـانـي لـعـنـّاز شـردت *** جمـعـت بالـمـظـمـون كـل الـبـديـده
مجهـد لجمع الشمل مـا يـوم فـّردت *** بـين الـقـبـيـلـة والـضمـايـر وديـده
لـو كـان بسيوف الحنـاجـر تسردت *** الـكـذب يـاقـف عـنـد حــّـده ومـيـده
مشيـت مـع درب الحقيقـة وعـّردت *** امشي بـرأي الـلي اريـاهـم سـديـده
لوجيه من يبحث عن النقص بـرّدت *** بالكـتـب الـلي لعـيـال وايـل فـريـده
شليـت يـمنـا الـلي شنـاني وحـردت *** وبـادت زنـود مـدوريـن الـمـكـيــده
قال عبدالله الموسى الخرشاوي : 955
الكلام يتــزاحم فـــي خفـــوق وسيـــع *** جال بيـن الحنايا تسمع التمتمــه
قلت ما ني مبين قال ما ني مطيـــــــع *** اكتـب الـلـي تـريده لا لا لا تكتمه
الحزن وسط قلبــي من كلام شنيــــــع *** من حسود حقود منخدع بقلمـــه
ما تدارى لحظــه سب حصــن منيـــع *** ما تجيه المذمة لا نـذوق عـدمــه
بين كل القبايـل بــه فخرنـــا جميـــــع *** زان وسط المزاين شامخ بكـرمه
فرق بينــه وبينــه بالقـــدر والصنيـع *** سيرة الشيخ نور وسيرته مظلمه
يا شيخ هزاع قدرك دوم عالي رفيـع *** عـزتـك وســط قـلـبـي ربنا يعلمـه
وكان هي بالشهامة والكلام البديــع *** واجب اسكت وغيري واجب اقدمه
القبيلة فخرهــــا بالكريم الشجيــــع *** (درع وايل) تنهض ربـنا يسلمــــه
ابتدأ بالنصايــح والكلام السنيــــــع*** الله اللي أعـــزه والحسود ألجمـــه
يوم غيره تلفظ بالكلام الوضيـــــــع *** ثابـت بالمباديء مـاتـزل قـدمــــــه
أشهد إن القوافي لا بو مشعل تطيــع *** رد قولـة(حسود) وسطر الملحمة
جواب عبدالله بن عبّار على أبيات الأخ عبدالله الموسى الخرشاوي : 956
يابو فهد تعيش وجاك ردي سريـع *** من قريض القوافي كالقراح طعمه
بالخطأ ما نجاري من فـواده وجيع *** لكن الحيص يجزع من قراد حلمه
الحكيـم المحـنـّك بالخـطـأ مـا يـذيع *** وأن تعـّدى خصيمه هجّده واكعمه
الشعر اللي قـريتـه بالنوادي أشيـع *** لفظ منطـق بشيّـر سجلـه من فمه
يزعم أن المطوطح خلا ذيبه مجيع *** عنده الذيـب جايع ما عطـاه لحمـه
لكن الذيب هيّص بين قمـرا وربـيع *** وأبتهج كل راعي لا يحوف غنمـه
يـوم خطـات تـاجـر بالفطانـه لكـيع *** لو يزوره مسيّر بار بـه ما احشمه
بس يجـمع دراهم بالشرا والمبـيع *** ناشف جلد وجهه تقل لـون رضمه
مـا تكفـل بـرمـلا ولا يـتيـم رضيع *** ولـو تـنصّاه مغـرم حـقّـره واشتمـه
أبو فهد شرالـه مـن حـلالـه قطيع *** ويوم شيّد خيامه من نصاه اعـزمه
شاد صيوان ضوّه بالدجا له لميع *** ومن قـلط فـي محلّـه شاهـدٍ بكرمـه
الرجال اعرفوه وجوه مع كل ريع *** بالنـفـايـل بـداه وبالجـميـل اخـتـمـه
وقال عبدالله الموسى الخرشاوي : 957
يا المنتدى من حقك اليوم أعايدك *** واجـب عـلي أقـول (عيدك مبارك
يا كثر ما أسعدتني في جدايــــدك *** واللي يضيع بعـلـم الأنساب زارك
نقاش علمي مع بحوث وقصايدك *** ومن شاهد علوم الرجاجيل شارك
عوايد أصحابك تجمل عوايــــدك *** الـعـز ثـوبـه جـملـوا بــه وقــــارك
هداج تيمـاء كلنـا اليـوم نـــاردك *** وفي كثرة الأعضاء دليل اشتهارك
يسلم أبو مشعل على الخيرقايـدك *** أسس على قول الحقايق جــدارك
معه رجال هم ذراك وسنايـــــدك *** سـلايـل الأبـطـال يـوم المـعــــارك
هذا معايد (عضو) واجب يعايدك *** يا اللي تشاهدني أنا وســـط دارك
عانقتني وإلا يدي صافحت يـدك *** حقـك عـلي أقـول ( عـيـدك مبارك
الجواب على عبدالله الموسى : 958
يا أبو فهد تسلم عسى الله يسعدك *** لك الشكر يا ريف ضيفك وجـارك
مهـمـا بجـزلات القصايـد أمجـدك *** علم الفخر يا نسل الأجـواد كـارك
أنـت الـذي للطيب عـودك والـدك *** وأنت الـذي تنجح بـوقـت أختبارك
ينسر بـالي يـوم يالقـرم أشاهـدك *** ما خاب من هو يالزميل استشارك
أنت العريب اللي عـريقه بدايـدك *** وأنـت الـذي بالـديـن عـدل مسارك
لي الشرف يالـوايلي فـي تـوددك *** حيث أنت وافي والمراجل اشعارك
نشتاق لـك لا غـبت عنـا ونفقدك *** ونفـرح اليـا وردت علينـا أخبـارك
من جاك ناصي دايم الدوم ياجدك *** بالبـيـت والـدلـه عـلى جـال نـارك
ربك لفعل الخير يالقـرم مـرشدك *** مـولاك عـلاّ قـيـمـتـك واعـتـبـارك
وقال عبدالله الموسى الخرشاوي : 959
تكريم شخصك والله أنـه من الدين *** ومـن لا يـرد الدين والـلـه فشيلـه
يقـوم بـه نسـل الـرجال العـزيزين *** مـن يذكـر المعـروف يوفي عميله
وفي حـفل تكريمك تقول العناوين *** إنـت الـذي كـرمـت كـل الـقـبـيـلــه
جواب عبدالله بن عبار على أبيات الأخ موسى :
سـلام يا نسـل الـرجـال الكـريميـن *** سـلام يهـدى مـن عـديـل لعـديلـه
أبـو فهد معـروف باللطّف واللّيـن *** حـيثـه مـن الـلي يكسبون النفيلـه
من ساس لابه يدحرون المعاديـن *** اليـا تـلاقـوا فـوق بـنـت الكحـيلـه
هذه الأبيات من شعر عبدالله الموسى الخرشاوي يسند على عبدالله بن دهيمش بن عبّار فيقول : 960
لا يهمـــك قول حاسد عــن جهودك *** اللـه اللي حطهــم وأعلــى مكـانــك
ينصفك مـن عـد نفسه من عضودك *** والحسود يمـوت واللـه ما أهانـــك
كان هي بالحق يا مكثــر حشـــودك *** يشهدون إنــك على قمـــة زمانـــك
شوف نسل شيوخنا ترثــة جــدودك *** يشكــرونـك ربنـا للخيــر أعـانــــك
يا سليـل المجـد يا مــن فـي وجودك *** صنت ما ضينا على العـزة وصانك
أروع الأمـثـال يضرب فـي صمودك *** وأروع الأقـوال مــا خـطــه بـنانـك
الحثالــة ما تقــرب فــي حـــــدودك *** من تخــفى انخــذل واعتـز شانـــك
بالحقايــق دايـــم توثـــق شهـــودك *** تمتطـي للمرجلــة صهـوة حصانك
جواب عبدالله بن عبّار رداً على عبدالله الموسى الخرشاوي : 961
يالكريم الـلي ثـبت طيـبـك وجـودك *** يا أبو فهد عشت وصح الله السانك
الـقـوافي يـا أبـو فـهـد مـا تـكـودك *** تشكر وتبدي عـلى الصاحب حنانـك
بان قصدك وأفتهـم مقصود مـودك *** والكـلام الـلي تـقـولـه مـن أحسانـك
الـكـلام الـلـي سـمـعـتـه لا يـكـودك *** طقـطقـه تشبـه عـلى رقـع التـوانـك
قـلـت للغـلـطـان لا تـفـسّـر زنـودك *** ولا تـومـّي لـلـزبـايــن فـي أردانــك
أنـظـر الكتّـاب وش قـالـوا بعـودك *** يامن على صاحبك تضرس اسنانـك
يالمحـرّض كـف شرك دون فـودك *** قـلـت هـرج الـزور والتعبيـرخـانـك
الـرجـال الصيد ماهـم مـن جنـودك *** كـل وافـي مـن ضـنـا عـنّـاز دانــك
قال عبدالله بن دهيمش بن عبار هذه القصيدة يسند على صاحب السمو
الأمير عبدالعزيز بن سعد بن جلوي آل سعود حفظه الله ورعاه : 962
بديت ونظمت القاف بسم الـلـه الرحمن
ولـي الـخـلايـق مـالـك الـمـلـك سبحـانـه
برب العبـاد أعـوذ مـن نـزغـة الشيطان
عـزيـز الجـلال أطمع بعفـوه وغفـرانـه
أصوغ المعاني وابـدع الشعـر والقيفـان
أجـنب ضعيف القـول وآخـذ من سمانـه
بيـوتـي منقـحـها عـن الـزود والنقـصـان
ولا خـيـر بالـلي مـا حـفـظ منطـق لسانـه
قرايض من افكاري كما الدر والمرجان
تـوجّـه مـع ورود الخـمـايـل وريـحـانـه
لعبدالعـزيـز الـلي بعـلـم الفضيلـه بـان
سعيف الـذي فـيـه الـزمـن مـال مـيـزانـه
أبن سعد معروف قـدره رفـيـع الشان
مـقـر الحـمـيـة فـي ضـميـره اوجـدانـه
عرف بالتواضع صاحب الجود والإحسان
لطيـف الـنبـا يـكـرم ضيـوفـه وجـيـرانـه
يقيس الرجـال وينتقي منهـم الصدقان
ولا يصادق الـلي طبعـهـم غـدر وخـيـانـه
من العـزوة اللي تنبذ الظلم والعـدوان
حـمـات الشريعة نصرة الدين واعـوانـه
سيوف العدل تردع هل البغي والطغيان
مـصـالـيـت ضـد الـلي يـمـاطـل بـديـانـه
كما الحيد اللي عن قمته تقصر الضلعان
منيع الـذرى والهـوج مـا هّـزت أركانـه
أسود الوغى لا جالت الخيل بالفرسان
لـيـوث المعـامع كـان خاضوا بمـيـدانـه
حفيد جلوي منسوب من مقرن ومرخان
مـريـدي عـريب وعـزوة سعود جـدّانـه
كما الصيرمي مجناه مـن مـاكـر العقبان
قـطـامي نـوادر عـالـي الحيـد مسكانـه
نويت اسند المعنا على صفوة الشجعان
مـلاذ الـدخــيـل الـلي لـجـأ لـه ومـزبـانـه
وقال الشاعر الرجل الفاضل عبدالله الموسى الخرشاوي هذه القصيدة مجاراة لقصيده
زميله عبدالله بن عبار المسندة على سمو الأمير عبدالعزيز بن سعد بن جلوي : 963
سـلامــي وتـقــديــري إلــى مـنـتـــدى الـويلان
عـلــى صـفـحــة الـمـوقــع تـغـنيــت بـألـحــانـه
ألا يـا حـروف الـشعــر ثـــوري كـمــا الـبـركـان
و صـبـي عـلــى الـمـيــدان مـن فـيــض نـيـرانــه
سـمـعــنا كــــلام اللــي تـجنــى عـلـــى الـعـربــان
بـعـــــده شـكـيـــــت الحـال لـلـه سبـحـانــه
نـاس(ن) عـلى كـيفـه تـبـي تـغــيـر الـجــــــــدان
وهـو لـو نـشـدتــه مــا عــرف بـعــض جــدانــه
خـذيـنــا مــن الـتـاريــخ مــع دورة الأزمـــــــــان
وعـرفـنــا نـصـيــر الـحـق يـا كـثــر عـدوانــــــه
أكـيـد الـمـسـبـة لا لـفــت مـن صـغـيــر الشـــــان
شـهــادة لـمــن سـبــه بـهــا يـعتــلي شـــانــــــه
تـرى الـكــذب و الـتـحـريـف مـا يـغيـر الـعـنـوان
اذا صــار عـنـوانــه مـثـبــت عـلــى أركـانــــــه
قـول(ن) بـلا بـرهـان عـيـب (ن) عـلـى الإنســان
وأنـا أقـول قـولــي و اتـبــع القــول بـرهــانــــه
جـهـودك يـا ابـو مـشـعــل لأمـر الـقـبـيـلــة بـان
ولا يـنـكــر الـمـعــروف يـا كــود خـوانــــــــــه
تـرجـع لابـن يـاقــوت فـي ( مـعـجــم الـبـلــــدان
و( ابـن الـمـقــرب ) قـريــت بـشــرح ديــوانــه
و الا ( المـبـرد ) ذكـرتــه فـي نـســب عـدنـــــان
و( لـب الـلــبــاب ) يــنـومــس فــيـــه عــنوانــه
و ) الاشـتـقــاق ) اللـي تـكـلــم عـن بـنـي هـــزان
لـ ( ابـن دريــد ) اللــي ذكــر بـعــض أوطـانـــــــه
و ( الجوهــرة ) فــي نـسـب سـيـد ولــد عـدنـــان
مـع ( طـرفـة الأصـحـاب ) و( كــتـاب بــدوانــه )
و( ابـن بـشـر) و( العـجـالـة ) لابـن ابي عـثمـان
مـع ( العـبــر ) و ( القـلائـــد ) كـلهــا دانــــــــــه
جـمـعـت ( الـدلائــل ) جـمـعـة الـعـرف بالـمـيـزان
جـزاك الله يـا شيـخ(ن) عـلـى الإحسـان باحـسانـه
ولــو قـابــل الـمـجـهــــود الـبـعـــض بـالـنـكــران
نـبــي الـهــدى قــد كـذبـــه بـعــض عـمــانــــــــه
أبيات من نظم الصديق الوفي عبدالله الموسى الخرشاوي الولدعي بمناسبة افتتاح حسابي في تويتر : 964
هذا الحساب الـلي يسمّى لـه حساب *** حـسـاب الـلي مـجـده رقـا لـلـثـريـا
مجد القبيله عـنـد الأدنيـن واجـنـاب *** شــمـخ بــذكـره والـدوافـع حـمــّيـا
واللي يـبي تاريخ مع عـلـم الأنساب *** بـحـساب ابـن عـبـار كـلّـش تـهـيـا
يشهد له القاصين من قبـل الأقـراب *** ومـن يـنكـر المعـروف الحـق عـيـا
قال عبدالله بن دهيمش بن عبار هذه الأبيات مجاراه لأبيات الأخ عبدالله الموسى الخرشاوي : 965
يا أبو فهد مشكور يا عـز الأصحاب *** تعـيش يالـلي بلـفـوة الضيـف حـيـا
حـيثـك فهيـم وتفـتهـم كـل الأوجـاب *** مـا عـنـك يـا ريـف الـرفـاقـه كـنيـا
دوّنـت تـاريـخ الحواضر والأعـراب *** الـلي شـمـال وشـرق والـلي هـنـيـا
والناس فيهم بالشّبه صقـر وغـراب *** وفـيهـم يـا أبـو فـهـد كـذلـك حـديـا
قال عبدالله الموسى الخرشاوي عبر تويتر يثني على زميله عبدالله بن دهيمش بن عبار : 966
غـرست بقـلـوب الـرجاجيـل مـقـدار *** واليوم تجني يأبيض الوجه غرسك
هـداج تـيماء من بـغى العـلم صـدّار *** يمّـك ويـروي من قـراحـك ودرسـك
الـلـه يـعـلـي منـزلـك والـي الأقـدار *** والـلـه بعـينه يا أبـو مشعـل يحرسك
قال عبدالله بن عبار جواب لأبيات عبدالله الموسى :
يا أبـو فهد من جـزل الأشعار تختار *** تـكـتـب عـذيـات القـوافي بـطـرسـك
عسى يفـداك الـلي للأصحاب عـقّـار *** لاغـبت هـمّـه بـس طعنـك وهـرسك
مـا يجـحـد التاريخ مـن قـدم الأدوار *** عـربـك تـدري بالحـقـايـق وفـرسـك
قال الشاعر عبدالله بن موسى الخرشاوي أبو فهد هذه الأبيات يثني على
زميله عبدالله بن دهيمش العبار : 967
من منطلق ذكر الجميل الشعر لحضوره مجال
( الشعر ديوان العرب) يحفـظ عـظيم فعولهـا
أسطّر أبيات الوفاء بأهل الوفاء و أهل الجَلال
الـلي إذا قـالـوا وفـوا و المـرجـلـة فـزّوا لهـا
سلام يا ذخر عنزة في وجه عسرات الليــــال
ثـنيـت رجـلـك دونـهـا و النـايـفـات تطـولـهـا
سلام يا فخـر عـنـزة بيـن القبايـل و الـرّجــال
دوَّنـت ماضي وقـتـها بـوديانـهـا وسهـولـهـا
سلام يا شهـم عـنـزة ذكـَرْت وافـيـن الخـصال
مـا كـأنّـك ألا بـيـنـهـم فـرّيـسـهـا و خـيـولـهـا
سـلام يـا ابـن عـنـزة بالـبـِرّ مـا جـالـك مـثـال
بـرّيـت بجـدودٍ مضـوا بفعـولهـا مـع قـولـهـا
عـنـد العـرب قولٍ قديم (ما للثقال الا الجمـال)
الـلي ينومس فعـلهـا و ان درهمت بحمولهـا
ما هي غريبة وقفتك يوم الدهر و الوقت مال
مـورَّثٍ فعـل الجـميل و المرجـلة لـزحـولهــا
(فدعان) من يوم العـرب دايم مواقفهم جـزال
سيـرة مصـوت بالعـشاء تحـدرت بـسيـولـهــا
وان حلّ ذكـرٍ للعطاء يـوم العطايا راس مـال
عطية غبين اعـتلـت و لا احـدٍ يقـرّب حولهـا
رد عبدالله بن دهيمش بن عبار على عبدالله بن موسى الخرشاوي : 968
يا أبـو فـهـد يا مسندي جتـني بيـوتـك والمقـال
تجلي عن النّفس الكدر في حين ضيقت جولها
رسالتـك نـفـرح بهـا فـرح الهـجـافـا بالخـيـال
لاهـل وبـلـه وانـهـمـر يـمـلآ طـمـان دحـولـهـا
يا أبـو فهد قلبك نقي أصفى من العـذب الـزلال
مامن جـمايـل بيننـا وأنـت تعـرف مـدلـولـهـا
لاخيـر بالـلي يعتذر للصاحب ما يرفى الخـمـال
ولا خيـر بالـلي عـزوتـه يفـرح بفتق خـلولهـا
تـسهّـلـت يا أبـو فهـد بالحـل لا يـوجـد محـال
وحـنـا بـدولـه عـادلـه تـتبع منهـج رسـولهـا
يا أبو فهـد وقـت اللزوم عـليـك بعـيـال الحـلال
وأبعـد عن عفون العـرب لا تشتكي لخبولهـا
علم الفخر والمرجله يا أبو فهد صعـب المنـال
ومن لـه وجاهه بالسعي كـان اجتهـد يـنولهـا
يوم أنتخى القرم النبيل وهو بالأجازه لا يـزال
جاء للدوام وهو مجاز قال ابشروا بحلـولهـا
ولاهي غريبه فزعته عـادت عمامه والخـوال
الـربعي نـعـم بعـزوتـه تفخـر بطيـب أصولهـا
عـاش سليمان المحتـرم قام بواجبنا بالكمـال
عسى يفداه أهل الجحود اللي الردى بحثولها
قال عبدالله الموسى الخرشاوي هذه الفصيدة يثني على أبن عمّه فهد بن محمد الخرشاوي : 969
قبـل غـروب الشمس و الجو بـه نسناس
عـلى جـال نـار(ن) ترتكي فوقهـا الدلّـه
وشوف النياق اللي ملكها عريب الساس
وحضور الرجال الـلي بها الخاطر يدلِّـه
سجّـت هواجيسي و انـا اكـرِم الهوجـاس
واطلـق سبوقـه فوق ضلعان(ن) مطـلّـه
جــزل القصايـد صيـد و يصيدهـا قـرناس
وترسل لبيت (ن) الرجاجيل مدهـلّ لـه
تاصـل (لابو محمـد فهد) كاسب النوماس
راع الكـرم و الطّيـب يشهـد لـه سجـلّه
كتبــت القصيدة حـب ومعهـا طناخة راس
تـنـومسني أفعـالـه مـعـه كـانـهـا ظـلّـه
يـا مــا علــى الترحيـب هــلّا بـدون قياس
يــردد الـتــرحـيـب و حـجـاجــه يـفـلّـه
يامـا جمعنــا عــّز معهــا كـــرم واونـاس
ومـن بـيـنـنـا يـمـنـاه بالطـيـب مـبـتـلّـه
ويـا مـا لقينــا نـاس و الدِّيـن هـو مقياس
تلفي عليه أفواج قدر(ن) وحب(ن) لّه
ويـا مـا سمعنـا شعـر بمجالـس الجـلّاس
ويـا مـا ذكـرنـا قـول خيـر البشـر كـلّـه
صحيح الكرم موروث و العرق به دساس
مـن ماضي الخرشان غيـوم(ن) مهلّـه
وكـل القبايـل فيهـا كـرم و طيــب اجنـاس
واسـأل إلــه الـكــون يـجـنـبـني الـزلّـه
قال عبدالله بن دهيمش بن عبار هذه القصيدة مجاراة لقصيدة عبدالله الموسى الخرشاوي : 970
بديت وتهيّض من صدى فكـري الحسّاس
جواب لشعـر قـرم (ن) يفاخـر بربعـلّه
كلام (ن) لأبـو فهـد قـريته يـزيـل عـماس
عماس الذي يبحث عن الكيف والفـلّـه
بـدأ بـوصـف مجلس مـا تربّع بـه البلاس
حليف الـرّدى واللاّش ما يقربه لـل لـه
مجلس فهد ما ظم زمرة غوى واخساس
مجـلس نـقـا مـا يـوم بـه تجتمع شّـلـه
فـلا طـبّـه الخايـب ولا الهـيس والـهّـلاس
قريب (ن) من البل شيده في هاك التلّه
كريم (ن) وبه عاده لجـزل الطلي هـبـّاس
وفـي كـل لـيـلـه مجـلسه فـيـه تـعـلـلّـه
ونعـم بسلـيـل مـحـرّق الـبّـن بـالمحمـاس
محمد أبـوه الطيب سلمه وطبع (ن) له
مـحـمـد وجـاره كـل لـيـلـه بـه الـمقـبـاس
من جـذور الأرطى ما أوقد النار بالجله
ترى صاحب التقوى تحبّه جميع الـنـاس
محمـد عشير الضيـف والجـار مـا مـلّـه
أبـو عبدالعزيـز بـوصفـه عـديـم اجـناس
طـلـبنـا الـولي عـساه بالـعـمـر يـمـهـلـه
ويوم الزمان الـلي نجح بـه قـوي البـاس
حفـيـد الـذي ما يطـري الخوف والـذّلـه
الخرشاوي تعـرفه قبايـل وهـب وجـلاس
بـعـلـم الـفـخـر تـاريـخـهـم كـلـن يـدلــه
وقال عبدالله الموسى الخرشاوي هذه الأبيات : 971
مجاراة أبـو مشعل لي تـاج فـوق الـراس
وشـلـون وأن جـتـني من القـرم عبدالله
افـخـر بـهـا واشوش واقـول أنـا يا نـاس
عـبـدالـلـه الـعـبـار لـبـسـنـي الـحــلّــــه
يـسلـم أبـو مشعـل شـعـره درر والـمـاس
فـي مـركـز الـويـلان لـه مـركـز احـتلّـه
قال الشاعر الأديب عبدالله بن موسى الخرشاوي أبو فهد هذه الأبيات : 972
مـا التـفـت لضعونهـم يـوم يـقـفـون *** ولا اضحك على طيحاتهم يوم دوَّن
مسلـم ومثـلـي نـاس لـلـه يـخافـون *** واثق من الخطوة ولا اعرف أخوّن
صاطي لقول الحق وابليس ملعـون *** احـفـظ لسانـي لـو حـروفـي تــروّن
يزداد غيض اللي على الخبث يمشون *** وازداد فـيض مـن المعـاني وادوّن
مثـل الزمّل الـلي عـلى العـدّ يـردون *** بـنـات فــكـري لـلـشـدايــد تــقــوّن
اكتب شعـر اكتب ادب اكتـب شجون *** هـادي ولـو اسـمـع ذيـابـه يـعـوّن
بيـاض خطّي بالـورق نـاصع اللـّون *** عـلـى الـمبـادي مـا اعـرف اتـلـوّن
بصراحتي كأني امـلـك عـلى الكـون *** ولا هـمّني طـعـناتهـم وش يـسـوّن
تقـول هوّن قلـت أمشي عـلى هُـون *** يـمكـن أهـوّن بـس مـا اقـدر اهـوّن
قال عبدالله بن دهيمش بن عبار هذه الأبيات مجاراة لأبيات الشاعر عبدالله الموسى الخرشاوي : 973
يا أبـو فهـد مـن ربـنـا نـطلب العـون *** الـلـي بــسـت أيــام لـلـكــون كـوّن
جاريـت منظـومـك وأنـا منك ممنون *** حيثـك مـن علـوم الفضيلـه تـمّـون
من أعتـدل سيـره له النصر مظمون *** لـو الحيـايا فـي مـحيـطـه تــطــّون
الـحـمـد لـلـه بـه شـريـعــه وقـانـون *** شعـن مـصابـيح الـعـدالـه وضـوّن
يالقـرم كـل الـنـاس بـالحـق يـدرون *** لـكـن شيـاطيـن البشـر لـهـم غـوّن
لاشـك لا تشـره عـلى أنذال وعفون *** جليسهـم الـلي بالـبـيـوت أيـتـحـوّن
يـا أبـو فهـد أهل الحسد لو يلومون *** الـمـجــد بـصـفـاح السجـلّـه مـدّون
ودنياك مـا دامت لكسرى وفـرعون *** أهـل العقول الـلي مـن الدين خـوّن
بالناس مـن يملك عـلى مال قـارون *** وبهـم الـذي طول السنيـن أيـتعـوّن
من شعر التصدي للحمله المغرضه قال عبدالله بن دهيمش بن عبار : 974
يالـلي مـديـحي للمـنـاعـيـر يـقـهـرك *** تشمت وعن قول الحقيقه عماوي
قل لي وش اللي من التغاريد حيّـرك *** مجـد عـنـزه ماهو ظنون وهقاوي
لـجـولـهـم أرمـن ولـجــولـهـم تــرك *** وحـتّى الخديوي جالهم والطحاوي
ومن جالهم يـوم القبايـل لـهـا عـرك *** يـأمـن ويسلـم مـن جميع البـلاوي
لـو تنشـد التاريـخ عـلمـك واخبـرك *** تـاريخـهــم يـرويــه راوي لــراوي
مـن الـذي يـا تـايـه البـصـر عـيّـرك *** بأسباب فـعـل مـزبـنـيـن الـجـلاوي
كان أنت مدرك ميّـز العيب واشكرك *** وأعرف من الـلي حرفوّا بالعزاوي
العـابـث الـلي كـان يطـعـن بمنحـرك *** جـداه هــرج الـبـلـبـه والـشـكـاوي
لـولا الغـيـور وفـاهـم العـلـم حـررك *** حطّـوك لحقه مثل وصف الفـداوي
يالوافي لربعـك عسى الرّب ينصرك *** أهـل صهـاوي من قـديـم وقـهـاوي
أتـرك اشبـاه الـلي تقـاقي لهـا كـرك *** وأقـر الفـخـر لا تـقـتـنع بالحجاوي
قال عبدالله بن موسى الخرشاوي أبو فهد هذه القصيدة مجاراه لقصيدة
زميله عبدالله بن دهيمش بن عبار : 975
دام الـرجـال الصِّيـد بالخيـر تـذكـرك *** يكـرم جنابـك عن غـلط كـل غـاوي
يا الحـر يا الـلي بالشواميخ ماكـرك *** لا تـلـتـفـت لـلـي بـطـبـعـه دنـــاوي
عـلى القبيلـة والجـزيـرة مـفـاخـرك *** هـداج تـيـمـاء بـالمـفـاخـر رهـاوي
مـن تـاه مـنـا بالنـسب لـك تـنـحـرك *** إرث القبـيلـة فـيـك يـرقـى سمـاوي
ابي انصح الـلي جـاهـلٍ فـي مآثـرك *** الـعـلــم قـالــوا لـلـجـهـالـة يــداوي
وياللي جهلت عن المراجع اخـبـّرك *** إن كان ما فوق الجهل حقـد طاوي
اقـرأ عـن الكافي بـه أشياء تبصّرك *** وتاريـخ نجـد الـلي علومه صفاوي
وعـقـد الـدرر فـيـه الدرر لك تنوّرك *** ولمسالـك الأبـصـار خـلـك قـنـاوي
وتاريخ ابن لعبـون تـاريـخ يـبهـرك *** ولطـرفـة الأصحـاب خـلـك شفاوي
و عجـايـب الآثـار تعـجـب سرايـرك *** والا الخـيـام السـود للنـور ضـاوي
والمؤتـلـف والمختلـف أدركـه درك *** وفـي تحـفـة المشتـاق لا لا تـراوي
و كـتـاب تـاريـخ الـيـمـامـة يـذكّـرك *** وبعـض الحوادث في زمانٍ حداوي
وسمط النجوم اللي به نجوم تزهرك *** وهجرة قبايل والقُـرب كـان نـاوي
واقـرأ عـن الـرحـلات تلقـا ذخايـرك *** وتلـقى بخـوزستـان رجـلٍ نحـاوي
ارجـع و أقـول الـلـه يالقرم ينصرك *** يالـلي على انساب القبيلة حـمـاوي
وعـلى جهـودك اسال الـلـه ياجـرك *** ومنـزلك بالدنيـا والأخـرى عـلاوي
ودام الرجال الصِّيـد بالخيـر تذكـرك *** يكرم جنابك عـن غـلـط كـل غـاوي
عبر توتر ارسل الأستاذ الفاضل عبدالله الموسى الخرشاوي هذين البيتين
بمناسبة فوز بعض الأبناء وتفوقهم يقول : 976
ماهي غريبه نال فن الخطابه *** في مدرسة علم الخطابه تعلّم
عبـدالله العـبـار عـز ومهـابـه *** والكل يسمع لـه إذا هـو تـكلّم
وقال عبدالله بن عبار رد على الأستاذ عبدالله الموسى :
جـاني لطيـف القيل يا مـرحبابـه *** وفكـري لمردود القوافي توّلـم
مرسول من قـرم وعزيـزٍ جنابه *** عبدالله الموسى للأضـداد بـلّـم
قال عبدالله بن دهيمش بن عبار هذه الأبيات من شعر التصدي للحمله المغرضه : 977
يـا جـمـاعـه شـفـت منشـور نـشـر *** بالمجالس والمـواقـع والـقـروب
حـرّفـوا بـأنـساب مسلـم مـع بشـر *** والصقوا في وايـل أبوهم عيـوب
جـدنـا حـطّـوه بـشـر الـلـي حـشـر *** صـاده الجحاف في ديـرة رحـوب
هي نكت من شخص مزّاح وعشر *** أو سـوالـف كـنهـا ريـح الهبـوب
يالـلي نشـرت الخـبـر أسنـد وأشـر *** لـلـمـصـادر لا يـقـال أنـك كـذوب
الـجـد الـلـي كـلـنـا بـنسـلـه خـشـر *** أسد المشهور في شرق وجنوب
قـلـتـهـا والـهـرج بــه لــب وقـشـر *** ومن ترك جـدّه معيّـر ومهـزوب
قال عبدالله الموسى الخرشاوي هذه الأبيات مجاراة لأبيات زميله عبدالله بن دهيمش بن عبار : 978
لا يــحــرّك سـاكـنــك قــول الــدِّشِـر *** الجهـل هـو نهجهم مـن كـل صوب
مـن جـهـل بابـن حجـر و ابن بـشـر *** بالنسب ضـاع بـمـتـاهـات الـدروب
مــا نـصـدق قــول كــذاب وأشِـــــر *** ولا نـصـدق قــول حـاقـد أو لـعـوب
النسـب ثـابـت و نـبـصـم بـالـعـشـر *** ومـن تـجـنَّـى حصًّـل كـبـار الذنـوب
مـن زمـان الجـهـل و عصورٍ قِشُـر *** النسـب مـحـفـوظ والعـلـم محسوب
و فـي زمـان العـلـم مـع دور النشر *** الكتـب صارت عـن الماضي تـنـوب
اجتهـد من هـو بـه الصيـت انتـشـر *** مـثــل ابـن عــبـار فـكـاك الـنشـوب
والبـشـر تـكـذب عـلى خـيـر البشـر *** و دايـم الكـذاب مخـزي و مـعـلـوب
قال عبدالله بن دهيمش بن عبار هذه الأبيات يسند على زميله عبدالله
الموسى الخرشاوي : 979
يـا ابـو فهـد دار البـطـيـن الشـمـالي *** بوجودكـم يا ليتـني وسطهـا اليـوم
حيثـك عـزيـز من الـرفـاقـه وغـالي *** ذكـراك تـبـقى راسـخـه دايـم الـدوم
مـثـل العـسـل عـذبٍ مـذاقـه وحـالـي *** للصاحب احلا من درير ام خرطوم
عـنـدك هـدف بـيـن السماكين عالي *** وحبـل التواصل بيننا لـيس معـدوم
لـو شفتـني غـلطـان تستـر خـمـالـي *** ولا ينكشف مـا بـيننـا سـر مـكتـوم
يـاقـاك ربـك مـن ظــروف الـلـيالـي *** تـعيـش لا ظـالـم ولا قـيـل مـظـلـوم
نفـخـر بـعـلـمـك كـان جـالـه مجالي *** من نسل عود من الرجاجيل زيزوم
وانا اعتزي بـك يا شجاع الـرجـالي *** حيثـك مجـرب مـن مشاكيل وقـروم
في شوف الـلي شرواك ينسر بالـي *** وانت الذي تبعـد عن الشوم واللّوم
حـيثـك مـن الـلي يفـرحـون بقـبـالي *** رب الـمـلأ عـذّاك مـن كـل مـثـلــوم
الـنـعـم مـقـصـوده بـعـيـد الـمـنالـي *** لاشـك نلتـه عـنـد الأصحاب والقوم
عـبرت لـك يالـقـرم عـن مـا طـرالي *** والقـاف يا مشكـاي معـنـاه مفهـوم
اكـتـب عـذيّـات الـبـيـوت الـجـزالـي *** والشاعـر الحسّاس مـا يترك الهوم
ويـن الـذي قـلـبـه مـن الـهـم خـالي *** الكـل فـي قـلبـه هـواجيس وهـمـوم
ويـن الـذي دالـه ضـمـيـره وسالـي *** الـكـل عـيـنـه حـاربـت لـذّة الـنـــوم
مـن فـضـل ربـي مـا عـلـيـه ولالــي *** امشي عـلى منهـج تقالـيـد وسلـوم
قـانـع ومـغـنيـني عـن النـاس مـالي *** الا ولانـي يـا أبـن الأجـواد مظيـوم
مـن فـضـل خـلاّق المـلأ مـا جرالي *** جـايـح ولاني بأمـر مولاي محـروم
سـرت وعـلـى رب العـبـاد اتـكـالـي *** عـز الجـلال الـلي عـلى الكون قيوم
قال عبدالله الموسى الخرشاوي هذه القصيدة مجاراه للقصيدة التي اسندها
عليه زميله عبدالله بن دهيمش بن عبار يقول : 980
اهــلا هــلابــك عــد ذر الــرمــالــي *** واعـداد مـا طشـت هماليـل وغيـوم
واعـداد مـا يـذكـر عـزيـز الجـلالـي *** واعـداد حجاج الحـرم وأهل الصوم
واعـداد مـا تـعـدّ الـبـنـوك الـريالي *** واعـداد نـاس بالوطا وبالسما نجوم
واعـداد مـا يسكن جنوب وشمالي *** من الساحل الشرقي إلى ساحل نيوم
منظـوم شعـرك يالـزميل استوالي *** ومنظـوم شعـري جاك بالخط مرسوم
أقـرأ وأطـوّح غـتـرتي مـع عـقالي *** للشعرحشمه ومرسل الشعرمحشوم
اسندت وأنـت بمـرقـب فـوق عالي *** ولاني من الـلي وقـتها يطيح ويقوم
وأنـا افـتخـر بـك يا بـعـيـد المدالي *** لأنك عـزيـز النفس مـا طبعك الـزوم
صـارت جـهـودك للقبـيـلـه ظـلالـي *** يـلـقـى جـوابـه كـل نـاشـد ومنجـوم
يشهد بقـولي لـك زحـول الـرجالي *** فعـلـك يـنومس كـل راوي وشغمـوم
بالعـلم قـدر الـرجـل عـالي وغـالي *** وراعي الجهل ليله تحاشيف وهموم
والـلـه لـو تـطـلـب حـلالـي ومـالي *** لا أبـيعـهـا لأجـلـك ولا هـمـني سـوم
ودنـيـاك تـالـي وقـتـهـا لـلـزوالــي *** وكـلن عـلى ممشاه والـرزق مقسوم
دنـيـا الشقا تعـطي مع المـر حـالي *** ورحيقهـا يـجـي مـع المـر مـطـعـوم
ان أدبرت تصلى على الناس صالي *** وأن اقـبـلـت تـفـنى وللخاتـمـه يـوم
اسـتـرجـلـت نسـوانـهـا بـالـتـوالـي *** وبعـض الرجال اشوفها دقت وشوم
ولا يـنـبـني بـيـٍت بـجـرف هـيالـي *** وطيـر الـرخم ما يشبه الحـر بالحوم
مـا لـلـثـقـال ألا ظـهـور الـجـمـالـي *** ويجيـب درّات الـبحـر راعـي العـوم
تسعة عشـر بيـت عـددهـا متـوالي *** دونتهـا ولانـي عـن الـزيـغ معصوم
أبيات عبدالله بن دهيمش بن عبار مجاراة لأبيات الشاعر عبدالله الموسى :
عادة أبو مشعل إذا اختار ما احتار *** رأيه سديد وما حياته تمضِّـي
يشير ويشاور طويلين الأشبــــــار *** الكل منهم بالمشورة يرضِّــي
وهذا الدليل إنه وثق بابننا البـــــار *** مشرف قضايا للقبيلة مفضِّي
قال الشاعر عبدالله الموسى الخرشاوي هذه القصيدة يثني على زميله
عبدالله بن دهيمش بن عبار : 981
مع نسيم الصبـح مـن بـعـد الأذكـار *** يـطـري عـلـيـنـا كاسبيـن النـفـايـل
يشـوقـنـي أن جـيـتهـم شـبـة الـنـار *** مجلاسهـم مابـيـن شعـر ومـثـايـل
الـفـكـر يـم ديـارهـم راح مـسـيـــار *** عـن البـطيـن الـيـوم مـالـه بـدايـل
اهـل الوفاء والطيب وافين الأشبـار *** وافـعـولـهـم مـعـدلـت كـل مـايــــل
شروى الأديب الشاعر الوافي البـار *** الـلي احتماهـا عن لهيـب القوايل
عبدالـلـه العـبـار مـن ويـن مـا سـار *** حـرٍ ومـرقـابـه بـروس الطـوايـل
مـا يـلتفـت لـلـي بـهـم زيـغ الأفـكـار *** دايـم مـكـانـه بالصـفـوف الأوايـل
ثبّت لمجهوده عـلى الطرس باحـبـار *** يرجـع لهـا مـن يهتـوون النفايـل
من روض شعره جمّع قطوف الأزهار *** واصـدق دلايـل لـلـقبيلـه دلايـل
قال عبدالله بن دهيمش بن عبار هذه القصيدة مجاراة لقصيدة الزميل
الشاعر عبدالله الموسى الخرشاوي : 982
حييـت يا مـرسـل عـذيـات الأشعـار *** من حسن ذاتـه دوم للصّدق قـايـل
يا أبو فهـد مشكور يا مكـرم الجـار *** يسلـم جـنـابـك يا عـريـب السلايـل
يفداك من هو يجحد الجهـد بأنـكـار *** مـا عـنـده ألا النـمنـمـه والنـقـايـل
راعي الحسد في مهجته ولّعت نـار *** غـدالـهـا وسـط الـحـنـايـا شـعـايـل
شـادوا بمجهـودي نقيـيـن الأسـرار *** ولا عن الـلي يجحد عريب مسايل
والهـايـف الـلـي بالـديـاويـن ثـرثـار *** هـرجه سراب الـلاّل والّـلال زايـل
لي عنـد الـلي مثلك حشيمه ومقـدار *** الـلي يعـرفـون العـلـوم الصمـايـل
أقـولـهـا يـا مـسنـدي سـر وأجـهـار *** خاب وخسر من كان للحقد شايـل
لاشـك مـن دوّر ثـلـيـمـه ومـعـيـــار *** الحـمـد للمـولـى حـصيـلـه فشايـل
يتبع