الربيع , والمنــــــاظر الجميله - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

07-03-2009, 03:47 AM

قال هذه القصيده الشاعر عبدالله التشيم الشملاني العنزي ,

يرحمه الله , يتمنى بها قرب الشاعر عبدالله العبار العنزي في

ربيع أحد السنين بمنطقة حايل.

(((نقلتها من ديوان الشاعر عبدالله التشيم رحمه الله )))

ليتك بحايل عندنا يابن عبار ÷÷÷حنا وياكم يابو مشعل جميعي

يالوايلي يامكرم الضيف والجار ÷÷÷لك همتا عليا وساساً رفيعي

جانا ربيعاً يعلم الله فلا صار ÷÷÷ ليتك يابو مشعل تشوف الربيعي

ياماحلا الجلسات مابين الأزهار ÷÷÷برض الربيع هموم قلبك تضيعي

العشب فيها طالع(ن) فوق الأزهار ÷÷÷فيه أم سالم مكرفونه يذيعي

والجو لابارد ولاهو بعد حار ÷÷÷ وقت الربيع وفات وقت الصقيعي

ياما حلا القيله ليا شبّو النار ÷÷÷ وتفرقو ربعك بدوّا وسيعي

احد(ن) يروّي من شخاتير الأمطار÷÷÷ من صافي الغدران ماها نقيعي

وأحد(ن) يجيب من الحطب عدة أغمار÷÷÷ جروم رمث وعرفجه له وليعي

والكبش له من نقوة الغوش جزّار ÷÷÷ قرم يجيب الك الشوايا سريعي

والقهوجي في حمسة البن له كار ÷÷÷ لاهي بحرقانه ولاهي صريعي

مبهّره بالعود والهيل تذكار ÷÷÷ مزعفره ذوقه وشكله فضيعي

وان كان معكم من الصنف صقّار ÷÷÷ ركب معه مشوار مع كل ريعي

الطير لامنه طلع واطلقه طار ÷÷÷ معلمن عن صيدته مايضيعي

حرن مخاليبه تقل وصف شنكار ÷÷÷ كونه على برق الحباري فنيعي

التمشيه ولارض خضراباللاقفار ÷÷÷ تجعل كبير السن يرجع رضيعي

ممشا الربيع وصحبة الناس الأخيار ÷÷÷ أشفق عليها كان وقتك يطيعي

وخل الردي لاتصحبه ميّت النار ÷÷÷ ترى الردي ماينفعك من ضريعي

عليك بالطيّب بحزات الأسفار ÷÷÷ أحرص عليه وخل عنك الكيعي

لاتصحب الانذال لو كان مشوار ÷÷÷عليك بالي لاومرته يطيعي

نفعه لذيذ وخوته تجلى الامرار ÷÷÷بوقت الرخا يمزح وباله وسيعي

اوقت الشدايدفيه شر(ن) للاشرار ÷÷÷ ماينهزع بالضيق حبساً منيعي

خله على جنبك ترى الوقت غدّار ÷÷÷ مثل السلاح بكف قرم(ن) شجيعي

واذا بلاك الله بعمسين الأبصار ÷÷÷ أصبر ترى الشوشات كونه شنيعي

دام الكلام الزين يأتي له أثمار ÷÷÷ خلك حكيم وخل هرجك طبيعي

وان كان خصمك ماقبل منك الاعذار ÷÷÷ولاشاف لك في طيب هرجك صنيعي

خل الدما من جبهت الخصم نثّار ÷÷÷ويحلها جلاب رزق المجيعي

دونت لك في ضرب الامثال الأسطار ÷÷÷ هذا حسب يالقرم مانستطيعي

وانا مثل جلاّب تمره أذا بار ÷÷÷ على الحسا وشلون يقدر يبيعي

هذا أرجو ان تنال أعجابكم أخوكم (ابن شامان) هيبة ملك