هذه القصيدة تحذّر من الظلم والبغي والعدوان - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

07-01-2026, 04:46 PM

قصيدة نصيحة وتحذير عن الظلم والبغي والعدوان

بسم الله الرحمن الرحيم وبه نستعين
قال عبدالله بن دهيمش بن عبار الفدعاني العنزي هذه القصيدة تبلف مائة وسبعون بيتاً وهي من أحدث ما قلت نصيحة عن الظلم والبغي والعدوان والكذب والأفتراء وبها ذكر عدد من الظلمة الذين ورد لهم قصص في القرآن الكريم والأحاديث النبوية الشريفة والتاريخ القديم وانتقم الله منهم بسبب طغيانهم وظلمهم وقد حذّر الله سبحانه وتعالى من الظلم وقال : ( فَتِلْكَ بُيُوتُهُمْ خَاوِيَةً بِمَا ظَلَمُوا إِنَّ فِي ذَلِكَ لآيَةً لِقَوْمٍ يَعْلَمُونَ ) وقال : ( لَا يَنَالُ عَهْدِي الظَّالِمِينَ ) وحرّم الله الظلّم وتوعّد فاعله بالعقاب وفي الحديث القدسي قال : ( يا عبادي إني حرمت الظلم على نفسي، وجعلته بينكم محرماً فلا تظالموا ) كما حذّر الرسول صلّى الله عليه وسلّم من الظلم فقال : ( اتقوا الظلم، فإن الظلم ظلمات يوم القيامة) وجاء في الأثر القول: دار الظلامين تصبح خراب وفي هذا الوقت كثر في وسائل التواصل الظلم والأفتراء والكذب والسب والطعن بالأنساب والشتم والقدح وأثارة الفتن والأتهامات الباطلة دون خوف من الله ودون وجه حق ودون رادع وما فعله المفترين بدافع الحقد والحسد والغيرة ومحاولة تشويه سمعت كل من قام بعمل جليل والتطاول على الذي لم يصل إلى مستواه لطلب الشهرة وحب جمع المال من خلال السب والقدح لكسب المتابعين للقنوات الشاذة نعوذ بالله من الظلم والظالمين وحسبنا الله ونعم الوكيل وقلت :
مـبـداي فـي خالـق جـميـع البـريـات *** مجـري نظام الكون مـن معجزاته
رب الـمـلأ رفــّاع سـبـع السمـاوات *** وأرضـه بسطهـا واحتـوت كايناته
عـلاّم بـأسـرار الـعـبــاد الـخـفـيـات *** ويعلـم كـلام النـاس مـع مفـرداتـه
جـل الولي فـرّاض خمس الصلوات *** والحج مع صوم رمضان وزكاتـه
فـي رحمتـه غـاث الديـار المحيلات *** مـن هاطـلٍ تسقي الثـرى هاشلاته
تـرتـع بريضـانـه عـشايـر وخلـفات *** بأرض القفر والريف ترغد رعاته
سبحـان سجـار البـحـار المحيطـات *** من أجـل ما تغشى الفيافي صراته
لـه سـبـحـت كـل الـخـلايـق بـلـغـات *** حـتّى الـوحـش والطيـر بتغـرداتـه
انزل عـلى الهادي مـن الوحي آيات *** والصادق المصدوق طبّق وصاته
خلاقـنـا لـه نبتهـل بأعـلا الأصـوات *** عـظيـم باسمـاه العـظـام وصـفاتـه
أحمـد ولـي الكون فـي كـل الأوقـات *** والشكـر للمولـى عـلى مكـرمـاتـه
حكامنـا آل سعـود روس الزعامات *** هـم قـمّـة الشعـب النبـيـل وسراتـه
صانـوا بلـدهـم بالسيوف الرهيفات *** سور الجزيرة والوطن هم حمـاتـه
سلمان ومحمد على الشعب سادات *** من طال بوعه يقصرون اخطواته
نسـل الـزعيـم الـلي فعاله عظيمات *** عبـدالعزيـز الليـث يقـهـر اعـداتـه
نـال الفخـر والمجد رغم الصعوبات *** وحـد بـلاده وأنـتـهـت مـشـكـلاتـه
صـقـر الجـزيـره بالسنين العسيرت *** قـات الشعـوب الجـايعـه بصدقـاتـه
واليا حمل سيفه بهوسه وعرضات *** عوجا ابن مقرن عزوته وانخواته
يـوم الوغى فـوق المهـار الأصيلات *** سرج الصويتي يعتلي في صهاته
عـوايـده نـطـح السـبـايـا المغـيـرات *** كـم فـارسٍ صنـديـد حطـم غـزاتـه
عـلى النضى يطوي بعيـد المسافات *** ويسـرج نـهـار المطّـرد صافنـاتـه
يوم الزمن عصره حرايب وصولات *** كلن عريـب الخيـل عسكر حذاتـه
العصر الأول كـان حـرب ونزاعـات *** يـوم الرماح الغـوج تسهج قطاتـه
بالماضي الـلي فات حرب وقوامات *** كـم فـارسٍ خـيـال يـزعـق حـداتـه
عصرٍ مضى واليوم أمـن وسلامات *** كلـن عقـل مـا عـاد يجـدع هواتـه
من فضل رب البيـت ننعـم بخيـرات *** والخيـر زادت نعـمتـه من رهـاتـه
الـكـل يـرفـل بـالـهـنـا والـمـسـرات *** وغرس الوطن تضاعفت منتجاتـه
بـيـن القبـايـل صـار ود وصداقـات *** والتـم شمل الشعب عقـب افتخاتـه
عشنا بوطن ما ضل به عنصريات *** بالعـدل تقـضي بالشريعـه قضاتـه
واللي تجاوز واخلف العرف مرّات *** ولا فـاد فـيـه النـصـح ومعـاتبـاتـه
ملزوم يرفـع عـن اعمالـه بلاغـات *** ضـده وحـد السيـف يقـعـد صغـاتـه
عقوبة الـلي عال سجن وغرامات *** حـتى يفيـق ويـنـتـيـه مـن سـبـاتـه
عـنـدي نصيحة والنصايح كثيرات *** منـظـوم شعـري فـي معاني بيـاتـه
تسمّعوا يا أهـل القلـوب الفطينـات *** اصـغـوا لقـولي وأنظـروا بالتفاتـه
تجـري بكـم سمـر الليالي سريعات *** وقـت الـزمـن دايـم سريـعٍٍٍٍٍ فـواتـه
الـعـبـد لـو عـمّـر سنـيـنٍ طـويـلات *** لابـد مـن سـاعـه ينـوحـن خـواتـه
ياسعـد من يتـرك طريـق الضلالات *** قـبـل يــزول ويـنـدبـونــه نـعـاتــه
تـوبوا تـرى كلن يحاسب اليـا مات *** تـوزن اعمالـه حيـن تعـلـن وفاتـه
عـن قـول مظمونـه يسبب خلافات *** كـلـن يـشـد ربــاط مـقـول لـهـاتــه
واللي بضميره ران بـه قلب نيـات *** مـا تـاب حـتى لـو تشيب شعـراتـه
مـا يقـلـع البـاغي عـن العنجـهيـات *** حـتى مفيض الشـط تنشف فـراتـه
من اعترض للنـاس يدخـل بنشبات *** والـلي وقـع بالبيـر تصعب نجاتـه
ومن لا يـدل الـدرب ضاع بمتاهات *** والهـرج بالبـاطل سمـاج وبهـاتـه
لا خــيـر بـالـمـغـتـاب نـقّـال نـمـات *** يسرق من السر الخفي في قتاتـه
في مهنته ياخـذ من الوقت ساعات *** شغـلـه بـنـقـل الـهـرج وده هـاتـه
والسامج الـلي كـل هرجـه تفاهـات *** عن الشتـم والسـب يلـزم اسكاتـه
لا زال يـكتـب بالـوسـايـل مـقـالات *** حـيـث أخـو مـرّه زاد من معظلاته
وش يستفيد الـلي يسـوي بروفـات *** مقـاطـعـه بالصـوت ومـراسـلاتـه
بالهـايـف الكـذاب تظهـر عـلامـات *** يعـرف ويكشف من خلال احركاته
الـنـاس مـا تـقـبـل كـلام الخـرافـات *** مـهـمـا هـذر مـا صـدّقـوا تـرهـاتـه
والـمـفـتـن الـغـدار يـزرع حـزازات *** شتم الخلايق من خصايص سماته
مـا يـنـفـع المذمـوم بـث الأشاعـات *** يـدور بشخـوص الحـمايـل شماتـه
ما ظني يـدوّر عـلى النـاس غـرّات *** الا السـفـيـه الـلي بطـبـعـه هـيـاتـه
هافـي بخـت معتـاد يـبـدع دعايـات *** بـعـلـوم رهــمـهـا مـن مـخـيـلاتــه
يسـرد كـلام بـتـكـتـكـه والقـروبـات *** ويلفـظ هـذاريـم الخـطأ فـي قنـاتـه
متخـفـي وبالكـذب يـنـشـر بـيـانـات *** دبـلاج زيـفـه واضـحـه فـبـركـاتـه
دايـم يـثـرثـر لـه لجـاجـه وصـجّـات *** مغبـون وعـلـوم الفخـر مزعجاته
اعرض عن الخايب كلامه لواصات *** مـا أجـاري الـمثـبـور بـمهاتـراتـه
والـلـي تــدنّـى لـلـعــلـوم الــرديـات *** مـا حاش عـلم الطايله مـن رداتـه
يقـدح وقصـده بـس جـمع الـريـالات *** يـدفـع لـه المبلـغ مـن متـابعـاتـه
بالـزور والتضـليـل يفـتـح حسـابـات *** غـروه عـوجان السوالـف رواتـه
ما يرفـع الطامـن شباشر وشوشات *** يسقط وتنـزل للحضيض درجاتـه
الـلي يصـنّـف بالسـوالـف حكـايـات *** مـع البـغي والظـلـم فـيـه انـفـلاتـه
مالـه عـلى العـالـم مطـالـب وقـالات *** يدهـر ويظـلم مـن غـواه وغبـاتـه
والـلي تـعـنـا مـن بـعـيـد المسافـات *** يقصـد ضنـا عـنـاز راس معنـاتـه
غـزاي صـايـل مـا مـرامـه زيــارات *** وأصبح على العزوة يكرر حجاته
بـالـزور والتـزويـر سـوى عـلاقـات *** نـال الهدف والقصد مع مشتهاته
زوّر وحـط بـنـسـب عـنــاز شـكـات *** يـلـوك هـرج ولا فـهـمـنـا لـغـاتــه
ياخـذ لقـاء عـن النسـب بالمحطات *** وحـوك المكـايـد ضـدنـا مشغـلاتـه
مالوم لـو صابه من الحسد لوعات *** بالبحـث مـا خـليـت كـود الحتـاتـه
أبي انشد المذكور بعض السوالات *** وش هو هدف قصده من مقابلاته
مـتى عـرف وايـل وعـنـاز بالـذات *** عـلم النسب ماهـو من تخصصاته
أنساب وهـب والجلاس معروفـات *** مـا كـان معـهـم منـزلـه ورحـلاتـه
وش عـرفـه بعبيـد هـم والعمارات *** ومتـى ضنـا عليان عـرف سلماته
والـلي درقهم في مخادع وحيـلات *** مـا حـلـلـوا مـعـنـاه وتـخـرصـاتـه
يـالـلـي أديـتـم لـلـمـزور شـهـادات *** خـلـوه يـخـبـركـم عـن مـولـفـاتــه
ماذكر له في كتب الأنساب طبعات *** والـلي بهـا مختص مـا هـو لقاتـه
مـا نقـبـل التصنيـف والخـزعبـلات *** والـلي خبـص مـا همنـا خربطاتـه
يـلـزم لمـن حـرّف نسبنـا نـقـاشـات *** مـا واجـب التلـطـيـف بمعامـلاتـه
مـن مصـدر التاريخ طالعـت ميّـات *** الشـرح والتـفـصـيـل بمـجـلـداتـه
وأخـذت مـن شيّـاب وايـل روايات *** جـمـلـة نسـب عـنـاز وتـفـرعـاتـه
بحثت خمس عقود وأخذت جولات *** ومناطـق العـزوة وصلـت لجهاتـه
واصدرت للويلان عشرة اصدارات *** احسـابهـم وانـسابـهـم محـتـواتـه
لي يشهدون أهـل الهداف البعيدات *** والـلي تـنكـر تـفـشـل مخطـطـاتـه
والـلي كتبتـه مـا وجـد فيـه غلطات *** هـو مـبتـدا المجـد التليـد ونواتـه
والـلي يـوجـه لـلعـفـيـف اتـهـامـات *** عـنـاز تـشهـد فـي نـقـاه وبـراتـه
مسلـم وبشـر فـي جميـع المكانات *** عـددهـم اكـثـر مـن قـبـايـل زنـاتـه
أنـسابـهـم مـن سـجـلـه بالسجـلات *** ومـن فـصّـل الـويـلان بمشجراتـه
مـن مـارثـة عـنـاز ماهـم عصابات *** تـاريخهـم كتـب النسـب ضابطاتـه
من شـاد قصره بالصخور القويات *** مـا تـنخـر عـبـر الليـالـي صـفـاتـه
والقصر الـلي مالـه قواعد وصبّات *** ينهـار لـو هـي غـالـيـه مشتـراتـه
افخـر بوايـل فـي جـميـع المجـالات *** والـلي عـبـث لابـد مـن مجادلاتـه
علـم النسب ماهـو أغـاني وشيلات *** مـصـادر الأنـسـاب فـي مكـتبـاتـه
حـنـا عنـزة والـلي انجبنـا عنزيات *** وعــنـاز وايــل جــدنــا مـنـجـاتــه
مسلـم وبشـر مـا يـديهـم قصيـرات *** ذربـة ربـيـعــه لا مـن مـخـلـفـاتـه
والـلي يـقـول أنسـابـنـا مستعـارات *** مـا تسكت العـزوة عـلى هربداتـه
سولـف ومنطوقـه معايـب وهزبـات *** والـلي خـدعهـم غـرهـم كهكهاتـه
صـنـف ضـنـا عـنـاز سـتـة كيـانـات *** وجـنـا عـلى الـويـلان بمصنفـاتـه
قـال النسب مـالـه روابـط ووصلات *** حـبـل القبـيلـه كـيـف قـطّع ابتـاتـه
جـد عنـزه سـبـه لمقـصـد وغـايـات *** مـا أحد عمل مثله وسوى سواته
جـد القبـيلـه فـي صـريـح العبـارات *** صـرّح بنفيـه واعجبـوا بكـلمـاتـه
مـا هـو لقـيـط ولا عـليـه اختلافـات *** ورث الذيـن المجـد نطـوا عـلاتـه
شـيـاب عـنـزة حـافـظيـن الأمـانـات *** وكـل الـجـدود مـدونـه سلسـلاتـه
لاشـك سـووا لـه كـرامـه وحـفـلات *** والكـل فـي مـدحـه يشيل اغنياتـه
واصبـح يكـرّم بالخـراف السمينـات *** دايــم تـقـدّم بـالـصـيـانـي شـواتـه
قلـت اكشفوا عن سيرتـه والملفات *** غير الطعن والسب وش منجزاته
مـالـه اعـمـال ألا مسـاوي وسـيّـات *** عـاث بنسبنا وكيـف ننسى جناتـه
يحضر صكوك مـزوره مالها اثبـات *** والـلي خـدعهـم بالـغـوا بعطيـاتـه
معـه عـلى التـزويـز زمـره وشّـلات *** محتـال والـلي صدقـه مـن عناتـه
تمجيـد مـن سـب الحمايـل سخافات *** دخـان ينفـث مـن سجـايـر بـكـاتـه
يـلـزم لمـن يطعـن بالأنسـاب كيّـات *** عـن ظـلـمـه المشهـود وتـعـديـاتـه
الـكـي لـلـعـي الـمـعـانـد عــلاجـات *** يـقـلـع عـن اجـرامـه وقـلّـت تقاتـه
والمنهـرف يـدخـل بعنبـر مصحـات *** ويكتـب لـه التـقـريـر بمـلاحظـاتـه
من يرغـب الشهـرة يسوي جمالات *** الطـيـب والعـفـه مـن مـواصفـاتـه
عـلـم الفخـر لأهـل القلـوب التقيـات *** الـلي المعـالي يصعـدون شعـفـاتـه
الطـيـب يكسـب بالفـعـال الشريـفـات *** يـنـالـه الـلـي قـام فــي واجـبـاتــه
الطيـب بأعـمـال الصخى والمـروات *** وصنع الجميـل وعفته هـي حلاته
الصـادق الـوافـي خصالـه حميـدات *** فعـل المـراجـل هـي منـاه وشفـاتـه
شهم وكريم وله مع الناس جاهـات *** والضيـف لا جـالـه فـرح بـه وقاتـه
يصيـر لـه تـقـديـر عـنـد الجماعـات *** مـع عـزوتـه مـا حـاد عن ملزماتـه
تـفـخـر بـعـلـمـه لابـتـه والـقـرابـات *** وكـل الرجـال تحشـمـه مـن غـلاتـه
والظـلـم ظـلـمـا حـالـكـه بالظـلـمـات *** والـظـالـم الـجـاهـل تـزيـد نـعـراتـه
نـهـايـة الظـالـم حسايـف وحسـرات *** يـنـدم اليـا ثـالـث رجـولـه عصاتـه
لابـد يشـعـر بـالأسـف والحسـافـات *** ويـجـر مـن حـدب الظلـوع نهتاتـه
يحـمـل ثـقيـلات الذنـوب الكـثيـرات *** وينفق على المظلوم جـل احسناته
الـظـلـم يـهــد الـبــروج الـرفـيـعـات *** كـم قصـر ظـالـم حطمـت واجهاتـه
والظالمين مـن العصـور القـديمـات *** ذكــرهــم الـتــاريــخ بــمـذكـراتــه
عمليق ملك طسم بالعصر اللي فـات *** طـغـى وأذل جـديـس بـمحـرمـاتـه
من شين فعله صار للبيض صيحات *** مصقول الأسـود شلقه فـي شباتـه
وفرعون من رب المـلأ جـاه لعنـات *** مـن لعـنـة المولى حصل لـه كفاتـه
حاول يبي خوض البحـور الغميقات *** وعلى الرصيف الموج طّوح رفاته
وهـامـان بـأمـر سيـده زال هـامـات *** سـار بهـدف فـرعـون وموامراتـه
وآخـر مصيـره مـع حليـفـه بـلجـات *** مـات بغـرق وعقوبـة الـرب جاتـه
ونمـرود جالـه فـي حياتـه عقوبـات *** اصغـر ذبـابـه هـي سبايـب مماتـه
صابه صداع ويسهـر الليل ما بـات *** والخادم الممـلـوك بالـنـعـل شـاتـه
وقـارون زادت ثـروتـه بالجنيهـات *** وطـغى وتجبـر وابتهـج في غناتـه
خسـف بقصره بالحفور السحيقات *** وذهـب زهـر عمره وزالت طراتـه
وجالـوت يـرفـل بالهـنـا والمـلـذات *** ويسمر مـع البهلول يسمع انكاتـه
عقب الطغى لاعه من البين لوعات *** ما عـاد يسحب بالمجالس عـباتـه
والسامـري جـت قصتـه بالروايـات *** بـالـبــر تـايـه مـا تـعـيّـن مـبـاتــه
يـهـوم بـفـجـوج الـديـار الـخـلـيـات *** ضايع ولا يعرف المسا من غداته
والـلي لصديقه قال يا صاح هيهات *** بستـان غـرسي ما يحصرم نباتـه
صابـه كبـر حيثـه تفاخـر بغـرسات *** وخوت عـرايش غرستـه ونخلاته
وكـليـب حـمـاي الـديـار الوسيعـات *** تـعـقـبـه جـسـاس يـنــوي ذكـاتــه
جـاه بضريـه في جنوب المشيشات *** وخـلاه ملـقى في صحـاري فلاتـه
وكسـرا الأعـاجـم هـام بالمنذريـات *** حـتـّم عـلى النعمـان يبـغي بـنـاتـه
غـزا بكـر ثم أودعوا جيشه اشتات *** خـمسيـن عـام ولا تـلـيّـم شـتـاتـه
ونيرون الـلي سبب مآسي وويلات *** رومـانـيـا لـجــت مـن تـصـرّفـاتـه
عـاف القصور الشامخـه والبنايـات *** ثـم انـتحـر بالسـم وانـهى حـيـاتـه
والـلي غـزا الكعبه بجيش ومعـدات *** الطيـر فـوقـه يرجمـه فـي حصاتـه
اقفت فيوله مع هـاك الريع عجلات *** عـاد مخـذول ولا حصـل لـه مناتـه
ومنذر أبن ماء السماء فيه شارات *** أنـكـر جـدوده بـالـبـشـر وأمـهـاتـه
دفن صديقه حـي مـن خمـر كاسات *** ونـدم عقـب ما فاق من مسكراتـه
وأبـو لهـب حصّل مـن الـرّب تبّـات *** حـيـثـه تعـرّض للنـبي فـي صلاتـه
كفـر وصابـه عـل بأسبـاب دعـوات *** مـات وجحيـم النـار هـي منتهـاتـه
والـظـالـم الحـجـاج قـام بـمـهـمـات *** ابـن الـزبـيـر ارداه وايــتـم فـتـاتـه
بعده بطش بالشيخ من دون ثارات *** العالـم ابـن جبيـر ضمن اضحياتـه
والقـرمطي فـي قـوتـه شن غـارات *** قضى عـلى الـلي صادفه من تلاته
وعـثابـهـم عـلي العـيـونـي بـقـوات *** خيـالـت القـيسي وجـملـت مشاتـه
وزيّـاد أبـن أبـيـه ســوى جـنـايــات *** مـا طـاع أبـن حسّـان بـتـوسلاتـه
مسلـم ولا لـفـوه بـقـمـاش خـامـات *** وهـو حـي طشّه في أواسط هباته
هـذي نتايج ظـلم والـظـلـم ظـلمـات *** والـلـه حسيب الـعبـد في منكراتـه
ومـن يظلـم المخلـوق تأتيـه نكبـات *** كـل الخـلايـق يـجـهرون بـشنـاتـه
يـبـلاه ربـه بالمـصـايـب والأزمـات *** ولا تنتهي طـول الـزمن معضلاتـه
والـلي ظلـم لـه عـنـد ربـه كرامات *** يـردع حليـف الظلـم عـن مخزياتـه
مـن انظلـم يـسجـد لمـولاه ركـعـات *** مظـلـوم والمظـلـوم تـقبـل دعـاتـه
يطلب عـسى الظالم تدوسه تريلات *** سكسٍ محـمّـل يـدعسـه بكـفـراتـه
وآخـر ختـام القاف أزكـى التحيـات *** مـع الـسـلام ورحـمـتـه وبـركـاتـه
وصلّوا عدد قطر المزون الغزيرات *** عـلـى الـذي فـي ديـن ربّـه ثبـاتـه