اخذت مابين المحبين جوله=قست الزمان وشفت مافيه حيله
ان قلت قولاً قبلك اللي يقوله=وان طبت قبلك مرقبين الطويله
وان جبت رايً صعباتن حلوله=لقيت من قبلك يحله بليله
وان قلت انا غطيت على الحموله=شداد الخطأ حطيت فوقه صميله
الناس فيها فرق والهرج سوله=هذا يجيب وذاك يطلع بديله
الطيب ماهو حاصلاً بالسهوله=صعباً على من كان ينسى جميلة
ودك على رايك تحقق وصوله=لو كان صعباً يالبناخي حصيله
برق وفرق من مشوا وجهدوله=كلاً يبي من فوق متنه يشيله
ياسعد من حقق ويضمن حصوله=لو مايحصل ياغير ذروة قليله
الفعل فعل اللي عباده سعوله=يجيبها علام سر المخيله
الله خلق خلقه وكلف رسوله=ينشر ويقراء كل حرفاً يجيله
العنبر الاصلي ربع نص توله=يكفيك طيبة عن بواقي حثيله
الرجل يعرف من مبادي فعوله=والزرع حبه مايماثل قصيله
واللي يبي روز الجبل مايطوله=لو العواصف مرته ماتزيله
ابمدح اللي بالفعول شهدوا له=عبدالله العبار مزبن دخيله
الصيرمي يفوز في كل جوله=مثل الصويتي بس تسمع صهيله
تكفون ياهل الغانمه صفقوله=اللي تبين دون دم الفصيله
اللي يجهز دون ربعه خيوله=بمهنداً بالكف يلمع صقيله
انشهد انه عيلماً شرق دوله=مايقدر السباح يقرب مسيله
يعيش من كافح كفاح البطوله=تعب على التاريخ ساس القبيله
نبراس راس ماتجاهل حلوله=بين تواريخ الرجال الاصيله
دايم بوجه الناس تاقف ذلوله=من خوف لاتظلم رجال مهيله
يكرم سبال اللي لداره لفوله=شهم عزيز النفس ماهي بخيله
والعلم نبراس راسه ينوله=والنفس ماتخضع ولاهي ذليله
ماقيل من الصعبات نفسه ملوله=عاش المعلم للنفوس الضليله