قصيدة اسندها الى والدي عبدالله بن عبار العنزي - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

12-11-2012, 08:22 PM

جبت اللذي غيرك لها ما حـداً جـاب *** وبـينت حـاجـه مثـلهـا مـابعـد جيـب
كـتبـت بالشـعـر وتـواريـخ الانـساب *** وصـارت كتابـاتـك عـلـيها مطـاليـب
ودقـيـت بفعـول الثـقيـلات الاطـنـاب *** وبنيـت لـك بـيتـا تـعـدا عـن العـيـب
ووفـقت مابـيـن الاجانـب والاقـراب *** كلن شهد لـك في زمانك على الطيب
امـا حسـودك يسكـت ويـاكـل تـراب *** كـانـه تـكلـم او كـتـب بـك مـكـاتـيـب
يبحـث عـن الشهـره منافـق وكـّذاب *** يبغى لعقلـه تـالي الـوقـت تصـويـب
فـعـلـه يـشيـن ولا تـجـمـل ولا طـاب *** مسـوي انـه عـنـدنـا صايـرن ذيـب
مـايـدري ان الـليـث لا كشـر انـيـاب *** بيشوف والـلـه في زمـانـه تعاجيب
يـخـيـّب ظـنـونـه اذا الـظـن مـاخـاب *** ويهـذب الـلي عندهـم نقص تهذيـب
وان كان والله صاحب الذنب مـاتـاب *** نحـرق يديهـم بيـن حـمـر اللواهيب
ندعس على الاشناب ونقص الارقاب *** مـاعـنـدنـا رحـمـه ولا فـيـه تـأنيـب
وقت الشتا يرجع إلـى جحـره الـداب *** وبالصيف يلدغ مثـل سود المحاريب
هذا اللذي يرجع بعـد طـولـة غـيـاب *** ينقـص راسه قـبـل يطلع بـه الشيب
دايـم ورى ظهـور الرجاجيل يغـتـاب *** عـزالـلـه انـه ماكسب من مكاسيب
وعـلاقـتـك فـيـهـم مـّدرس وطـّـلاب *** يبغـون مـن حضرتـك عـلم وتدريـب
راسك بوقفاتك عـلى المرجله شـاب *** ولا طـرا لـك تـجـمـع المـال بالجيـب
عـزالـلـه انك من طـويليـن الاشنـاب *** ولابـد مـاتخـطي ولابـد مـاتـصـيـب
والـلي أخطأ لابـد فـي يـوم مـاصـاب *** كـل شي تلقى لـه مع الوقت تخريب
مادام صرت لعـزوتك ستـر وحجـاب *** ورتـبـت مـايحتـاج لـلـربـع تـرتيـب
كـتـبـت تـاريـخ وشعـر داخـل كـتـاب *** محشوم والله عن جميع العـذاريـب
كـل من قـرا لك يبدي بكتبك اعجـاب *** ولا لحـق فـي مـاذكـر شك او ريـب
عـلـمتـني عـلـمـك وانـا تـوني شـاب *** احيـان بالترغـيب واحيـان تـرهيـب
يـابـوي والـلـه مـاتـوفـيـك الالـقــاب *** فعـلـك نـزيـه ولا حصل بـه معـاييب
ماجبت في صغري لنـا كثـر الالعـاب *** دايـم توجهنـا عـلى الجـود والطيـب
علمتني ماقفل عـلى المجلس الـبـاب *** ووشلون اخلي من ضيوفـي معازيب
ميلـت عـقـالي ماهييـب ميلـة الكـاب *** والضيـف لامـنـه لـفـا لـه تـراحيب
خـلـيـتـنـا نـبـذل ولانـحسـب حـسـاب *** مـادام نـعـرف وش عـلينا مواجيب
افـعـالـنـا دايـم عـلـى راس مـرقـــاب *** والطيـب فعـلـه في جميع الاساليب