اول بدايه سلام وفي سياق السلام=الحمد وشكر لله العزيز الحكيم
حقن على كل من صلى لربه وصام=مايرجي آلى رضا الله بالنهار العظيم
ابي ابتدي به واختتم به ختام=حيثه تحية هل التقوى بدار النعيم
مقرون بأزكاء تحيته واجلى الأحترام=بلسان صادق سليم ومن ضميرآ سليم
للملتقى الولدعي حق على شكل عام=حق على مثلنا اجهوده تديم
للكل غايه وغايه مقصدي والمرام=مايرضي المستمع مقصدي ومقصد جسيم
وليا رضا عني الجمهور فخر ووسام=اعطيتهم فوق مايعطي الحميم الحميم
عشره ملايين تصغي اسموعها للكلام=واللسن كلها تذن علي وتقيم
والي وقف ماقفي لو يختلف مايلام=مابين ناقد فهيم ولوم المليم
لاكن عسى الله ان يهدينا للجواب التمام=حتى نتثبت على سلاطه المستقيم
ابي اجتهد واستعين الله واشد الحزام=واحط بصمه بري من فوق بصمه فهيم
لو ان بصمه على بصمه تسمى حرام=جميع ما يلحق الذمه بذمه ذميم
اعز نفسي ولا اوقف موقف الإتهام=من حيث مدخل حشيم وحيث ماخرج حشيم
والواجب الي حقوقه مثل فرض الصيام=ان كان ما قف وقفت وان كان غرم غريم
ميقاف ما ياقفه غيري عليه إلزام=في كل ماقف رجال وللعظايم عظيم
مثلت ربعي بني وائل بنجد وتهام=مع حرب ومطير وعتيبه و معهم سليم
مواقف الوائليه مستلمها انا استلام=وقفت فيها ولد فسقان ساطي غشيم
حوشي بها غطرسه متجاوز الإنتظام=اصول واجول واطفي الجحيم بجحيم
لو ماهي كذا ما جت على مايرام =حتى عرفت اتعامل مع غشيم وفهيم
في حقها ما ذخرت من المروه غرام=تسعه وثلاثين من عمري عليها زعيم
و اليوم كلآ يبي يقتادها با لخطام=و انا موثق اشدادي فوقها من قديم
مطولي اقدر على مسك القلم بالبهام=تبقى على عهدتي بها من دون سين وجيم
إلى اذا مت للي يدرك الإحتكام=و من لا يصد العواصف طار فيه النسيم
مايوصف الياسمين بيلسان البشام=وتفرق صلاه المسافر عن صلاه المقيم
واليوم جاني مع الشعار مبسم وزام=اقوم بالزام وامري لسميع العليم
لشعر قمه وله قيمه ويمه وإمام=ماروث عند العرب له منزله بالصميم
يجسد احداث مقبلات الأعوام=لو مات راعيه يبقى حي بعده مقيم
عوامل الجيل ساقت هاجسي للأمام=ومخايل الشعر في صدري ترازم رزيم
هلت مطرها على بحر القوافي وزام=تجاوز المد والامواج تبرم بريم
ياسرع ماشكلآ بالضمير ازدحام=اضعفهن الي تعادل قنبله هورشيم
مدري وش اخذ وش اترك كلبوها ازمام=احترت واحترت حجم المستواء سيم سيم
اخذت منها الموالي والهمام الهمام=الوقت ماهو على ما اريد والجو غيم
قسمي ليا قسمو لحم الجزور السلام=شاعر ولي مع عزوتي موقف مستديم
ميقافهم فرض عين وكل مافيه هام=مايترك الموقف المفروض غير اللأيم
شاعر قبيله ولاكني شاعر غرام=احس بالنقص لو سميت واصف حريم
لاوالله اوصف هل الملحا نهار الزحام=الي نهار القاء المكروه عوق الخصيم
ان كان غار وطمع والى مغار انتقام=ماحسبو لتوالي بالنهار العقيم
بقياده اخوان بقشه للمعادي سقام=حمايه الدار واهل الدار والمستضيم
وردو حياض المنايا مثل ورد الحيام=خزامه الفيل عز الملتجي واليتيم
والى اختلط عج خيل بخيل والحظ قام=في ساعه حاضر فيها بليس الرجيم
الي بروس القناء وحد الحسام=كم نزلو من سروج الخيل فارس عديم
تشوف روس النشاما مثل حب الثمام=وتشوف جضع الجنايز مثل جضع الهشيم
ربعي هل الطيبات وجارهم مايضام=ولأدعه من يعاديهم جريح سقيم
تفضل الموت ماترضا الإنهزام=والنفس ترخص ليا لزم الزيم الزيم
ارضآ علي عاش فيها طول عمره واقام=ملكآ لنا ماطمع فيها ضفير و تميم
ذريته دونها تروي خشوم السهام=في ضل ربعي هل الملحا ثراها حشيم
لو طالها عقب حام وعقب سام=ماشفت منا على ضهر البسيطه فطين
لاكن لنا هرجه تكسر صليب العظام=حامينها من جبل عطوه لغربي غنيم
ربعي هل الموقف المشهود شرقآ وشام=شاعر ومن واجب الشاعر لربعه كليم
ابغى اتغزل بهم حب ووفاء وانسجام=ووصف ابطالهم وفعولهم بالغريم
ان كان في حب مزبنت المجلا هيام=انشهد اني بكل اهيامهم مستهيم
واليوم بأمن وامان وكل عينآ تنام=في مافرض ربي ورحمه رحيم
في حكم حكام عدل ونور يجلا الضلام=وبخير مايجحده غير اللائيم الأثيم
ذكرت نبذه عن احداث الزمان القدام=حيه مع الحي منها لو اهلها رميم
واخر كلامآ نقوله قبل مسك الختام=صلوا على المصطفى الهادي لدينآ قويم