يالله ياللـي كـل حــيٍ يسـآلـك=يا واحـدٍ كـلٍ يخافـك ويرجيـك
يا قاسم انـوال المـلا مـن نوالـك=وقبضة نواصي الخلق كله باياديـك
إتفك عقد احبـال عبـدٍ شكـى لـك=مستبـرمٍ حبلـه بعقـد الشرابـيـك
بعيدٍ عن الداني دعـا والتجـا لـك=يا من هو المالـك وحنـا المماليـك
ارمـي بحالاتـي لذيـك التهـالـك=تفرج عن القلب الذي فيـه تشكيـك
ما به من الحرفـات الا الدعـا لـك=والحيل قصـر والأيـادي مفاليـك
فيلا اقتضى عسري بحسن الرضا لك=فاجعل لنا صبرٍ على العسر يرضيك
سايلت داعي البيـن مالـي ومالـك=من كل صـوبٍ كاثـراتٍ دعاويـك
قال إن هذا الأمـر لا لـي ولا لـك=أمرٍ قضـاه آلهـك اللـي مسويـك
لا تعترض أم القـدر فـي جدالـك=ولا تحسب إن اللي مصيبك بيخطيك
قسمة احظوظ الخلق قسم السوا لـك=ومكتوب حظك يالفتى في نواصيـك
جف القلم باللوح فيمـا اقتضـى لـك=إمـا سعيـد الحـظ وإلا مشقـيـك
وأنا اشهد أن اللي كتب لـك ينالـك=يالعبد ربك باسـم حظـك يناديـك
كـلٍّ بتقديـر الولـي طـاب فالـك=اصبر علـى مـا قـدر الله يآتيـك
ولا تلوم النفـس فيمـا جـرى لـك=تبور غالـي سلعتـك بيـن أياديـك
ويلومك اللي مـادرى عـن حوالـك=ولا درى ويش الدهر محـدثٍ فيـك
محدٍ درى ويش الذي صـاب حالـك=وما جرى لك مـع صديـقٍ معاديـك
بمكايـده يَبلـنّ الأيــام حـالـك=وعن المـوارد قاصـراتٍ مداليـك
ما شام بك من ديرتك عـن عيالـك=وما عرضك درب الخطر والتهاليك
وين انت والأقـدار يـوم ارتحالـك=في وسط غباتٍ بها المـوج عاليـك
مـرٍ يميـن ومـرةٍ مـن شمالـك=والعرب من التريك تاخـذ بياديـك
إن قيل رد البوش واربـط احبالـك=ضاقت على احرارهـا والمماليـك
فاعزم وشـم ولا تضيـق المسالـك=ولا تسـوي يافتـى شومـت الديـك
وافهم نبا ما أقول لك طـاب فالـك=سعود الفتى بالحظ من غير تشكيـك
وإن جاد حظك باع لك واشترى لـك=فوايده مـن كـل الأبـواب تاتيـك
وإن بـار بـك دلّى يهـزل حلالـك=وباردى الثمن لزماً يبيعـك ويشريـك
وإن جاد حظك بالمجالـس حكى لـك=وصدق مقالك وكـلٍ يحاكيـك
وإن بآر بـك دلّى يكـذب مقـالـك=وتصير كذبات المـلا كلهـن فيـك
وإن جاد حظك بالمنـازل بنـا لـك=بيتٍ رفيعٍ شامـخ الطـول يذريـك
وإن بار بك خـلاك تنقـل اعيالـك=مـن دار إلـى دار ودارٍ اتجلـيـك
وإن جاد حظك كل شيءٍ صفى لـك=وقرايـب الخـلان كلـن يصافيـك
وان بار بك بيّن جميـع العـدى لـك=وصار المحب أعدى عَـدوٍ يعاديـك
وإن جاد حظك كـل شـيءٍ عنى لـك=ويباشرك عنـد المـوده ويعطيـك
وإن بار بك ضليـت محـدٍ بحالـك=ولا هو بفنجـالٍ مـن البـن يسقـيـك
وإن جاد حظك قام واطلـق اعقالـك=ومشى معك في كـل دربٍ يباريـك
وإن بار بك جود متيـن الثنـا لـك=وعن كل دربٍ لك يعقلـك ويثنيـك
وإن جاد حظك كل شيءٍ زهـى لـك=حليـاه بـرواح المجالـس تزهيـك
وإن بار بك شيـن حلايـا خيالـك=إليا اقبلت تغضى كل عينٍ تراعيـك
وإن جاد حظك كل شيءٍ أضـا لـك=يشبـه فـم القنديـل نـوره يقديـك
وإن بار بك عزي لحالـي وحالـك=ارذل رذيـلٍ هافـي الجـد يوذيـك
يالعبد لـو كثـرت حـث ارتحالـك=وعرضتها درب الخطر والتهاليـك
تـازي بـلا حـظ بعيـدٍ محالـك=وقلوص عزمك بالمهامـه اتخليـك
تسعين عـام يافتـى مـا بـدا لـك=ولا لآح في بالك لـزومٍ يصافيـك
قل ول يا حظي على ما جـرى لـك=إليا قل عونك ماجتهـادك بيغنيـك
اكتب مكاتيـب الشقـى والعنـى لـك=قل ولّ يا حظ الشقى اتعبت راعيـك
يا حظ لو ذيب المفالـي عـوى لـك=في مجلسٍ حاويه صـوتٍ يعاويـك
يقول لو حظـك سعيـدٍ نمـى لـك=لو عشـرة اولادك عضيـدٍ يكفيـك
واليـوم لا تأمـن يمينـك شمالـك=يبوقـك اصـدق صديـقٍ يماليـك
ولا يغـرك إن لقـاك وحكـى لـك=لو عطا لك من المواثيـق يرضيـك
اخذ الحذر كل الحذر لو صفـى لـك=عيبٍ على انك تآمن الخصم ياليـك
تحرز بسوّ الظن وابصـر بحالـك=واحذر جليسٍ ضايع الرآي يعميـك
من سوّ طبعه إن حكى بك حكـى لـك=يرضي عدوك بالنميمـة ويرضيـك
راعي المكر والبوق والكذب سآلِـك=وراعي الثنا ضاقت عليه المساليـك
يمشـي ورأيـه ضايـعٍ بالمهالـك=لا شاف من دونه على الوكر عاليك
ما تنظر الأقـدار فيمـا جـرى لـك=شيوخ القبايـل يتبعـون المماليـك
فاعزم بعون الله على مـا بـدى لـك=واقصد إله العرش حسبـك ويكفيـك
صاروا ابطن إلحود ارض فمالـك=صبرٍ فهل منهـم صديـقٍ يعزيـك
لا بآس لو من كل طرفٍ جرى لـك=هامي سحاب الوجد من فوق خَديـك
يا قلب هيّـد عـن تذكـر احوالـك=واصبر عسى رب الملا يعتني فيـك
اصبر عسى تِعطا خلف ما غدا لـك=رجلٍ إلى سامتـك الأيـام يشريـك
يارب تجعـل واحـدٍ مـن رجالـك=عند الشدايـد مزبـن اللـى يواليـك
في يوم ما تعطـي يمينـك شمالـك=مثقال حبة خـردلٍ مـن حسانيـك
تعطيني مقصودي وأنا اللى أسآلـك=يا سامعٍ مـن جـا لبابـك يناديـك
واختام ملفوضي لنـا فـي مقالـك=ازكى صلاة إلى هادي الرشد هاديك

شعر
الشريف محمد بن عون
غفر الله له ولوالديه
وللمسلمين أجمعين
( النسخة الأولى وضعت في
شبكة منتديات قبيلة السبعه اهل العرفا )