السلام عليكمحيَّاكم الله يارْجال
<b>

• عطني ياهاب الريح من وقتك شوي
  واسمع كلامي كان مابه كلوفه
  
  سخر جهودك في رضا الواحد الحي
  والفرض لاتغفل من اول صفوفه
  
  لا تمنع الناصح ليا قال ياخي
  خذ مايفيد وزايد الهرج طوفه
  
  لا تطرد المقفي ولاتشاور العي
  قدّام ياكلك الندم والحسوفه
  
  ترى حكيم الشور ياخذ ويعطي
  نفسه من الراي الدناوي عيوفه
  
  ولا تقرب الشبهه ولاتخاوي السي
  عليك باللي طيباتٍ وصوفه
  
  من رافق الطيب شرب صافي المي
  ومن رافق الهافي جفا الما كفوفه
  
  ولا تنكر المعروف لو انه شوي
  من قدّم المعروف رد معروفه
  
  وادمح خطا الطيب لياصار مخطي
  واقبل معاذيره وقدر ظروفه
  
  ولا تنهر المحتاج لاجاك مبلي
  خسارةٍ في فعل خير مخلوفه
  
  واطلق حجاجك لقبل الخاطر وحي
  بشاشة الطيّب كرامة ضيوفه
  
  ترى الكريم معان بالخير مرهي
  من يترك الماجوب جعله ذلوفه
  
  لا تقطع الرفقه ولو حبلها لي
  حبل الرفق من يفلته بان خوفه
  
  رجلٍ بلا ربعه من الناس مجفي
  لابد صكات الليالي تحوفه
  
  لاصار في عينه مايشوف البشر شي
  ترى البشر في عيونها ماتشوفه
  
  ومن عوده حظه على بارد الفي
  لابد لفحات ا لسمايم تلوفه
  
  ومن ساقته نفسه على سكة الغي
  صعبٍ عليه ليا تمادى نكوفه
  
  ترى الليالي تطوي ايامنا طي
  يالله بحسن الخاتمه والمروفه
  سعد بن جدلان