أمس العصر يا ريم حين(ن) تماريت
(و)عادت لي الذكرى وعيّت تروحي
نَظَرت لي نظرة بها القلب أدميت
نظرة عتب خلّت دموعي تسوحي
واتركتني للشوق وحدي وقفّيت
كيف ما نْظرت طيفك لعيني يلوحي
(ا)شتقت (و)إلى دفا لياليك حنّيت
ما اوعيت من بعدك عوجه(ن) صبوحي
من حرقتي في واسع البرّ سجّيت
وحدي (و)نسيم الشوق وحده سَروحي
خذيت لي مرباع والنار شبّيت
وقلت للدّلّة على النار فوحي
صبّيت لي فنجال منها (و)تقهويت
دايم تهدّي دلّة الكيف روحي
يا ما عنار الشوق عقبك تدفّيت
واضلوعي مْن البرد تشكي وتنوحي
عقبك أنا يا ريم ابد ما تهنّيت
صكّت علي بَقعا أذاها لحوحي
يا ريم ما نْسيتك أنا (و)لا تناسيت
إسمك على لْساني (و)لساني يبوحي
يا ما بإسمك من جميلات ناديت
مكشوف سرّي صار من زود بوحي
أعرف ترى ما جت على ما تمنّيت
الله على هذا الزمان الشحوحي
أخطيت في حقّك كثير (و)تماديت
يا ريم سامحني وسامح جموحي
نادم أنا يا ريم عنّك تخلّيت
ذنبي أنا (و)ذنبك يغاية طموحي
يا ما سهرت الليل للصبح ما اغفيت
أبكي على فرقاك والناس توحي
يا ريم انا منّك تعبت (و)تعنّيت
كافي ولا تنكأ جروحي (و)قروحي
عنيد انت والعند يا ما خرب بيت
(و)يا ما هدم من عاليات الصروحي
ما عاد تنفع ليه أو ليش أو ليت
حقيقة(ن) ما هي بلعب ومْزوحي
يا ريم خذ منّي الخلاصة بهالبيت
يغنيك عن طول الهرج والشروحي
يا ليت انا صدّيت أو أنت صدّيت
ما كان تاليها عذاب (و)جروح(ي)
د. فواز عراجي
20/12/2024

صح الله لسانك وعظّم الله شانك ويسلم بنانك

حيّاك الله أخي عبد الله بن عبار
وشكراً لك على تفاعلك مع ما أكتب
لقد أسعدتني أسعدك الله

فوّاز شاعر والقلم طوع إيده
بْعدّة لغات ابيات شعره كتبها
صادق بقافه ما يخون القصيدة
(و)ياما خسر ناس(ن) وناس بْسببها
لكنّ به ناس(ن) ولو هي بعيدة
عنّي تواسيني بوفرة أدبها
أكتب لها من حُرّ قافي (و)فريده
وافرح ليا من شفت قافي عجبها
د. فواز عراجي