( رجال يستحقون الثناء )

من الرجال الذين عرفتهم الرجل الفاضل الشيخ عبدالله بن محيجين بن راشد من وجهاء مدينة بريدة بالقصيم ومن حاضرة قبيلة الفدعان بالقصيم وهذا الرجل جمع التقّى والكرم والفهم وله مجلس في كل عصر يرتاده الرجال الأفاضل وله مواقف مشرفه وقلت هذه القصيدة تحتوي على ثناء لهذا الرجل :

نويت أقول ولا عـرفـت الهدف ويـن *** وبـديـت أجـاري بالمثـل من يقولون
اشفـق عـلى السجّات لأهـل الدياوين *** الـلي عـن هـمـوم الـروابـع يسلـّون
أنـصى مـنـاعـيـر الـرجـال الـمسمين *** عـلى النـقّى مـن زارهـم بـه يهلـون
اهـل العـلـوم الطيـبـه والـنبـا الـزيـن *** مـا امـل مجـلسهم وهـم مـا يـمـلـّون
النافـلين الـلي عـلى الطـيـب ضاريـن *** جـليسهـم مـا يشـكي الـذل والهـون
بالمجلس الـلي مـا جـلس بـه شقيين *** مجلس شرف فيه الـرجال يتقهوون
بـيـض القـلـوب الطـاهـريـن التقييـن *** مـن قـام منهم راح راضي وممنـون
اعـتـز فـي عـز الـقـروم الـعـزيـزيـن *** الـلي عـلى عـلـوم الرجال يتواصون
المنصفين الـلي عـلى القـلـب غـالين *** لـهـم قـدر عنـدي وهـم لـي يـعـزون
نـسـل الحمايـل والـرجـال العـريـبيـن *** أهـل عـقيـده طبـعـهـم مـا يخـونـون
صنايـع المعـروف بـيـن العـرب ديـن *** وأهـل الـوفـاء عاداتهم دوم يوفـون
عـلم الفخـر والطيب مبـطي وهلحين *** ما ينمحي لـو تمضي دهور وقـرون
احـب صحـب الـنـافـلـيـن الكـريـميـن *** مـن كـل شغـموم مـجـرّب ومبخـون
شروى جناب الشيخ خـلفة محيجيـن *** الـقـرم عـبـدالـلـه بطيـبـه يـشيـدون
الفـاهـم الـلي مـا تـخـفـاه الـقـوانـيـن *** عـقـلـه سلـيـم ويفتهم كـل مظـمـون
حـكـيـم راي مـن الـرجـال المـيـاميـن *** هـو الـذي مـن حـكـمـتـه يستفيدون
مـاهـو مـن الـلي غـيـرتـه المـلايـيـن *** فـيـه الصخّى ولاكان بالمال مفتـون
أظهـر ثناء الطيّب مـن الربع الأدنين *** واجهـر بمـدحـه والمخاليق يوحون
حيـث أبـو راشد من كـرام الفـداعيـن *** أهـل فـخـر مـاهـم هـلابيج وعـفـون
ذخر الخوي لاصار وجه الزمن شين *** هم السند عـن جاير الوقت والعـون
مـدحي لـهـم مـاهـو هـقاوي وتخمين *** ولا قـلـت تمجيدي مراميع وظـنـون
العـزوه الـلي شوفهـم يطـرب العـيـن *** حـمـر النـواظـر باللـّزم مـا يـتردون
والـمـدح مـا يـرفـع مـقـام الـرديـيـن *** مهـمـا يـشيـد بمـدحهـم كـل مـلسون
نـعـوذ بالـلـه مـن رجـيـم الشيـاطيـن *** بأمـر الولي مدحور وإبليس ملعـون

تسلم يابومشعل وال محيجين أهل بذل وكرم ومعروفون بأفعالهم