يافكر قل للقلب وين اليمومي
أبيك تعطيني قرارك إشماما

وإذكر لنا يافكر شي ً لزومي
ترشح غراب البين والا الحماما

هات الخبر قلي وعطني العلومي
متى يخلص عنا فلم الدراما

وإليا متى دنياي بيا تزومي
وانا كلامي صايم ً عن كلاما

شفني أجاري في دهاق السمومي
خوفا على راسي تقوم القياما

أشوف أنا الحر صايداته رخومي
والغمد مسلوله بكبد الحساما

أعيش أنا كل حياتي حلومي
وأرفض حلاوه مغمسه بالحراما

من دون ليش ولو تترع همومي
حيث الوقاحه تنشهر باحتراما

ابي الهداوه لو تهيت ليومي
اما الزعامه تاركه للنشاما

كل الجماعه شيوخ تملى الهدومي
وأنا القبيلة اللي تطيع الزعاما

أخفظ جناحي والمشايخ تزومي
والامر ياتي بساع كب الكراما

كفن ضميرك وإدفنه بالحزومي
وإحذر تجالس ناس فيهم كراما

عصر اللئام إمام وانت مأمومي
وعليك نثر الورد على الجهاما

وادفق كاس الود جعله ثلومي
واجنح عن الدنيا وعطها سلاما

هاذي أوامر طيعها يامعدومي
من ورى خشمك ماشيه بالسهاما

وناديت انا يا سامعي لاتلومي
الله يجيرك من مرار الملاما

لي بالملا كلمة ولاني محرومي
وليه عذر أن كان شلت اللثاما

حتى أن شكيت بحزن هاك السلومي
وعنيت أنا عنه تقص العضاما

القيم صارت حدر جال مهدومي
وقامت توطاهن عيال الحراما

صح لسانك يا أبن رجا الكره على هذه القصيدة الجزلة وكن على يقين أن الدنيا لا تزال بخير

صح بدنك يابو مشعل وطول الله عمرك بما تحب وترضى

هذي قصيدة قديمة لـ رجاء سليمان الكرهـ الله يعطيه الصحه والعافيه

واعتذر اني لم اذكر ان القصيدة لوالدي

بارك الله فيك