زيارتنا لمنطقة الحريق ونعام لحمايل من بني هزان من عنزة

في نهار الجمعه مساء السبت الثامن والعشرين من شهر جماد الثاني عام 1447هـ قمت برفقة الرجل الفاضل نواف أبو ممدوح العبادي والرجل الفاضل الأستاذ عبدالله بن سمير الحنتوشي والأبن المهندس أحمد بن عبدالله العبار بزيارة منطقة الحريق بدعوة من الشيخ علي بن سعد العشبان الهزاني وتشرفنا بالسلام على سعادة الشيخ عبدالعزيز الهلال رئيس مركز نعام وعدد من وجهاء وأعيان أهالي منطقة نعام من الهزازنة وسبيع والفضول وبعد ذلك وصلنا إلى مزرعة مضيفنا الشيخ علي العشبان وحضر جمع غفير من رجال الهزازنة وعتيبة وسبيع والفضول والكثير والدواسر والقى الشاعر المعروف الشيخ عبدالله بن عبدالعزيز آل حسن الهزاني قصيدة معبره عن مشاعره الطيبه كما قال الشاعر عبدالعزيز العلي الهزاني قصيدة بمناسبة زيارتنا ولا يفوتني أن اشكر الرجال الذين اكرمونا واثنوا على جهودي لقبائل ربيعة .

قال : لشيخ الشاعر عبدالله بن عبدالعزيزآل حسن الهزاني هذه القصيدة يثني على
عبدالله بن دهيمش بن عبار :

مثـلـك يـا ابـن عـبـار فـخـر وتجـاره *** لـك مـركـز مـتـقــدم بـالـطــوابـيــــر
وقـد قـلـت بـيـت حـط عــنـده اشـاره *** وانا اشهد ان لك نظرة في المناعير
بـيـتـك يـقـول الأسـد صـارت جعـاره *** وجـرو الثعـل كشّـر بالأنياب تكشير
واقـع لـنـاس تـدعـي بـالـشـطـــــاره *** يا قربهـم مـن وصـف نفاخـة الكيـر
قـامـوا تـجـاهـل يـالـسنـافـي بـغــاره *** وطموحهـم شهـره وكثـر التصاوير
يا طيـبهـم خـلـف الحجـب والستـاره *** مـتستـريـن مـثـل هـنـف الغـنـاديـر
والـجـبـل مـثـلـك مـا تـهـزه حـجـاره *** راسي مثل ما يرسي طويق والنير
واثـق ومـتـمـكـن بـقـول الـعـبــــاره *** صادق ولا تخشى هروج المصاغير
ارثـت ارث واضـحٍ فـي مـســـــــاره *** ولا تلتفـت لأهـل العـطـا والدنـانـيـر

وقال عبدالله بن دهيمش بن عبار هذه القصيدة جواب لقصيدة الشاعر عبدالله
ابن عبدالعزيز الحسن الهزاني :

الـشـيـخ أبــو ســعــد دعــانــا زيــاره *** عـلي ابـن عشبـان ريـف المسـايـيـر
وريـس نـعـام الـلـي يـروس الأمــاره *** رحـب بنـا ابـن هـلال مذكـور بالخيـر
وجـينـا ديـار أهـل السطـر والجسـاره *** عـزوة بـنـي هـزان نسـل الـمغـاويـر
بـالـديـره الـلـي جـدودنـا هـي ديــاره *** يـوم المـراجـل بـالسيـوف الـبـواتـيـر
بـالـوادي الـلي بـالـمــصـادر اخـبـاره *** دار عـنـزة صيـد الـرجـال المشاهيـر
وسـمـعـت قـول الـوايـلـي عــز جـاره *** الـلي جهـر بالقـاف وسـط الجماهيـر
عـبـدالـلـه الـلي بالـفـضـيـلـه مـسـاره *** اطلـب عسى رب الخلايق لـه ايجيـر
أبــن عــبــدالـعــزيـز عــنــده جــداره *** فـاهـم لبيـب ومـن كـبـار الشـواعيـر
القـرم الـلـي طـبـعـه وسـلـمـه وكـاره *** يفـرح أن كان الفـوا عليه الخطاطير

وقال الشاعرعبدالعزيز بن علي الهزاني ابو عزام يثني على عبدالله بن
دهيمش بن عبار :

يكـرم ابن عـبـار عـن كـل مـا قيـل *** هـذا نـسـل وايـل عـزيـز مـقـامـه
رجـل بـذل وقتـه وجاهـه بـلا ميـل *** عن عزوته يدفع هروج الرخامه
رجـل فهيـم وقـرم نشمي وحلحيل *** رجـل جـمع بين الأدب والشهامه
رجـل قـرأ التاريخ مـا فيـه تظليـل *** يشهـد لـه الكتاب صـدق وسلامه
وهـذي ربـيعـه شملهـم كالقناديـل *** وارسى قواعـد شملهم باهتمـامـه
عنده عـلى علمه شهود ودواليـل *** ودايـم يوضـح حجتـه فـي كـلامـه
ما هـو من الـلي يتبعون الأقاويل *** علمـه وكـاد وبنـدقـه فـي حـزامـه
شامخ ولا همه من القال والقيـل *** مـا يـلـحـقــه فـالـحـق أيـة مـلامـه

وقال عبدالله بن دهيمش بن عبار هذه القصيدة جواب لقصيدة الشاعر
عبدالعزيز ابن علي الهزاني ابو عزام :

جـتـني قـوافي مـثـل ورد الأكاليـل *** أخـن مـن ريـح النفـل بالثـمـامـه
من قـاف قـرم ما يقـول المهازيـل *** نظمـه جـزيـل ولا بقـافـه هـلامـه
عبدالغزيز الليث نقـوه من الجيـل *** ابن عـلي منعـور مـا هـو فـدامـه
يشمت على اللي ينطقون الأباطيل *** ويثني عسى الرحمن يرفع مقامه
زرنا الديار اللي تدارج بها السيل *** جـاهـا الوبـل من مدلهـم الغمامـه
ديـرة بـني هـزّان نـقـوة رجاجيـل *** بيـن العقيق وبيـن أرض اليمامـه
العزوه اللي يوم عصر المصاويل *** مـن دور وايـل يحتمون الجهامـه
عـنـد الكـرام النـافـليـن المشاكيـل *** كـلـن عـزم وده يـسـوي كـرامــه
العود الأزرق واشقر البن والهيل *** وأدنـاهـم التـرحيـب غايـة مرامـه
ابـو سعـد قـلّـط خـراف المهاجيـل *** مع القعـود الـلي عـريض سنامـه

قال عبدالله بن دهيمش بن عبار هذه القصيدة يثني على أهل الحريق ونعام بمناسبة الزيارة لمنطقتهم
ومهما قلت ما أوفيهم حقهم من الشكر والعرفان حيث حظيت بالحفاوة والأكرام واعتذر من الجميع فهم جميعهم يستحقون الشكر وقلت :

يـا ابـو سعـد جـاك مـرسـولي نـديـبـي *** كـزّه الـلي من ضميـره هـاض قـافـه
بـه جـزيـل الشكـر للشيخ الـهـضيـبـي *** شـيـد الـديـوان لـضـيـوفـه مـضـافــه
نـاصـر أبـن سعـود مـا شبحـه قر يـبي *** نظـرتـه صـوب العـلا تـبـعـد مسـافـه
عـامـري ربـعـه عـمـا عيـن الحـريـبي *** فاضـل وفـيـه الـشـهـامـه والـعـفـافـه
وتـركـي وعـثـمـان والـقـرم الـعـتيـبـي *** والتغـالـب عـنـدهـم طـيـب ولـطـافـه
الـلـواء مـشـهـور بـالـفـهـم ولـبـيـبـي *** شـاد بـجـهـودي وصّـرح بـاعتـرافـه
كـل مـنـهـم يـرغـب أنـي اسـتـجـيـبـي *** واعـتـذرت وقـلـت مـاريـد الـكـلافــه
عـلي أبـن عشبـان دايـم يحـتـفـي بـي *** بـالـعـلـوم الـغـانـمـه تـنـدر وصـافـه

قصائد مساجلات جديده

قال الشاعر منصور بن حواس الخضع هذه القصيدة يثني على عبدالله بن دهيمش أبن عبار :

مـا ذاد مـثـلـه عـن حـدود الـقـبـيـلـــه *** في نصف قرن فات وخصومه شهود
ولا قـطـف مـثـلـه زهـور الـخـمـيـلـــه *** بامجـاد وايـل مـن رحـيـمـه لجـيـرود
ولا جــرد عـلـى الـمـعـفـنـه صـقـيـلـه *** يـوم العفن سيفه عـلى الربـع مـزنـود
الـعـيـلـم ان عـابــاه راعـي الـثـمـيـلـه *** بالصمت ينسف له على ذراع مسعود
يـسـبـّه الـلـي مـا يــداري شـلـيـلــــــه *** ولا ينفضـه والـذمـه سـهـود ومهـود
لا فـاعـلـن فـعـلـه ولا هــو بــجـيــلــه *** والـلـي تـغـشى مـا هـو بناطـح الكـود
والظـاهـر انـه مـا هـو مـن الـقـبـيـلـه *** لـو كـان منهـا مـا تغـشى كـمـا الخـود

قال عبدالله بن دهيمش بن عبار هذه القصيدة جواب لقصيدة الرجل الفاضل الشاعر
منصور بن حواس الخضع الرويلي :

مـنـصـور ابـن حـواس رديـت قـيـلــه *** لـك الشكـر مـدبـول يا صاحـب الجـود
نسل الشجـاع الـلـي اعـمـالـه جـليلـه *** لكم الفخـر موروث من مـارث اجـدود
خـضـعـان واحـدهـم يحـوش النفيـلـه *** رجـالـهـم مـجـده عـلى الـعـز مـشيـود
تـسعـيـن نـعـم بـعـزوتـن تـنـتـمي لـه *** حـمـايـة الـعـلـيـا الـيـا صـارت جــرود
عـسـى فـداك الـلـي يـنـاكـر عـمـيـلـه *** كوبـان عن زيـن العـمل عـنـده جحـود
الـحـاسـد الـفـاسـد يـمـوت بـغـلـيـلــه *** ولا همنا اللي من الصدى قلوبهم سود
ومـن سـب خـلـق الله ظليمـه وعـيلـه *** مـع الـسـفـاهـة هـافـي الـحـظ مـقـرود

وقال الرجل النبيل هزاع بن فايز بن هزاع بن عشبه الصقري هذه القصيدة بالرجل
الذي سب قبيلة عنزة وعبث بنسبها يثني على عبدالله بن دهيمش بن عبار :

انا احسب انه تاب عن قوله المعثور *** واثر جرحه الغابر عثا فيه جراحه
بعد ما لفانا من ورا حدود دير الزور *** يبـث الفتن ما بيـن عـنـاز بالساحه
الا يالبـنـاخي زود الجـرح يالـدكتـور *** ولا ترحمه طالبك لو تسمع صياحه
أبو مشعل الوافي له موقفٍ مشهور *** وريث الرجال اللي للأخصام ذباحـه
ولا همه الضايق ولا همـه المسرور *** ولا راعه اللي من ورا القوم نباحه
يوم الذيابه تجتلد والرصاص يثـور *** قنيت التعب يوم ان غيرك قنا الراحه
نبي تسهج العايل بعد ما يفج النـور *** نـهـارن يشـادي العـاذريـه ونـواحـه

قال عبدالله بن دهيمش العبار هذه القصيدة جواب لقصيدة الشاعر هزاع بن فايز بن
هزاع ابن عشبه الصقري حفيد الفاهم هزاع بن عشبه رحمه الله :

تعـيش يـا هـزاع يالـوافـي يالمنعـور *** والـلي عبث يالقرم نفهم هدف ناحه
انـت الـذي شرواك يكره كلام الـزور *** من لفـظ هرجـك كـل عنـاز مرتاحـه
كما ترى البغاه وأهـل النكـد والجـور *** نـاسٍ بهرج الهيف والكذب صدّاحه
الكل صار اليوم يهـرف كما المسعور *** عـنـده دليـل الشـر قـفلـه ومفتاحـه
يسب كي يعرف وهو طامن ومغمور *** والحمـد لـلـه كسبـه الأثـم وارباحـه
المـدح والتشجيع يغوي عديم الشور *** ومن بـه حميه يقشع قناعه وزاحـه
من يسكن بحوران شرقي بلاد الغور *** خلـوه عالـم والفخـر يلـبس وشاحـه