( قصائد جديدة )

وجه لي الشيخ فهد بن راضي بن عبدالرحمن الراضي الحبلاني رئيس مركز قصيبا دعوة بمناسبة زيارة صاحب السمو الأمير محمد بن سعد بن خالد بن محمد بن عبدالرحمن آل سعود وأخيه سمو الأمير بندر بن سعد بن خالد للمركز الراضي في قصيبا بالقصيم فكان لي شرف المشاركة بهذه القصيدة التي القيتها أمام سموه يوم الجمعة الأول من شهر ربيع الثاني الجاري :

فـاح نـفـح القـوافي بالشـذا والعـبيـر *** من مفيض القـريحه قلتها باختصار
يـا هـلا مـرحـبـابـك يا سمـو الأمـيـر *** عـنـد شيخ وقـور ولـك بقـلبـه وقـار
أبو فيصل يرحّب من صميم الضمير *** يبتهج فـي وجـودك يعتـزي بأفتخـار
عـنـد كـل الحـمـايـل لـك مـقـامٍ كبيـر *** حيث مجناك صيرم من مواكر حرار
يـا سمي الشجاع وملتجـأ المستجيـر *** عز جاره ومزبن من به الوقت جار
أبـو جـدك مـحـمـد بالحسـام الشطيـر *** هـوعضيد الموحد فوق قـب المهـار
وأنت نسل الكـرام وبالمكـارم جـديـر *** مجدكم ورث جـد وليس هو مستعار
يا حـفيـد البواسـل محتميـن القصيـر *** يوم خوض المعامع يجلبون العـمار
ينطحون المعادي كـان جـاهـم نـذيـر *** باللقاء من غـزاهم راح جيشه فـرار
يردعون الخصيم ويجبرون الكسيـر *** ومن نواهم بسيه زال واصبح دمـار
عزوة سعود مبطي لهم عـلم شهيـر *** صيتهم دوم يذكر مثـل ضوح النهـار
طفلهم قـبـل يـبلـغ بالمـراجـل خبـيـر *** بالكرم والشجاعة فـاز عقب أختبـار
كـل مـن سـاد منهـم للشريعة نصيـر *** ناصروا كـل مسلم عـلى دينـه يـغـار
كـل مـن سـاد منهـم بالعـدالـه يسيـر *** منهج الحـق الأبلـج واضعينه شعـار
هـم حجانـا وذرانـا بالـزمان العسيـر *** وهم سطام العنيد ومن طمع بالديـار
حكم شعب الجزيرة مالهم بـه خشير *** حرروها وحموهـا يـوم قـدح الشرار
أسرة الخير حصّل شعبهم كـل خـيـر *** جملة أحفاد مقـرن من ربيعـة خـيـار
هـم معين المعـوّق والمسن الضرير *** وهـم سعيف الثكالا واليتاما الصغـار
هم ربيع الهجافا وهـم غنات الفقيـر *** من دخل في رفقهم نـال كـل اعـتبـار
حـنا منهم ومعهم نرتبط فـي مصيـر *** لهم نعـلن ولانـا بالصـراحـة اجـهـار

جاء بالأثر ( من لاشكر الناس ما شكر الله ) ومن خلال مشوار حياتي كان لي شرف معرفة الكثير من الرجال الذين لهم قدر ومقام في المجتمع وذلك حصيلة طيبهم وتواضعهم وأخلاقهم النبيلة ومن هؤلاء الدكتور سعد بن محمد الماضي من حمايل المدلج أهل حرمة من الحسنة من عنزة وهو رجل وقور وكريم وقد التزم رغم مشاغله في جلسة اسبوعية في كل يوم اثنين في منزله بالرياض وفي كل جلسة مستمر في تقديم القهوة والشاهي والرطب والبخور والعشاء ويحضر مجلسه الكثير من الأدباء والدكاترة ورجال العلم والمعرفة ورجال الدين وكان لي الشرف في حضور بعض جلساته فقلت هذه الأبيات اثني على سعادة الدكتور سعد بن محمد الماضي مدير شركة أيوان الدوائية بالرياض لمواقفه الطيبة :
سعـد ينـال الشرّف مـن زار ديوانـه *** المجلس اللي شخوص الربع يأتونه
المدلجي مـنـزلـه مـا صـك بـيـبـانـه *** فـي مـوعـد الشبّه مضيفـه يزورونه
يستقبـل أصحابـه وربعـه وجيـرانـه *** ما ينعقد حـاجبـه من طيـب مـكنونـه
جـميع الأجـواد عشرانـه وصدقـانـه *** الـبـدو والـحـضـر ديـوانـه يـدلـونــه
الطيّـب ايصادقـه عـدّه مـن أخـوانـه *** لا شك يبعد عن الـلي الناس يشنونه
دلـيـل مدحي بـأبـو ماضي وبرهانـه *** شهـادة الـلي من أصحابه يعـرفونـه
حـبـاه ربّـه ولـي الـكـون سـبـحـانـه *** كـل أهـل العـرف والمعـروف يغلونه
ربـه عـلى المرجلة والطايلـه عـانـه *** من حيث عـلم الفخر ما ينثني دونـه
حـاز أبـو ماضي مقام العـز بإيمانـه *** ينهـل من الصافي النقروح بحفونـه
كم واحدٍ يشكر جنابـه عـلى احسانه *** من طـاب يمدح وأهـل الحظ يطرونه
ربّـى عـلى كـلمـة الترحيب صبيانـه *** لاشـافـوا الـوافـد المقـبـل يحيـيـونـه
المرجله والفخـر والطيـب عـنـوانـه *** الـوايـلي غـايتـه بالصّـدق مبخـونـه
الـزور والهيف مـا يلفـظ بـه لسانـه *** ينطـق مهاجي عن الـزّلات موزونـه
الـلـه رفع قـدره وعـّلا الولي شانـه *** لـه سلم ما يشبح عـلى العيب بعيونه
ما بـار بالصاحب الـوافي ولا خـانـه *** نفسه عن الخبث والأحقاد مصيونـه
يـبـذل جهـوده لمـن ينصاه وامكانـه *** مـثـل البليهي يشيل الحـمـل بمتونـه
روس الروابي بعالي الحيـد مسكانه *** والحـر وكـره مقـرّه فـوق صعنونـه
فعل الصخى والكرم من طبع جدانـّه *** تاريخ جـدّه جـميع الـنـاس يـقـرونـه
جـده حمى ديرته من غـزو عدوانـه *** شيخ الحسانا الـلي حسامه يهابونـه
بالقحط يقري من نمى الغيد ضيفانه *** زمان نصف العـرب ما تاجـد المونه

أما سعادة الدكتور عبدالعزيز بن صالح العقيل من الحمادى من الرباع من الحسني من عنزة رئيس المراكز في وزارة الثقافة والإعلام سابقاً وكيل الوزارة حالياً فهو رجل له مواقف لا تنسى وسبق وأن اثنيت عليه بقصيدة وقبل فترة حصل على جائزة بسبب علمه وأخلاصه في العمل فقلت هذه الأبيات تهنئة :

جيت أبارك لأبو صالح يـوم عـيّـن *** أفخر بنسل الحميدي وأعتزيبـه
طـاع ربّـه طـاهـر النـفس وتديّـن *** أبن عقيـل التـقي مـاداس ريـبـه
عـن طواريـق الـردى طعّـم وتيّـن *** اشتهـر عبدالعـزيز وبـان طيـبـه
محـتـرم للنـاس مـتـواضع ولـيّـن *** وأبتع من السيف لاشاف الغليبه
أبـو صالح في مجال العـلـم بـيّـن *** كان نـال الجايـزة مـاهي غـريبـه
مـن يـدور العـز للفـرصـة تحـيّـن *** يغـتـنم وقـتـه قـبـل يـبـدأ مشيبـه
عالي الهمّات خلا الصعـب هـيّـن *** عادتـه يصعد على راس الجذيبـه
كـل مـا جـاء دائـرة رتّـب وزيّــن *** من اخلاصه كل مخـلص يقتديبـه
من حمايل حيـروا عـقـل الذهيّـن *** بالحجـج رجـالهـم يـفـلـج طـليبـه
طبعهم كان الزمن وجهـه تشيّـن *** دارهـم لضيـوفهـم دايـم خصيـبـه
يوم ينضب مبهل الضّرع المحيّن *** يلتقون الضيـف بصدور رحـيبـه

صح لسانك يابو مشعل

ونعم بالمادح والممدوح

وابن راضي غني عن التعريف بمواقفه المشرفة لابناء بلدته وبلده

وابن عقيل أكرم به من رجل فهو صاحب المواقف المشهورة

صح السانك يا ابو مشعل

وبيض الله وجهك

صح لسانك يا ابو مشعل بخصوص هولاء الاشخاص نعلم لو كانو ليس كفوا ماتقدم لهم هذه القصائد الجميله والتي لاتحوي في كلماتها تلميح للعطاء وانما تشجيع لهم فيما يفعلون من طيب للناس .... وقال الامام الشافعي خير من في لانام رجلا - تقضى على يديه للناس حاجات

الله الله اششششششششششششششلع سما يابو مشعل صح لسانك يالوايلي ...