( القصايد الوطنية وقصايد الإشادة في أمجاد القادة - من الديوان المطبوع وغير المطبوع ) - موقع قبيلة عنزه الرسمي: الموقع الرسمي لقبائل ربيعه عامه و عنزة خاصه

07-01-2022, 06:28 PM

ملخصات قصائد من شعر الأشادة في أمجاد القادة أسرة آل سعود الكرام

بسم الله الرحمن الرحيم

قصايد من شعر الإشادة في أمجاد بعض القادة تحتوي على المدح والشكر والثناء لقادة هذه الأمة المجيدة وتنوّه عن اعمال ومنجزات مؤسس دولة المملكة العربية السعودية هذا الكيان الشامخ وأسلاف آل سعود الغر الميامين الذين حكموا في الشرع المطهر ووحدوا شعوب جزيرة العرب تحت راية التوحيد وهذه القصائد تصف تاريخ المملكة والأسرة السعودية الكريمة وقصائد في المؤسس الملك عبدالعزيز طيّب الله ثراه وقصائد في معارك على حدود الوطن وقصائد في أيام الوطن وقصائد في مناسبات متنوعة مع اختصار بعض القصائد المطولة وهذه القصائد نظمتها عبر مسيرة أيام عمري وفاء واخلاص للوطن وقادته واعتزاز في الأفعال والأعمال الجليلة التي قاموا بها قادة هذا الوطن وفقهم الله .
يسرني أن الخص ما كتبت من القصائد التي قلتها خلال مشواري الطويل وفاء وأخلاص لحكومتنا الرشيدة ملوكنا الأشاوس أسرة آل سعود الكرام حفظهم الله بحفظه ونصرهم على أعدائهم وأدام عزهم وهيبتهم ووقاهم شر الأشرار حيث قلت بالوطن الغالي وحكّام الوطن عشرات القصائد وأسأل الله أن يخذل من يريد بالوطن وحكومته وشعبه سوء أنه سميع مجيب الدعاء وبخصوص هذه القصائد فهي انتاج فكري خلال ستة عقود من الزمن وقلت الشعر بالوطن في مناسبات وطنية كثيرة ونظراً لطول بعض القصائد فقد اختصرت على ما يخص الوطن وقادته الغر الميامين الذين أسسّوا العدل وأرسوا دعائم الأمن ونهضت البلاد بسببهم وتوفرت الأرزاق وعاش الشعب في بحبوحة من العيش الكريم وأصبح الشعب أخوة متحابين وهم أصدقاء وزملاء في العمل وجيران في المنازل وأصهار وكلهم يد واحده على الأعداء فهنيئاً للوطن بقادته وهنيئاً للقادة الكرام بالموطنين الأوفياء ونحن في بلد الحرمين الشريفين نفتخر ونعتز أننا من اهل الديار المقدسة ولله الحمد والله الموفق .

القصائد الوطنية وقصائد الأشادة في أمجادة القادة أسرة آل سعود الكرام نصرهم الله وعزهم وعز بهم الإسلام والمسلمين (وقصائد في تأسيس المملكة ومؤسسها الملك عبدالعزيز :

* قال عبدالله بن دهيمش بن عبار العنزي هذه القصيدة يصف حال الجزيرة العربية قبل حكم آل سعود وبعد تعاهد الإمام محمد بن سعود والشيخ محمد بن عبدالوهاب على رفع راية التوحيد ونصرة الإسلام وبعد توحيد البلاد على يد
المؤسس الملك عبدالعزيز بن عبدالرحمن آل فيصل آل سعود طيّب الله ثراه :

مبداي باسم مكون الكون باسبـوع *** منشي العبـاد وكايـنات الطبيعــــه
ومن بعد ذكر الله سجلت موضـوع *** عـن واقـع كـل الـوسايـل تـذيـعــه
تـاريخ عـبـره بالسجـلات مطـبـوع *** عـد الـوقـايـع مـا تجـاوز وقـيـعـه
شعب الجزيرة كان شتان وامـزوع *** شملـه تـفـرق كـل عصبـة مزيعـه
وصـل القرايـب بينهم كان مقطـوع *** حـل التباغـض والجفـا والقطيعـة
هـذا غـزا هـذا بـجــردات وافــزوع *** وهـذا عـلى هـذا يـدور الـهـزيعـه
ياما بها صالت جموع على جمـوع *** كـون وحرايـب والنتايـج فجيـعـه
لقحت ضغاين وانتجت دم وادمـوع *** تشيب مـن هولـه اطفـال رضيعـه
كـل بـذل روحـه عـلى غير منفـوع *** مثـل الـذي يـتـبع سـرابٍ بـقـيـعـه
سلمٍ زمن عصر الجهل كان متبـوع *** سلب ونهايب والمصايب شنيعـه
وبالمجتمع عمت خرافـات وابـدوع *** وراجـت شعـاويـذ العبـاد اللكيعـه
ظلـم وظـلام وداعـي الحـق ممنـوع *** وكفر ومعاصي والمناكر فضيعه
وكثر النكد والكيد والهـول والـروع *** والجور واعمال الدجل والخديعه
مع الجـفا والحيف والـذل والجــوع *** خيـّم عـلى كـل الـديـار الـوسيعـه
من عقب هذا لاح في جوها اشموع *** البـدر نـوّر فـي سمـاهـا شعـيعـه
جاها الفرج من والي الكون مدفوع *** والعـز حـل بجالها عـقب ضيعــه
نسل الدروع لـدارهم حـرز وادروع *** صفوة هل العوجا صوارم ربيعه
مجد الجزيرة والفخر عادها رجوع *** لـيـث بـشـرع الديـن يمنع منيعـه
لبّى نـداء شيخ مـن الـظلـم مفجـوع *** للحـق يـدعـي ما لـقا مـن يطيعـه
دعوه من السنه لها جذوع وافروع *** فـيهـا الصلاح وللخلايـق نـفيعـه
نادوا لدين الحق في صوت مسموع *** وتبايعـوا لأجل الهدى خير بيعـه
وتحالـفـوا انـصـار للـديـن واربـوع *** وتعـاهـدوا يحيـون حكم الشريعه
وقضوا على الفجار والضد مقمـوع *** وسدّوا عـلى كل العصاه الذريعه
مـا هـازهـم مـن دار بالدار مطمـوع *** خابوا دعـاة اهـل العلوم الخليعه
تركي اعـاد المجـد مثـني ومـربـوع *** مضراب سيفـه ماتشافى صريعه
سيفه يقص رقاب وامتون واضلوع *** به الشفـا وعلاج روسٍ صديعـه
تركي فعـل فعـلٍ بـه المجـد مشفـوع *** ضربـات كـفـه بالمعـادي فـنيعـه
وفيصل لبوه العضد والزند والكـوع *** مجناه من صلب الفهـود البتيعـه
شبل نهـل مـن صافي المجد ينبـوع *** علمه كما النبراس يجـذب لميعـه
من عانده راسه عـن المتن مشلوع *** حـدب القشاعم من يمينه شبيعـه
كم طاغيه من مضربه طاح مجدوع *** خـلي طعـام للـوحـوش المجيعـه
كم حاقـد قـلبه مـن الغيض ملـقـوع *** يخـفي غـليله والضماير وجيعــه
مـن خلـق ربي واهسه دوم منزوع *** كـنـه يـراهـم فـي وطنهـم نـزيعـه
سقاه أبن مقرن من الموت قرطوع *** واقـفـت خـيـولـه للمنايـا سريعـه
خلا دعـاة الـشـر هـجـاد واهـجـوع *** سيفـه فتك باهل النفوس الدنيعـه
بالشيمه الشماء لـه اهداف ورموع *** توصيف فعـل الليث ما نستطيعه
الليث اللي قلبه من الصلب مصنوع *** نمـر نجب هك النمور الشجيعــه
سور الوطن واحماه والضد مردوع *** دانـت لـهـم كـل القبايـل امطيـعـه
بصروح عـز شامخه مابـها صدوع *** اشـمّ مـن شـمّ الجـبـال الـرفـيعـه
وجـدد سوابق مجـدهم طايل البـوع *** عبدالعـزيـز الـلي فخـرنا صنيعـه
جّـمع شتايـت ديـرة شعبهـا انجـوع *** وليمّ شمل شعب الجزيرة جميعه
ساد الوطن من بـاب جـده الميقـوع *** ومـن ديـرة الخفجي لحد الوديعه
عبدالعزيز اللي يخلي الصعب طوع *** ومن عال دلـه بالدروب السنيعـه
امجـاد عـزه تـرتـقي لـلعـلا اطـلوع *** ومجهـود فضله مرغدين ابريعـه
والحمـد لـلـه بيـرق النصر مرفـوع *** والمملكـة بـيـن الـدول بالطلـيعـه
مـا وردت عـادات غـرب ولا شـوع *** ولا هي لترديـد المبـادي سميعـه
ولا جاملت كفر البشر ذل وخضوع *** تـنبـذ قـوانـيـن العـبـاد الوضيعـه
والمملكـة صارت بساتيـن وازروع *** عـم الـرخا والخير وازهر ربيعـه
لبست بـلدنـا عـزهـا بـافخـر النـوع *** عـلـم وتـطـوّر والمبـانـي بـديعـه
ولا مر يـوم غـير به صار مشروع *** وإلـى انتها المشروع يأتي تبيعـه
وصلوا عـدد ما قام سجـاد واركوع *** عـلى النبي مهـدي العباد وشفيعه

وقال عبدالله بن دهيمش بن عبار ملخص قصيدة بالمؤسس الملك عبدالعزيز
بن عبدالرحمن آل سعود طيّب الله ثراه :

بـديـت بـسـم الـلـي للأرزاق وهـاب *** رب الـملأ خـلقـه يـمـيتـه ويحيـيـه
الواحـد الخلاق مـا غـيـره اربــاب *** رب العــبـاد الكـون يعـلـم بخـافـيـه
باسمه بديت وهاض مكنون الألباب *** نـظم القـوافي جوهـر الفكـر يمليـه
بامر الولي اريف بلدهنا بالأخصاب *** والـدار فيها الخيـر تجـري سواقيه
مـسـوح يــروي درهــا كــل حـّلاب *** صـافـي لبنهـا يابـس الكبـد يرويـه
بجهـود مـن خلآ البلـد كـرم عـنـاب *** حقـق هـدف شعبه ولا خاب راجيه
عبدالعزيز اللي من اعداه مـا هـاب *** واصـل كفاح وعـاد مجده وماضيه
وحـد جـزيرتـنا عـلى خيـل وركـاب *** بالسيـف الأملح كـل مشرك يصفيه
بالسيف يـردع كـل عـابـث ونهـاب *** حـكـم بعـدل وحقـق الـلـه مساعـيـه
شهر صقيل السيف قطـاع الأرقاب *** سيف العـدل ماهوعلى الظلم حانيه
الساطي الـلي له بالأضداد مضراب *** مـن عـاوده زومـه بـحـده يـداويــه
مضراب سيفـه ما تشافيه الأطـباب *** حـده شطـيـر ومـن تعـاوج يـذكـيـه
يا ما جـزر بـه من منافـق ونصـاب *** ومن طاغيـه جبار وإبليس مغـويه
شره على اللي صايبه كبر واعجاب *** مـن ثقـل نـفسه ما تـمكـن أتحاكيه
مـن خـالـف السنـة يحطـه بسرداب *** ومـن يقـترف جنحة بذنبه يجازيـه
طوع طواغيت الحواضر والأعراب *** صنـديـد مـا جامـل عـدوه أيـداريـه
دق الأفاعي وأنتـزع شوكت الـداب *** وخـلا الحنش ما عاد بالسم يوذيـه
كف المغازي وأنتهى شلح الأسلاب *** وخـلا العشايـر تـرجهـن بـمفـاليـه
وكـلـن مخيّـر بيـن سفـره ومنساب *** مـن جاع له يشبع ومن عال يكويه
ما ربح مـن يأخذ عن الحق مجناب *** مصقـول أبو تركي يصافح علابـيه
والـدار غيـره مـا بغـت كـل خـطاب *** جـاهـا الزعيم الـلي بغـاهـا وتبغـيه
ومن ساد من نسله للأمجـاد كساب *** حـيـث أبـو تـركي للمكارم موصيـه
الحـاكـم المأمـون نطـاح الأصعــاب *** ذخـر العـروبـة مـن لجأ لـه يلجيـه
الليث مـا دونـه عـن الشعب حجـّاب *** عـسى السعـد دوم الـليالي يباريـه

* وقال عبدالله بن دهيمش بن عبار هذه القصيدة بمناسبة الذكرى المئوية
لتأسيس المملكة وكفاح المؤسس الملك عبدالعزيز طيب الله ثراه :
بـديـت والمكنـون بـه خـاطري بـاح *** وغـرفت من عـذب القوافي قراحـه
ذكرى البطل يشدوبها الشعر صداح *** شعـر العـوام ومن يجيـد الفصاحـه
ذكرى الزعيم المقرني باسـط الراح *** عرق الندى ساس الكرم والسماحه
ذكـرى الـذي للـكـوم والحـيـل ذبّـاح *** يبـذل إلـى صـاب النشامـى شفاحـه
ذكـرى مليـك المملكـة عطرهـا فـاح *** يـنفـح عبيـره مـن شـذا ورد واحـه
ذكرى الزعيم اللي بمجد الفخـر لاح *** ذكـرى بـطـولاتـه وذكـرى كـفـاحـه
ذكـرى الـذي سام المعـالي بالأرواح *** يلقـا المصاعب كـان زادت فـداحـه
ذكرى الذي عاد الفخر عقب ما راح *** خـطـط ونـفـذ فـكـرتـه وأقــتـراحـه
يـوم البـلـد كانـت تجـاذبـها الأريـاح *** جـمع شتـايـت شعـبهـا والمسـاحـه
أقبـل من المشرق بـه الجيش طفاح *** حيث الوطن فرصة رجوعه متاحه
صمـم وعمـم صـادق العلـم بأيضاح *** وعّـلـم رفـاقـه فـي كلام الصـراحـه
ما مقصـده جمع المكاسب والأرباح *** ولا سـار قصـده للجـزيـره سيـاحـه
قـاد الهجوم وطـوّق القصر واجتاح *** وحـمى خصيمـه بالظـلام استباحـه
فـادى بحياتـه واشهب الملح ضبّاح *** وعاد السليب وغاصب الحق زاحه
وعـذى جناب الدار بسيوف ورماح *** ملـك الجـدود ولا شلحـهـا شـلاحـه
ونادى المنادي فـي تباشير الأفراح *** واستبشـرت كـل الشعـوب بنجـاحـه
صقـر الجزيـرة صـار للخير مفتـاح *** مـن يـوم قصـر العـز تـم افـتـتـاحـه
قـاد السفـيـنـة واخـتـفـى كـل مـلاح *** وراحت على اللي ما يجيد السباحه
زال الدجى وابعـد كوابيس الأشباح *** وطيـر السعد بالعـز رفـرف جناحـه
ولاح بدياجي حندس الليـل مصباح *** وفجـر الفخر نـوره تكشف صباحـه
رام الـمعـالـي وارتـدا تـاج ووشاح *** والمجـد ابـو تـركـي تقـلـد وشـاحـه
ولا تـم نيـل المجد في لعب وامزاح *** والعـز الأقعـس ما حصل له براحـه
يـأخـذ مـع الميـدان بالخيل مسراح *** عـوق السبـايـا الـيا تـلاقـوا بساحـه
يرهـب مناعير الفوارس إلى صاح *** يـدحـم على الصعبه حليفـه سلاحـه
سـبـع الـرجـال وللصنـاديـد نـطـّاح *** يـودع لـخـفـرات المـعـادي مـنـاحـه
كم طاغـي وجبار من ضربتـه طاح *** بـالمـعــتـرك خـلاه تـنـزف جـراحـه
شره على اللي ما قبل هـرج نصّاح *** والـلي بـراسـه زوم يكبـح جمـاحـه
بالسيف عـالـج كـل مجـرم وسفـّاح *** وزال الـذي مـا عـاد يرجى صلاحـه
لـكـن لـزلـت كـل مـن تــاب دمـّــاح *** مـن عـاد رشـده سامـحـه ثـم بـاحـه
يـعـفـي ولا يـسـمـع نـماميـم قـّـداح *** ولا طـاع راي اهل الحسد والوقاحه
مـفـاخـره تـصعـب عـلى كـل مـداح *** تفـوق وصف اهل الذكى والرجاحـه
من ثمر غرسه ساير الشعب مرتاح *** يـرفـل ويـنعـم فـي كـرامـه وراحـه
والراعي الـلي يـتبـع الـذود مصلاح *** اليـوم يـمـلـك مـزرعـه واستراحـه
والـلي من اول يـبـذر الغـرس فّـلاح *** انـعــم عـليـه الـلـه وكثرت ارباحـه
وصـلاة ربـي عـدد مـا سـاح سـواح *** عـلى الرسول اعداد رمـل البراحه

وقال : عبدالله بن دهيمش بن عبار هذه الأحدية بالملك حفظه الله :
حـامي الوطـن عـز الجمـيع *** حـاكـم وطـنــا وعــاهـلــه
العـاهـل الـبـطـل الـشـجـيـع *** مـا ضـام حــمـلـه كـاهـلـه
الـلي أودع العاصي مطـيع *** يـوم الـسـبـايـا صــاهــلــه
خـلا الـوطـن قـدره رفـيــع *** بالـمـجـد عـلـمـه شـاهـلـه
وأصبح كما الحصن المنيع *** والـعـز الأقـعـس واهــلــه
سـلـم الـمـوحـد مـا يـضيـع *** الـلــيـث مـشـعـل زاهــلــه

يتبع