تابع
قال عبدالله بن دهيمش بن عبار هذه الأبيات من شعر الهجيني أهداء إلى شبكة منتديات السبعه أهل العرفا : 350
الـلي بـمـوقـع هـل العـرفـا *** نـوادر مـن خـلـفـة مـعـلاّ
رفـيـقـهـم خـمـلـتـه تـرفــا *** والضّـد عـن جمعـهـم ولا
ما حربهم في عصا الطرفا *** هـم عـز مـن يزبن مجّـلا
بالسيف والرّمح والشرفـا *** مـا يـفـتي الشيـخ والـمـلا
وأن جو على اللي تقل هرفا *** ادنـاهــم بـخـاطـره هـّلا
السفن ترسي على المرفا *** وحـديـدهـا صلـب مـا حـّلا
قال عبدالله بن دهيمش بن عبار العنزي هذه القصيدة يسند على الرّجل الفاضل
عمدة السالمية في بريدة ناصر بن إبراهيم الناصر السالم الفصيل : 351
أبــتــدي بـالــرّب مـولاي الـعـظــيـم *** جـل شـأنـه مـالـك الـملـك الـوكـيـل
يـا ولـي الـكـون يـالــرب الـرحــيــم *** لـك سجـودي كـل صبـح وكـل لـيـل
عـذت بـك يا رب مـن صلو الجحيـم *** تـغـفـر ذنـوبـي الـيـا حـان الـرحيـل
يالـلـه العصمـة مـن إبليس الرجيـم *** ومن شمات الهيس والنـذل الرزيـل
وبـعـد ذكـر الـلي بمخـلـوقـه عـلـيـم *** بالقوافي مـن ضميري هـاض قـيـل
فاض نبع القـاف من جـاش الصميم *** يـهـدى لـلي يحمـل الحـمـل الثقـيـل
الـجـواد الـفـاضـل الـصخي الـكـريـم *** نـاصـر العمـده مـن أحفـاد الفصيل
نـعـم أبـو إبـراهـيـم وقــور وحشيـم *** الـنـزيـه الـوافـي الـشـهـم الـنـبـيـل
بـه صفـات الجـود مضيـاف وحـليـم *** مـا يـجـي درب الـمـذمّـه مستحـيـل
مـن صفاتـه صاحـي الـذهـن وفهيـم *** مـع صـفـاوة نـيـتـه بـاعـه طـويــل
مـقـتـدي مـمـشـاه عـدل ومستـقـيـم *** عـن طـريـقـه مـا يـميـل ولا يـعـيـل
فـي بـريـده مـنـزلـه بـأرض القصيم *** يـكـرم الـعـانـي الـيـا شـح البـخـيـل
يـا عـسـى جـدوده بـجـنّـات الـنعـيـم *** يسكنـون الخـلـد فـي ضـل ومـقـيـل
حـيـثـه لأبـو بـداح صديـق وحـمـيـم *** دوم محـمـد يشكـره شـكـراً جـزيـل
صـار عـمـده لـلـمـواطـن والـمـقـيـم *** والـتـاريـخ يـخـلـده فـي كـل جـيــل
كـم لفـالـه ضيـف مـن بـعـد العـتـيـم *** مـا سهـج واجـب ولا بـار بـعـمـيـل
هـو صليـب الشور والـراي الحكيـم *** ومـن طبايـع عـادتـه زرع الجـميـل
أشهـد أن ناصـر مـن العايب سلـيـم *** مهمـا قـلـت المـدح فـي حـقّـه قليـل
مـا يـسـبّـه كـود مـسـفـوه وسـقـيـم *** ومن يسب أهـل الكـرم عقـله ضليل
وللرجال أوصاف تعـرف من قـديـم *** عـلمهـا عـنـد المـجـاور والـزمـيـل
بـه رجـل مـا تـأمـنـه عــدّه جـريــم *** انـتـبـه واحـذر تـحـطـه لـك خـلـيــل
وبـه رجـل نـادر وبأخـلاقـه زعـيـم *** صـر صديقـه مـا تـبي غـيـره بـديـل
وبـه رجـل يعجـبـك بالمنظـر وسيـم *** وأن بخنتـه مـا سوى نكاتـت سبيـل
وبـه رجل يفخر بالـلي عظمه رميـم *** ولا نـفـل لـو هـو من اسكندر سليل
وبـه رجـل مشهـور شجاع وعـديـم *** يرخـص بعـمـره اليـا هـاب الـذلـيـل
وبـه رجـل لـه تلتجي لـو جاك ظيـم *** سـاطـي وعـنـده حـمـايـه لـلـدخـيـل
وبـه رجـل مـا يفتهـم قـلـبـه غشيـم *** مـا يـنـاظـر للـخـطـأ خـبـل وهـبـيـل
بالبشـر صـفـوه مـثـل نـقـروح ديـم *** وبالبشـر مـثـل الحـثـالـه والحـميـل
والـمـكـارم بـالـرجـال وبـالـحـريـــم *** أنـشـد مـجـرّب عـلـى قـولـه دلـيــل
والـخـتـام اعـداد مـا هـب الـنـسـيـم *** صلّـوا عـلى صاحـب القـدر الجـليـل
قال عبدالله بن دهيمش بن عبار يسند على الشاعر خلف المحدى الغبين : 352
يا خـلـف أنت بواضح القول خاطبت *** تـبـي الـذي قـصّـر يـقـوم بـمقـامـه
عـن سـب ذربـيـن الفعـايـل تجـنبـت *** وتحث الشيخ الـلي تراخى حـزامـه
قـلت أنتهـض ياشيخ مـادام نـاوبـت *** عـن عـزوتـك خلـّك لربعـك دعامـه
بحقـوق ربعـك ليـت يا شيخ طالبـت *** الـوضـع يـبـي الـلي يفسّـر اكمامـه
عـن القـبـيلـه أبـعـد الـغـم والـكـبـت *** والـلي اشتكى يوليـه كـل اهتـمامـه
وكـانـك لـعـزّة لابـتـك مـا تـسـبـبّـت *** كلن يقول الـلي انسدح وش علامـه
قاله خلف يامن عـلى القـول عاتبت *** اعرف هـدف معنـاه وافهـم مرامـه
يا لايـم أبن خليف لـو كـان جـرّبـت *** قـلـت أبـو خـالـد مـا تطولـه ملامـه
عنـدك خـبـر من شبتي لـيـن شيّبت *** أمـدح جـدود الشيخ وأمـدح عمامه
بالمـدح أمجدهـم ولا يـوم عـذربـت *** والـكـل لـه قـدره وجــل احـتـرامــه
تعـبـت مـن جـمع البحـوث وتعذّبـت *** مجهد من أجل أهل الوفا والشهامه
وحتى الذي مدفون في رملة الخبت *** وحطّوا عليـه مـن الصفايح ردامـه
دونـت لـه تاريـخ ولسيـرتـه جـبـت *** ورفـعـت لـه رايـه بـراس الـعـدامـه
ولاحظت أنا الحسّاد مهما بهم طبت *** يشنون بأسبـاب الجهـل والغشامـه
ضدي تجمّع حلف لو كان ما أذنبت *** مـنهـم أحـفـاد جـدود قـادة جـهـامـه
لو كنت مذنب كان عن غلطتي تبت *** والحـق الأبلـج مـا نخـالـف نظـامـه
والله ما أذكـر يوم عن واجبي غبت *** وأشوف بعض الناس مثـل النعامـه
كتبـت عـن ماضي فخرهم وجاوبت *** عـلـى الـذي يـسـبـهـم فـي كـلامــه
عقب النجاح من الحوسيد حـوربت *** والـلي ظـلـم للشرع جـاز احتـكامـه
هـلّـيـت بـالـلي لـه دعـيّـه ورحـبـت *** والشرع يقـضي بـه زعيـم اليمـامـه
الـلي ظـلمـوا جابهتهـم مـا تهـرّبـت *** وحسيـبـهـم مـولاي يـوم الـقـيـامـه
كافحت الـلي جاروا عليـه ولا هبـت *** صامـد ولا تـطـري عـلي انهـزامـه
وأهـل الحسد والحقد منهم تحـزّبـت *** ولا ارافق الرديان وأهل الرخامـه
حيـث أنني لصحاح الألباب صاحبت *** أجـنـاب ولا عيـال عـم ورحـامــــه
وأهـل المكايـد من عملهم استغربت *** يـبـون الـلي سويـت تطخـم ارقامـه
عجبـت مـن أهـل الجحـود وتعجّبـت *** اهفـوا حقوق الـلي جـزاه الكرامـه
عـن الخـطـأ والعيب للنفس حاسبت *** والعـبـد بـالـرّب الكـريـم اعتصامـه
قلته ومن فضل الولي للهدف صبت *** ومـن جـنّـب الباطـل يعيش بسلامه
شعـري مـديـح بعـزوتي مـا تكسّبت *** ولانـي مـن الـلي يـدعـون بغـرامـه
عـلى جهودي عـنـد الأجواد وجبـّت *** وانصفني اللي من الرجاجيل هامه
قال عبدالله بن دهيمش بن عبار هذه الأبيات يبارك للرّجل الفاضل عبدالله بن
رحيّل الدعيدع بمناسبة أفتتاح مجلسه : 353
الـلـه يعـمـر يا أبـو فـرحان مجلسك *** وعـسـاك يـالـمـنـعـور بـالـعـز دايـم
المجلس الـلي عـز شانـك ونـومسك *** عـادتـك تـعـمـل لـلـنـشـامـا ولايـــم
انـت الـذي جـمـع الـرفـاقـه ينـوسـك *** وعليك من رحيّـل رسوم وعـلايـم
رب الـمـلا يـزيـل هـمّـك وهـاجـســك *** دعـيـت لـك فـي أول العشر صايـم
مجلسك اللي علمه مثل ريحة المسك *** مـا طـبّـه أهـل البلبـلـه والنـمـايـم
سـر للإمـام وسامـك العـرش حارسك *** ولا يبلـغ العـليـا ضعيـف العـزايـم
قال عبدالله بن دهيمش بن عبار هذه الأبيات يسند على البشري بن جبيلان
السويلمي الدهمشي صاحب قروب فرسان عنزة : 355
اشكرك واشكر جميع الرّبع يالبشري *** يا راعي العوجا وجودي ترحّب به
حيث أنـت يا سويلمي للغانمه تشري *** بقروبكم أقـرأ المواضيع وأكتب به
ما يجمع الا عـزيز النفس والعشري *** والحاقد الـلي يدور النّقص ما طبّـه
وحـنـا لـك الـلـه كلنـا بعنـزه خشري *** وافعال الأجواد نفخر به ونعجب به
قال عبدالله بن دهيمش بن عبار هذه القصيدة يثني على الشيخ سعد بن عوده بن رشدان الجعفري
بعد أن سجل مقطع اشاد بجهدي وذكر الواقع جزاه الله خير على عدله وأنصافه : 356
سمعـت منطـوق الشجاع ابن عـوده *** سعـد رفيع الشان من عقـب رشدان
ســعــد كـلام الـحـق قـصـده ومــوده *** صـدح بقول الصّدق مـا قـال بهتـان
سـعـد مـن أصحـاب القلوب الـودوده *** منصف ولا يظلـم من النـاس أنسان
سيـرت سعـد عـنـد الـرجـال محموده *** عسى يـفـداه الـلاّش والنـذل كوبان
قـول الحـقـيـقـه يـشـهـره مـا يـكــوده *** حيثـه رفيـع المنزلـه عـالـي الشان
مـن يسمعـه هـرج الخـطـأ مـا يعـوده *** شرحّه يـنبـه كـل مخطي وغـلطـان
والـلي عـن المجهـود يعـلـن جحـوده *** وضّح لمـن عنـده تـجاهـل ونكـران
مـاهـو مـن أصحاب القلوب الحقـوده *** حيثه من اللي طبعهم فعل الأحسان
يـشـيـد بـالـلي مـا ذخـر مـن جـهـوده *** فـي كتـب ولا فـي قصايـد بشرطان
والـلي حصـل مـفهـوم نـقصه وزوده *** ولا أقـول قـول بـلا دلايـل وبـرهـان
مـشكـور يـالـلي شـاد بـي فـي ردوده *** ما مال أبـو عوده مع فـلان وفـلان
الــوافـي لــلـي مـا يـخـالـف وعــوده *** أبـي اشكره في كل مجلس وديـوان
حـيـثـه عـريـب ويـنـتـبـونـه جــدوده *** أهل الكرم والجود من نسل شيخان
أدنـاهـم الـلـي تـذكـر الـنـاس جـــوده *** يفـرح اليـا جولـه مع الليـل ضيفان
والـكـل مـنهـم مـا تـراخـت عـضوده *** لاهاجت الهيجاء بالأكوان شجعان
يـوم الـرجّـال الـكـل يـفـخـر بــفــوده *** مكسبهـم الخلـفـات زيـنـات الألـبـان
مــفـاخــر الأمـجـاد مـاهـي مـحـدوده *** وشاهدهم الأفعال مـن قـدم الأزمان
نـسـل الـذي طـابـور ربـعــه يـقـوده *** طول المدى شامخ مثل ضلع عرنان
مـفـاخـر الـرشـدان مـاهـي مـعـدوده *** يـوم المجاهد بـيـرقـه فـوق الأمتـان
جـدّه سـعـد هـبـت هـبـايـب سـعـوده *** وحمـل البيرق يوم صولات الأخوان
ومـطـلـق تـقّـدم والـوثـايـق شهـوده *** بطـل وشجاع ومن صناديد فـرسـان
جــاهــد وجـمّــل بـالـفـعـايـل بــدوده *** بـه تفـتخـر عـزوة سـلايـل سليمـان
يـوم أن أبـو تـركـي يـجـهّـز جـنـوده *** خاضوا معـه بالكون فـي كل ميدان
ولـد سليمان أهـل الفخـر مـع جروده *** ضنـا عـلي وأيضـاً سلايـل عـلـيـان
صـقـر الجـزيـره كـان يجمع حشوده *** من ديرة الخفجي إلى شرق جيـزان
يـسـري ويـجـري والـمعـادي يـذوده *** مـن جده الـيا طريف لحدود نجـران
الـرايـه الـخـضـراء عـليـه مـعـقـوده *** رمز الفخر من دور مقرن ومرخان
ثـبـت زعـيـم الشّعب وأعـلن صموده *** يوم الفخر بالسيف والرّمح والـزّان
عـبـدالـعـزيـز الليـث حـصّـن حـدوده *** صان الجـزيـره مـن تجبّـر وطغيـان
وأنـجـب بواسـل مـن نـوادر فـهـوده *** سادوا بحكم الشّرع يوم السّعـد زان
والـيـوم كـلـن مـهـتـنـي فـي رقـــوده *** ننعم بضـل الأمـن في حكـم سلمـان
ومـحـمـد الــلي مـن أشـاوس أسـوده *** ضـد العنيد وضد من بالوطن خـان
قال عبدالله بن دهيمش بن عبار هذه الأبيات يثني على الشيخ سفاح بن
حمود بن شامان شيخ البجايده من السلقا حيث له موقف مشّرف : 357
ماهـي غـريبـه منك يا نسل شامان *** مـا تـقبـل الا قـول مثبـت ومسنود
الناس يا أبـو حـمـود بقلوبهـا ران *** نعـوذ بالله مـن سواد الصدى سـود
الحسـد يـوقـد بالمـعـالـيـق نـيـران *** والناس يا نسل الحمايل بها حقـود
ولا همني يا مسندي كيـد عـدوان *** ولا هم من يشهد على سرق مجهود
ماني لك الله من هل الّظلم زملان *** مـن راد يـفـتـن دونـه البـاب مـردود
اشره على جملة قرايب وصدقان *** والمنصفين اشـرح لهـم كـل مقصود
يشهـد عـلي الـلـه ما قلت بهتـان *** الـرّب يـشهـد والخـلايـق لـي شهـود
والحمد لله حاكـم الشعـب سلمـان *** مـا نـظـلـم وحـكـامـنـا عـزوة سعـود
قال عبدالله بن دهيمش بن عبار هذه القصيدة يثني على الشيخ كاسب بن
عشوي بن مطلق الرشدان من كبار مشايخ الجعافرة من ولد سليمان : 358
يا بن عشوي مشكور يالشيخ كاسب *** شهم وكريم ولـك مع الناس سمعـه
شيـخ ومـحـلّـك بالـمـكـان المنـاسـب *** وعلم الفخر لـك بـه هقاوي ورمعـه
ولـو تختبر بالمرجله ما أنـت راسب *** وشمل القبيلـة دوم تـفـخـر بجـمـعـه
المـجـد وعـلـوم الفضيـلـة مـكـاسـب *** ولالـك بغيـر الطيّـب يا شيـخ طمعـه
وأنـت الـذي لـلنـفـس دايـم تحاسـب *** علمـك شهيـر وللـرجاجـيـل شـمـعـه
يا نسـل الـلي لـعـداه بالسيف لاسب *** اليا هـاب حـومـات الوغى كـل أمـعـه
لا جـوا على الزرفات مثل العياسب *** والـكـل سـيفـه يـشبـه الـبـرق لـمـعـه
وأن جودلت عـوج القوايم سياسب *** مـن حافهـا حصّل عـلى الخشم قمعـه
شــاد بفـخـركـم كــل راوي وناسب *** وعـدوكـم يـذرف مـن الـظـيـم دمـعــه
قال عبدالله بن دهيمش بن عبار هذه الأبيات إلى الأخوة الكرام أسرة الشايعي
من المريزيق من الرباع من الحسني من السلقا بعد أن حظي بالحفاوة والتكريم
من الرجل الفاضل عبدالله الشايعي وأخوانه وأبناء عمه مشكورين : 359
الـشـكـر والـعـرفـان لـعـيـال شـايـع *** أهـل الكـرم والجود وافين الأبـواع
وأخـص عـبـدالـله كـريـم الطـبـايـع *** واخوانـه الـلي منهم السّلم ماضاع
وعـيـال عـمّـه فـعـلـهـم دوم رايــع *** لهـم عـلى العـليـا هقـاوي ومرماع
ديـوانـهـم مـا يـدهـلـه كــل صـايــع *** ولا طـب مجـلسهم منافـق وخـدّاع
منـزالهـم روس الحـيـود الـرفـايـع *** مـا ينزلون بـكـل طامـن مـن القـاع
وأن عـدوا الأجـواد هـم بالـطـلايـع *** أهل ضماير بيض وصدورها وساع
سـلايــل مـريـزيـق مـاهــم نـزايــع *** من حـمـد الأعـلى ومن نسل ربـاع
من أولاد حسـن مشبعت كـل جايـع *** العـزوه الـلي باللقاء تـوفي الصاع
وقت اللّزم يخضع لها الخصم طايع *** سـلـقـا كـعـام الضـّد بالكـون بـتّـاع
وأنـتـم منـازالكـم بـروس الـرفـايـع *** ما تنزلون بـكـل طامـن من الـقـاع
وجـدودكـم مـا يـقـبـلـون الـهـزايـع *** مبطي لهم في خب روضان منجاع
من حـريـمـلا حـلّـوا شمـال البدايع *** في ديـرة بـريـده مصايف ومربـاع
عاشوا مع الـلي جـربـوا كـل خايـع *** فيما مضى عـاداتهم بـوج الأريـاع
مـن كـل ديـره يحضـرون البضايـع *** يـوم البلـد شعبـه مهاجيف واجيـاع
سـاروا قوافـل بـيـن شـاري وبايـع *** ركـب العـقيلي كـنّـه الغـيـم الا زاع
غيـر الذهـب والمـال معهـم ودايـع *** والدرب فيه مقطّعت طرق واسباع
مـا هـابـوا الـلي يـدورون القـلايـع *** ولا اشكل عليهم كـل غـادر وطـمّع
قال عبدالله بن دهيمش بن عبار العنزي هذه الأبيات يشكر الشيخ مطلق ابن
شافي البريعصي المطيري على موقفه النبيل المشّرف : 360
يا أبـو فهـد نهدي جزيل الشكر لـك *** وأنـت الـذي يا شيخ تشكر مواقفـك
عادتك كسب الغـانمـه مـا بـهـا شك *** وطـاريـك مـع كـل القبـايـل يشرفـك
نـاداك جـارك دونـه الـبـاب منصـك *** يـنخـاك والـنخـوة تـثـّور عـواطفـك
بالسجن مـن دونـه شبابيـك وأبلـك *** يـوم التـزم من بـد غيرك استهدفـك
مغـرم سجيـن ومنهظـم ينتظـر فـك *** وفـزعـت لـه بالمـال لـو كـان كلفـك
فكيت من ضكه ظروف الزمن ضك *** وبذلـت مالـك مـا تحسّـب مصارفـك
الطيـب يـا مطـلـق ملـكتـه ويـمـلـك *** وأخـذت من سلم المهادي وصايفـك
حـقـك عـليـنـا نشكـر ونحتـفي بـك *** ونـعـد فضلك يا أبن شافي وننصفك
في بيت اللي معه على الطايله صك *** أبـو عـلي معـروف مـا بـه نعرفـك
هو مزبن الـلي الهم في خاطـره دك *** مـا أقـولها قـصدي تـملـق ولا أفـك
قال عبدالله بن دهيمش بن عبار العنزي هذه القصيدة يسند على سلامة الأشجعي أ
بو مشاري ويثني على قبيلة الأشاجعة من الجلاس فيقول : 361
راكب الـلي ما مسـك طـاره فـدامـه *** مـن طـراز الجيـب يشبـه للنـداوي
مـن طراز الجيب والسايق سـلامـه *** اللـبـيـب الـقـرم عـريـب العـزاوي
الـضـحـى مـداد مـن دار الـيـمـامـه *** وأتـجـه مشـمـل تعـنـى للـصـداوي
مع طريق رماح من شرق الثمامـه *** مقصده نـزل عـلى شوفه شفـاوي
عـانـي لأهـل الـمـروة والشـهـامـه *** نـافـلـيـن بـالـصـيـاني والـقـهـاوي
عـنـدهـم للضـيـف تقـديـر وكرامـه *** من نسل مشجع عطيبين الأهـاوي
بالقـصى رجالهـم يرخص طعـامـه *** جـودهـم مـبـطي حكابـه كـل راوي
مـا يـدق بساسهـم عـرق الرخامـه *** مـن بـني وايـل بعـيـديـن الهقـاوي
كـل منهـم بالفـخـر مشمـوخ هـامـه *** لـو أعـد شخوصهم ماني بـقـاوي
سـالميـن مـن الشمـاتـه والـمـلامـه *** كـلهـم صـفـوة قـليـليـن المسـاوي
كـل منـهـم بالـفخـر جـل اهـتـمامـه *** مـا يجـد خملات مـن دار الشناوي
كـل مـنـهـم حـاز قـدره وأحـتـرامـه *** وكـل منهـم بالفضيلـه لـه مـنـاوي
شامخيـن بـيـوتـهـم مـثـل العـدامـه *** مع بزوغ النور تسمع حس ماوي
يفتخـر من هـم خوالـه أو عـمامـه *** خـص كـانـه صـار بالهيـه نخـاوي
فزعت المضيوم كان الوقت ضامه *** ملـتجـأ وزبـن المجـنى والجـلاوي
بالمفـالـي نـوقـهـم يشـمخ سنـامـه *** دونـها الشجعان تسجـع بالحداوي
كان جاهم من تغطرس بـه غشامـه *** يرجع لرشده عقب ما كان غـاوي
مـن قـرب من ذودهم تـبلا عظامـه *** مـابـهـا تقـديـم للشـرطـة شكـاوي
كـل فارس بالـوغى جـرد احسامـه *** يـأخـذون الحـق بحـدود الـرهـاوي
يوم عصر الحرب يحمون الجهامه *** بالمشوك مـا يسوقـون الـرشـاوي
الجهل زوّع وجـاء عصـر الفهامـه *** من فضل رب الملأ جزل العطاوي
وأحمـد المولى عـلينـا الـعـز دامـه *** تحت حكم اللي على السنة حماوي
قـالهـا الـلي بطيبهـم يجهـر كـلامـه *** لا مـجـامـل بـالـكـلام ولا رجــاوي
الصخى والجـود لـه رمـز وعلامـه *** صـاحبـه مـنـهـوم للعـليـا هـواوي
الصخي حوش الثناء غايـة مرامـه *** كان بـار الـلي عـلى مالـه غـلاوي
ومن يدور العـز عـز الـلـه مـقـامـه *** والـردي كوبـان فـي مثـواه ثـاوي
مـن تـردى مكسبه عـيـب ونـدامـه *** ومن بغى الطولات يصعد للعلاوي
لا تحقرص وآخـر الملبوس خـامـه *** مـن قبل لا تحط بالبـرزخ خـلاوي
الـزمـن مـيّـال مـا يـعـرف نـظـامـه *** ولـو صفـت دنيـاك تنـذر بالبـلاوي
مـا صفـت للشاه عـريـق الـزعامه *** والخديوي ما صفت له والطحاوي
وأذكـر الـلـه فـي بـدايتـه وختـامـه *** ثـم أصلي عـلى مـن سـن الفتـاوي
يتبع
التعديل الأخير تم بواسطة عبدالله بن عبار ; 01-07-2025 الساعة 04:56 PM
|