تابع
هذه الأبيات من شعر عبدالله بن دهيمش بن عبار أهداء للرجل الفاضل الرايف
الصقيري أبو ريان وجميع أهل الأستراحه : 321
نـويـت أوجـه جـزيــل الـشّكـر للـرايـف
شـرواه نـال الفخـر والمـرجـلـه كـفـوه
أبـو ريــان الـلي الـيـا جـالـه الـضايـف
يـبـهـج صـدر زايـره ويـرحّـب بـلـفـوه
مـا رافـق الخـايـب ولا عاشـر الهـايـف
الا ولا دوّر عـلـى الصـاحـب الـهـفـوه
مـع ربـع مـا سولفـوا بالمنطق الزايـف
بيض الضماير ما حصل بينهـم جـفـوه
مـا مـعـهـم الـلي لنفسه بالطغّـى شايـف
ولا يجـالسون الشقي جميعهم صـفـوه
جـليسهـم يـسـمـر مـع الـيـل مـتـكـايـف
مبسوط ما تـطـري عـلى بـالـه الغـفـوه
الـكـل مـنهـم بـفـعـل الـمـرجلـه نـايــف
ولا منهـم الـلي عـادتـه يشرب القـفـوه
والكـل منهـم عـن الماجوب مـا يسايف
مـن زارهـم حـتّى خـمالـه وجـب رفـوه
يـفـداهـم الـلي يمـوق لعـزوتـه عـايـف
يسرح ويـمـرح مـع الملسـون والأفـوه
مـن عـزوة تـدخـل المضيوم والخايـف
والـجـالـي تـزبـنـه حـتّـى يـجـي عـفـوه
مـثـل الجـبـل لاهـبهـب الـلافـح اللايـف
بـه ضـل بالقـيـض وبـه بالشتـاء دفـوه
قال عبدالله بن عبار هذه الأبيات يهني سعد بن زعل بمناسبة فوزه : 322
سعـد سعـد يا عسى الـلـه يسعده *** ويا عسى يعيش في عيشٍ هني
فـاز بالمـجـلـس وربـعـه مسنـده *** حـيـث صـف بجـانبـه كـل يـمني
ويــوم لـلـويـلان لــوّح فـي يـده *** حـوضبوا عـنـاز مـا فـيهم ونـي
خاض تلك المعترك ماهو وحده *** كـل عـنـزي لـه ولـد عـمن دنـي
أبـي أهني زعـل في فـوز ولـده *** ولوما عندي ظـرف والله لاعني
كـل مـن عـرفه شهد لـه وحمده *** لـو مدحته قيل عن مدحي غني
وقال عبدالله بن عبار هذه الأبيات يثني على الشيخ متعب بن عبدالهادي
الفققي حفيد مؤدب قبيلة السبعه والرجل الفاضل محمد بن عايد بن دوهان
لمواقفهم المشرفة حفيد المهوهي : 323
مشكور يا متعب على فعل الإحسان *** تستاهـل التمجيـد والمـدح بـك لاق
جـدك عـقيـد لعـزوتـه يـوم الأكـوان *** وله الأدب مبـطي عـلى جـمع دلاق
من عـلي الأول بالفخـر فعـلكم بـان *** يـنهـم عـلى نـمـرا تشابه جبل ساق
وأشكر محمد من صماصيم دوهان *** قرم العيال اللي على الطيب مشتـاق
نسل الذي بذراف مع جنـد عثمـان *** خاطر بغالي الروح يـوم العـدو بـاق
كبير سن وسامك العرش لـه عـان *** صان الشرف والمعتدي باد وانعـاق
وأعم في شكري هل القدر والشان *** شكراً جزيل من الضماير والأعمـاق
يشمل جميع الربع ذربين الأيـمـان *** لابـة هـل العـرفـا عـريـبين الأعـراق
قال عبدالله بن دهيمش بن عبار يسند على الشيخ متعب بن عبدالهادي الفققي : 324
وجهـت منظومي لقـوي العـزيمه *** الشيخ الـلي جـّده يكـف الطـلايع
أسند على متعب عسى الله يديمه *** ويحميه ربّه من شـرور الفجايع
أبـو عـبـدالـلـه من حمايل كريمه *** شيخ الدوام أهل الرباع الوسايع
أنشدك يا راعـي الفكـار السليمـه *** حـيثـك سلايـل حـافظين الـودايع
كيف الغضنفر صار ثعـلب نديمـه *** كيف الخزي لهـل الوجاهه يلايع
كيف الـدنـي هـبّـت هبايب نسيمه *** كيف الردي بالناس له علم ذايع
كيـف الغـني يسعى يـدور الغنيمه *** كيف يهـرف كنّه من الفقر جايع
كيف الـتقي مالـه وقـار وحشيمه *** كيـف الوقـار لكـل فـاسد وصايع
كيـف النقي ماله مع الناس قيمـه *** كيـف الفخـر نـالـه خبيث الطبايع
كيف أصبح التقدير لأهـل النميمه *** كيف أرتفع مـن كـان للحـظ بايع
كيف الخيانـه مـا تسمّي جـريـمه *** كيف أستعـز اللي يسوي فضايع
كيف الـبـري يتهم بظـلم وظـليمه *** كيف الوساطه خلّت الحق ضايع
كيف الغـريـم بظلم يفلج غـريمـه *** كيـف الضمير يباع مثـل البضايع
كيـف المحاجج ما يقابل خصيمه *** كيـف التحايـل والدجـل والخـدايع
كيف المحقق كـف سينه وجيـمـه *** كيـف البشـر مـا تحتـكم للشرايع
كيف الـرجل يقبل بغبن وهضيمه *** كيف ايتحمّل جـور والعـدل شايع
كيف الذي ما داس عيب وثليمـه *** كيـف أطبـاه الـلي يـدور الهـزايع
كيف الذي يضرب عميمه طميمه *** كيف استحث القوم مع كـل خايع
كيف المحرّض شب نار الجحيمه *** كيف أؤقـد الفتـنه بقـدح الولايـع
كيف يغوون أهل القلوب الفهيمه *** كيف الرجـل يخـدع وينقـاد طايع
كيف القروم أهل الفعول العظيمه *** كيـف أستخف أحفادهم كـل مايع
كيف الرجال الـلي تبوج الخريمه *** كيف انتمـوا للحلف مثـل النزايع
كيـف الحمايل ترتضي بالهزيمـه *** كيف الجدود اليوم صارت قـلايع
كيف أستعاروا جـد لابـه صميمـه *** كيـف جحـدوا تاريخها والـوقايع
كيـف التعـبّث بالأصول القـديـمـه *** كيف المـزّور منهجـه قـيـل رايع
كيـف أقـتناع الـلي افكاره حكيمه *** كيـف التجاهل بعـد كشف القنايع
قـلتـه وهيضني خـطـات اللخيـمه *** الظـالـم الـلي بالخـطأ لـه صنـايع
يا عـل مـن يظلـم تصيحه حريمه *** نطلب عسى تبكي عـليـه الـربايع
وقال عبدالله بن دهيمش بن عبار هذه الأبيات في الحث على اعتاق رقبة سعيد بن عواد الدمجاني : 325
الشيـخ نـايـف أصـدر الـيـوم نـشـره *** نسل أخو بقشه من صناديد الأجواد
شـيـخ الشـمـل يـحـث وايـل ويـشـره *** ينخى عـنزة لأجـل سعيد ابن عـواد
رهن السجن مطلوب خمسه وعشره *** قـريـبـكـم فـكـوه مـن سـيـف جـّلاد
يا ربـعـنـا مـا تـزهـق الـروح دشـره *** وبيـوت وايـل شامخه مثل الأطواد
أنـتـم مـلاذ الـلـي زمـانـه يـحـشــره *** بالمـال جـودوا يا عـريبيـن الأجداد
حـيـث الـردى كـلـن يـذمّـه بـقـشره *** والجـود يشعـر بالفخـر كـل من جاد
قال عبدالله بن دهيمش بن عبار هذه القصيدة يسند على هديس بن صبر بن دخين العريفي وهو من أفاضل رجال عنزه : 326
مـبـداي في ذكـر الـولي منشي الغـيم *** محـيي هـوامـيـد الجـذوع الميابيس
مـنزل هـواشيل السحايب مـن الـديـم *** بالمزن الـلي غيثه يغيث المغاريس
رب الـخـلايـق قـسّـم الـرزق تـقسيـم *** ولا عـادوا الـلي يطلبونـه مـفـاليس
باسمـه بـديـت أنـظـّم القـاف تـنظيـم *** وسجـلت مافي خـاطـري بالكراريس
يسنـد عـلى لـلي بالكـرم نـال تـنعيـم *** أن قيل من هو قلت أبو نايف هديس
الفـاهـم الـلـي يـقيّـم الـقـاف تـقـيـيـم ** ذكي وفـطيـن يـقيّس الهـرج تقييس
أبن صبّر صمم عـلى الطيـب تصميم *** وعلى المراجل كرس الجهد تكريس
من طلعته ماهـو عـن الموجبـه نيـم *** عسى فـداه أهـل الـوجـيـه المعابيس
صرنا يا أبو نايف غضاب ومكاضيم *** بأسباب حوك الكيـد وسط الكواليس
الـلـي يبـون لـبـاذل الـجـهـد تحطيـم *** الحـاقـديـن أشبـاه عـوجـان وغـليس
جهـدي عـليه مـن أهـل البـغي تعتيم *** الـلـه حسيـب مشربكيـن الـلـوالـيس
كـانـه جحـد بعـض الرجال الخماخيم *** أهـل الـدنس والـدنفسه والدحاويس
مجـدتـهـم مـابـي مـعـونـه وتـكـريـم *** غير الفـخـر فـي كاسبيـن النـواميس
كـرامـتي عـنـد الـرجـال الشـغـاميـم *** تعبير في صدق المشاعر واحاسيس
لاشك أبـي كـف الـهـروج الهـذاريـم *** الـلـي تـروّج مـن كـلام الـمـنـاحـيس
الـشـلـه الـلـي يـنـشـرون الـتعـاميـم *** سـود القلوب الـلي تعـلـواهـم إبليس
الـلـه حـسيـب الـلي يـدور المثـالـيـم *** قـلبه رعـاه الحسد والعقل بـه خيس
ياحيف أشوف اليوم حصن النواهيم *** صارت هـلايب ما تميّـز من السيس
ويا حيف يا فروخ الحرار الصواريم *** مـاكن مـجـنـاهـم مـواكـر قـرانـيـس
ويا حيف نسل اللي يقـود الـدواهيـم *** دنّس علوم شخوص الأجداد تـدنيس
الـلي نـريـده بالـفـزع يجـلـي الظـيـم *** دنّـق بـراسـه يستـشيـر الـهـلابـيـس
مـايـرفـع الطـامـن مـدايـح وتـفخـيـم *** ولا يطـمّن العـالي هـروج البـلاليس
مـن طـاوع الكـذبان عـلـط الـزراديـم *** سلك طريق اللاّش والنـذل والهيس
من كـان عنده سين عندي له الجيـم *** يـكبـح جـمـاح الـلي يضلـل بـتدليس
أصـل عـنـزه مـا هـو تلفّـق وترهيـم *** أصل أصـل ماهـو هـقاوي وتوهيس
مــن وايــل الأول وجــلان واهـمـيـم *** ضـد المعـادي فـي زمـان المتـاريس
فـوارس الهيـجـاء بـوقـت المـلازيـم *** عصر النضا والخيل والكنّس العيس
لـهـم مـفـاخـر يـوم بـوج المخـاريـم *** ولـهـم فـعـايـل بـالسنيـن المـرامـيس
عـزوة ربـيعـه مـن سلايـل إبراهيـم *** نجـد سكنوها من بعـد طسم وجديس
ومـن يجحـد التـاريـخ نعـطيـه تعـليم *** أصل عنـزه مـاهـو تحالف وتجنيس
قال عبدالله بن دهيمش بن عبار هذه القصيدة يثني على الرجل الفاضل
صاحب الكرم المعروف هديس بن صبر بن دخين العريفي أبو نايف : 327
أبـي أمـدح الـلي كامـلات وصـوفـه *** حاتـم هـل العـرفا هديس أبـو نايـف
هـو الكـريـم الـلي تهاشـل ضيوفـه *** يـكـرم ولا تـشكـل عـلـيـه الكـلايـف
دنـيـاه مـا يـبـدي عـلـيهـا حسـوفـه *** ينفق كـرم ماهـو من الفقـر خـايـف
جـور الزمن ما يشتكي من ظروفـه *** حيثه من اصحاب النفوس العفايف
مـا وفّـر الـلـي يـمـسكـنـه اكـفـوفـه *** ولا هـو بمـالـه ماكـر الجـود رايـف
مـن يـوم شـب الموجبه ما تطـوفـه *** ضـاري لتقليـط الشّحـم والـرغايـف
كم كبش حـنـا بأحمـر الّـدم صـوفـه *** جـاب السّميـن ولا يجـيـب العذايـف
دايـم يـجـيـه أجنـاب ماهي محفوفه *** تـدهـل مضيفـه مـن جميع الطوايف
مـفـتـوح بـابـه مـن يـمـرّه يـشوفـه *** ولـه مجلسٍ فـيـه العلـوم الطرايـف
يـفـرح بـزواره ونـفـسـه عـطـوفــه *** ولاهو من لـلي عـن لزومه يسايف
عـوايـده مـبـطي قـهـوتـه يـحــوفـه *** والـبـن الأشـقـر مـن يشفّـه تكايـف
غيـر الصخى ما ياجد الحقـد جوفـه *** ولا عاشر عفـون الرجال الهدايـف
خصـايلـه عـنـد الـرجـال مـعـروفـه *** دايـم عـن الـهـزلـه يـضـم الشفايـف
نفسه عـن عـلـوم الـرذايـل عيوفـه *** ولـه مـنـزلـه مـا طالهـا كـل هـايـف
مـرفـوع راس ولا تـدلـبـح اكتـوفـه *** ولاهو من الـلي ينتحل مجـد زايـف
القـاف تقصـر عـن مديحه حروفـه *** توصيف طيبه ما تحصاه الصحايف
هذه الأبيات قلتها شكر وثناء لأبناء عبدالعزيز المقبل حيث أنهم يكتبون
دعوة عامة في كل يوم بعنوان ( اقلطوا الله يحييكم القهوة زاهبة فقلت : 328
اهـل مضافـه كنهـا طـويـق مشرفـه *** رجـالهـم بالطـيـب تسمـو مـذاهـبـه
ديـوانـهـم مـفـتـوح والـكـل يـعـرفـه *** وفي كل وقت قهوة الأجواد زاهبـه
سـاس الـكـرم مـا حـسّبـوا للتكلـفـه *** رجـالـهـم ربـه مـن الطيـب واهـبـه
من نسل مقبل يقري الضيف منسفه *** الطرقـي اليـا جـاه يـمـلأ مـزاهـبـه
يـامـا نصـاه الـلي رحـولـه يـشعـفـه *** عابـر سبيل وحامي القيض لاهـبـه
يـوم السنـيـن القـاسيـات المجحـفـه *** عصر الجفاومن حصّل الفود ناهبه
جـدهـم قمقـومـه مـن البـن يعـلـفـه *** والنجـر يضبح تقـل ناقـوس راهبـه
قال عبدالله بن دهيمش بن عبار هذه الأبيات يثني على رجل الأعمال خليل بن
عايد البري والمهندس مشعل بن عبدالله العبار حيث لهم مواقف مشرفه : 329
هاضت شجـوني وسجـلـت القريض *** والـقـوافي بالمـعـاني لـه عـروض
أمـتــدح خـلـيـل بـالـخـط الـعـريـض *** والـكـلام أوضّـحـه مـابـه غـمـوض
أبـن عـايـد قـرم لـه صفحات بـيـض *** دوم راسه مرتفع ما هـو مخفوض
مـن طهارت مهجتـه مـالـه بغـيـض *** أشـهـد أنـه دوم رابـح ومحـظوض
مجهـد بـوقـت الشتاء وأيـام قـيـض *** مـا جـمع مـالـه عطايا ولا قـروض
يـوم خطـو الـلاّش ينـزل للحضيض *** عادته صوب العـلا ينهض نهـوض
أبـو عـبـدالـلـه فـخـرعـزوة فـريض *** طـيّـب وقـدره مـع الـرّبع محفوض
حـيـث نـبع الجـود من كـفّـه يفيـض *** بالكـرم مثـل الخمايل وسـط روض
ومشعل الـلي شع نـوره لـه وميض *** بالدجّـا ضـّوه عـن المشعل يعـوض
باللـّزم يرسي ولا يعـرف الفضيض *** عنده الواجب مثـل خمس الفروض
وأن تـكـلّـم مـالـمـنـطـوقـه نـقـيـض *** وفي هـذاريـم السوالف ما يخـوض
حيص في شيل الثّقل ماله جضيض *** كـنّـه بـلـيهـان فـي حـمـلـه يـنـوض
مـن ورد هـدّاج جـمّــه مـا يـغـيـض *** يـروي الظـامي ويـمـلأ كـل حـوض
ومن يـلـم الشمل لا يصبح شضيض *** يا بعد من هو عن الواجب ربوض
يـا عـسى يـفـداكـم الـفـض الغليض *** بـس يهـرف كنّـه الغلـث العضوض
الحـقـود وصاحب القـلـب المريـض *** مخبـث ويلسع مثـل لسـع البعـوض
قال عبدالله بن دهيمش بن عبار هذه الأبيات يثني على الرجل الفاضل خليل بن عايد البري
الضحوي احيث أن هذا الرجل له مواقف تشهد له في الكرم وبعد النظر وحبّه للجماعة : 330
رفع روسنا خليل أبن عـايـد البـري *** حميد السجايا بالمراجل ظهر علمه
من طريف للخفجي اليا ديرة المري *** تشهـد عـلى طيبـه الشياب والغلمه
كريم وصخي ما كان للمدح متحرّي *** من الخايب النمام ما يسمع الكلمـه
ما شانت اخلاقه ولا قيـل لـه شـرّي *** عزيزالمقام ومشتهر صدقه وحلمه
وعن واجبه ماهو لك الـلـه متوري *** الطيب والمعروف هوطبعه وسلمه
ماهو من الطّيب والمعروف متبري *** أبـو عبدالله للخـوي فـزعتـه ولـمـه
خليـل مثـل الحيـد بـه ظـل وايـذري *** شرواه تعتز بـه وقـت اللّـزم زلـمـه
يفداه الـلي بالناس شامت ومتزري *** الـلي القـرايب تتقي جـوره وظـلمـه
عفن الرجال اللي من الخير متعري *** يذكـر عيوب الناس ما بـرّق بثلمـه
أبي أمدح اللي لفعل الطيب متجري *** لـه الشكـر والسـن الحسّـاد منبلـمه
أبياتي اجهـر بهـا مـا أقولها سـري *** يـبـثـهـا مـنـتـج الأفـلام مـع فـلـمــه
ما نلبس الثوب كان الثوب متهـري *** ما يستر العضد والأردان منصلمه
يتبع
التعديل الأخير تم بواسطة عبدالله بن عبار ; 06-30-2022 الساعة 08:27 AM
|