هذي السالفة تدور حول رجل شايب صاحب مال

وجاه وله ولد وحيد ويوم اقتربت وفاته وعلى فراش الموت نادى ولده

وقال يا وليدي بوصيك بثلاث وصايا ابيك تحفظها وتعمل بها .

قال ولده:ابشر يابوي

قال الأبو:الوصيه الاولى :ابن لك بيت في كل ديرة

والوصيه الثانية :ام البنتي وام الكنتي وام المسمار الي ينتي لا تزوجها

والوصيه الثالثة :لاتخون من آمنك لو كان خاين

وذا ضاقت عليك السنين وحتجت شي عليك بصحيبي فلان في الديرة الفلانية

قله انا ولد هاك الرجال ون شالله مايقصر معك.

بعد هذي الوصايا الثلاث توفى الأبو وحتار الولد في وصايا ابوه .

راح الولد وبنى له بيت في الشمال والجنوب والشرق والغرب

المهم سوى مثل ماقال له ابوه وبنى بيت في كل ديرة.

بعد كم شهر نوى الولد الزواج وكان في الديرة عجيز ولها بنت مزيونة

مطلقة ولها ولد من زوجها الاول ويوم سمعت انه يبي الزواج جته

وقامت تمدح في بنتها له وعن زينها لين اقنعته في الزواج من بنتها

وفي نهاية تزوج الولد بنت العجيز المطلقة .

وبعد كم سنه قالت العجيز لبنتها يابنتى افطنى في العلم الى اقوله لكِ

انا مازوجتك الرجل هذا الى طمع في ماله وبيكِ تتسلطين عليه وتحفضين كل ماله لولدك

كل ماجاب مال من تجارتة تاخذينها منه و تحفضينها لولدك

بنيتى يابنتي لا تنسين ولدك

قالت البنت :ابشري يمه.

مرت السنين وكل ماجاب الولد مال وربح من تجارته اخذتها زوجته

وحجتها انها تبي تحفظ ماله وسوت الزوجة خزانة في ركن المجلس و بنت عليها

تكنز فيها الاموال وهو مايعرف عن الخزانة شي .

مرت السنين والولد احواله المالية صارت تعبانة

وراح وباع بيته الى في الشمال ويوم جاب فلوس البيت اخذته منه زوجته

مثل العادة وتكنزه في الخزانة وتعطي زوجها قدر يسير من المال يتصرف فيه .

انتهت السنة ورجع الوضع على ماكان راح الولد وباع بيته الى في الجنوب

وعلى هذي الحال لين باع كل مايملك من بيوت وزوجته تاخذ منة وتكنز

في هالخزانة وكل ماسألها زوجها وين المال الى اعطيتك اياه تعذرت انها

صرفته في لاوازم البيت .

مرت السنة وطلع الولد ماعنده مايملك شي من مال وتذكر وصيةابوه

يوم يقول اذا احتجت شي وضاقت عليك الدنيا عليك بصحيبي فلان.

ويوم من الايام بلغ الولد زوجته وقال لها انا مسافر ادور رزق الله

شد على مطيته وحط زهابه عليها وسافر لديرة صحيب ابوه.

ويوم وصل ديرة صحيب ابوه قلط عنده

وقال انا ولد هاكالرجال وابوي يطلبك الحل توفى

وقبل وفاته وصاني بثلاث وصايا.

الاولى :قال لي ابن لك بيت في كل ديرة

والثانية : ام البنتى وام الكنتى وام المسمار الى ينتى لا تزوجها

والثالثة :لا تخون من آمنك لو كان خاين

وسويت مثل ماقال لي ابوي بنيت لي بيت في كل ديرة وتزوجت حرمة مطلقة

ولها ولد وبعد زواجي منها تغيرت احولي المادية وصرت بعد كم سنة ماملك

شي وجيتك انا ومالى الا الله ثم انت.

قال صحيب ابوه :

هلا فيك وحياك الله والله يرحم ابوك عزالله نعم الصاحب

لكن وش لي اذا رديت مالك لك

قال الولد :والله لصير ولد لك طول حياتي

قام صحيب ابوه ونادى بناته الخمس

وقال للولد اختر من هن وحدة زوجتن لك اختار الولد وحدة منهن .

قال صحيب ابوه :

اللهم انى وهبتها لك ( كلمة كانت تقوم مكان عقد النكاح )

وقال له ابيك تحفظ الي بقوله لك

ابيك ترجع لديرتك انت وزوجتك واذا سالتك زوجتك وش جبت من سفرتك

من مال قل لها ماجبت الا هذي العبدة الخادمة الصماء البكماء.

ونتى يابنيتى

قالت بنته :سم يبه

روحى واضربي جسدك بالفحم لين يصير لونه اسود وبيك اذا وصلتم بيت

زوجك لا تكلمين ولا كلمة على انك صماء بكماء وابيكِ تسمعين وش تقول

زوجة زوجك من كلام في غيابه وتخبرين بها زوجك اذا رجع.

قالت البنت :ابشر يبه.

قال صحيب ابوه :

ونت ياولدي امانة الله وامانتك لا تكشف ستر بنتى

( المقصود بة الجماع )لين ترجعون

قال الولد :ابشر ياعمى

سافر الولد هو زوجته يم ديرته ويوم وصل بيته قابلته زوجته

وقالت له:بشرعساك في طرقتك جبت لنا مال

قال الولد: لا والله ماجبت من عند صحيب ابوي الا هذي العبدة الصماء البكماء

ابيها تخدم لنا

قالت زوجتة:وحنى عندنا شي ناكله عشان نصرف على هذي الخادمة

قال الولد:الشكوة لله هذا الي حصلته في طرقتى( رحلته)

المهم صارت الخادمة كل شي تقوله زوجة عمها من كلام لمها تخبر به عمها الى هو في الاصل زوجها .

ويوم من الايام جت العجيز ام زوجت الولد لبنتها

وقالت لها يابنيتى المال كله انتى كانزته في الخزانه الى في ركن المجلس

لولدك ورجلك مايملك شي ولا نستفيد منه شي

ابيكِ تطلبين الطلاق منه عسى انة يطلقكِ وتقولي له انت ماتملك شي يالفقير تصرف علينا

وذا طلقكِ زوجتك زوجك الاول صار ميسور الحال

والخادمة جالسة جنبهن تسمع وش يقولون.

المهم يوم جا تالي الليل راحت الخدامة يم عمها( زوجها) وقالت له

كل السالفة

قال الحين عرفت وين ضاع كل مالى .

يوم اصبح الصبح جت زوجته يمه تشتكي الحالة والفقر

وتطلب منه الطلاق

قال لها زوجها ماعندي الا ابيع البيت واليوم العصر ابجيب الدلال

وابيع البيت

راحت الزوجة وبلغت امها العجيز

وقالت لها يايمه زوجى يبي يبيع البيت والبيت كانزه المال فيه لولدي تصرفي لا يفوتكم البيت

قالت امها:ابشري ابروح يم زوجك الاول اخليه يحضر المزاد على البيت

عشان يشتريه

راحت العجيز يم زوج بنتها الاول

وقالت له:يابو فلان زوج بنتى يبي يبيع البيت والبيت بنتى كانزه المال فيه

لولدك لا يفوتك البيت زود فيه لين تشتريه تكفى يابو فلان

قال : ابزود في البيت لين اشتريه

المهم يوم جا العصر وحضر الدلال يبيع البيت حضر الولد وتجار الديرة

وحضر زوج بنت العجيز الاول

بدا المزاد وكل مازودا تجار الديرة زود عليهم زوج بنت العجيز الاول

لين وقف البيت علية وشراه

قال الولد :عندي شرط وهو ماسلمه البيت الا بعد ثلاث ايام لين احصل بيت ثاني

اسكن فيه

قال المشتري( زوج زوجتة الاول): مايخالف .

رجع الولد للبيت وطلق زوجته وطردها يم بيت امها

وراح ودخل المجلس وكسر ركن المجلس ويوم كسره

حصل الجنيهات والفلوس والذهب مكنوز فيه

قال لزوجتة( الخادمة):عطينى خيشة اشيل فيها المال

قالت زوجته: ابشر

المهم اخذ الولد المال كله الى في الخزانة وحمل الولد على المطية

وشال المال عليها وقفل البيت وراح يم الدلال

وقال يافلان خذ مفاتيح البيت عطها المشتري ونا ترى لقيت بيت في جنوب

الديرة

وسرى الولد هو وزوجته من الديرة متوجهين يم عمه

يوم جا الصبح ودخل المشتري( زوج بنت العجيز الاول) هو والعجيز وبنتها

وولدها البيت حصلوا المال الى فيه كله ماخوذ وصاحب البيت مايدرون

وين راح اختفى من الديرة.


المهم يوم مشو الولد وزوجته حوالى ثلاث ايام بالياليها ومروا غديرا مليان ماء

نزل الولد عن مطيته وبركها وقام وشب ناره وسوا قهوته وراحت زوجته

يم الغدير وتسبحت فيه ونظفت ماعليها من فحم وصارت مثل قمر اربعطعش

وجت تمشي لين جلست عند زوجها.

$$$ ( وقالت له ) : $$$

انا زوجتك رحت معك وجيت وماعطيتنى حق من حقوقي عليك

قال زوجها يابنت الحلال ابوكِ قال لى امانة الله ثم امانتك لا تكشف سترها

من يوم تروح لين ترجع.

قالت له: والله اذا ماتعطينى هذا الحق انى ماعيش معك طول حياتي

قال زوجها : الشكوة لله

المهم يوم وصلوا ديرة عمه

قال عمه : من طول الغيبات جاب الغنايم

قال الولد : ابشر ياعمي بالغنايم والمال والحلال كله

قال عمه : بشر عساك ماكشفت ستر زوجتك

قال الولد: لاولله ياعمى هي الى غصبتى على نفسها امس

قال عمه: ياخاين الامانة قم ياصبى دخل يده مع فتحة الجدار هذا

ورح من الجهة الثانية واقطع يده

يوم دخل الولد يده مع فتحة الجدار جت زوجته وطلعت يد زوجها ودخلت يدها

مكان يده

وقالت: يابوي لو قطعت يده كيف تبيه ياكلنى ويصرف علي.

قال ابوها: شفت ياولدي انت مامسكت من وصايا ابوك شي

يوم يقول: ابن لك بيت في كل ديرة

قصدة معرفة الرجال تعرف على الرجال الطيبة في كل ديرة تحتاجهم

ويوم يقول:

ام البنتي وام الكنتي وام المسمار الي ينتي لاتزوجها

قصدة لاتزوج الى لها بنت من زوجها الاول وكل شوي رايحه يم بنتها تمشط شعرها

او تفقد احوالها

ولا تزوج ام الكنتى الى تزوجت واحد قبلك وكل شوي تعايرك وتقول لك

لو كنت مثل فلان فلان كان يسوي كذا وكذا

وام المسمار الي يانتي لاتزوج الى لها ولد وكل حلالك تحفظه لولدها

عليك بالبكر الى قلبها على قلبلك وانت شفت بنتى وش سوت لجلك

اما قول ابوك :

لا تخون من امنك لو كانا خاين

وانت خنتنى يوم قلت لك لا تكشف ستر بنتى

لكن تراك مسامح ياولدي مدام حلالك رجع لك ون شالله تكون استفدت

جميله جدا هذه القصه وفيها من الحكمه الشئ الكثير

بارك الله فيك يابو زياد

بارك الله فيك
قصة رائعة من رائع وفيها من الحكم كثيرة

لك مني فائق اليقدير

صاعد المصلوخي

شكرأ شكرأ يا أبو زياد قصة

جميلة جدأ وفيها من الحكم الحلوه والجميلة

ابو زياد بارك الله فيك وتقبل مني كل المودة والحترام
&&&&&&&بس أبي منك طلب ممكن تكثرلنا مثل هذهي القصص
وشكرأ&&&&&&&&&&&&&&&&&&

بارك الله فيك و جزاك الجنة و والديك

مشكور ابو زياد . على هذ القصه التي تحمل من العبر الكثير ولكن صار الوفاء في هذا العصر من المستحيلات

أخواني الأعزاء
مشكورين على المرور والكلام الجميل
وارجو ان يكون هدفنا جميعاً الأرتقاء بالمنتدى لما فيه الفايده للعموم
تقبلوا مني كل الأحترام والتقدير
(

وابشر ياخي رياض باللي يرضيك

)

اهلله يجزاك بالخيير يبو زياد واقسم لك بالله اني بكيت لأن الوصيه حقت الوالد حدث لي نفسها بالضبط ولكن على موضوع غير وفي دوله ثانيه وكان والدي رحمه الله غائبا عن هذا الشخص حوالي او اكثر من 16سنه ولابينهم اتصال الى ان توفى الوالد ولكن صداقتهم اصحاب اغنام وبدو راحلين ونازلين سوى ويوم جيته وقلت انا ابن هك الرجال فزبي والله ماانسى كلماته من ضمنهن يابعد خشيمي يابعد عويناتي يعني يصغر كل كلمه من شدة محبته للوالد وفرجها الله ثم ذلك الشخص واخذت حاجتي عندما اوصاني والدي كنت غير آبه لكلامه كنت فقط مصغي له كي ارضيه ووصاني على شخص ثاني بس ماحفظت الا هذا وندمت ندما كبيرا على عدم اخذ وصات الوالد بالجد ولكن هذا الشخص رحمه الله مازلت مع ابنائه على اتصال واعتبرهم اخوان لي وهم كذلك حتى ان اختهم هنا شكت لهم زوجها فقالو لها ياتيك رجل اسمه فهيدالشنو تراه اخوك سولفي معه كل شي وطيعيه حتى لوكان رأيه غير صائب وفعلا اخبروني ومن ساعتي ذهبت وساويت الامور وشرحت لزوجها علاقتي بهم واناالمسؤل عن الانثى هذه وسبحان الله زوجها صار كأنه اخو وتغيركليا مع الزوجه وكل تقريبا شهر شهرين يسيرون علينا والحمدالله مابه طريفه ولكن قصتك فعلا يجب ان نتخذها بعين الاعتبار وشكرا لك يابو زياد

انا قلت حدث لي نفس القصه اللي ذكرته واقصد في بند واد وصيه وحده وليس كل الوصايا لأني ماوضحت بالمشاركه السابق فقط بوصية الوالد لولده عندما قال اذا انضمت اذهب الى فلان هذه التى حدثت لي ولذلك احببت انوه ربما يظن البعض اني غير او ابالغ ولكن يعلم الله بسريرتي ولكم تحياتي

هلا اخوي فهيد وشكراً لتفاعلك مع القصة
اما بخصوص الوصية التي وجهت لك من الوالد
فكان يجب عليك الانصات لها واخذها بعين الأعتبار
ولكن انا ما الومك فقد كان الموقف عليك صعب
والله يرحم والدك ويسكنه فسيح جناته (آمين)
تقبل احترامي وتقديري...
أبو زياد