هذه ردية بيني وبين الشاعر الحميدي بن نبات بن صنعاء الجعفري العنزي قبل أيام ....

- نايف العُمري العريب:

يا أبو عمر يوم اللقاء و القدر طاع=يوم الله اللي بالملاقا كتبها
بشكي لك احوال الهوى و أنت له راع=خابرك يا وافي عليم بخربها
يا أبو عمر حد البكاء عذب الأطباع=لأجل العيون اللي تظَل بهدبها
خطرٍ على اللي مسكنه بين الأضلاع=يكفين صوت ولا تعدّن جنبها
الصبح يقفي بالوله و التولّاع=و الليل طايل و الدموع بسببها
أخفي عن العالم سواليف الأوجاع=والوجد باين و الجروح بعطبها
أقول برحل لا دعا للحزن داع=يا أبو عمر و النفس ما أحدٍ غصبها
لا ضاق صدري قمت احزّم بالأمتاع=و إليا تذكرته نكست لعربها
يا أبو عمر مرباعها كان مرباع=واليوم خيمة مع بقايا طنبها
ودلال مرمية ولا نور وشعاع=والنار من مبطي رمادٍ لهبها
ما أحدٍ رماني بالهوى جيت بطْواع=كنت أحسب إن القلب ياخي كسبها
مشاعري و الشوق صارن له أتباع=والروح علّت به إلى آخر رتبها
خطرٍ على قلبٍ شرى الحب ما باع=و خطرٍ على روحٍ يبالَغ عتبها
و الشور من عندك على عشق و وداع=و أبي تحل الحال تقوى نشبها
هي راس مالي و اللقاء كل الأطماع=ويلي على أدري ويش ربي كتبها

- الحميدي بن صنعاء العنزي:

حي الذي مرسل جزيلات الإبداع=اللي حبكها ثم ليّه ندبها
هلا هلابه عد ما هب ذعذاع=و اعداد برقٍ بالسحايب نصبها
و يشكي علينا الزين ممزوج الأنواع=عسلوجةٍ يا حظ من هو طلبها
أوصافها ما تنذكر كله أرواع=تقتل سليم البال يا من قربها
كن العسل مغروس ما بين الأصباع=و المسك و العنبر مكاسر وهبها
نايف عليها محترق حيل ملتاع=كزّت على قلبه حمايم طربها
من حبّها ما كن مشيه مع القاع=يوم يتخيّل زولها في ذهبها
من سبته نثّر على الخد الأدماع=و نفسه عن الهزلات قام و ودبها
قبلك لعب بي ناعس الطّرف سباع=و لا زلت أعاني من قناها و عنبها
قلبي وقع له يا فتى الجود مرتاع=و النار شبّت دون تضرم حطبها
و راع الهوى يالقرم ما هو بسمّاع=عذاله الغالين يقهر حجبها
بصفكم ما عاد بالوضع مهزاع=بالجاه و الوجاه شفنا بحسبها
و حنّا معك بالصاع و المد و الباع=حدّد لها و تشوف من هو حضبها
نزمي لها مع كل مدخل و مطلاع=و إن طوّل المشوار نحضر حدبها
ما ألوم مثلك بالهوى مهما ذاع=و لا كل شيهانة على ما تحسبها

تحياتي للجميع:

أخوكم/ نايف العُمري( العريب ).

صح لسانك أخي نايف ولسان الشاعر الحميدي بن صنعا على هذه الإبداع وما قصر بن صنعا بفزعته حيثه ثنا وإنتخى عندك وعز الله إنه من أهلها ولا غريبه عليه وأنت تستاهل ..

والله يلحقك مرادك ومرجاك وإن شاء الله نحضر عرسك يالبنآخي ..

وأللي قلبه من العشق خالي مثل الخرابة أللي ما ذكر حيٍ سكنها ..

أشكرك أخوي بن دوهان على المرور الراقي ... وما قصرت وآمين الله يجزاك خير

و ابن صنعاء كفو بيض الله وجهه ... و انتم يالسبعة خوالي ما يحتاج ....

تحياتي لك و لمرورك العطر ...

صح لسان الشاعرين نايف العمري والحميدي بن نبات على هذه الروائع وبالتوفيق

صح بدنك يا أبو مشعل ....

ما يحتاج أنت راعي الجزلات .... و ما بعد قولك قول ...

تشرفت بمرورك الرائع .... و لا تحرمنا تواجدك ...

صح لسان العمري ولاهان ابن صنعاءمحاورة جيدة هل تسموحون باالمجاراة؟

صح بدنك يالغاآلي ... ومشكور على المرور ...

من عندي سامح لك انا ..... و ابن نبات خله علينا ,....

أبد جارهن .... اضافة جيدة ... وننتظر ...

تحياتي