شيخ القصيد وعميٰـده
اهـداء الى الشاعر والاديب
مشعل عسام التريباني .

ســـلام ياشــيخ. القصيـد وعـمـيـده = مثل القمــر في ظلمــة الليـل وهّـــاج
العــلم غــانم والهقــاوي بعـيــده = وكـلً يقـول ونعــم واشـهـوده افـواج
مشعل مـع الشعار عـالي رصـيـده = مثـل البحـور اللي تـلاطــم بالامـواج
نعـم الصـديق. اللي علـومه فـريـده = عـدً غٰــزير عــذب كـ عيــن هــداج
اشــهد شــهـادة حـق واثنـي وازيـــده = قـول وفـعــل ماهـي سـوالـيف هــرّاج
بالنصـح والحكمه تميّـز قصيــده = وبلسم جروح اللي شكى الهـم واعـلاج
قـيفــان لاهــل الـذوق تـاتـي مفــيــده = مثـل الـذهب يطـرد فـقـر كـل محتـاج
وشــرواه جعــل اللـي خـلقــنا يـزيـده = خيـر وتقـى وايمـان والصـبر منهـاج
وصلــوا على المختــار صفــوة عبيده = صلـوا عليـــه اعــداد مــا داج دواج

محمد بن سوعان الربيّع .
........................................
رد الشاعر مشعل عسام بهذه الابيات
حي البيـوت اللي لفـتني جديـده = من عـيلمن جمه مثل بير هـداج
ابـو. فهــد حلــو القوافي يجيـده = يلقط درر محار من وسط الامواج
شاعر علـم وابيات شعره فريده = له في جزيل الشعر مسرا ومعراج
شره على عوب البيوب العنيـده = حرن مضارب مخلبه تبهج ابهاج
عريب ساسـن والنوايا حميده = غيثن بروقه بالدجا تلعـج العــاج
من روس قومن ماتمـد الزهيـده = مداتهـم فيهـا شــفا النفس واعلاج
هلا الفضيه بالليـال الزهيده = يـوم الزمان اللي به اذلال واحراج
وهــلا الفـعـول البينات المفـيـده = واهـل البيوت اللي للاجــواد مدهـاج
امجــادهــم موروث جـــد لحفيــده = يبنون للامجـــاد جدران واســـــياج
وليا نشــب ريــق الردي في وريــده = مــداتهــم تمــلا الحقـايـب والادراج
مشعل عسام التريباني

صحة السن الشاعرين على هذا الأبداع وشاعرنا الفاضل محمد بن سوعان الربيّع دائماً يكون له أصدقاء من خيرة الرجال من شتّى القبائل ولا يصادق ألا النخبة وهو دائماً يعبّر عن شعوره نحو صديقة ويثني على من يستحق الثناء وشكراً له على استمرار نشر هذه القصائد الجزلة في موقعه موقع قبائل ربيعة عامه وعنزة خاصة

شهادتك فخر واعتزاز لي
سلمت من كل شر استاذنا واديبنا المتألق دائماً
ربي يحفظك ويزيدك من نعيمه
لاهنت يابو مشعل ...