السلام عليكم ورحمة الله وبركاته

هذه قصيدة قالها شيخ عنزة الشيخ مشعان بن مغيليث بن هذال ، ومناسبتها ان ماجد بن عريعر امير بني خالد طلب من شيخ عنزه الرجوع الى نجد بعدما نزحت قبيلةعنزه الى العراق وسوريا بحثأ عن المرعى والمكلأ الطيب
وبالفعل استجاب ابن هذال ورجع الى نجد حيث موطن عشيرته الاصلي

يقول الشيخ مشعان بن هذال

يالله بتصريـف الهبايـب والادوار

شانك عسى تصريف شانك لنا خير

يالله ياعالـم خفيـات الأســرار

يامعتني بالخلـق والـي المقاديـر

قلته ونوم العين عن جفنها طـار

والقلب كنه فوق حامي المجاميـر

وهلت دموع العين من شوفها الدار

سكانها الأجنـاب هـم والبقاقيـر

من عقب ما حنا بها مثـل الازوار

نامر وننهي نحمي الجـار ونجيـر

حامينها في لابة تسقـى الامـرار

عدوهم مـا يحتسـب بالمخاسيـر

ولولا شفاتى فيك يا نجد ما صـار

أنادي نذيرات الهواجيـس ونذيـر

وندير حيـلات بالاريـا وتبصـار

وارجي من الباري عساها مسافير

ولابـد ماناتـى لا بـانـت زوار

باسلاف عجلات تعدى المظاهيـر

يهومن هومات بعيـدات واعسـار

وكم ذيرن من واحد ما بعـد ذيـر

كم جن للعـدوان غـرات وجهـار

والى انتون كم يسبقن من معابيـر

ظعايـن حطـن مالـك بسنجـار

وبنن على الخابور زين الدواييـر

تواهلن الزور حصـن لهـن كـار

ومن البطين الى الرها والمعابيـر

نامر وننهى ما نـداري بهـا ادوار

ونهدي العاصى بخسر ومخاسيـر

ومرن على الشنبل وحطن لهن كار

وخذن خضـرات بسيـف وتدبيـر

هم انتون مع كفـة الشـط حـدار

هم انتحن مع روس هاك العناقيـر

واقفن وكالن من شثاثا بالاسعـار

وحطن لملوم المسمـى مصاديـر

وقطع ينوون الخطايـط بالاقفـار

يطيرن جيشان الحباري المخاميـر

وخلن فوق الشبك عج الرمك طار

واحلو هاك اليـوم خـز المغاتيـر

وحطن على ورد الدجاني لهب نار

وغدوا بها الريلان مثل المداويـر

وابا ذراع اصبح مقيم على الـدار

وقطع حلال المحمرة والمساميـر

وشدن وحطن الثمانـى بالايسـار

وخلن على المطران مثل المعاصير

باغي عليهم جاري مثل ما صـار

ذبح الشفايـا والغنـم والمظاهيـر

كسيـرة ماقـط عـدت بالاذكـار

وبهـا القلايـع كنهـن الخنازيـر

وفهدن بالجبر وداسـن بالاشـوار

وجاهن كتاب من زبون المقاصيـر

من ماجد بن عريعر حر الاوكـار

يقول وليت داركـم يـا المناعيـر

وجيناه مثل السيل طمام الاوعـار

ليما غدوا عنه البـوادي شعاثيـر

رفاقته واللـي حذانـا لهـم جـار

وحنا عليهم نحمي الجـار ونجيـر

وصحنا عليهم صيحة تجلى الامرار

من ابواب للحير السبايـا مقاديـر

أولاد عم وعندنـا غيرهـم جـار

وشيخ لنا عنـده جـلال وتقديـر

وحنا شباة الحرب وان شبت النـار

وتفازعت بين الجموع المشاهيـر

وحنا هل الجمع المسمى إلى سار

مركاضنا يشبع به السبع والطيـر

وصلاة ربي عد ما بالهـوى طـار

وعد ما وردن ظمايا علـى البيـر

شيخه القصيد