بيـت الشرف والكرامـه
------------------------------
يابيـت . يابيـت الشــرف والـكــرامـه = يالـيـتـها يـابيـت مـا اقـفـــت لـيالـيـك
اقـفٰـا معـك يـابـيت معـنى الشــهـامه = ولا عــاد تـذكــر بالمـجالس طـواريـك
ولا عٰـاد لـك مــبنى بــرأس العـدامـه = ولا عٰـاد بـه طــرشً وخـيـلً حـوالـيٰك
ولا عـاد ضـوّك يشـتعــم فـي ظـلامـه = ونجـــرً ينــادي وده الظـيف يـلــفيـك
اقـفيـت عـنــا رافــقــتــك الســـلامـــه = اصبحت ماضي واكثـر الناس ناسـيك
وعـيـنً بكـت لـك مــا عليـهـا مـلامـه = وكل ابـلــجً يـا رمـــز الاجــٰواد يبكيـك
يبكي عـلى الشـيخان وأهل الزعـامـه = اللــي تحــل المعـضــله والشـــرابيٰـك
اللــي عـلــٰى خٰـد التــواريــخ شـــامـه = قبٰل ان يجي وقت الضعٰوف الصعاليك
وقبـل الـدجـاجٰــه والـثـعـل والنـعــامه = قبـــل الــذي مـاجاب لا ذي ولا ذيــك
مـتــربـعـيـٰنً فٰــــوق ذروة سٰـٰـــنـامٰـه = هـذا الـوكـاد اللـي تـدوّن ابمــاضٰيــك
مجـدك تـرك عبر التـوارخ عــلامـــه = بصمٰـة شرف يــا بيــٰت تبقى تباريـك
وانـت الــذي بالنـفـس عـالـي مقـامـه = ولــو ابـعـدت يابيـت عنـا مشــاحـيـك

محمد سوعان الربيّع .....

صح لسانك يا أخ محمد ولاشك أن الزمان تغيّر وكل زمان له رجال وقد قلت يوم ما لأحد المشايخ ( انتم لست شيوخ ) قال : وش حنا ؟ قلت ( أنتم عيال شيوخ ) قال : وعيال الشيوخ ماهم شيوخ ؟ قلت : جرّب أبوك رحمه الله عندما يأمر قبيلته بالغزو أو بالرحيل أو بالحرب أو بالصلح ما يتأخر أحد عن شوره وحالياً انتهت الحرب والغزو ولكن أنت ارسل لقبيلتك وقل ترانا غداً رحيل وأنظر من يطيعك فضحك وقال والله أول من يعصاني أهل بيتي حيث يقولون وين تبي تودينا عن بيتنا فقلت بقي عندكم الوجاهه والمجد الذي ورثتموه يحتاج حمايه وعليكم استخدام الوجاهه عند المسئولين لصالح القبيلة وعند القبيلة لأصلاح ذات البين وعليكم عدم الكبر والغطرسة والتعالي وعليكم التواضع لصغير القبيلة وكبيرها وتقدير الرجال الذين لهم دور بالقبيلة وعدم الغيرة من الذي يوفق من القبيلة في مال أو منصب أو جاه لأن الناس تغيرت وإذا لم تكسبون الرجال بالصفات الحميدة فأن الناس يقدرونكم على تقدير جدودكم وهكذا فقالوا الحضور صدقت
والآن يا أخ محمد الزمان تغيّر والرجال ثلاثة أنواع ( ساحق وماحق ولاحق ) فالساحق هو الذي يرتفع شأنه أعلى من جدوده ويحصل على مجد يسحق مجد أجداده والماحق هو الذي يرث مجد ثم يمحقه أما بضعف أو في تهاون وخمول واللاّحق هو الذي يمسك منزلة جدوده فلا يتقّدم عليهم ولا يتأخر عنهم وأقول الله يعينك فأنك من الذين يعانون من ظروف ونسأل الله أن يزيل الغمّة ويفرج هم المهمومين

لاهنت اخوي واستاذي الكريم ابو مشعل
ومنكم نستفيد ..... صدقت وكلامك درر
ولا عندي أي تعقيب على ما قلت
تقبل خالص مودتي وتقديري ..... لاهنت