اقتباس : المشاركة الأصلية كتبت بواسطة الرجال العنزي [ مشاهدة المشاركة ]

......... تسلم وصح لسانك .....

صح بدنك اخوي العنزي

الأخ محمد شكر الله لك وجزاك الله خير ولا عليك زود ونحن مكملين لبعضنا وأي مساس بالقبيلة فهو يعني الكبير والصغير ولكن بعض القوم مع الأسف يتصدى للقريب ويترك البعيد وعلى هذا المقصد قلت بعد المعاناه :

بسم الولي محيي الجذوع الهـميـده *** يطـلع نمـاهـا عـقـب مـاهـي جمـاده
بـأمـره نصـر موسى وحطم طريـده *** وبأمـره نطق عيسى وهوفي مهاده
رب المـلأ يـبـدي العــبـاد ويـعــيـده *** ويحـيـيـه مـن بعـد الفـنـاء والإبـاده
الـواحـد الـلـي دبـرت الـكـون بـيـده *** محصي جميع الخلـق يعلـم أعـداده
الـعـبـد خـلاق الـخــلايــق شـهــيـده *** يـعـلم بـخـافـي غـايـتـه وأعـتـقـاده
يـدري بـمـكنون السـدود الصمـيـده *** ويـكشـف خـوافـي مـا يـكـنه فـواده
هـو اللطـيـف الـلي يـروف بعـبـيـده *** ومــا قـدره بـالـكـون لـه فـيه أراده
يـا مـن سـمـاه بـلا ركـايــز يـشيـده *** وأرضـه جعـل شم الرواسي أوتـاده
يـا خالـقـي تـجعـل اخـطـانـا سديـده *** عسى طـريـق الحـق نـتـبع أرشـاده
درب الهـدى نسلـك مسـاره وسيـده *** ودرب الضلالـة نبتعـد عـن قصـاده
يـا رب عـفـوك يـوم نشـر الجـريـده *** يـوم الجـوارح مـا تـكـن الـشـهـاده
يـوم البـشـر يـكشـف ملـفـه وقـيـده *** ويبين لـه ربـح العـمـل مـن كسـاده
الكـل يجـني مـن غـرايـس حصيـده *** كــانــه بــذر ريـحــان ولا كــــداده
ومن لا جعـل صالح أعماله رصيده *** مـا ينـتـفـع مـن ثـروتـه وأقـتصـاده
الـعـبـد لـو طـالـت سـنـيـنـه مـديـده *** يـنـقـاد لـحـتـوف الـفـنـا بـالـقـــلاده
يـردم عـليه من الصفـايـح نضـيـده *** وتصبح اعـظامـه بالضرايح رمـاده
الـعــمـر دورات الـلـيـالـي تــبــيــده *** وسيـف المنايـا مـا يضبـه أغـمـاده
والقصر لو يشمخ على ساس ميده *** لا بـد لـو طـال الـزمـن مـن هـــداده
ومـن عـاش بالدنيـا حياتـه سعـيـده *** يـرفـل ويـنعــم بـالـهـنـا والسـعـاده
لا بـد تـقحـط عـقـب ما هي رغـيـده *** وتـوريـه لـوعـات الـكـدر والنكـاده
جـور الـزمـن فـل العـزوم الشـديـده *** ومن زام مرجـوعـه يسيـر بهـواده
مـن يعـتبـر يسمع مـواعـظ عـديـده *** تحيي الضميـر وتوقضه من رقـاده
تـب للـولي يالعـبـد قـبـل الـوعـيـده *** وأزجـر ضميرك عن غـواه وفساده
وأكبح جماح النفس عـن ما تريـده *** النـفس يـلـزم عـن هـواهـا اجـهـاده
وأبـي أنصح الـلي ملسنه فـك قيـده *** شيـن المهـاجـي بالمجـالس أيـنـاده
مـن لجـتـه يـوجـع مسامـع قـعـيـده *** مـثـل الـمـدوه فـي مـتــاه الـحـمـاده
مـدفـع لهـاتـه كـان زمـجـر رعـيـده *** يلـفـظ عـلى الخـل الموالـي عـتـاده
دائـم عـلى الصاحب عـلومه مكيـده *** حـيـثـه تـشبـث بالخطـأ مـن عـنـاده
تـغـتـر فـيـه أهـل العـقـول الهـريـده *** قـصـده يـزيّـن حـجــتـه بـالــربــاده
يـغـري شيـاطـيـن الـعـبـاد المـريـده *** ويتعـب عـلى لـوم البشـر وانتقـاده
بالـكـذب والـتـزويـر يـرسـل بـريـده *** مـع ريح نسناس الهـبـوب وبـراده
يـشـب مـا بـيـن الـرفــاقــه وقـيــده *** تـفـريـق شـوفـات الجمـاعـة مـراده
يجهـد على شضي القـلوب الوديـده *** وجـمهـور ربـعـه ما يـريـد أتـحـاده
يـحـمي بـتـلقـيـح القـلـوب الحـديـده *** والـشـر بـالـصلـبـوخ يـقـدح زنـاده
ينفح غضب قيـح الضمير وصديـده *** غيض البغيض الـلي تراثت احقاده
غـل الضغـايـن ذاب مـبـطي جـليـده *** ولا زال قـلـبـه فـي صـداه وسـواده
مـن سـار بالـبـاطـل وداج بصعـيـده *** حـظـه ضعـيـف ولايـعـتـه الـقـراده
ومـن طـب شبكات الحبايـل تصيـده *** ومـن طـاوع الشيـطـان للشـر قـاده
الشـرع قـايـم والـحـكـومـة رشـيـده *** والـلـي يـعـيـل تـوقـفـه عـنـد مــاده
سجلـت مـن فيض القريحـه قصيده *** مـن يفـهـم المقـصـود يـدرك أبعـاده
أخـتــار جـزلات البـيـوت الـفــريـده *** وأعــاف فـضـلات الـكـلام الـزيـاده
قـلتـه ومـنطـوق الخـطـأ مـا نـريـده *** غـلطـان مـن حـطه وسيلـه وعـاده
هـرج المغـالـط مـا لـنـا بـه مـفـيـده *** والقـدح مـا يفـرض علينـا أعتمـاده
مـا نـشمـت الفـاني ونجـرح حفـيـده *** نـحـط مـن دون الـذرايـع أســـداده
نـبـي الـعـلـوم الـمسـنـده والـوكيـده *** والهـرج يوخـذ صاملـه مـن وكـاده
مـادام لـتــراث الـحـمـايـل شـريــده *** نـجـمع شتـاتـه عـن دواعـي نـفـاده
مـا ودنـا يـذهـب ضـيـاع وفــقـيــده *** حـيـثـه فـخـر تركت مشايخ وسـاده
أهـل الـفعـول المسـمـلات الجـديـده *** مـن طـاب منهـم ينـتـبـونـه أجـداده
مـثـل الـحـيـود الـراسيات المحـيـده *** عـنـهـم سجـل الـعـز ثـبّـت اسـنـاده
بالعـصر اللي عسى الولي ما يعيـده *** لـهـم بـجــزلات الـفـعــايـل ريــــاده
الـلـي لـهـم عـز ومـفـاخـر تـلـيـــده *** وضــحـتـهــا لـلـي يـبــون الأفـــاده
جـمـعـتهـا مـا أريـد دخـلي تــزيــده *** ولا لـي طـمع مـقـدار حـبـة رشـاده
قصدي فخـر بأهـل الفعـال المجيـده *** نـعـتـز بـالـطـيـّب ونـذكـر أمـجـــاده
نـفخـر بـذكر أهـل الخصال الحميـده *** ونـشـيـد بـالـلـي يـستحـق الأشـاده
وكـم واحـدٍ فــن الخـطــابـه يـجـيـده *** وربـه عـطـاه المـوهـبـه والجـواده
لـكـن عــن الـلابــه أقـلامــه بـلـيـده *** مـا سـال فـي ذكـر القـبـيلـه أمـداده
والـلي تـجـاهـل خـدمـتي لـلـبـديــده *** الجـهـد يشـكـر مـا تـفـيـد الجـحـاده
يـبغـي يعـوق الـلي يـواصل فـديـده *** والمرجـلـه تـحـتـاج صبـر وجـلاده
يـفـرح بغـلطـات الـرفـيـق الـزهيـده *** يشمـت عـليـه ولا يشوف أجتهـاده
شبـحـه قـريـب ولا أهـدافـه بـعـيـده *** عينه على الصاحب سوات الجراده
جـوده عـلى خطـو القرابـه عضيده *** وأن جـت مـن الأقصين يلزم حيـاده
مـثــل الـذي يـرعـى بـدايـد لـبـيــده *** حتى سطى بعـظـم الغـوارب شـداده
الـلاش لـو يشمخ بـراسـه وجـيـده *** مالـه عـلى عصم الشوارب اعقـاده
ما هـو سليل اللي أنتخى فـي سنيده *** ولا هـو زبون الحـرد خلفت رفـاده
فعله على الكبسه ومقـرى الثـريـده *** حـتى غـدى تـشبه اخصامه افـراده
كـانـه غــيـور ودون حـقـه ولـيــده *** يـذود عـن حــد الـحـمى والـسـيـاده
لا خـيـر بالـلي مـا يـنـاطح ضـديـده *** مـا يـطـول العـمـر القصير الشـراده
وصلوا عدد رمـل الثرى فـي بريـده *** عـلـى مـحـمـد رايـة الـديــن شــاده

محمد مطر

صح لسانك وبيض الله وجهك على غيرتك لقبيلتك

------------------

ابو مشعل

صح لسانك وبيض الله وجهك ولاغرابه إنتم من يتصدى
لمن يمس القبيله عساكم بالوجود دائما ً

اقتباس : المشاركة الأصلية كتبت بواسطة حمد الضوّي [ مشاهدة المشاركة ]

محمد مطر صح لسانك وبيض الله وجهك على غيرتك لقبيلتك ------------------ ابو مشعل صح لسانك وبيض الله وجهك ولاغرابه إنتم من يتصدى لمن يمس القبيله عساكم بالوجود دائما ً

صح بدنك يالغالي ولا شكر على واجب قمنا به

اديبنا ابو مشعل شكراً على هذه الروائع التي تحاكي واقعنا في هذا الزمن

الذي شحت به الأنفس وطغى به الذكاء الثعلبي على المبادئ السامية

فأصبح البحث عن المصالح الشخصية الضيقة بديلاً للبحث عن العلم الغانم!!

قبل عشرين عاماً كتبت قصيدة متواضعة اسأل فيها!!

ليـه السـؤال يمـوت قـبـل الاجـابـه

ليـه السـؤال يمـوت قـبـل الاجـابـه

ليه النواظر تحتجب قبـل ماتشـوف

ليـه القلـم يمحـي حــروف الكتـابـه

ليه الجهل غطا على كـل مكشـوف

لـيـه الفـقـر يـرمـي كبـيـر المهـابـه

ليه الجشع يصبح فضيله ومعروف

لـيـه الفـتـى يـحـرق بـقـايـا شـبـابـه

ليه الامان يضيع في زحمة الخوف

هــذا ســؤال الـلـي حـيـاتـه كـأبــه

فاقد امـل فـي طيـة اليـأس ملفـوف

ينـقـل جـراحـه والمشـاعـر زهـابـه

هايم بصحراء مالها حـد موصـوف

اسقط مشاريـع الزمـن مـن حسابـه

مال الزمن عنده سجلات وكشـوف

واسـع خيـالـه مــن شـقـاه وعـذابـه

يشوف نور الكـون بعيـون مكفـوف

الله درك يا ابومشعل كم هي كلماتك قاموس يسترشد بها كل تاية عن الاستقامه ونظافة السريره وكم هي جمرة تكوي ضمير كل صاحب سوء حقا