وش رايك في حالتي يا ابو سلطان

العصر شفنا شوفةً تخلف الظن

شاهدت لي ناسٍ على شكل غزلان

ظبيين مرن قدمنا ويتبارن

مصورات خشوف في نظرة انسان

سبحان ربٍ يا عطالله خلقهن

اليا نظرت الزول والجسم وعيان

خطرٍ عليك من اختلاف التوازن

قرونهن شقرٍ تغذت بريحان

والمسك معهن والشمطري خلطهن

قلت اه يا ظبي الفلا فيك حيران

كيف الظبى في وسط الأوُناس يمشن

قالن وش اسمك قلت اسمي عشيان

قالن علامك تقصر الصوت وتون

قلت ابغي لكن مرافقٍ كل الاحيان

وبالليل نومي بينكن لو سمحتن

واذوق من طعم العسل بين الاسنان

في مبسمٍ ريح النفل فيه له بن

خلك في شانك وترك فلان وفلان

مالك ومال الناس عالي وطامن

لاتعترض شخص ً مع الغير شقيان

ومن راقب العالم من الهول يمحن

مطلبك يابن الناس عسرٍ ولاهان

وبعد النجوم اللي ربي اللي رفعهن

قفن وشاحن بالعبايا بالايمان

وقالن وداعاً ياابو بندر وراحن

عزي لمن مثلي من الحب هيمان

وش عاد لوني عليهن محزن

الحب قبلي يشتكيه ابن عدوان

وابن الخفاجي موتته والسبب هن

وابن سبيل والعطاوي وراكان

والقيس راح من اجلهن داخله جن

وأنا شربت من الهوا صاع مليان

شربت صاع وصاع ثم شارب ٍ طن

احترت بالحاير بكثر التفاكير

صبري قضا ماعاد عندي عزايم

ان جيت ابا أجلس وان كنت ابا سير

فكري يتعبني وانا اتعبت القوايم

عدي كسير طاح في قاعت البير

أقرش مقامه والرشا والردايم

ولاسباح ماعرف جيهت السير

دش البحر باليل والموج عايم

بغى النجاه وضيعته المعاصير

فقد حياته عقب كسب الغنايم

ولا مريض ماعرفوه الدكاتير

قالو طريح فراش ماهو بقايم

باشاعة ليزرماتبين التقارير

لو عالجوه علاجهم مايلايم

ولا سجينآ حط دونه نواطير

صدر قراره في عدة جرايم

على اللذي من حبهم كيف ابا صير

القلب غاديً من سببهم قسايم

خلى بعيد من ورى هديب وصوير

بضهيرة الصقار غرب الخرايم

ياما حلا نطت تليل الصقاقير

حزة غروب الشمس والجو غايم

وطرقت شوفي مع ذيك الحثابير

واشوف بيوت مشيده بالعدايم

وشفته قدام البيت عند المصاغير

متخصرآ بين الجلد والفطايم

ومشجرآ ثوبه من الورد تشجير

يشكنه اللي مثل بيض الحمايم

طيفه تصور لي اذا نمت تصوير

دايم يهرجلي اذا كنت نايم

ياشب قلبي شبة النار بالكير

نارآ تلضى يابسات الهشايم

مافيه يوم مر ماهني الطير

اللى على روض المحبين حايم

هذي ضروف ايامنا والمقادير

هم ٍ وغم ٍ فوق راسي تلايم

باليل انا والقلم والتعابير

سهران حتى كوهفن النعايم

صبرت حالى عن هوى النفس تصبير

ولا اطيع انا في حبهن كل لايم

نبغى وصوله لو لحقنا مخاسير

قلبي على قرب اريش العين هايم

الكبد ياسليمان عيت عن المير

كنه بشوب بحايمات السمايم

ياسمرها سمر الخشب بالمسامير

ياحشه حشت حشيش القصايم

افزع لنا بشورًوفكرآ وتدبير

يفداك عفنآ ضاريآ للنمايم

حيثك فهيم ومن رجال بهم خير

ولا الردي عن هرجته تقل صايم

نعمين وان قالولكم عزوة مطير

عساك تبقى يابن الاجواد دايم

وصلاة ربي عد خط الاساطير

على النبي اعداد ماهل غايم

ياحيف والله يالزميل أبن دلي

كان الكلام اللي وصل منك مسبوت

جانا الخبر مع واحد ٍ مرسل ٍلي

صديق منكم يمنا كان منعوت

قلت آآه عسى فيه علم ٍ يسلي

يقول لي بع الغنم وألبس بشوت

قلت الغنم به عيب يالقرم قلي

عطني دليلا ً يابن الجواد مثبوت

حيث الصحابه مع طرفها تفلي

يمشون معها بدون كزمه ولاكوت

وشف سعرها بالسوق فيها تغلي

من أقصى الخليج ألى مشاريق بيروت

وقنيتها ماقصد كثر ٍ وقلي

باغيها لياجو النشامى لهم قوت

أمفطحات ٍ بالصياني يتلي

والأزهري من فوقهن دوم مكتوت

كار النشامى يالخوي عادة ٍ لي

نبغى الفخر قبل يجي مالك الموت

وبعض المجالس مابها فايدة ٍ لي

لعابة ٍ فيها مع الهند بيلوت

لهم خواطر مكتمات ٍ تعلي

ياجيتهم تلقاهم صموت وسكوت

ماقام لو يسمع نداةالمصلي

وأذا سألته صد يمك . عقب صوت

هواي باللي مركبه جايز لي

ولاقيل بأن محركه يصرف زيوت

قيرين فيه ونطرم التنك فلي

نمشي مع البيداء مسانيد وكتوت

نركب عليه ليا بغينا نملي

أحسن من سيرة واحد ٍ يخرب بيوت

وأم العذارا ياعفات أظحك لي

ومن قبلنا قال العواجي على نوت

ياما لقيته بالغتارى تجلي

وكم ساعة ٍ قالت تفضل ولاتفوت

عيونها سود ٍ هدبه ن مضلي

وثمانها بيض ٍ تقل حب ياقوت

قلت آآه قلي ياريش العين قلي

أنا طريح من الهوا ليه وقوت

قالت لو أن تجي ديرة حولي

والصين مع باريس وديار جابوت

راع الهوا ماله طبيب ٍ يدلي

طب الهوا رص الشفايف بلا صوت

قلنا صحيح وعطني دواي يلي

حبك سلاني والحشى صار مبهوت

ياما أعقدلي بالهوا وأفتل لي

وفرقتهن فرق المعادن عن التوت

بديت بالي خالقٍ كونه اصناف

مهد النفوس وللفضيله ومرها

خلاقنا ولاسرار الأعباد كشاف

وكلٍ عمله شاهده ياحشرها

برضاك يا المعبود في كل ميقاف

اطلبك نفسي بالايمان تعمرها

ومن بعدها نبدا المثايل على قاف

من شاعر عسر القوافي سخرها

احلى من نقد الذهب عند صراف

واحلى من نبت الفياض وزهرها

حنى ادعينا لحفلت الشيخ نواف

وبدون دعوه يادرينا نحضرها

هو شيخ شمل رويل قواد الاسلاف

زيزوم قومٍ نفتخر في فخرها

ربعه هل العليا على العز وقاف

ضد العنيد ليا تنثر حمرها

لأجل المعزه جوه من كل الاطراف

ما همهم كثر متاعب سفرها

ياما قطعنا من المسافة بالآلآف

من الصبح لياما طبقه في بحرها

جياناك زياره مالنا قصد واهداف

فرصه سعيده شوفتك نعتبرها

جمع معزه مابها كل لفاف

جمع محبه لنفوس تغمرها

اخوانك حرارمرقبه كل مشراف

افعالهم بالطيب كلن ذكرها

نسل الفواز الصيرمي حسن الوصاف

نضراتهم بعيد محد نضرها

لنا الشرف لنا الفخر يا بن الاشراف

ب أرض الرياض وعسى ربي عمرها

با رض السعود اهل الشهامه والرياف

من صكته ضيم اليالي نحرها

ارض السعاده و الشهاده والأنصاف

ارض الامانه والطمان لبشره

مساجد حطولها شؤون الاوقاف

وحامين مكه للسلام تعمرها

للحق ميزان ولسيف سياف

وللصاحب احلى من هواتف مطرها

المملكه من دونها مصقلن حاف

فهد ملكنا يا ضلمت هو سفرها

وعبدالله الي مزبن كل منخاف

سلطان درع للدفاع وذخرها

وحنا خدام المملكه سر وأكشاف

وابليس يرجم في حصات نثرها

وصلاة ربي عد ما بلحرم طاف

من خاطر عشيان باسمه نشرها

يامل قلب ٍ صابه الفين لاوي

نوب ٍ يهوم ونوب تكثر شبوحي

لو اتمنى ماتفيد المناوي

كن الها في وسط صدري يفوحي

بلاي غرون في وصوله قطاوي

الصاحب اللي جادني بالمزوحي

ابشتكي لك ياعيون النداوي

حيث ان راع الحب قلبه نصوحي

دواي عندك وانت ليه مداوي

وانت اللذي بالحب تبري جروحي

وانا اللذي من ساس حبك هواوي

وانت اللذي بالحب قلبك رجوحي

وانا اللذي بالحب قلبي شقاوي

ياعل قلبك لي ماهو شحوحي

حملتني يازين هم وبلاوي

هموم عيت عن ضميري تروحي

خليتني محتار جالس خلاوي

ما عرف خسارتي من نجوحي

شفي بكم من لابسات المزاوي

يابو خديدن لون برقا ً يضوحي

لوا هني من طش عنك الغشاوي

يرقد معك بالليل ياروح روحي

وانا بقربك يالحبيب شفاوي

واللي يجيني منك ترني شفوحي

يالله ياللي كل حي ٍ يراجيك

طالبك تقبل دعوتي يوم أنا اسلك

الجود والمعبود والمد بيديك

في حكمتك ياربنا تجري الفلك

يالله تجعل عملنا دوم يرضيك

يالله عفوا رحمتك يوم نقابلك

تنحى كثير الطغى والتهاليك

يالواحد اللي لك الاعباد والملك

يالعبد ربك قادر ٍ معتني فيك

وهو اللذي بيديه آجلك وعاجلك

رزقك وعمرك محفظه عند واليك

الياظهرت من طين واحسن فصايلك

وهو اللذي ياراك بإمره يمشيك

الواحد اللي حافظك ثم مسجلك

خلاقنا من دون ريب ٍ وتشكيك

وازيح حلم@@ يوم ضاقت محايلك

خلاق بالدنيا لك متاعا ً ملهيك

وبالاخره يعرف مصيرك ومنزلك

يالعبد ربك عالم ٍ وش جرى فيك

واحذر في دنياك تخدع وتجهلك

اليارتحت دنياك تكثر بلاويك

والياقبلت تجيبها مكرة السلك

والياقست لك اطلب الرب ينجيك

ولاتفرح ان الله على الناس فظلك

وابعد عن الانذال لوهو بناخيك

مكار نكار ٍ بالرديه يحاولك

اللاش لو يكون من اقرب عوانيك

مرافقه ومعاشره دوم بخذلك

ماغار دجال ٍ بالنميمات يوديك

حكي الردى والعايزه كنها علك

لو جيت مع اتلاه ملزوم يوزيك

مهما مشيت بخاطره غير يبحلك

خلك مع اللي بالمهمه يصافيك

قرم ٍ يراعي وين مدن رحايلك

ولياغفل عن خاطرك غير يرضيك

بالطيب والعفرات دايم يعاملك

أن جيت بيته يبتهج ثم يحيك

ماهو بخيل ٍ بالوازم يزاولك

أسال مجرب والتجاريب تنبيك

ينبيك من هو مال به الدهر

تلك المتاعب والصعيبات تبكيك

بين الحلا والمر يامر ويعذلك

وخذ الحذر من وادي ٍ به شرابيك

وتجنب اللي خايف ٍ منه يزملك

واحفظ لسانك دايم ٍ وامسك بريك

وحاسب عن الاجواد وامسك فراملك

واطلب وليك عن خطاياك يحميك

والله عزيز ٍ عن بلاويك يدخلك

والدين خله من مناهج مباديك

والدك ثم والدك لوكان يزعلك

واتعب على والدك والله يهنيك

والله رقيب عن خطاياك يكفلك

واتعب على المرجله في مماشيك

وخل المراجل ساس منهج عواملك

وخل المراجل يافتى من مراميك

درب المراجل والعلا مايفشلك

وجنب عن اللي لسفاله يوديك

وحذراك تجهل والمواجيب تجهلك

وقول ابن مهلهل بالمخاليق قاديك

والدسم اللي قال قول ٍ يعدلك

وقول بركات يعلمك بالتهاليك

وقول ابن شايم للمراجل يوهلك

وقول السديري للمراجل يعنيك

ويمديك باللي جرب البر والهلك

وسنع طريقك ياجعل الرب قاديك

عسى الولي بالسنع يجزى رحايلك

ويالله صلاتك عد ماسال واديك

على النبي اعداد مالعبد يسألك

شعر / عشيان بن سليمان

ياراكب ٍ من شركته تو مفكوك

سواقها ماهمته درب الأدراك

عندك دروس الخارطه يوم مشوك

بالبوصله تفهم بها درب ممشاك

خوارطن طبلونها تشبه ا سلوك

ومحركه زرن على جنب يمناك

ماهي تايوتا ولاجمس ٍ ولابيوك

البونق صنع المشركه لاعدمناك

حديدها من صافي الصلب متروك

وعبى المخازن وانتهى عند الوشاك

تقلع كما طيرا ً تطلق من شبوك

طيرا ً شهر بالجو من عقب مشباك

طيارها اقلع من مطار بنكوك

وهبط بها بارض أنقره عند الأتراك

وغادر مطار أنقره مابه شكوك

خطرا ً عليها من الهوا قطع الأسلاك

وهد بمطار الجوف والربع حيوك

وترتاح من عقب السفر عن نواياك

وسلم على اللي يافتى الجود عزوك

واشرح لهم ماصار عندك بدنياك

وحذر عن بعض العرب لايغروك

وترا بعضهم يافتى ماهو شرواك

وحذر عن اللي حكيهم بالقفى شوك

حذراك عنهم يافتى الجود حذراك

وخلك مع الطيب لو الوقت مضنوك

اللي ليا صار مصيبة ٍ ماتناساك

والناس ترها عموق وكنوز وبنكوك

مثل الذهب مايقترب قطع الازناك

يوم ٍ يبعد بك عن الانذال ..مبروك

خلك مع الطيب اللي ليا ضقت سلاك

وجنب عن اللي بالردى يقطع صكوك

يمناك ماتجي مثل فعل يسراك

نصيحة ٍ لناس ترسم على بوك

من مايعرفها ضارب ٍ درب الاهلاك

قول بركات الهاشمي مابه شكوك

وقول ابن معيتق والجويعان يجزاك

وارجوك ياسامع هرجتي ثم أنا أرجوك

انك تفكر بالزمن لايتعداك

وين الرجال اللي بالإمجاد ربوك

فكر وحسب لزمن لايتعشاك

وترا الزمن لو طال دايم به ضنوك

يديرها رب الملا مدير الفلاك

وحافظ على لوازم امك مع ابوك

بالحج والغفران والصوم ودعاك

وبعد عن اللي بالوازم تناسوك

وخلك عزيز الشان من ساس مرباك

ورزقك على اللي بيده العرش مسموك

رب ٍ رحوم ٍ عن خطاياك ياقاك

والحر يخضع ياصار بالحبل مشبوك

مايحترك ياصار بالرجل مشباك

وجنب مجال الناس لوهم تبلووك

والصبر مفتاح الفرج عند مولاك

ولاترتخي كانهم على الحق حدوك

خلك قوي الباس للي تحداك

وقل الصحيح اللي مخاليق سالوك

وقلل كثير الهرج ون جيب طرياك

وسر القدم ون صار بالقلب داكوك

خلك مع البيدا ون القلب شقاك

ولي عنالك خله بمنزل أخوك

تقضي له اللازم على حد مسعاك

واوف الوعد لاصار الصحاب تدعوك

الناس بوعدك ياسنافي ترجاك

وخلك بشوش ٍ للمسايير ياجوك

رحب وقدم للملا حوش يمناك

اللي بيتك يافتى الجود زاروك

حذرا تلقيهم يافتى الجود علباك

تمم الواجب لو الانذال كرهوك

من جاك عزه ولي ماجاك ماغلاك

يابد عقب القرب والهرج وضحوك

لابد يذكر فعلك من بعد فرقاك

ان كان فعلك شين بالناس ..ذموك

الكل يكره قرب بيتك ومشحاك

وان كان فعلك زين بالزين ٍ وزادوك

تمشي طويل الراس لو كرهوا اعداك

والناس وصلو سطح القمر فوق مكوك

لاتراقب المخلوق ناظر للمشاك

لاتراقب اللي دونه هلاك وحوك

مايلحق الرجلين تضفي من غطاك

واحذر تملى بطنك ترا البطن عاروك

والبطن مامدح صاحبه لاعدمناك

وترا الخوي والجار لوكان سبوك

ملزوم ترفي خملته لوهي ياذاك

ونفسك تعززها عن الناس ياغووك

خلك عزيز النفس واللاش يفداك

جميع شين قدم عينيك متروك

احذر تهين النفس وابليس غواك

عمر الفتى مادام لشيوخ وملوك

المال والدنيا والاعمال تقفاك

يالله يالي في محارمك لبوك

انك تقبل دعوتي واترجاك

ترحم ضعوف ٍ خاشعين ٍ ترجوك

وانت اللذي تبهج مضلوم ٍ تنصاك

وانت الذي بيديك عقد ٍ وفاكوك

وانت اللذي ياردت تامر برضواك

تغفر لعبد ٍ تحت اوامرك مملوك

عبد ٍ عبدك ولالهم رب ٍ حذاك

تجعلنا في جنة الخلد ندعوك

في جنة الفردوس نطلب ملاقاك

وصلاة ربي عد شيكات ببنوك

على النبي اعداد ماهلل الاسماك

___شعر: عشيان بن سليمان

ياشيخ ابن شعلان جيتك من الجوف

وجيت الرياض وناصين بيت نواف

جيتك مسير يافتى الجود وضيوف

وانت اللي مثلك يكرم الضيف ياضاف

مع سلام ٍ خاتمه داخل زروف

احلى من نقد الذهب عند صراف

يابن اللي يزبن يوم على العرب خوف

يردها يوم الارياق نشاف

يوم النمش والشلف ومطاعن سيوف

يثنى وراهم ياجبى كل خواف

يخلي خصيمه دايم ٍ يطلب العوف

ولصديقه احلى من هواتيف هتاف

وانتا يابن شعلان بالفعل معروف

حر ٍ مقره في شواهيق مشراف

ماتقدم الإ للمسايير خاروف

على المعزه والمخدات ولحاف

الله يفكك من غضب كل صادوف

عساك في دنياك في حيد ورياف

اقولها ماشاقني كل هذلوف

اللي على الاجواد بالكذب بلاف

فعلك مبين نظرة العين مشيوف

ماقلتها من شان لي قصد واهداف

وصلاة ربي عد ماهب عاصوف

على النبي اعداد مامسلمٍ طاف

__شعر : عشيان بن سليمان

ياتركي ابن سعود جيتك زياره

ليه مرام بشوفتك يابن الاكرام

يامير ياللي ناجبينك زياره

زرتك الآن وقبلها زرتك العام

معرفة الإجواد ماهي خساره

لي الفخر وان سرت يمك بالإقدام

يابن اللذي بالطيب تافي شباره

سعود الكبير وبالفخر شال الإوسام

انتم اعوان الدين وانتم أنصاره

ماشين في القرأن في هدي الإسلام

وانتم رموز العز وانتم اشعاره

يا اهل الصخا والعز ياعز من ضام

انتم صقورا ً بالشوامخ أوكاره

من رادكم في سوء جعله للإعدام

طورتوا السكان بإمن وحضاره

المملكه من خيركم كلها انعام

صم الصحاري بدلت في أنهاره

هذا مشروع وذاك مشروع قدام

مزارع وعمران غير التجاره

وبل ودواجن غير مشروع الإغنام

وهذا مشروع ٍ صادرا ً من الوزاره

من غير اللي تنشره صحف الإعلام

افعولكم ماتنحصى في جداره

من كثرها ماتنحصى بروس الإقلام

نطلب من اللي حط مكه مزاره

انه يبقيكم طول الإسنين حكام

بظل المليك الفهد سرنا مساره

وانتم قياد الشعب والشعب حزام

وحنا لكم يا امير رهن الاشاره

نثبت وفانا عندكم كل الاعوام

اقولها من جد ماهي قماره

والكذب عيب ولشغاميم مثلام

وصلاة ربي عد ما اخضر زهاره

على النبي صلاة ربي بالاختام

____________

شعر : عشيان بن سليمان

سميت باسم اللي عالم خافي الاسرار

رب ٍ عزيزا ً كل حي يسيله

الواحد المعبود رزاق الاطيار

امدبر المعبود باحسن وسيله

من بعدها جبت القلم واكتب اشعار

اترك هزيل القاف واخذ جزيله

عبرت من فكري من القاف وأختار

واعرف معاني القاف يوم أن تبيله

بكتب سلام ٍمرسله لابن الخيار

بانيابتة ً بالقول عن القبيله

يستاهل التمديح من يفعل الكار

واللى اللخيمه مايجيب النفيله

ياشيخ يحشم جنابك عن العار

ياعل ايامك يالسنافي نهيله

الله يفكك من صواديف الإقدار

في جاه رب ٍ فيه حيل وحيله

تعيش ياشيخ على الطيب مغوار

يمناك بالماجود ماهي بخيله

امن الخليفه للمواجيب صبار

مثل البليهي كل حمل ٍ يشيله

نفخر بعلمك يابو محمد بالاذكار

بالذكر واللى ماقدرنا نجيله

تقبلوا سلامنا بالوفا حار

سلام مني عد وبل المخيله

واعداد مالفوا من البعد زوار

وعدد طلوع الصبح وعداد ليله

وعداد ماينبت من العشب نوار

وعداد حي ٍ فارح ٍ في خليله

حيثك عزيز وعارف كل معبار

شيخ مجرب والفعايل جليله

ماهي غريبه حشمة الضيف والجار

حيث انت ياحمد من رجال ٍ شكيله

من لابتن سكانها بخمس الاقطار

ومن وائل الكبرى حماك الدبيله

والخاتمه ياشيخ نطلبك الاعذار

وارجي السموحه كان بالهرج ميله

وصلاة ربي عد ماهلت امطار

على النبي اعداد حب وقصيله

____

شعر : عشيان بن سليمان